Sîrîrî Kaareta Eꞌmaiꞌnon Paulo Nîmenukaꞌpî Tessalônica Ponkon Pia 5:1-28
5 Uyonpayamîꞌ, îꞌ pensa Uyepotorîkon iiꞌtoꞌ weiyu eseporî ekaremekîuya eꞌpai pra man, maasa pra esepuꞌtî pra awanî epuꞌtî pîꞌ naatîi.
2 Mîrîrî epuꞌtîyaꞌnîkon morî pe Uyepotorîkon iiꞌtoꞌ weiyu manniꞌ amaꞌyeꞌ iipî warantî. Maasa pra tuipî ekaremekîiya pepîn. Tîîse inîmîkî pra tîîse aaipî. Mîrîrî warantî inîmîkî pra tîîse, Uyepotorîkon iipî pe man.
3 Mîrîrî yai tîîkoꞌmansenon pemonkonyamîꞌya taa kupî sîrîrî: —Tamîꞌnawîrî man morî pe. Morî pe koꞌmannî man îꞌ eꞌkupî pra —taa toꞌya. Tîîse mîrîrî yai kaꞌneꞌ pe toꞌ eꞌtarumaꞌtîtoꞌ wanî kupî sîrîrî. Manniꞌ wîriꞌ more yan pe tîweꞌsen moronta kaꞌneꞌ pe inîmîkîiya pra tîîse, neꞌneꞌ pe eena. Mîrîrî warantî eꞌtarumaꞌtîntoꞌ wanî pe man. Anîꞌ esuwaꞌka eserîke pra awanî pe man.
4 Tîîse uyonpayamîꞌ, amîrîꞌnîkon innape Jesus kuꞌnenan koꞌmantoꞌ awanî, manniꞌkan imakuiꞌpî kupî pîꞌ tîîkoꞌmansenon koꞌmamî warantî pra. Mîrîrî yeꞌnen Uyepotorîkon iipî yai, aawanmîraꞌnîkon awanîkon pepîn, inîmîkî pîꞌ aakoꞌmamîkon yeꞌnen. Amaꞌyeꞌ iipî warantî pra aaipî.
5 Tamîꞌnawîrî amîrîꞌnîkon koꞌmantoꞌ wanî Paapa pemonkono pe aꞌka ta tîîkoꞌmansenon pe. Mîrîrî yeꞌnen morî pe aakoꞌmamîkon, morî ayeserukon tîrumakai pra. Ewaron ta tîîkoꞌmansenon paakokon koꞌmamî warantî pra koꞌmannîtoꞌ wanî. Imakuiꞌpî kupî pîꞌ koꞌmannî pepîn.
6 Mîrîrî yeꞌnen uurîꞌnîkon wanî eꞌpai pra man manniꞌkan tîweꞌnasanon warantî. Maasa pra tîweꞌnasanon wanî inîmîkî toꞌya pra. Inkamoro warantî pra uurîꞌnîkon eꞌpai wanî. Tîîse enpen moropai tîwarî ipîꞌ eꞌnîpaiꞌnîkon.
7 Inkamoro tîweꞌnasanon wetun ewaron yaꞌ. Moropai ewaron yaꞌ nîrî teetînsenonya tîwukukon enîrî teetînmîkonpa.
8 Tîîse mîrîrî warantî pra uurîꞌnîkon eꞌpai awanî. Maasa pra ewaron yaꞌ tîîkoꞌmansenon pepîn uurîꞌnîkon, Jesus nîmîkî pîꞌ koꞌmannî yeꞌnen. Mîrîrî yeꞌnen innape ikupî pîꞌ koꞌmannîpaiꞌnîkon. Paapa saꞌnama pîꞌ koꞌmannîpaiꞌnîkon, moropai inîmîkî pîꞌ koꞌmanpaiꞌnîkon. Manniꞌ suraraya tîpon saꞌman moropai tarakko yekaꞌma teeyatonya tîwî namai, mîrîrî warantî Makuiya utîꞌkakon pepîn maasa pra epuꞌtî, Jesusya upîikaꞌtîꞌnîkon iwinîpai, innape ikuꞌsaꞌ wenai moropai Paapaya usaꞌnamakon wenai.
9 Maasa pra Paapaya uurîꞌnîkon menkasaꞌ pra man uurîꞌnîkon tarumaꞌtîpa kaiꞌma. Tîîse umenkaꞌpîiyaꞌnîkon Uyepotorîkon Jesus Cristo wenai eꞌpîikaꞌtîntoꞌpe.
10 Mîîkîrî Cristo saꞌmantaꞌpî uurîꞌnîkon ton pe, tîîpia koꞌmannîtoꞌpe. Îꞌ pensa tuipî yai, aaipî enen eꞌnî tanne, mîîwîni pra awanî ya, isaꞌmantaꞌsan pe eꞌnî tanne aaipî ya, îꞌ waniꞌ awanî pepîn. Iipia koꞌmannî.
11 Mîrîrî yeꞌnen atausinpatî mîrîrî pîꞌ moropai tiaronkon meruntîtannîꞌtî, mîrîrî ikupî pîꞌ aakoꞌmamîkon manniꞌ pîꞌ.
Tiwin Konoꞌpî Pe Toꞌ Panama Pauloya.
12 Uyonpayamîꞌ, esatî annaya apîꞌnîkon kureꞌne. Manniꞌkan akoreꞌtaꞌnîkon teesenyakaꞌmasanon Uyepotorîkon nîmenkaꞌsan ayenupanenkon pe, apanamanenkon pe, inkamoro namatî.
13 Inkamoro ayenupanenkon konekatî morî pe. Moropai toꞌ saꞌnamatî akoreꞌtaꞌnîkon toꞌ esenyakaꞌma wenai. Akoꞌmantî tîwanmîra tiaronkon pokonpe.
14 Inîꞌ panpîꞌ esatî annaya sîrîrî see warantî: Manniꞌkan pemonkonyamîꞌ esenyakaꞌmakoiꞌkon pepîn panamayaꞌnîkon yuꞌse anna wanî, enyaꞌne toꞌ wanî namai. Moropai eranneꞌ pe tîweꞌsanon meruntîtannîpîyaꞌnîkon yuꞌse anna wanî, eranneꞌ pe toꞌ wanî namai. Moropai aꞌtuꞌmîra tîweꞌsanon pîikaꞌtîyaꞌnîkon yuꞌse anna wanî, imakuiꞌpî kupî toꞌya namai. Moropai tamîꞌnawîronkon pokonpe morî pe awanîkon yuꞌse anna wanî teekoreꞌmai pra toꞌ pokonpe. Tîîse morî pe eeseurîmakon toꞌ pokonpe.
15 Imakuiꞌpî kupî tiaronya ya awinîkîiꞌnîkon, itenta imakuiꞌpî kîꞌkuꞌtî. Tîîse morî pe aakoꞌmamîkon yarakkîrî yuwatî. Moropai tamîꞌnawîronkon yarakkîrî morî pe eꞌtî.
16 Taatausinpai akoꞌmantî.
17 Eepîremakon pîꞌ akoꞌmantî tîwîrî, tîrumakai pra.
18 Moropai “morî pe man Paapa”, kaꞌtî tamîꞌnawîrî aapiaꞌnîkon tuiꞌsen pîꞌ. Mîrîrî taayaꞌnîkon yuꞌse Paapa wanî, Jesus Cristo pemonkono pe awanîkon yeꞌnen.
19 Morî Yekaton Wannî esenyakaꞌmatoꞌ akoreꞌtaꞌnîkon kîꞌmaꞌtanîꞌtî.
20 Paapa maimu ekaremeꞌnenan nekaremekî kîsewanmarîtî.
21 Tamîꞌnawîrî anetaꞌpîkon itekare yakoꞌmenkatî. Oꞌnon wanî morî pe tîweꞌsen pe, mîrîrî morî epuꞌtîyaꞌnîkon ya, mîrîrî yarakkîrî akoꞌmantî.
22 Moropai imakuiꞌpî pe tîweꞌsen epuꞌtîyaꞌnîkon ya, mîrîrî yuꞌse pra eꞌtî.
23 Manniꞌ Paapa tîwanmîn esaꞌ pe tîweꞌsenya akupîkon yuꞌse wai imakuiꞌpî ton pra. Moropai ayekatonkon moropai ayewankon moropai ayesaꞌkon kupîiya yuꞌse wai morî pe Uyepotorîkon Jesus Cristo iiꞌtoꞌ weiyu yaino ton pe.
24 Mîrîrî kupî mîîkîrî uyannokontîponya, îꞌ taasaꞌ tîuya yawîrî. Maasa pra seruꞌyeꞌ pepîn mîîkîrî.
25 Uyonpayamîꞌ, anna pona nîrî epîrematî.
26 Uyonpayamîꞌ, umaimu man amîrîꞌnîkon pia.
27 Esatîuya sîrîrî tamîꞌnawîronkon uyonpayamîꞌya eta tanne, sîrîrî kaareta erenkayaꞌnîkon yuꞌse wai ituꞌse Uyepotorîkon wanî yeꞌnen.
28 Morî pe Uyepotorîkon Jesus Cristo eꞌtoꞌ wanî aapiaꞌnîkon yuꞌse wai. Mîrîrî neken.
