Sîrîrî Kaareta Itakon Iteꞌka Pe Paulo Nîmenukaꞌpî Coríntio Ponkon Pia 1:1-24
1 Uurî Paulo, Jesus Cristo naipontîꞌpî ituꞌse Paapa wanî yeꞌnen. Uurîya sîrîrî kaareta menuka sîrîrî uyonpakon Timóteo uupia tîîse. Sîrîrî kaareta yarimauya aapiaꞌnîkon innape Jesus kuꞌnenan Coríntio po tîîkoꞌmansenon pia. Moropai tamîꞌnawîronkon Grécia pata poro tîîkoꞌmansenon Paapa pemonkonoyamîꞌ pia nîrî yarimauya sîrîrî.
2 Paapa pîꞌ esatîuya moropai inmu Jesus Cristo pîꞌ. Tamîꞌnawîron morî pe tîweꞌtoꞌkon moropai tîwanmîn tîîtoꞌpe toꞌya aapiaꞌnîkon. Sîrîrî warantî esatîuya Paapa pîꞌ moropai Uyepotorîkon Jesus Cristo pîꞌ.
Pauloya Paapa Pîꞌ Morî Pe Man Taa
3 Uyepotorîkon Paapa, Jesus Cristo yepotorî moropai itun, mîîkîrî yapurîpaiꞌnîkon man. Maasa pra mîîkîrî uyunkonya uurîꞌnîkon saꞌnama koꞌmannîpî. Moropai mîîkîrî wanî upîikaꞌtînenkon pe.
4 Mîîkîrîya tamîꞌnawîron uurîꞌnîkon esewankonoꞌmatoꞌ winîpai upîikaꞌtîkon. Moropai mîrîrî upîikaꞌtîtoiꞌyaꞌnîkon ke, manniꞌkan uurîꞌnîkon warantî, teesewankonoꞌmai tîweꞌsanon pîikaꞌtîtoꞌpe, manniꞌ iwinîpai unapisîꞌpîkon ke.
5 Innape puꞌkuru man, eꞌtarumaꞌtîn Cristo pemonkono pe eꞌnî yeꞌnen. Tîîse eꞌtarumaꞌtîꞌnîkon ya, iwinîpai eꞌpîikaꞌtîntoꞌ yapisîꞌnîkon.
6 Anna eꞌtarumaꞌtîtoꞌ wenai amîrîꞌnîkon eꞌpîikaꞌtî. Maasa pra anna pîikaꞌtîꞌpî Paapaya, amîrîꞌnîkon pîikaꞌtîtoꞌpe annaya, innape ikupîkonpa. Mîrîrî yeꞌnen amîrîꞌnîkonya nîrî aweꞌpîikaꞌtîtoꞌkon yapisî, annaya yapisîꞌpî warantî, aweꞌtarumaꞌtîkon yapîtanîpîkonpa.
7 Mîrîrî yeꞌnen epuꞌtî pîꞌ anna man, anna eꞌtarumaꞌtîꞌpî warantî aweꞌtarumaꞌtîkon ya, Paapaya ayausinpakon, eesewankonoꞌmakon winîpai, anna yausinpaꞌpî tîuya warantî.
8 Uyonpayamîꞌ, îꞌ kaiꞌma anna yarakkîrî eꞌkupîꞌpî Ásia pata po epuꞌtîyaꞌnîkon eꞌpai man. Kureꞌne anna eꞌtarumaꞌtîtoꞌ wanîꞌpî, yapîtanîpî annaya yentai. Anna saꞌmanta yonpaꞌpî mîrîrî wenai.
9 Mîrîrî epuꞌtîꞌpî annaya, anna wîîtoꞌpe awanî. Tîîse mîrîrî eꞌkupîꞌpî anna yenupatoꞌpe. Anna warîrî anna eꞌpîikaꞌtîtoꞌ yuwa annaya namai, tîîse Paapa winîpai anna eꞌpîikaꞌtîtoꞌ ton epotoꞌpe annaya, manniꞌ isaꞌmantaꞌsan pîmîꞌsaꞌkanen winîpai.
10 Mîîkîrîya anna pîikaꞌtîꞌpî mîrîrî nariꞌ saꞌmantantoꞌ winîpai. Moropai epuꞌtî pîꞌ anna man, tîwîrî anna pîikaꞌtî pîꞌ aakoꞌmamî,
11 amîrîꞌnîkon epîrema koꞌmannîpî tanne, anna pona. Mîrîrî warantî arinîkon epîrematoꞌ yuuku Paapaya. Moropai tuꞌkankonya “Morî pe man” taa Paapa pîꞌ, morî pe anna pîikaꞌtîiya wenai.
Pauloya Coríntio Pona Tuutîtoꞌ Teseru Moꞌtanîpî
12 Anna atausinpatoꞌ man kureꞌne, maasa pra tiaronkon winîkîi yairon kupîꞌpî annaya wenai. Moropai inîꞌ panpîꞌ amîrîꞌnîkon koreꞌta anna koꞌmanpîtîꞌpî seruꞌ pe pra. Anna esenumenkatoꞌ wanî yairî epuꞌtî pîꞌ anna man, anna yewan yaꞌ. Maasa pra ipîkku pe epuꞌnenan esenumenka yawîrî pra ikupîꞌpî annaya. Tîîse morî pe anna pîikaꞌtîꞌpî Paapaya wenai, ikupîꞌpî annaya.
13 Sîrîrî anna nîmenukaꞌpî pîꞌ esenumenkatî. Îꞌ pensa erenkayaꞌnîkon yai, aronne etayaꞌnîkon, moropai îꞌ taatoꞌpe awanî epuꞌtîyaꞌnîkon. Tiaron pe awanî pepîn.
14 Tiaronkon amîrîꞌnîkon koreꞌtawonkonya epuꞌtî, yairî eseurîma. Mîrîrî warantî tamîꞌnawîronkon amîrîꞌnîkonya epuꞌtî yuꞌse wai. Moropai îꞌ pensa Uyepotorîkon Jesus Cristo iiꞌtoꞌ weiyu erepamî yai, anna, ayenupatîponkon pîꞌ aatausinpakon. Mîrîrî anna nîkupîꞌpî wenai anna pîꞌ aatausinpakon, apîꞌnîkon anna atausinpa manniꞌ warantî.
15 Mîrîrî warantî epuꞌtîuya yeꞌnen, eꞌmaiꞌ pe uurî esenumenkaꞌpî amîrîꞌnîkon eraꞌmapîꞌse uutî pîꞌ. Mîrîrî uutîsaꞌ yai, amîrîꞌnîkon atausinpa itakon teꞌka pe.
16 Maasa pra esenumenkaꞌpî Macedônia pona uutî pe amîrîꞌnîkon aneraꞌmapîꞌpai wanî pîꞌ. Moropai esenumenkaꞌpî ennaꞌpo yai, inîꞌrî amîrîꞌnîkon poirî iiꞌpai wanî. Moropai mîrîrî yai, pîikaꞌtînan ton yuꞌse wanî, Judéia pata pona ennaꞌpo yai.
17 Îꞌ kaiꞌma yairî uurî esenumenkatoꞌ kupîyaꞌnîkon pra naatî? Manniꞌ seꞌ tapairî teesenumenkasen esenumenka warantî uurî esenumenka pepîn. Taiya mîîkîrîya inna tîîse teseru miakanmaiya tiwinarî moropai taiya kaane. Moropai tîmaimu manaꞌpokaiya mîrîrî pe rî. Mîrîrî warantî uurî esenumenka pepîn.
18 Îꞌ taꞌpîuya amîrîꞌnîkon pîꞌ wanî pepîn mîrîrî warantî. Unekaremekî wanî yairon pe, inna moropai kaane tauya pepîn mîrîrî pe rî. Tîîse yairon pe puꞌkuru Paapa eseurîma warantî, eseurîma.
19 Maasa pra Jesus Cristo, Paapa munmu pîꞌ anna eseurîmaꞌpî amîrîꞌnîkon koreꞌta. Silas moropai Timóteo moropai uurî eseurîmaꞌpî, ekaremekîꞌpî annaya. Taasaꞌ annaya pra man —Yai pra innape awanî, kaane kaꞌrî mîrîrî pe rî. Moropai mîrîrî warantî Jesus Cristoya tîmaimu manaꞌpokaiya pepîn nîrî.
20 Maasa pra Cristo nîkupîꞌpî wenai, epuꞌtîꞌnîkon tamîꞌnawîrî îꞌ kupî tîuya taꞌpî Paapaya pena, ikupîiya. Jesus Cristo pemonkono pe eꞌnî yeꞌnen ikupîiya innape. Mîrîrî wenai —Innape man, mîrîrî warantî man —taa uurîꞌnîkonya Paapa pîꞌ, kureꞌne upîikaꞌtîiyaꞌnîkon yeꞌnen.
21 Maasa pra mîîkîrî Paapaya Cristo pemonkono pe anna koꞌmamî, moropai amîrîꞌnîkon koꞌmamî emapuꞌtî. Moropai mîîkîrî Paapaya uurîꞌnîkon menkaꞌpî tîmîrî pe eꞌnîtoꞌpeꞌnîkon.
22 Mîîkîrî koꞌmamî uyesaꞌkon pe. Uyesaꞌkon pe tîwanî wenai, mîîkîrîya uurîꞌnîkon yekiꞌkaꞌpî tîmîrî pe eꞌnî ekaremeꞌnen pe. Uyewankon yaꞌ Morî Yekaton Wannî tîîsaiꞌya, tamîꞌnawîrî îꞌ tîrîuya taꞌpî tîuya tîrî Paapaya ekaremeꞌnen pe. Mîrîrî yeꞌnen uurîꞌnîkon esenkuꞌtîn pepîn.
23 Paapaya epuꞌtî pîꞌ man, îꞌ kaiꞌma uurî esenumenkatoꞌ wanî. Sîrîrî tîpose uutî pra wanî Coríntio cidaderî pona akoreꞌtaꞌnîkon, maasa pra amîrîꞌnîkon aneppeꞌnîꞌpai pra awanî yeꞌnen.
24 Mîrîrî tauya pepîn, amîrîꞌnîkon yaipontînen pe îꞌ yapurîkonpa. Mîrîrî yeꞌka pe pra, tîîse anna wanî amîrîꞌnîkon pokonpe teesenyakaꞌmasen pe, amîrîꞌnîkon eꞌtoꞌpe taatausinpai. Maasa pra innape ikupî pîꞌ aakoꞌmamîkon, tîrumakai pra.
