Sîrîrî Kaareta Itakon Iteꞌka Pe Paulo Nîmenukaꞌpî Coríntio Ponkon Pia 10:1-18
10 Uurî manniꞌ Paulo esatîuya sîrîrî apîꞌnîkon, morî pe Cristoya esatî warantî. Teuren tiaronkonya taa tanne upîꞌ: —Tîweppeꞌsen mîîkîrî akoreꞌtaꞌnîkon awanî ya, tîîse aapiapaiꞌnîkon aminke awanî yai, teekoreꞌmai nariꞌ pe eꞌkoi mîîkîrî —taa toꞌya.
2 Anna pîꞌ tiaronkon esenumenka see warantî: Paapa epuꞌnenan pepîn yeseru warantî Paulo yeseru wanî kaiꞌma. Mîrîrî wenai erepamî ya akoreꞌtaꞌnîkon, inkamoro yeurîmauya meruntî ke, nariꞌ pe. Tîîse amîrîꞌnîkon esatîuya morî pe, nariꞌ pe pra, yairî akoꞌmantî, mîrîrî warantî ayeurîmauyaꞌnîkon namai.
3 Inna seruꞌ pepîn, pemonkon pe tamîꞌnawîronkon pemonkonyamîꞌ wanî warantî, anna wanî nîrî. Tîîse anna warîrî, anna meruntîri ke anna ekoreꞌma pepîn anna yeyatonon pîꞌ, inkamoro Paapa epuꞌnenan pepîn ekoreꞌma warantî.
4 Anna ekoreꞌmatoꞌ wanî imakuiꞌpî yarakkîrî. Tîîse anna meruntîri wanî pepîn sîrîrî pata pon meruntîri pe. Tîîse awanî Paapa meruntîri pe, saꞌman pe tîweꞌsen yaretîꞌkanen pe.
5 Mîrîrî yeꞌnen inkamoro seruꞌyeꞌkonya yenupantoꞌ yaretîꞌka annaya Paapa meruntîri ke. Yairî pra toꞌ yenupatoꞌ wanî inkamoro ekaremekîꞌpî annaya Paapa meruntîri ke. Mîrîrî epuꞌsaꞌ toꞌya yai, innape Cristo kupîꞌpî toꞌya. Maasa pra innape ipîkku tenupatoꞌkon kupîꞌpî pemonkonyamîꞌya emapuꞌtîꞌpî toꞌya, Paapa nekaremekîꞌpî pepîn. Paapa epuꞌtî toꞌya maꞌnîpanen tîꞌnapannîpî annaya. Moropai toꞌ esenumenkatoꞌkon etinyakaꞌmaꞌpî Paapa meruntîri ke. Moropai Cristo maimu yawîrî toꞌ enaꞌpî.
6 Moropai amîrîꞌnîkon koreꞌta anîꞌ wanî Cristo maimu yawîrî epuꞌsaꞌ annaya yai, imaimu yawîron pepîn tarumaꞌtî annaya.
7 Aꞌkî, amîrîꞌnîkon pîꞌ esenumenkatî. Anîꞌ esenumenka ya, Cristo maimu pe teeseurîma pîꞌ, moriya eesenumenka eꞌpai awanî anna pîꞌ nîrî. Maasa pra anna eseurîma nîrî Cristo maimu pe, amîrîꞌnîkon neken pra.
8 Yai pra uurî atapurî Uyepotorîya ipîkku pe eꞌtoꞌ ton tîîsaꞌ wenai. Tîîse sîrîrî intîrîꞌpî ipîkku pe eꞌtoꞌ wanî amîrîꞌnîkon pîikaꞌtîtoꞌpeuya, inîꞌ panpîꞌ aarentakonpa innape ikuꞌtoꞌyaꞌnîkon wenai. Mîrîrî wanî pepîn amîrîꞌnîkon tarumaꞌtîtouꞌya pe. Mîrîrî yeꞌnen tîweppeꞌse wanî pepîn tiwin kin, maasa pra yairî eseurîmasaꞌ yeꞌnen.
9 Uurî esenumenka pra wai tiwin kin, îꞌ taatouꞌya ukaaretarî wenai teesiꞌnîꞌse awanîkon yuꞌse pra wai.
10 Tiaronkonya taa see warantî: —Sîrîrî kaareta Paulo nîmenukaꞌpî wanî meruntî ke eeseurîmatoꞌpe. Tîîse ukoreꞌtaꞌnîkon tîwanî yai, eeseurîma pepîn, eranneꞌ pe tîwanî yeꞌnen. Mîrîrî yeꞌnen îꞌ pe pra rî imaimu eeseurîmatoꞌ wanî —taa toꞌya.
11 Tîîse inkamoroya epuꞌtî eꞌpai awanî, îꞌ kaiꞌma kaareta po eseurîma wanî akoreꞌtaꞌnîkon wanî yai eseurîma warantî, tiaron pe pra.
12 Aꞌkî, ipîkku pe anna atapurî kaiꞌma anna eꞌkuꞌpîtî pepîn tiwin kin, inkamoro yeꞌkakon eꞌkuꞌpîtî manniꞌ warantî ipîkku pe tîwanîkon kaiꞌma. See warantî ipîkkukon wanî pîꞌ toꞌ esenumenka. Moriya mîrîrî warantî uurî wanî yeꞌnen, —Ipîkku pe puꞌkuru anna wanî —taa toꞌya. Tîîse pakkokon kinî inkamoro.
13 Îꞌ pîꞌ anna atapurî pepîn, tîîse anna esenyakaꞌmatoꞌ pîꞌ, Paapaya itîîsaꞌ anna nîkupî ton, mîrîrî pîꞌ neken anna atausinpa. Moropai amîrîꞌnîkon pîꞌ nîrî anna atausinpa maasa pra Paapaya anna yarimaꞌpî akoreꞌtaꞌnîkon esenyakaꞌmatoꞌpe.
14 Amîrîꞌnîkon koreꞌta esenyakaꞌmatoꞌ pîꞌ anna eseurîma pepîn seꞌ tapairî maasa pra eꞌmaiꞌ pe anna erepamîꞌpî akoreꞌtaꞌnîkon tiaronkon erepamî pra tîîse. Mîrîrî pîꞌ anna eseurîma taatausinpai eserîke awanî.
15 Tiaron nîkupîꞌpî pîꞌ anna eseurîma pepîn mîî pe, mîrîrî kuꞌsaꞌ annaya kaiꞌma. Tîîse anna nîkupîton Paapa nîtîrîꞌpî pîꞌ neken anna atausinpa. Maasa pra inîꞌ panpîꞌ innape ikupîyaꞌnîkon yuꞌse anna wanîꞌpî. Mîrîrî amîrîꞌnîkon wenai anna esenyakaꞌmatoꞌ ena inîꞌ panpîꞌ, tiaronkonya itekare etatoꞌpe. Mîrîrî yuꞌse anna wanîꞌpî tîwîrî rî.
16 Mîrîrî yai anna wîtî tiaron pata pona Cristo yekare ekaremeꞌse, oꞌnon pata anîꞌya ekaremekî pra sîrîrî tîpose. Mîrîrîya mîî pe anna atapurî pepîn tiaron esenyakaꞌmatoꞌ pîꞌ, maasa pra anîꞌ wîtîsaꞌ pra man mîîtoꞌpe.
17 Maasa pra Paapa maimu eꞌmenukasaꞌya taasaꞌ see warantî:—Anîꞌ atapurî yai mîî pe, mîî pe aatapurî eꞌpai awanî manniꞌ Paapa nîkupîꞌpî wenai
—taꞌpîiya.
18 Maasa pra anîꞌ yapurî Paapaya ya, mîîkîrî tînapurî yapisîiya tîwakîri pe. Tîîse manniꞌ tîîwarîrî taatapurîsen yapisî Paapaya pepîn, maasa pra îꞌ pe pra rî awanî.
