Sîrîrî Kaareta Itakon Iteꞌka Pe Paulo Nîmenukaꞌpî Coríntio Ponkon Pia 11:1-33
11 Eseurîmatoꞌ pakko warantî yapîtanîpîyaꞌnîkon yuꞌse wanî sîrîrî, upîꞌrî eseurîma tanne. Uurî eseurîmatoꞌ yapîtanîꞌtî.
2 Îꞌ kaiꞌma Paapaya aꞌnînmakon tîuya wenai, asaꞌnamakon warantî, uurîya nîrî aꞌnînmakon. Maasa pra amîrîꞌnîkon wanî manniꞌ maasaron wîriꞌ warayoꞌ yarakkîrî siꞌpî pepîn warantî. —Anoꞌpî pe mîîkîrî wîriꞌ tîrîuya neken tiwinan warayoꞌ pia —taꞌpî itunya warantî tauya nîrî. Mîrîrî warantî tiwinan Cristo pia neken amîrîꞌnîkon tîrîuya yuꞌse wai. Mîrîrî yeꞌnen mîîkîrî maimu yawîrî neken aakoꞌmamîkon eꞌpai man.
3 Maasa pra eesenkuꞌtîkon nama pîꞌ wai, îꞌ kaiꞌma Eva nurîꞌtî yenkuꞌtîꞌpî Makuiya warantî. Tuꞌke yenupatonkonya ayenupakon wenai, yairon Cristoya yenupantoꞌ kupîyaꞌnîkon nama pîꞌ wai tîwî.
4 Maasa pra amîrîꞌnîkon man anîꞌrî akoreꞌtaꞌnîkon teerepansen pîꞌ taatausinpasen pe, manniꞌkan Jesus pîꞌ teeseurîmasanon tiaron pe rîse. Tîîse mîrîrî warantî Jesus pîꞌ anna nekaremekî pepîn. Moropai —See warantî yekaton awanî yapisî eꞌpai man —taa toꞌya tanne, mîrîrî yeꞌka itekare etayaꞌnîkon. Tîîse mîîkîrî wanî pepîn Paapa yekaton pe, manniꞌ anapisîꞌpîkon eesenpatakonasaꞌkon yai. Moropai mîrîrî itekare, inkamoro nekaremekî wanî pepîn anna winîpai anetaꞌpîkon pe, tiaron pe awanî. Mîîwîni tîîse toꞌ maimu anetapai awanîkon.
5 Moriya inkamoro yeꞌkakon eseurîmatoꞌ etayaꞌnîkon manniꞌ warantî, uurî nîrî eseurîmatoꞌ etatî, maasa pra uurî wanî pepîn inkamoro yeꞌkakon yaipontîsaꞌ pe tîweꞌkuꞌsanon maꞌre. Ipîkku pe toꞌ wanî pîꞌ eesenumenkakon.
6 Yai pra uurî wanî pepîn morî pe teeseurîmasen pe. Tîîse epuꞌnen pepîn uurî, tauya pepîn. Maasa pra Paapa epuꞌtîuya, moropai itekare epuꞌtîuya, taꞌpîuya amîrîꞌnîkon pîꞌ. Yairon pîꞌ eseurîmaꞌpî epuꞌtîꞌpîyaꞌnîkon.
7 Îꞌ pensa akoreꞌtaꞌnîkon Paapa maimu ekaremekîuya yai mîrîrî ekaremekîꞌpîuya epeꞌmîra, uyepeꞌpî tiwai pra. Uurî esenyakaꞌmaꞌpî uyenya ke, akoreꞌtaꞌnîkon wanî yai, amîrîꞌnîkon pîikaꞌtîtoꞌpeuya. Mîrîrî warantî ipîkku pe pra uyeraꞌmaꞌpîyaꞌnîkon. Mîrîrî kupîꞌpîuya ipîkku pe awanîkonpa. Mîrîrî kupîꞌpîuya wanî imakuiꞌpî pe kaiꞌma eesenumenkakon?
8 Mîrîrî yai akoreꞌtaꞌnîkon esenyakaꞌma tanne, tiaronkon soosi tawonkonya uyeꞌmaꞌpî. Mîrîrî pîꞌ taayaꞌnîkon eꞌpainon, yamaꞌrunpaꞌpîiya. Tîîse mîrîrî kupîꞌpîuya amîrîꞌnîkon pîikaꞌtîtoꞌpeuya kaiꞌma.
9 Moropai amîrîꞌnîkon koreꞌta uukoꞌmamî yai, utînirurî ton esatî pîꞌ uukoꞌmansaꞌ pra wai anîꞌ pîꞌ. Tîîse uyonpakon Macedônia poinokonya enepîꞌpî tamîꞌnawîrî ituꞌse uurî eꞌtoꞌ kaisarî. Mîrîrî warantî awanî pe man, eꞌmaiꞌ pe akoreꞌtaꞌnîkon wanî yai, moropai inîꞌrî tiaron pensa uutîsaꞌ yai, mîrîrî wanî kupî sîrîrî anîꞌ pîꞌ esatî pîꞌ anna koꞌmamî pepîn.
10 Taꞌpîuya wai yairî apîꞌnîkon, yairî Cristo eseurîma warantî. Maasa pra ipemonkono pe wanî yeꞌnen. Îꞌ pensa esenyakaꞌmaꞌpî yepeꞌ pîꞌ esatîuya pepîn tiwin kin. Mîrîrî pîꞌ eseurîma koꞌmannîpî tamîꞌnawîrî Grécia pata po wanî yai. Anîꞌya uyeseru miakanma eserîke pra man. Îꞌ kaiꞌma itekare ekaremekî pîꞌ esenyakaꞌmatoꞌ yeseru pîꞌ eseurîma taatausinpai, uyepeꞌ ton esatîuya pra.
11 Îꞌ waniꞌ awanî yeꞌnen mîrîrî tauya mîrîrî? Maasa pra amîrîꞌnîkon saꞌnamauya pra awanî wenai? Kaane, mîrîrî wenai pra. Paapaya epuꞌtî pîꞌ man, îꞌ kaiꞌma amîrîꞌnîkon saꞌnamauya.
12 Îꞌ kupî pîꞌ uukoꞌmamî manniꞌ, mîrîrî kupî pîꞌ uukoꞌmamî tîwîrî. Inkamoro seruꞌ yenupatonkon yaipontîsaꞌ pe tîweꞌkuꞌsanon inkamoro yeꞌka pataꞌseꞌ ton tîrî annaya namai. Moropai inkamoroya taa namai, teesenyakaꞌmatoꞌkon wanî anna esenyakaꞌmatoꞌ warantî, taa toꞌya namai.
13 Maasa pra inkamoro warayoꞌkon eꞌkupî yaipontîsaꞌkon pe tîîse seruꞌyeꞌkon inkamoro, yairon pîꞌ teeseurîmasanon pepîn. Inkamoroya tiaronkon yenkuꞌtî, Cristo maimu pe teesenyakaꞌmasanon pe tîweꞌkuꞌse.
14 Mîrîrî yeꞌka inkamoro wanî pepîn taa eꞌpai pra man. Maasa pra Makui nîrî etinyakaꞌma eserîke awanî. Eesenpo inserî warantî, morî pe, aꞌka pe, tiaronkon yenkuꞌtîpa kaiꞌma.
15 Mîrîrî warantî tuꞌke Makui maimu pe teesenyakaꞌmasanon yeseru wanî mîrîrî. Inkamoroya morî kupî tiaronkon yenkuꞌtîkonpa kaiꞌma. Tîîse inkamoroya mîrîrî kuꞌpî tîuyaꞌnîkon miakannoꞌpî pe eꞌtarumaꞌtîntoꞌ yapisî kupî sîrîrî itepeꞌpî pe.
Tîweꞌtarumaꞌtîtoꞌ Pîꞌ Paulo Eseurîma
16 Tuꞌke iteꞌka apîꞌnîkon tauya, pakko pe puꞌkuru wanî pîꞌ anîꞌ esenumenka namai. Mîî winî tîîse anîꞌ esenumenka ya, moriya pakkokon maimu etayaꞌnîkon warantî umaimu etatî. Mîrîrî etayaꞌnîkon ya, eseurîma sîrîrî, uurî yeseru pîꞌ.
17 Upîꞌ eseurîma ya, eseurîma pepîn mîrîrî Uyepotorîkon maimu pe. Tîîse eseurîma sîrîrî mîî pe eꞌnîtoꞌ yeseru pîꞌ, pakko pe tîweꞌsen eseurîma warantî.
18 Mîrîrî warantî uyeyatonon wanî teeseurîmasanon tîpîꞌnîkon. Toꞌ eseurîma teserukon yawîrî. Mîrîrî warantî nîrî uurî eseurîma.
19 Maasa pra amîrîꞌnîkon wanî epuꞌnenan pe puꞌkuru. Tîîse insamoro pakkokon maimu etayaꞌnîkon, epuꞌnen pe awanîkon kaiꞌma eesenumenkakon wenai.
20 Inkamoroya ayenkuꞌtîꞌpîkon, moropai ayesaꞌkon pe ayaipontîꞌpîkon toꞌya, moropai ayentaiꞌnîkon toꞌ eꞌkupîꞌpî. Mîrîrî warantî atarumaꞌtîkon toꞌya tanne, ayeppeꞌnîpîkon toꞌya tanne, îꞌ taayaꞌnîkon pepîn toꞌ pîꞌ.
21 Anna wanîꞌpî mîrîrî yeꞌka pe pra. Maasa pra anna wanîꞌpî eranneꞌ pe, mîrîrî yeꞌka kupî eserîke pra.
Inna seruꞌ pepîn. Tiaronkon eseurîma ya, tîpîꞌnîkon mîrîrî yeꞌka. Mîrîrî warantî nîrî uurîya ikupî pakko warantî eseurîma upîꞌ.
22 Taa toꞌya ya: —Hebreu pe anna wanî, uurîya nîrî taa, —Hebreu uurî. Moropai —Israel ponkon pe anna wanî —taa toꞌya ya, uurîya nîrî taa: —Israel pon uurî. Moropai —Abraão nurîꞌtî payanyamîꞌ pe anna wanî —taa toꞌya ya, uurîya nîrî taa: —Abraão nurîꞌtî parîꞌpî uurî.
23 Inkamoro wanî Cristo poitîrî pe? Tîîse uurî wanî inkamoro yentai Cristo poitîrî pe. (Teuren pakko warantî eseurîmasaꞌ tanne). Maasa pra inkamoro esenyakaꞌma yentai uurî esenyakaꞌmaꞌpî. Moropai inkamoro yentai atarakkannîtoꞌ yewîꞌ ta uutîpîtîꞌpî. Tuꞌke iteꞌka uꞌpoꞌpîtîꞌpî toꞌya inkamoro yentai. Moropai tuꞌke iteꞌka uusaꞌmanta yonpaꞌpî.
24 Miaꞌtaikin iteꞌka Judeuyamîꞌya uꞌpoꞌpîtîꞌpî poꞌpînnîtoꞌ ke, 39 iteꞌkaꞌne.
25 Eseurîwîꞌne iteꞌka Romanoyamîꞌya uꞌpoꞌpîtîꞌpî yei ke. Moropai tiwin iteꞌka tîꞌ ke upaꞌtîpîtîꞌpî toꞌya. Eseurîwîꞌne iteꞌka apoꞌyen yaꞌ uutî tanne, eeseuronkaꞌpî. Moropai tiaron pensa tiwin wei kaisarî uukoꞌmamîꞌpî kureꞌnan pîrana kaꞌ, apoꞌyen eseuronkasaꞌ yai.
26 Tuꞌke iteꞌka itekare ekaremekî pîꞌ asarî yai, nariꞌ esuwaꞌkaꞌpî uyarakkîrî. Iren mairontasaꞌ winîpai urukkutî yai, moropai tuꞌkankon amaꞌyeꞌkon winîpai, moropai tiaronkon pepîn uyonpayamîꞌ, Judeuyamîꞌ winîpai moropai Judeuyamîꞌ pepîn winîpai. Moropai cidade po uutîsaꞌ yai, toꞌ nîkupî winîpai moropai keren po nariꞌ winîpai, tiaron pensa apoꞌyen yaꞌ uutî tanne, nariꞌ esuwaꞌkaꞌpî. Moropai yonparî wanîyakonkon seruꞌyeꞌkon winîpai, nariꞌ esuwaꞌkaꞌpî uyarakkîrî.
27 Esenyakaꞌmapîtîꞌpî mararî pra taapîꞌkaꞌse. Tiaron pensa uwetun pîn, umoron epuꞌtîꞌpîuya emiꞌnan pîꞌ, moropai upataꞌseꞌ ton ton pra awanî pîꞌ, moropai komiꞌ pe awanî pîꞌ, tuꞌke upon ton pra awanî yeꞌnen.
28 Tamîꞌnawîron mîrîrîkon tîîse, uurî esenumenka koꞌmannîpî wei kaisarî. Esewankonoꞌma manniꞌkan innape Jesus kuꞌnenan pîꞌ, soosikon kaisarî.
29 Maasa pra îꞌ pensa tiaron wanî ya aꞌtuꞌmîra, uurî nîrî esepuꞌnî pîꞌ wai aꞌtuꞌmîra ikaisarî. Moropai tiaronya imakuiꞌpî kuꞌsaꞌ ya, uurî wai teesewankonoꞌmai ipîꞌ mararî pra.
30 Upîꞌrî atapurî ya, moriya mîrîrî atapurîtoꞌya aꞌtuꞌmîra wanî ekaremekî.
31 Mîrîrî epuꞌtî pîꞌ Uyepotorî, Jesus yun, Paapa man. Manniꞌ morî puꞌkuru ipatîkaronya, îꞌ kaiꞌma seruꞌyeꞌ pe eseurîma pepîn epuꞌtî pîꞌ man.
32 Pena Damasco cidaderî po wanî yai, manniꞌ pata esaꞌya surara tîrîꞌpî cidade manaꞌta pona uyapiꞌnen ton, manniꞌ rei Aretas nîmenkaꞌpî pata esaꞌ pe aweꞌtoꞌpe manniꞌya.
33 Tîîse uyonpayamîꞌya uyaraꞌtîꞌpî waikaraꞌpî yaꞌ. Inkamoroya uyenuꞌtîꞌpî cidade yiwaꞌtoꞌ aꞌta yai, poro po winîkîi, waikaraꞌpî yaꞌ wanî tanne. Mîrîrî warantî toꞌ yenya pai atarîꞌkaꞌpî.
