Sîrîrî Kaareta Itakon Iteꞌka Pe Paulo Nîmenukaꞌpî Coríntio Ponkon Pia 12:1-21
12 Upîꞌrî uurî atapurî eꞌpainon, teuren îꞌ pe pra rî atapurîtoꞌ wanî. Tîîse eseurîmapai wai îꞌ kaiꞌma uweꞌneꞌ, visão Uyepotorî nekaremekîꞌpî pîꞌ.
2 Pena Paapaya uyarîꞌpî kaꞌ ratai pona, paraíso iteseꞌ. Awanî sîrîrî asakîrîrî puꞌ pona tîîmoꞌtai konoꞌ esuwaꞌkasaꞌ. Tîîse epuꞌtîuya pra wai aweꞌtoꞌ yawîrî, uyesaꞌ yarîꞌpîiya, uyekaton neken kaꞌrî yarîꞌpîiya. Anîꞌya mîrîrî epuꞌtî, Paapaya neken.
3 Inîꞌrî tauya Paapaya uyarîꞌpî uyesaꞌ yarakkîrî kaꞌ pona, uyekaton neken kaꞌrî yarîꞌpîiya epuꞌtîuya pra wai. Paapaya neken epuꞌtî.
4 Miarî etaꞌpîuya anîꞌya ekaremekî eserîkan pepîn, see yeꞌka pe rî mai ke, îꞌ kaiꞌma anîꞌya ekaremekî Paapaya itîrî pepîn.
5 Mîrîrî etasauꞌya wenai, atapurî mîrîrî pîꞌ. Tîîse atapurî eserîke pra wai tiwin kin uurî pîꞌ. Tîîse atapurî aꞌtuꞌmîra uurî eꞌtoꞌ pîꞌ neken.
6 Mîrîrî yeꞌka pîꞌ atapurîpai wanî ya, atapurî eꞌpainon maasa pra yairon pîꞌ eseurîma mîrîrî. Mîrîrî wenai pakko pe wanî pepîn mîrîrî. Tîîse mîrîrî yeꞌka pîꞌ eseurîmapai pra wai. Maasa pra mîrîrî wenai anîꞌya uyapurî yuꞌse pra wai. Tîîse uyeseru eraꞌma tîuyaꞌnîkon wenai moropai eta tîuyaꞌnîkon wenai, mîrîrî pîꞌ toꞌ esenumenka yuꞌse wai.
7 Tîîse mîrîrî warantî kureꞌne atapurî namai, uyakinpanen ton neꞌneꞌ erepamîꞌpî upona. Paapaya itîîsaꞌ upun yai, mîꞌnî ewonsaꞌ warantî. Mîrîrî erepamî epuꞌtîꞌpîuya Makui narimaꞌpî pe awanî utarumaꞌtîtoꞌpe.
8 Mîrîrî yai eseurîwîꞌne iteꞌka Uyepotorî pîꞌ epîremaꞌpî. Esatîꞌpîuya ipîꞌ, uupiapai mîrîrî moꞌkatoꞌpeiya kaiꞌma.
9 Tîîse umaimu yuukuꞌpîiya: —Kaane, imoꞌkauya pepîn. Tîîse apîikaꞌtî pîꞌ uukoꞌmamî, mîrîrî yeꞌka yapîtanîpîpa. Aasîrî aapia untîrî pîꞌ man. Maasa pra umeruntîri wanî meruntî ke aꞌtuꞌmîra eesepuꞌtî tanne —taꞌpîiya upîꞌ. Mîrîrî yeꞌnen uurî enaꞌpî inîꞌ panpîꞌ taatausinpai, aꞌtuꞌmîra uurî eꞌtoꞌ pîꞌ uurî atapurî. Mîrîrî warantî Cristo meruntîri eseraꞌmatoꞌpe uwenai.
10 Mîrîrî yeꞌnen taatausinpai uukoꞌmamî aꞌtuꞌmîra eꞌtoꞌ pîꞌ, moropai umuꞌtunpatoꞌ pîꞌ, moropai ituꞌse eꞌtoꞌ pîꞌ, moropai upokonomatoꞌ pîꞌ, moropai tiaron uyarakkîrî teesuwaꞌkasen pîꞌ Cristo wenai, taatausinpai uukoꞌmamî. Mîrîrî yeꞌnen îꞌ pensa aꞌtuꞌmîra esepuꞌtî ya, tîîse meruntî ke esepuꞌtî maasa pra Cristoya itîrî yeꞌnen uupia.
Paulo Esewankonoꞌma Koꞌmannîpî
Coríntio Ponkon Soosi Tawonkon Pîꞌ
11 Eseurîma pîꞌ wai pakko pe tîweꞌsen eseurîma warantî. Maasa pra amîrîꞌnîkonya mîrîrî warantî eseurîma emapuꞌtîꞌpî. Tîîse amîrîꞌnîkon eseurîma eꞌpai awanîꞌpî, îꞌ kaiꞌma morî pe uyeseru eꞌtoꞌ pîꞌ taayaꞌnîkon eꞌpai awanîꞌpî. Inna seruꞌ pepîn, îꞌ pe pra rî uurî wanî. Tîîse inkamoro, yaipontîsaꞌ pe tîweꞌkuꞌsanon maꞌre uurî wanî pepîn tiwin kin.
12 Moro akoreꞌtaꞌnîkon wanî yai, Paapaya tuꞌkan kupîꞌpî uwenai. Teraꞌmasen kupîꞌpîiya, esenupantoꞌ ton, moropai teesewankonoꞌmai esenumenkantoꞌ ton kupîꞌpîiya. Moropai anîꞌ nîkupî eserîkan pepîn kupîꞌpîiya akoreꞌtaꞌnîkon, tînaipontîꞌpî pe wanî epuꞌtîkonpa. Inaipontîꞌpî pe uukoꞌmamîꞌpî tîrumakai pra.
13 Yai pra amîrîꞌnîkon esenumenka kaꞌrî, tiaronkon pîikaꞌtîꞌpî annaya, amîrîꞌnîkon pîikaꞌtîꞌpî annaya yentai. Îꞌ kaiꞌma anna wanîꞌpî? Amîrîꞌnîkon koreꞌta anna yeseru kupîyaꞌnîkon pe naatî, ayewanmakon pe? Mîrîrî warantî anna kupîꞌpîyaꞌnîkon ya, Îꞌ tesaꞌse pra anna koꞌmansaꞌ wenai, aawanmîraꞌnîkon anna koꞌmamîꞌpî kuꞌtî.
14 Inîꞌrî teeseurînon iteꞌka pe amîrîꞌnîkon eraꞌmapîꞌse uutî. Mîrîrî yai nîrî îꞌ anesaꞌpai pra wai amîrîꞌnîkon pîꞌ. Atînirurîkon yuꞌse pra wai tîîse amîrîꞌnîkon neken yuꞌse wai kureꞌne. Maasa eraꞌmatî moreyamîꞌ yunkonya neken tîniru yannuku eꞌpai awanî, îꞌ tînmukuyamîꞌ eꞌtoꞌ ituꞌse yennapa. Moropai mîîkîrî munkîyamîꞌya tîyun ton pe yannuku pepîn eꞌpainon.
15 Mîrîrî warantî uurîya nîrî ayunkon warantî, uwakîri pe taatausinpai tamîꞌnawîrî itesaꞌ pe eꞌtoꞌ aretîꞌkauya. Uurî rî ataretîꞌka pe wai, amîrîꞌnîkon pîikaꞌtîtoꞌpeuya. Yai pra mîrîrî kupîuya wenai, uyapurîyaꞌnîkon pepîn eꞌpainon, kureꞌne amîrîꞌnîkon saꞌnamatouꞌya wenai?
16 Mîrîrî yeꞌnen amîrîꞌnîkonya innape epuꞌtî, îꞌ kaiꞌma amîrîꞌnîkon yenyakaꞌmai uutî pîn. Tîîse tiaronkonya taa amîrîꞌnîkon yenkuꞌtîsauꞌya, uupia atînirurîkon tîrîkonpa kaiꞌma taa toꞌya.
17 Îꞌ pensa insamoro uyonpakon yarimasauꞌya yai aapiaꞌnîkon, uurî ton pe atînirurîkon eraꞌmai toꞌ yaipontîsauꞌya pra wai.
18 Uurîya mîîkîrî Tito yarimaꞌpî moropai tiaron uyonpakon, innape Jesus kuꞌnen wîtîtoꞌpe yarakkîrî. Tîîse mîîkîrî wanîꞌpî yairî teesenumenkasen pe anna esenumenka saꞌnîrî. Mîrîrî yeꞌnen Titoya amîrîꞌnîkon tenkuꞌtîi atînirurîkon moꞌkasaꞌ pra man.
19 Yai pra eesenumenkakon amîrîꞌnîkon rawîrî anna eꞌwapuꞌtî kaiꞌma, tîîse kaane. Anna eseurîma Cristoya anna eseurîmatoꞌpe taꞌpî yawîrî, Paapa rawîrî siꞌma. Moropai tamîꞌnawîrî anna nîkupîꞌpî wanî uyonpayamîꞌ, uwakîrikon puꞌkuru amîrîꞌnîkon pîikaꞌtîtoꞌpe.
20 Tîîse eppeꞌnî pîꞌ wai kureꞌne, îꞌ kaiꞌma yairî pra awanîkon anepopai pra wanî pîꞌ. Eranneꞌ pe wai mîrîrî akoreꞌtaꞌnîkon ekoreꞌmantoꞌ eporîuya pîꞌ, moropai kinmuwanîtoꞌ, moropai esewanmîrîntoꞌ, moropai aawarîrîꞌnîkon teesenumenkai aweꞌtoꞌkon, moropai eꞌmuꞌtunpantoꞌ, eseurîmantoꞌ, moropai mîî pe aweꞌtoꞌkon, moropai pîraiꞌ pîꞌ tîmurukun pe pra awanîkon anepopai pra wanî pîꞌ eranneꞌ pe wai. Mîrîrî warantî ayeporîuyaꞌnîkon ya, awakîrikon pe wanî pepîn, maasa pra ekoreꞌma kupî, mîrîrî imakuiꞌpî ayeserukon pîꞌ.
21 Eranneꞌ pe wai nîrî inîꞌrî akoreꞌtaꞌnîkon uutîsaꞌ ya, eppeꞌpai pra wai Paapa rawîrî siꞌma awenaiꞌnîkon. Moropai mîrîrî pîꞌ tîweppeꞌse ukarunpai pra wai mararî pra awenaiꞌnîkon. Maasa pra pena imakuiꞌpî kupîꞌpîyaꞌnîkon, moropai mîrîrî pîꞌ tîwenpenatai irumakayaꞌnîkon pra aakoꞌmamîꞌpîkon. Mîrîrî imakuiꞌpî kupîyaꞌnîkon seꞌ tapairî wîriꞌsanyamîꞌ yarakkîrî awanîkon ke, moropai tiaron nura ayeserukon kupî pîꞌ aakoꞌmamîkon tîrumakai pra. Mîrîrî wenai eppeꞌpai pra wai.
