Sîrîrî Kaareta Itakon Iteꞌka Pe Paulo Nîmenukaꞌpî Coríntio Ponkon Pia 13:1-14
13 Sîrîrî wanî iteseurîno iteꞌka pe uutîtoꞌ amîrîꞌnîkon eraꞌmapîꞌse. Erepansaꞌ ya, ikupîuya, îꞌ kaiꞌma Paapa maimu eꞌmenukasaꞌya taasaꞌ warantî. See warantî taasaiꞌya:—Anîꞌya îꞌ rî kuꞌsaꞌ ya, mîîkîrî esepuꞌtoꞌpe innape,asakîꞌnankon pemonkonyamîꞌya. Mîîwîni pra awanî ya,eseurîwîꞌnankonya taa eꞌpai man
—taasaiꞌya man.
2 Itakon iteꞌka pe aapiaꞌnîkon uutîsaꞌ yai, taꞌpîuya îꞌ kupîuya manniꞌkan imakuiꞌpî kupîtîponkon yarakkîrî. Mîrîrî warantî inîꞌrî tauya pe wai, aapia pra siꞌma. Inîꞌrî erepamî yai, —aka saꞌne —tauya pe pra wai anîꞌ pîꞌ tiwin kin, tamîꞌnawîronkon imakuiꞌpî ikuꞌnenan pîꞌ.
3 Maasa pra îꞌ kaiꞌma Cristo eseurîma warantî uurî eseurîma anepuꞌpai awanîkon. Maasa eraꞌmatî, Cristo wanî pepîn aꞌtuꞌmîra. Tîîse mîîkîrîya tîmeruntîri yenpo, akoreꞌtaꞌnîkon erepamî yai.
4 Tîîse aꞌtuꞌmîra awanîꞌpî, îꞌ pensa pakîꞌnan pona ipokapîtî toꞌya yai. Tîîse sîrîrîpe aakoꞌmamî Paapa meruntîri yai. Mîrîrî warantî nîrî anna wanî aꞌtuꞌmîra Cristo wanîꞌpî warantî. Tarîpai anna koꞌmamî yeꞌnen yarakkîrî, imeruntîri yai anna koꞌmamî, amîrîꞌnîkon pîikaꞌtîtoꞌpe annaya.
5 Mîrîrî yeꞌnen aawarîrîꞌnîkon rî eseraꞌmatî ayewankon yaꞌ, innape ikupî pîꞌ aakoꞌmamîkon epuꞌtîkonpa. Innape ayewankon yaꞌ Cristo wanî epuꞌtî pîꞌ naatîi, ipemonkono pe awanîkon ya.
6 Mîrîrî yeꞌnen mîrîrî epuꞌtîyaꞌnîkon ya, anna yeseru wenai, Cristo pemonkono pe anna wanî, epuꞌtîyaꞌnîkon, anna yewan yaꞌ aakoꞌmamîkon yeꞌnen.
7 Esatî annaya Paapa pîꞌ imakuiꞌpî kupîyaꞌnîkon namai. Mîrîrî esatî annaya maasa pra morî pe anna eseraꞌmatoꞌpe pra, tîîse morî kupî pîꞌ awanîkonpa yairon. Moropai anna esenyakaꞌmatoꞌ eseraꞌma ya îꞌ pe pra rî, îꞌ waniꞌ awanî pepîn.
8 Maasa pra Cristo maimu pe anna esenyakaꞌma tanne, îꞌ koneka annaya eserîke pra man yairon Paapa maimu yawîrî pra. Tîîse mîrîrî yawîrî neken anna wanî.
9 Aasîrî yairî ayeserukon wanî ya, meruntî ke annaya ayaipontîkon pepîn eꞌpainon. Mîrîrî pîꞌ anna atausinpa eꞌpainon. Mîrîrî yeꞌnen anna epîreman pîꞌ man aponaꞌnîkon yairon pe ayeserukon enatoꞌpe.
10 Mîrîrî yeꞌnen sîrîrî kaareta menukauya sîrîrî aapiaꞌnîkon eꞌmaiꞌ pe, uutî rawîrî amîrîꞌnîkon eraꞌmapîꞌse. Maasa pra îꞌ pensa uutîsaꞌ ya, meruntî ke atarumaꞌtîuyaꞌnîkon namai, Uyepotorî maimu pe. Maasa pra sîrîrî Uyepotorî maimu wanî inîꞌ panpîꞌ amîrîꞌnîkon ena emapuꞌtînen pe morî pe panpîꞌ. Mîrîrî wanî pepîn innape ikuꞌtoꞌyaꞌnîkon rumakayaꞌnîkon emapuꞌtînen pe pra.
Paulo Esekaremekî
11 Uyonpayamîꞌ, koꞌmannîꞌnîkon. Tamîꞌnawîrî Paapa pîꞌ esatî pîꞌ akoꞌmantî, morî pe amîrîꞌnîkon kuꞌtoꞌpeiya, morî pe tîwanî manniꞌ warantî Paapaya akuꞌtoꞌkon pe. Sîrîrî apanamatouꞌya etatî, mîrîrî taasauꞌya manniꞌ. Moropai morî pe tîwanmîra akoꞌmantî ayonpakon pokonpe. Teesiyuꞌpîꞌse pra akoꞌmantî ayonpakon pokonpe. Mîrîrî warantî aakoꞌmamîkon ya, ayarakkîrîꞌnîkon Paapa koꞌmamî. Mîîkîrî Paapa wanî eꞌsaꞌnamantoꞌ tîînen pe, moropai tîwanmîn tîînen pe.
12 Ayonpakon yenya yapiꞌtî morî pe, eeseporîkon yai.
13 Tamîꞌnawîronkon uyonpakon Paapa yapurînenanya uupia tîweꞌsanonya aapiaꞌnîkon tîmaimukon yarima sîrîrî.
14 Esatî annaya Uyepotorîkon Jesus Cristo pîꞌ, tamîꞌnawîrî morî pe tîweꞌtoꞌ tîîtoꞌpeiya aapiaꞌnîkon. Moropai Paapaya morî pe teetîꞌnînmai aakoꞌmamîkon emapuꞌtîtoꞌpe esatî annaya. Moropai Morî Yekaton Wannîya tiwin eesenumenkatoꞌkon eꞌtoꞌpe tamîꞌnawîrî siꞌma, esatî annaya sîrîrî.
