Sîrîrî Kaareta Itakon Iteꞌka Pe Paulo Nîmenukaꞌpî Coríntio Ponkon Pia 2:1-17
2 Mîrîrî yeꞌnen uurî esenumenkaꞌpî inîꞌrî, amîrîꞌnîkon pokonpe eseporî eserîke pra awanî pîꞌ, yairî maꞌre amîrîꞌnîkon ankuꞌpai pra awanî yeꞌnen.
2 Maasa pra yairî maꞌre amîrîꞌnîkon kupîuya ya, yairî maꞌre nîrî uurî ena. Mîrîrî warantî awanîkon tanne, anîꞌya uyausinpa eꞌpainon? Amîrîꞌnîkon neken, unewankonoꞌmaꞌsanya uyausinpa mîrîrî.
3 Mîrîrî yeꞌnen manniꞌ eꞌmaiꞌnon kaareta menukaꞌpîuya aapiaꞌnîkon. Maasa pra amîrîꞌnîkon yewankonoꞌmai itîîpai pra wanîꞌpî. Maasa pra uyausinpatonkon pemonkonyamîꞌya uyewankonoꞌma yuꞌse pra wanîꞌpî. Maasa pra epuꞌtî pîꞌ wai, îꞌ pensa taatausinpai uurî wanî yai, amîrîꞌnîkon nîrî wanî taatausinpai.
4 Mîrîrî kaareta menukaꞌpîuya kureꞌne apîꞌnîkon esewankonoꞌma yeꞌka pe, moropai ukarau yeꞌka pe. Tîîse mîrîrî menukasauꞌya pra wai, amîrîꞌnîkon yeppeꞌnîꞌtoꞌpeuya. Tîîse imenukaꞌpîuya, îꞌ kaiꞌma amîrîꞌnîkon saꞌnamauya epuꞌtîkonpa.
Imakuiꞌpî Kupîtîpon Yausinpa Eꞌpai Man
5 Tîîse manniꞌ pemonkon, amîrîꞌnîkon koreꞌta yairî maꞌre ukupîtîpon, tîîse uurî neken pepîn, tiaronkon amîrîꞌnîkon koreꞌtawonkon nîrî kupîꞌpîiya mararî pra yairî maꞌre. Sîrîrî warantî imenukauya, meruntî ke puꞌkuru eseurîmatoꞌpe pra ipîꞌ.
6 Aasîrî arinîkon amîrîꞌnîkonya yenpaꞌkaꞌpî akoreꞌtapaiꞌnîkon. Mîrîrî wenai kureꞌne eesewankonoꞌmaꞌpî imakuiꞌpî tînkupîꞌpî pîꞌ. Aasîrî man.
7 Tarîpai aawanmîraꞌnîkon inkupîꞌpî kupîyaꞌnîkon eꞌpai man. Moropai yausinpayaꞌnîkon eꞌpai man, mararî pra yairî maꞌre yapîtanîpîiya yentai awanî namai.
8 Mîrîrî yeꞌnen esatîuya sîrîrî apîꞌnîkon, îꞌ kaiꞌma kureꞌne tîsaꞌnamayaꞌnîkon epuꞌtoꞌpe mîîkîrîya, isaꞌnamakonpa.
9 Moropai mîrîrî wenai manniꞌ kaareta menukaꞌpîuya aapiaꞌnîkon. Anepuꞌpai uurî wanîꞌpî, innape umaimu yawîrî awanîkon.
10 Îꞌ pensa tiaron nîkupîꞌpî imakuiꞌpî kupîyaꞌnîkon ya, aawanmîraꞌnîkon, uurîya nîrî uuwanmîra ikupî. Uuwanmîra mîîkîrî nîkupîꞌpî, (imakuiꞌpî kuꞌsaiꞌya ya) mîrîrî kupîuya, amîrîꞌnîkon wenai, Jesus Cristoya eraꞌma tanne.
11 Mîrîrî kupîuya uuwanmîra, maasa pra Makui ena namai uyentaiꞌnîkon. Epuꞌtî man, îꞌ kaiꞌma mîîkîrî esenyakaꞌmatoꞌ yeseru upîꞌnîkon.
Coríntio Ponkon Pîꞌ
Paulo Esenumenka Koꞌmannîpî Trôade Po Siꞌma
12 Toꞌsarî aapiaꞌnîkon uutî pra tîîse, Trôade cidaderî pona uutîꞌpî Cristo yekare ekaremeꞌse. Miarî erepansaꞌ yai epuꞌtîꞌpîuya, îꞌ kaiꞌma itekare pîꞌ esenyakaꞌma pataꞌseꞌ ton tîrîꞌpî Paapaya.
13 Mîîwîni tîîse kureꞌne esenumenka yeꞌka pe esenyakaꞌmaꞌpî, maasa pra uyonpakon Tito yarakkîrî eseporî pra wanî wenai. Mîrîrî yeꞌnen esekaremekîꞌpî mororonkon pîꞌ moropai uutîꞌpî Macedônia pata pona.
Cristo Wenai Tamîꞌnawîron Yentai Eꞌnî
14 Tîîse —Morî pe man —tauya Paapa pîꞌ, maasa pra Cristo pemonkono pe ukuꞌsaiꞌyaꞌnîkon yeꞌnen. Mîrîrî wenai Cristo wanî teyatonon yentai ekaremekî Paapaya tamîꞌnawîronkon pîꞌ. Uurîꞌnîkon pinunpa koꞌmannîpîiya itekare ekaremeꞌse. Manniꞌ aꞌpusin soroka anîꞌya ya, aꞌpusin puꞌnîku tamîꞌnawîronkonya. Mîrîrî warantî eꞌnî maasa pra uwenaiꞌnîkon itekare, tamîꞌnawîron yentai Cristo wanî yekare epuꞌtî tamîꞌnawîronkon pemonkonyamîꞌya.
15 Maasa pra anna wanî, manniꞌ aꞌpusin Cristo nîtîrî Paapa pia warantî tîweꞌsanon pe. Manniꞌ aꞌpusin wîtî pata po warantî, itekare anna nekaremekî eta manniꞌkan aweꞌpîikaꞌtîtonkonya, moropai aasaꞌmantatonkonya eta nîrî.
16 Ituꞌsankon pepîn pia awanî imakuiꞌpî pe, morî pe pra, innape ikupî toꞌya pra awanî yeꞌnen. Mîrîrî wenai Paapa pia tîîkoꞌmantoꞌkon ton eporî toꞌya pepîn. Tîîse manniꞌkan aweꞌpîikaꞌtîtonkon pia awanî morî pe, maasa pra innape ikupî toꞌya yeꞌnen. Moropai ipatîkarî enen tîîkoꞌmantoꞌkon eporî toꞌya. Mîrîrî yeꞌnen anîꞌya sîrîrî yeꞌka esenyakaꞌmatoꞌ kupî kin eꞌpainon?
17 Tîîse annaya ikupî, maasa pra anna wanî Paapa naipontîꞌsan pe. Yairî puꞌkuru ipîꞌ teeseurîmasen pe anna wanî irawîrî siꞌma. Mîrîrî yeꞌnen anna wanî pepîn manniꞌkan tuꞌkankon pemonkonyamîꞌ warantî. Seꞌ tapairî Paapa maimu ekaremekî pîꞌ anna esenyakaꞌma pepîn, manniꞌkan pemonkonyamîꞌ seꞌ tapairî tîweꞌrepasanon esenyakaꞌma warantî. Tîîse anna wanî Cristo poitîrî pe.
