Sîrîrî Kaareta Itakon Iteꞌka Pe Paulo Nîmenukaꞌpî Coríntio Ponkon Pia 3:1-18
3 Inîꞌrî annaya ekaremekî eꞌpai pra man, anîꞌ pe anna wanî. Tiaronkonya pemonkonyamîꞌ yaipontî kaareta menukatoꞌpe toꞌya, Cristo naipontîꞌsan pe tîwanîkon pîꞌ teeseurîmasen. Tîîse mîrîrî warantî, tiaronkon esatî annaya pra man, imenukatoꞌpe, amîrîꞌnîkonya epuꞌtoꞌpe.
2 Maasa pra amîrîꞌnîkon rî wanî anna kaaretarî warantî. Ayeserukon eraꞌma tamîꞌnawîronkonya wenai, epuꞌtî toꞌya, anna wanî Paapa naipontîꞌpî pe itekare ekaremeꞌse. Maasa pra anna yewan yaꞌ awanîkon, anna wakîri pe awanîkon. Maasa pra anna winîpai innape ikuꞌsaꞌyaꞌnîkon. Yairî ayeserukon wanî wenai, Cristoya apîikaꞌtîsaꞌkon epuꞌtî toꞌya.
3 Mîrîrî wanî Cristo nîmenukaꞌpî warantî. Mîrîrî erenka toꞌya ya, Cristo yarakkîrî aakoꞌmamîkon epuꞌtî toꞌya. Îꞌ kupîꞌpî Cristoya ayarakkîrîꞌnîkon, ikupîiya pepîn kaareta menukatoꞌ ke. Tîîse Morî Yekaton Wannî meruntîri yai ikupîꞌpîiya, manniꞌ ipatîkaron tîîkoꞌmansen winîpainon. Kureꞌnan tîꞌ pîꞌ imenukasaꞌ pe awanî pepîn, Moisés nurîꞌtîya imenukaꞌpî warantî pra, tîîse uyewankon yaꞌ itîrîꞌpîiya, yairî uyeserukon enatoꞌpe.
4 Mîrîrî taa annaya sîrîrî, maasa pra innape puꞌkuru Paapaya ikupî, Jesus Cristo wenai. Mîrîrî epuꞌsaꞌ annaya innape.
5 Mîrîrî yeꞌnen —Anna warîrî anna esenyakaꞌmatoꞌ koneka annaya sîrîrî —taa annaya eserîke pra awanî. Tîîse ikoneka annaya yeseru wanî Paapa winîpai tuiꞌsen pe, anna winîpai pra.
6 Maasa pra mîîkîrîya neken anna kupî, amenan tarakkîrî esetantoꞌ yekare ekaremeꞌtoꞌpe annaya. —Manniꞌ pena Moisés nurîꞌtî nekaremekîꞌpî yawîrî akoꞌmantî —taa annaya pepîn, tîîse —Manniꞌ Morî Yekaton Wannî yapiꞌtî, ameruntîri ton tîîtoꞌpeiya —taa annaya. Maasa pra manniꞌ Moisés nurîꞌtî nekaremekîꞌpî wanî tarumaꞌtî ton pe moropai saꞌmantantoꞌpe, yawîrî pra eꞌnî yeꞌnen, maasa pra uurîꞌnîkon yentai awanî yeꞌnen. Tîîse manniꞌ Paapa winîpainon, Morî Yekaton Wannî nîtîrî wanî ipatîkarî enen koꞌmannîtoꞌ tîînen pe.
7 Pena Moisés nurîꞌtî pia Paapaya tîmaimu tîrîꞌpî, kureꞌnan tîꞌ pona imenukatoꞌpeiya. Moropai mîrîrî ekaremekî Moisésya yai, pemonkonyamîꞌya epuꞌtîꞌpî, îꞌ kaiꞌma ipîkku pe Paapa eꞌtoꞌ wanî. Epuꞌtîꞌpî toꞌya kureꞌnan aꞌka wenai, Paapa winîpainon. Mîrîrî eraꞌmaꞌpî toꞌya Moisés yenpata pîꞌ. Mararî pra inkeꞌ pe awanîꞌpî, eraꞌma toꞌya yentai. Tîîse mîrîrî wanîꞌpî tîîkoꞌmansen pe pra, kaꞌneꞌno pe. Moropai mîrîrî Moisés nekaremekîꞌpîya pemonkonyamîꞌ tarumaꞌtîꞌpî.
8 Tarîpai esenumenkan, mîrîrî yentai Paapa winîpainon Morî Yekaton Wannî nîkupî wanî. Mîrîrî pîꞌ ekaremekî annaya.
9 Pena Moisés nurîꞌtî esenyakaꞌmatoꞌ wanîꞌpî morî pe puꞌkuru teuren pemonkonyamîꞌ eꞌtîꞌkaꞌpî, yawîrî pra tîweꞌsanon. Mîrîrî yeꞌnen itentai puꞌkuru, morî pe Morî Yekaton Wannî esenyakaꞌmatoꞌ wanî, yairî uurîꞌnîkon kupî pîꞌ, uurîꞌnîkon saꞌmanta namai.
10 Maasa pra manniꞌ Moisés nurîꞌtî nekaremekîꞌpî eꞌmaiꞌ pe mîrîrî enasaꞌ îꞌ pe pra rî, maasa pra itentainon erepamîꞌpî. Ikaisaron ton pra tîîse, iteꞌmaꞌpî pîꞌ Morî Yekaton Wannî nîkupî wanî itentai, morî pe puꞌkuru.
11 Inna seruꞌ pepîn Moisés nurîꞌtî nekaremekîꞌpî wanîꞌpî morî pe, tîîse mîî pîkîrî neken, tîîkoꞌmansen pe pra awanîꞌpî. Tîîse iteꞌmaꞌpî pîꞌ Morî Yekaton Wannî nîkupî wanî ipatîkarî tîîkoꞌmansen pe, taataretîꞌkasen pe pra. Mîrîrî yeꞌnen itentai puꞌkuru morî pe awanî.
12 Mîrîrî yeꞌnen meruntî ke puꞌkuru itekare ekaremekî annaya. Yairî uurîꞌnîkon kupî Paapaya epuꞌtî annaya yeꞌnen, ekaremekî annaya teweppeꞌse pra.
13 Ekaremekî annaya pepîn, manniꞌ Moisés nurîꞌtîya ekaremekîꞌpî warantî. Mîîkîrîya tenpata yettapurîꞌpî kamisa apiꞌtîmî ke. Mîrîrî kupîꞌpîiya, maasa pra Israel ponkonya tenpata yaꞌkaru tîpamî eraꞌma namai, yenonpîtîꞌpîiya.
14 Inkamoro Israel ponkonya epuꞌtî pra awanîꞌpî maasa pra toꞌ esenumenkatoꞌ wanîꞌpî kamisa apiꞌtîmî ke yettapusaꞌ warantî. Sîrîrî tîpose Israel pemonkonoyamîꞌya epuꞌtî pra awanî, Paapa maimu eꞌmenukasaꞌ erenka tîuyaꞌnîkon yai. Tîîse inkamoroya epuꞌtî eꞌpainon innape Cristo kupî tîuyaꞌnîkonya yai.
15 Mîrîrî yeꞌnen Moisés nurîꞌtî nîmenukaꞌpî erenka toꞌya yai, epuꞌtî toꞌya pepîn, maasa pra tenpatakon yettapusaꞌ warantî toꞌ esenumenkatoꞌ wanî sîrîrî tîpose.
16 Tîîse mîrîrî emoꞌka eꞌpainon, îꞌ kaiꞌma Paapa maimu eꞌmenukasaꞌya taasaꞌ manniꞌ warantî. Taꞌpîiya: —Moisés nurîꞌtî yenpata yettaputoꞌ emoꞌkaꞌpî, îꞌ pensa Uyepotorîkon yarakkîrî eseurîmai awennaꞌposaꞌ yai. Mîrîrî warantî epuꞌnen pe eꞌnî, maꞌnîpanen emoꞌka innape Uyepotorîkon kupî yai. Moropai epuꞌtî.
17 Sîrîrî Uyepotorîkon taatoꞌ wanî Morî Yekaton Wannî pe. Moropai uyesaꞌkon pe Morî Yekaton Wannî wanî ya, mîîkîrî maimu yawîrî eꞌnî, Moisés nekaremekîꞌpî yawîrî pra.
18 Tamîꞌnawîronkon uurîꞌnîkon yenpata wanî inaponkasaꞌ warantî tîweꞌsen pe. Morî pe Paapa eꞌtoꞌ eraꞌmaꞌpî Moisésya warantî, morî pe Uyepotorîkon eꞌtoꞌ eraꞌma uurîꞌnîkonya, aronne. Mîrîrî ipîkku pe Uyepotorîkon eꞌtoꞌ wanî tuiꞌsen pe iwinîpai, manniꞌ Morî Yekaton Wannî winîpai. Moropai mîîkîrîya uurîꞌnîkon kupî tîwarantî eꞌnîtoꞌpe. Moropai mîrîrî warantî uurîꞌnîkon kupî pîꞌ aakoꞌmamî, inîꞌ panpîꞌ morî pe uyeserukon enatoꞌpe.
