Sîrîrî Kaareta Itakon Iteꞌka Pe Paulo Nîmenukaꞌpî Coríntio Ponkon Pia 5:1-21
5 Maasa pra epuꞌtî man, see warantî awanî pe man. Warayoꞌya tappîi yaranka, tîîmoꞌta yai amenan tewîꞌ ta. Mîrîrî warantî îꞌ pensa ita koꞌmannîtoꞌ, upiꞌpîkon ataretîꞌka ya, Paapaya amenan uyesaꞌkon ton tîrî, ita koꞌmannîtoꞌpe kaꞌ po, taataretîꞌkasen pepîn. Maasa pra mîîkîrîya ikupîꞌpî, pemonkonya pra.
2 Tarî anna koꞌmamî tanne, anna esekaꞌnunka mararî pra uyesaꞌkon pe inkonekaꞌpî kaꞌ po, mîrîrî ta ikoꞌmanpai.
3 Ipon pra tîweꞌsenya yekaꞌma warantî uurîꞌnîkonya yekaꞌma itesaꞌ pra esepuꞌnî namai.
4 Tarî upiꞌpîkon ke anna koꞌmamî pîkîrî, teesenumenkai anna koꞌmamî. Saꞌmantapai anna wanî pepîn, tîîse amenan morî puꞌkuru anna esaꞌ ton yuꞌse anna wanî, Paapa winîpainon. Mîrîrî yekaꞌmaꞌnîkon ya, tarîron uyesaꞌkon taataretîꞌkasen miakanmaiya, taataretîꞌkasen pe pra, ipatîkarî koꞌmannîtoꞌpe Paapa pia.
5 Mîîkîrî Paapaya mîrîrî konekaꞌpî anna ton pe, anna miakanmapa kaiꞌma. Moropai mîîkîrîya Morî Yekaton Wannî tîrîꞌpî tamîꞌnawîrî îꞌ tîrî tîuya anna pia ekaremeꞌnen pe aweꞌtoꞌpe.
6 Mîrîrî yeꞌnen tîwîrî kureꞌne taatausinpai anna wanî anna pona tamîꞌnawîrî tuiꞌsen pîꞌ. Epuꞌtî man, tarî koꞌmannîtoꞌ uyesaꞌkon ta siꞌma, aminke koꞌmannî Uyepotorîkon piapai, amenan uyesaꞌkon, ipatîkaron ke pra.
7 Aminke Uyepotorîkon piapai koꞌmannî yeꞌnen, innape Paapa kupî pîꞌ koꞌmannî, eraꞌma pra tîîse.
8 Tîîse teesewankonoꞌmai pra anna koꞌmamî. Maasa pra upiꞌpîkon piapai, Paapa pia ikoꞌmanse itîîpai anna wanî yeꞌnen.
9 Mîrîrî yeꞌnen tamîꞌnawîron yuꞌse eꞌnî yentai Paapa yapurî eꞌpai awanî tarî koꞌmannî yeꞌka pe. Mîîwîni pra awanî ya, iipia koꞌmannî yeꞌka pe Paapa yapurî.
10 Maasa pra tamîꞌnawîrî uurîꞌnîkon koꞌmantoꞌ eseraꞌma kupî sîrîrî. Cristoya uurîꞌnîkon yakoꞌmenka tiwin pîꞌ uurîꞌnîkon tîîse. Mîrîrî yai ukaisarîꞌnîkon koꞌmannîtoꞌ morî wenai, koꞌmannîtoꞌ îꞌ pe pra rî wenai, yapisî iwinîpai. Cristoya uurîꞌnîkon repa kupî sîrîrî.
Cristo Nîkupîꞌpî Wenai
Paapaya Tîwanîyakon Ukupîkon
11 Cristoya anna yakoꞌmenka epuꞌtî annaya yeꞌnen, Paapa nama annaya. Mîrîrî yeꞌnen, yairon pîꞌ pemonkonyamîꞌ yenupa pîꞌ anna wanî, toꞌ anpîikaꞌtîpai anna wanî yeꞌnen. Mîrîrî kupî annaya epuꞌtî pîꞌ Paapa man yairî puꞌkuru. Moropai ayewankon yaꞌ epuꞌtîyaꞌnîkon, yairî nîrî ikupî pîꞌ anna man.
12 Anna yeseru pîꞌ atapurî pepîn, ipîkku pe anna wanî epuꞌtîkonpa. Tîîse tiaronkon yuukukonpa îꞌ kaiꞌma anna yapurîyaꞌnîkon, manniꞌkan taatapurîsanon pîꞌ. Maasa pra inkamoro atapurî morî pe teeseurîmatoꞌ, ipîkku pe tîweꞌtoꞌkon wenai. Tîîse tewankon yaꞌ tîîkoꞌmansen, imakuiꞌpî teserukon pîꞌ toꞌ esenumenka pepîn.
13 Tiaron pe anna yeseru eraꞌmayaꞌnîkon ya, pakko pe anna wanî kaiꞌma tiaronkon esenumenkaꞌpî anna pîꞌ. Tîîse anna wanî Paapa wakîri pe eꞌpai. Moropai mîrîrî warantî anna koꞌmamî. Yairon pîꞌ anna eseurîma amîrîꞌnîkon pîikaꞌtîtoꞌpe annaya.
14 Maasa pra mîrîrî kupî annaya Cristoya anna saꞌnama yeꞌnen. Epuꞌtî pîꞌ anna man, tiwin pemonkon saꞌmantaꞌpî tamîꞌnawîronkon pataꞌseꞌ yaꞌ, tamîꞌnawîronkon saꞌmanta eꞌpai tîîse. Mîrîrî wenai epuꞌtîꞌnîkon tamîꞌnawîronkon saꞌmantaꞌpî Cristo yarakkîrî.
15 Mîîkîrî saꞌmantaꞌpî tamîꞌnawîronkon ton pe, mîrîrî yeꞌnen inîꞌrî manniꞌkan enen tîweꞌsanon, inkamoro koꞌmamî namai tîîwarîrîꞌnîkon ituꞌse tîwanîkon pîꞌ, tîîse ituꞌse Cristo eꞌtoꞌ pîꞌ toꞌ koꞌmamî. Manniꞌ isaꞌmantaꞌpî moropai tîîsaꞌmantaꞌpî tîpo, eꞌmîꞌsaꞌkaꞌpî ton pe toꞌ koꞌmamî.
16 Cristo yarakkîrî uurîꞌnîkon saꞌmantaꞌpî yeꞌnen, anna esenumenka pepîn pemonkonyamîꞌ pîꞌ, tîpîꞌnîkon sîrîrî pata po tîîkoꞌmansenon esenumenka warantî. Teuren pena Cristo pîꞌ anna esenumenkaꞌpî inkamoro Paapa epuꞌnenan pepîn esenumenka warantî. Tarîpai inîꞌrî mîrîrî warantî anna esenumenka pepîn.
17 Maasa pra anîꞌ wanî ya Cristo yarakkîrî tîîkoꞌmansen pe, mîîkîrî wanî amenan teseru ton yapisîtîpon pe. Penaroꞌ imakuiꞌpî iteseru, mîrîrî ataretîꞌkaꞌpî. Tarîpai amenan teseru ton yapisîꞌpîiya iwinîpai. Mîrîrî wanî kureꞌne esenumenkantoꞌ pe.
18 Tamîꞌnawîrî mîrîrî kupîꞌpî Paapaya Cristo nîkupîꞌpî wenai. Anna miakanmaiya teeyaton pe anna wanî winîpai tîwanîyakon pe anna eꞌtoꞌpe. Moropai anna pia anna nîkupî ton tîrîꞌpîiya, îꞌ kaiꞌma tiaronkon nîrî ena emapuꞌtîtoꞌpe Paapa wanîyakon pe.
19 Anna nekaremekî itekare wanî see warantî: Paapaya unkupîꞌpîkon imakuiꞌpî eraꞌma pepîn, tîwanmîra ikuꞌsaꞌ tîuya yeꞌnen. Maasa pra Cristo nîkupîꞌpî wenai ikupîꞌpî Paapaya tamîꞌnawîrî tîwanîyakon pe eꞌnîtoꞌpe. Mîrîrî ekaremeꞌtoꞌpe annaya, Paapaya itîrîꞌpî îꞌ kaiꞌma ikupî tîuya pemonkonyamîꞌ yarakkîrî, tîwanîyakon pe toꞌ kupîiya.
20 Mîrîrî yeꞌnen anna wanî sîrîrî Cristo naipontîꞌsan pe ipîꞌ teeseurîmasanon pe. Akoreꞌtaꞌnîkon siꞌma, Paapa eseurîma warantî, esatî Paapaya anna wenai. Tîwî Paapaya amîrîꞌnîkon miakanma iteyaton pe awanîkon wenai, tîwanîyakon pe ayinyakanmatoꞌpeiyaꞌnîkon.
21 Maasa pra mîîkîrî Cristo wanîꞌpî tiwin kin imakuiꞌpî ton pra. Tîîse Paapaya umakuyikon rumakaꞌpî ipona, iwenai tîmoron epuꞌtoꞌpeiya kaiꞌma. Mîrîrî miakannoꞌpî pe, yairon yapiꞌtoꞌpe uurîꞌnîkonya, Paapa winîpainon. Mîrîrî wenai tîwanîyakon uyapisîiyaꞌnîkon.
