Sîrîrî Kaareta Itakon Iteꞌka Pe Paulo Nîmenukaꞌpî Coríntio Ponkon Pia 6:1-18
6 Paapa esenyakaꞌmatoꞌ pîꞌ teesenyakaꞌmasanon pe anna wanî yeꞌnen, esatî annaya apîꞌnîkon see warantî: Epeꞌmîra Paapa nîtîrî yapiꞌsaꞌyaꞌnîkon yai, apîikaꞌtîꞌpîiyaꞌnîkon. Mîrîrî yeꞌnen îꞌ pe pra rî anapisîꞌpîkon kîꞌkuꞌtî.
2 Mîrîrî warantî taasaꞌ Paapa maimu eꞌmenukasaꞌya:Amîrî pîikaꞌtîtoꞌ weiyu eposaꞌ yai,amaimu, anesatîꞌpî etaꞌpîuya.Moropai manniꞌ weiyu yai, apîikaꞌtîꞌpîuya,imakuiꞌpî ankupîꞌpî winîpai.
taꞌpî Paapaya pena. Mîrîrî yeꞌnen tauya sîrîrî. Sîrîrîpe awanî, Paapa winîpainon eꞌpîikaꞌtîntoꞌ yapiꞌtoꞌpe. Umaimu etatî, aasîrî eeseposaꞌ man, eꞌpîikaꞌtîntoꞌ weiyu.
3 Îꞌ pe pra rî anna esenyakaꞌmatoꞌ kupî tiaronya yuꞌse pra anna man. Mîrîrî yeꞌnen tiaronkon yakaꞌma yuꞌse anna wanî pepîn anna yeseru ke.
4 Tîîse tamîꞌnawîrî Paapa esenyakaꞌmatoꞌ pîꞌ anna esenyakaꞌma yeseru ekaremekî annaya, mararon pepîn yapîtanîpîiꞌma. Anna eꞌtarumaꞌtî yeꞌka pe kureꞌne, îꞌ yuꞌse anna wanî wenai, moropai saꞌman erepamî tanne anna pona, yapîtanîpî annaya.
5 Tiaron pensa anna poꞌpîtîꞌpî toꞌya, anna yarakkamoꞌpî toꞌya, moropai mararonkon pepîn pemonkonyamîꞌ eperepîꞌsan ekoreꞌmaꞌpî anna pîꞌ. Moropai anna esenyakaꞌmaꞌpî mararî pra anna wetun pîn, moropai anna yekkari yonpa annaya pîn. Tamîꞌnawîrî mîrîrî yapîtanîpîꞌpî annaya Paapa poitîrî pe anna wanî wenai.
6 Moropai mîrîrî wenai morî pe, nura pe pra anna yeseru eꞌtoꞌpe yuwa annaya, yairî itekare ekaremeꞌtoꞌpe annaya. Moropai teekoreꞌmasen pe pra, moropai eranmîra anna eꞌtoꞌpe yuwa annaya. Moropai Morî Yekaton Wannîya anna pîikaꞌtî yeꞌka pe, tiaronkon saꞌnama annaya, Paapaya anna saꞌnama warantî.
7 Moropai yairî puꞌkuru itekare ekaremekî annaya. Moropai Paapa meruntîri pe puꞌkuru anna esenyakaꞌma mîîkîrî tonpe. Moropai yairî puꞌkuru anna yeseru wanî itekare ekaremekî yai moropai tiaronkon Paapa epuꞌnenan pepîn maimu yuuku yai, anna yeseru wanî yairî.
8 Tiaron pensa tiaronkonya anna yapurî anna yeseru wenai tîîse tiaronkonya anna yewanmîrî. Moropai tiaronkonya anna muꞌtunpa, tiaronkonya anna saꞌnama tanne. Tiaronkonya taa anna pîꞌ seruꞌyeꞌkon, tîîse yairon pîꞌ anna eseurîma tanne.
9 Paapaya anna epuꞌtî mîrîrî morî pe tîîse tiaronkon pemonkonyamîꞌ esenumenka îꞌ pe pra rî tîweꞌsanon pe anna wanî kaiꞌma. Tuꞌke iteꞌka anna esenumenka anna saꞌmanta kaiꞌma, tîîse sîrîrî tîpose enen anna koꞌmamî sîrîrî. Teuren tiaron pensa anna tarumaꞌtî toꞌya tanne, tîîse anna saꞌmantasaꞌ pra man.
10 Tiaron pensa anna wanî teesewankonoꞌmai teuren. Tîîse taatausinpai anna koꞌmamî tîwîrî. Anna eseraꞌmaꞌpî îꞌ ton pînon warantî, tîîse tuꞌke ipîkku pe tiaronkon kupîꞌpî annaya. Îꞌ ton pra warantî anna esepuꞌtî tanne tîîse tamîꞌnawîron, Paapa winîpainon esaꞌ pe anna wanî. Tamîꞌnawîron mîrîrî yapîtanîpî annaya tanne, Paapa esenyakaꞌmatoꞌ pîꞌ anna koꞌmamî yairî.
11 Uyonpayamîꞌ, Coríntio cidaderî ponkon, anna eseurîmaꞌpî ayarakkîrîꞌnîkon tamîꞌnawîrî anna nepuꞌtî pîꞌ. Moropai îꞌ kaiꞌma kureꞌne amîrîꞌnîkon saꞌnama annaya ekaremekîꞌpî annaya.
12 Tîwîrî amîrîꞌnîkon saꞌnama pîꞌ anna koꞌmamî. Tîîse amîrîꞌnîkonya anna saꞌnama pra man, pena anna saꞌnamaꞌpîyaꞌnîkon warantî.
13 Eseurîma apîꞌnîkon unmukuyamîꞌ pîꞌ eseurîma warantî. Amîrîꞌnîkon saꞌnamaꞌpî annaya warantî anna saꞌnamayaꞌnîkon yuwatî, îꞌ kaiꞌma ayewankon tîsaꞌmannîꞌse pra.
Paapa Epuꞌnenan Pepîn Yeseru Yawîrî Pra Eꞌnî
14 Inîꞌrî innape Cristo kuꞌnenan pepîn yarakkîrî pra eꞌtî. Maasa pra imakuiꞌpî kuꞌnenan pe toꞌ wanî, tîîse amîrîꞌnîkon, innape ikuꞌnenan koꞌmamî imakuiꞌpî tîkuꞌse pra. Mîrîrî wanî manniꞌ paakayamîꞌ pîmî yeꞌpî pona tîtîsen warantî, paaka yarakkîrî kaware pona itîîsaꞌ ya, morî pe awanî pepîn. Mîrîrî warantî morî kuꞌnen koꞌmamî pepîn imakuiꞌpî kuꞌnen yarakkîrî. Maasa eraꞌmatî îꞌ kaiꞌma aꞌka koꞌmamî ewaron yarakkîrî? Aakoꞌmamî pepîn. Mîrîrî warantî Paapa epuꞌnen pepîn yarakkîrî Paapa epuꞌnen koꞌmamî pepîn maasa pra toꞌ yeseru wanî tiaron pe, seꞌ kaisarî pra.
15 Moropai oꞌnon yeꞌka pe morî pe Cristo koꞌmamî eꞌpainon Makui yarakkîrî? Aakoꞌmamî pepîn, maasa pra toꞌ esenumenka tiaron pe, seꞌ kaisarî pra. Innape tîkuꞌnenan pia morî tîrî Paapaya, tîîse innape tîkuꞌnenan pepîn pîikaꞌtîiya pepîn.
16 Paapa yapurînen pe siꞌma, miaꞌ ke ikonekasaꞌ yapurî eserîke pra awanî, Paapa epuꞌnenan pepîn warantî. Maasa pra miaꞌ ke ikonekasaꞌ yarakkîrî Paapa eseta pepîn, eeseurîma pepîn. Moropai tewîꞌ pe uurîꞌnîkon konekasaiꞌya, uyaꞌnîkon tîîkoꞌmantoꞌpe. Mîrîrî pîꞌ Paapa eseurîmaꞌpî pena:Uurî koꞌmamî pe wai toꞌ pokonpe.Moropai asarî inkamoro koreꞌta.Uurî wanî pe wai toꞌ yepotorî pe,uyapurîtoꞌpe toꞌya,moropai inkamoro wanî pe man upemonkono pe
taꞌpîiya.
17 Moropai mîrîrî wenai inîꞌrî Uyepotorîkonya taa:Amîrîꞌnîkon atarima eꞌpai man,inkamoro yeꞌka piapai.Toꞌ rumakatî, mîrîrî yeꞌka nura kupîyaꞌnîkon namai.Tîîse tiaron, morî teseru ke akoꞌmantî.Moropai mîrîrî yai amîrîꞌnîkon yapisîuya uwanîyakon pe
taiya.
18 Moropai taa Uyepotorîkonya, meruntî puꞌkuru manniꞌya:Uurî wanî pe wai ayunkon pemoropai amîrîꞌnîkon wanî pe man unmukuyamîꞌ pe
taiya. Mîrîrî warantî taa Uyepotorîkonya upîꞌnîkon.
