Sîrîrî Kaareta Itakon Iteꞌka Pe Paulo Nîmenukaꞌpî Coríntio Ponkon Pia 7:1-16
7 Uyonpayamîꞌ, uwakîrikon puꞌkuru tamîꞌnawîrî sîrîrî îꞌ taꞌpî Paapaya wanî uurîꞌnîkon ton pe. Mîrîrî yeꞌnen morî pe eꞌnîꞌnîkon yuwa sîrîrî. Nura kupî pîꞌ koꞌmannîtoꞌ rumakapaiꞌnîkon, imakuiꞌpî pîꞌ esenumenkantoꞌ rumakapaiꞌnîkon, imakuiꞌpî koꞌmamî namai uyewankon yaꞌ. Tîîse morî pe koꞌmannîpaiꞌnîkon Paapa wakîri pe eꞌnîtoꞌpe, inamaiꞌma.
Paulo Atausinpatoꞌ Coríntio Ponkon Pîꞌ
2 Morî pe enatî anna pokonpe, maasa pra anîꞌkan tarumaꞌtîsaꞌ annaya pra man amîrîꞌnîkon koreꞌta. Anîꞌkan yenkuꞌtîsaꞌ annaya pra man tiwin kin. Mîrîrî epuꞌtî pîꞌ naatîi.
3 Moropai amîrîꞌnîkonya imakuiꞌpî kuꞌsaꞌ taasauꞌya pra wai tiwin kin. Maasa pra pena taꞌpîuya see warantî, amîrîꞌnîkon wanî uwakîrikon pe puꞌkuru. Îꞌ rî ton pra man uurîꞌnîkon pantakanen ton. Mîrîrî warantî eꞌnî tanne, enen eꞌnî pîkîrî moropai saꞌmantan pîkîrî.
4 Yairî aakoꞌmamîkon epuꞌtî pîꞌ wai. Mîrîrî pîꞌ esenumenka ya, atausinpasaꞌ wanî. Mîrîrî wenai upîikaꞌtîsaꞌyaꞌnîkon. Inîꞌ panpîꞌ taatausinpai koꞌmannî pîꞌ wai, eꞌtarumaꞌtî tanne.
5 Aꞌkî, anna erepamîꞌpî pata pai Macedônia pata pona anna erîꞌkaꞌsaꞌ pra man. Maasa pra tamîꞌnawîronkon patakon poro teesuwaꞌkasen saꞌman wanîꞌpî. Ekoreꞌmantoꞌ moro awanîꞌpî, moropai eranneꞌ pe anna kupîꞌpîiya.
6 Tîîse manniꞌ Paapa, yairî maꞌre tîweꞌsen yausinpanenya anna atausinpatoꞌ ton tîrîꞌpî, uyonpakon Tito erepamî weiyu yai.
7 Moropai mîîkîrî Tito erepantoꞌ neken pîꞌ pra, tîîse itekare etauya yeꞌnen iwinîpai. Îꞌ kaiꞌma amîrîꞌnîkonya yausinpaꞌpî yekare pîꞌ atausinpaꞌpî. Mîîkîrîya ayekarekon ekaremekîꞌpî. Îꞌ kaiꞌma uurî aneraꞌmapai awanîkon yekare, moropai îꞌ kaiꞌma kureꞌne teesewankonoꞌmai awanîkon, imakuiꞌpî ankupîꞌpîkon pîꞌ, moropai îꞌ kaiꞌma uurî anpîikaꞌtîpai awanîkon yekare ekaremekîꞌpîiya. Mîrîrî pîꞌ inîꞌ panpîꞌ taatausinpai uurî wanî.
8 Îꞌ kaiꞌma uurî esewankonoꞌma pra wai kaareta menukasauꞌya pîꞌ aapiaꞌnîkon. Tîîse amîrîꞌnîkon esewankonoꞌmaꞌpî ipîꞌ epuꞌsauꞌya ya, esewankonoꞌmaꞌpî, ukaaretarîya ayewankonoꞌmaꞌpîkon yeꞌnen.
9 Tîîse mîrîrî yeꞌka pe pra, uurî wanî sîrîrî taatausinpai. Ukaaretarîya ayewankonoꞌmaꞌpîkon pîꞌ pra tîîse mîrîrî eesewankonoꞌmatoꞌkon wanî amîrîꞌnîkon esenumenkatoꞌpe. Maasa pra mîrîrî esewankonoꞌmantoꞌ tîrîꞌpî Paapaya aapiaꞌnîkon imakuiꞌpî ankupîꞌpîkon rumakakonpa. Moropai mîrîrî wenai amîrîꞌnîkon tarumaꞌtîsaꞌ annaya pra man tiwin kin.
10 Maasa pra mîrîrî esewankonoꞌmantoꞌ wanî Paapa winîpai tuiꞌsen imakuiꞌpî unkupîꞌpîkon winîpai eꞌpîikaꞌtîntoꞌ eporî emapuꞌtînen pe. Mîrîrî yeꞌnen mîrîrî pîꞌ teesewankonoꞌmai eꞌnîpai pra man. Tîîse Paapa epuꞌnenan pepîn pia awanî saꞌmantantoꞌpe, maasa pra imakuiꞌpî tînkupîꞌpîkon winîpai toꞌ esewankonoꞌmasaꞌ pra awanî yeꞌnen.
11 Maasa eraꞌmatî îꞌ kupîꞌpî Paapaya amîrîꞌnîkon esewankonoꞌmatoꞌ winîpai. Kaꞌneꞌ pe imakuiꞌpî ankupîꞌpîkon anrumakapai amîrîꞌnîkon wanîꞌpî, pemonkon yairon pe awanîkonpa. Moropai kaꞌneꞌ pe anna pîꞌ morî pe eekonekaꞌpîkon anekaremeꞌpai awanîkon. Moropai îꞌ kaiꞌma teekoreꞌmai awanîkon imakuiꞌpî ankupîꞌpîkon pîꞌ moropai eranneꞌ pe awanîꞌpîkon Paapaya atarumaꞌtîkon pîꞌ, moropai uurî iipî yuꞌse awanîꞌpîkon aapiaꞌnîkon. Moropai yairon kupî pîꞌ ikoꞌmanpai awanîkon, moropai imakuiꞌpî tarumaꞌtîpai awanîkon. Tamîꞌnawîrî mîrîrî wenai ekaremekîyaꞌnîkon morî pe, îꞌ rî ton pra awanîkon epuꞌtoꞌpe annaya.
12 Mîrîrî yeꞌnen mîrîrî kaareta menukasauꞌya manniꞌ imakuiꞌpî kupîtîpon neken wenai pra, moropai manniꞌ inkupîꞌpî imakuiꞌpî wenai tîmoron epuꞌtîtîpon wenai pra, tîîse imenukaꞌpîuya aronne Paapaya epuꞌtoꞌpe, kureꞌne amîrîꞌnîkonya anna saꞌnama.
13 Mîrîrî wenai kureꞌne taatausinpai anna wanî.
Mîrîrî tîîse inîꞌ panpîꞌ anna enaꞌpî taatausinpai Tito pokonpe. Maasa pra morî pe mîîkîrî pîikaꞌtîꞌpîyaꞌnîkon inîꞌrî apîꞌnîkon eesewankonoꞌma namai.
14 Maasa pra apîꞌnîkon eseurîmaꞌpî morî pe. Tarîpai akoreꞌtaꞌnîkon attîsaꞌ yai, innape eseurîmaꞌpî yawîrî awanîꞌpîkon. Uyeppeꞌnîpîyaꞌnîkon pra awanîꞌpîkon. Moropai îꞌ kaiꞌma Tito pîꞌ ayekarekon ekaremeꞌsaꞌ annaya mîrîrî nîrî wanîꞌpî innape.
15 Mîrîrî wenai inîꞌ panpîꞌ Tito eꞌsaꞌnamatoꞌ ena kureꞌne îꞌ kaiꞌma tamîꞌnawîrî ayeserukon epuꞌtî tîuya wenai. Moropai imaimu yawîrî awanîkon epuꞌtî tîuya wenai moropai îꞌ kaiꞌma yapisîꞌpîyaꞌnîkon, eerepamî yai akoreꞌtaꞌnîkon iwakîri pe. Mîîkîrî namaꞌpîyaꞌnîkon moropai mîî pe pra awanîꞌpîkon iwinîkîi.
16 Mîrîrî wenai kureꞌne taatausinpai uurî wanî, maasa pra yairî awanîkon epuꞌtîuya yeꞌnen.
