Sîrîrî Kaareta Itakon Iteꞌka Pe Paulo Nîmenukaꞌpî Coríntio Ponkon Pia 8:1-24
8 Uyonpayamîꞌ, îꞌ kupîꞌpî Paapaya epuꞌtîyaꞌnîkon yuꞌse wai Macedônia pata ponkon pîꞌ, innape tîkuꞌnenan yarakkîrî. Kureꞌne inkamoro pîikaꞌtîꞌpîiya.
2 Maasa pra miarîronkon uyonpakonya saꞌman teesuwaꞌkasen epuꞌtîꞌpî tarakkîrîꞌnîkon. Mîrîrî pîꞌ toꞌ esewankonoꞌma pra awanîꞌpî, tîîse toꞌ atausinpaꞌpî inîꞌ panpîꞌ. Teuren îꞌ ton pra toꞌ esepuꞌtî tanne, tîntîrîkon tîrîꞌpî toꞌya inîꞌ panpîꞌ antîîpai tîwanîkon pîkîrî.
3 Tauya amîrîꞌnîkon pîꞌ inkamoroya itîrîꞌpî tamîꞌnawîrî, anîꞌya esatî pra tîîse. Moropai itentai panpîꞌ itîrîꞌpî toꞌya kureꞌne antîîpai tîwanîkon yeꞌnen.
4 Moropai esatîꞌpî toꞌya anna pîꞌ tîntîrîkon tîrîkonpa Paapa pemonkonoyamîꞌ Judéia po tîîkoꞌmansenon pîikaꞌtîkonpa kaiꞌma. Mîrîrî kupîkonpa esatî pîꞌ toꞌ koꞌmamîꞌpî.
5 Moropai mîrîrî kupîꞌpî toꞌya kureꞌne inîmîkîꞌpî annaya yentai. Maasa pra eꞌmaiꞌ pe toꞌ eturumakaꞌpî Paapa yenyaꞌ, ituꞌse Paapa eꞌtoꞌ yawîrî tîîkoꞌmamîkonpa. Mîrîrî tîpo anna pia toꞌ eturumakaꞌpî, anna maimu yawîrî toꞌ eꞌtoꞌpe. Maasa pra mîrîrî yuꞌse Paapa wanî epuꞌtîꞌpî toꞌya.
6 Mîrîrî yeꞌnen esatîꞌpî annaya Tito pîꞌ maasa pra eꞌmaiꞌ pe mîîkîrî esenyakaꞌma piaꞌtîꞌpî amîrîꞌnîkon koreꞌta. Mîrîrî yeꞌnen tîwîrîrî aakoꞌmamî apîikaꞌtîkonpa mîrîrî antîrîkon yapiꞌtoꞌpeiya aretîꞌka tîuya pîkîrî.
7 Moriya tamîꞌnawîron ankupîkon pîꞌ eesekaremekîkon, tiaronkon yentai awanîkon. Innape ikuꞌtoꞌyaꞌnîkon, moropai itekare ekaremeꞌtoꞌkon, moropai epuꞌnen pe aweꞌtoꞌkon îꞌ kaiꞌma tiaronkon anpîikaꞌtîpai aweꞌtoꞌkon. Moropai anna saꞌnamatoꞌyaꞌnîkon wanî. Moropai inîꞌ panpîꞌ ikupîyaꞌnîkon yuꞌse wai. Tiaronkonya itîrî yentai antîrîkon tîrîyaꞌnîkon yuꞌse wai, yarimakonpa manniꞌkan îꞌ ton pînon pia.
8 Amîrîꞌnîkon yaipontîuya pepîn mîrîrî tîrîkonpa, tîîse tiaronkon atausinpa mîrîrî pîꞌ epuꞌtîkonpa. Mîrîrî warantî amîrîꞌnîkon eꞌsaꞌnamantoꞌ eseraꞌma yairî puꞌkuru awanî.
9 Maasa pra epuꞌnenan amîrîꞌnîkon, kureꞌnan Uyepotorîkon Jesus Cristo eꞌsaꞌnamatoꞌ. Mîîkîrî wanîꞌpî ipîkku pe tîîse, mîîkîrîya ipîkku pe tîweꞌtoꞌ nîmîꞌpî. Îꞌ ton pra tîweꞌsen pe eenaꞌpî. Amîrîꞌnîkon wenai, mîrîrî kuꞌsaiꞌya amîrîꞌnîkon eꞌtoꞌpe ipîkku pe. Mîrîrî kupîꞌpîiya, amîrîꞌnîkon pîikaꞌtîpa.
10 Sîrîrî uurî esenumenkatoꞌ mîrîrî ankupîkon ton pîꞌ: Morî pe awanî uupia amîrîꞌnîkonya aretîꞌka ya, isaraꞌtîꞌpîyaꞌnîkon konoꞌ eesuwaꞌkaꞌpî manniꞌ pîꞌ. Îꞌ ton pînon pîikaꞌtîkonpa antîrîꞌpîkon tîrîꞌpîyaꞌnîkon eꞌmaiꞌ pe tiaronkonya itîrî rawîrî. Moropai mîrîrî neken pra tîîse eꞌmaiꞌ pe amîrîꞌnîkon wanîꞌpî nîrî toꞌ anpîikaꞌtîpai.
11 Mîrîrî yeꞌnen mîrîrî eesenyakaꞌmatoꞌkon yaretîꞌkatî. Mîrîrî kuꞌtî awakîrikon pe puꞌkuru, taatausinpai eꞌmaiꞌ pe itîrîꞌpîyaꞌnîkon, mîrîrî warantî itîîtî. Îꞌ aapiaꞌnîkon tîweꞌsen yawîrî itîîtî.
12 Maasa pra anîꞌ itîînen nîtîrî yapisî Paapaya antîîpai tîwanî yeꞌnen. Tîntîrî kaisarî itîrîiya yuꞌse Paapa wanî. Intîrî ton esatîiya pepîn ipîꞌ îꞌ ton pra tîîse.
13 Tauya pepîn tiaronkonya itîrî namai amîrîꞌnîkonya neken itîîtoꞌpe. Moropai mîrîrî kupîkonpa tauya ya, amîiꞌne pe awanî eꞌpainon amîrîꞌnîkon pia. Tîîse tîmenkai pra tamîꞌnawîronkon amîrîꞌnîkon eꞌtoꞌpe seꞌ kaisarî.
14 Sîrîrîpe amîrîꞌnîkon pia awanî mararî pra, mîrîrî yeꞌnen manniꞌkan îꞌ ton pînon pîikaꞌtîyaꞌnîkon eꞌpai awanî. Îꞌ pensa itesaꞌ pe inkamoro enasaꞌ ya, inkamoroya nîrî amîrîꞌnîkon pîikaꞌtî eserîke awanî. Mîrîrî warantî aweꞌpîikaꞌtîkon ya, seꞌ kaisarî awanîkon.
15 Mîrîrî pîꞌ pena Paapa maimu eꞌmenukasaꞌya taasaꞌ man: Taꞌpîiya:—Manniꞌkan tuꞌke tekkarikon ton moꞌkaꞌtîponkonya imoꞌkaꞌpî tîîse itonparîꞌpî eꞌkupî pra awanîꞌpî.Moropai manniꞌkan tuꞌke pra tekkarikon ton moꞌkanenanya imoꞌkaꞌpî. Tîîse toꞌ maꞌre aweꞌsaꞌ pra awanîꞌpî.
—taꞌpîiya. Mîrîrî warantî eꞌpai awanî amîrîꞌnîkon pokonpe.
Tito Moropai Tiaronkon Ayonpakon Wîtî Coríntio Pona
16 Paapa yapurî pîꞌ wai kureꞌne, maasa pra Tito wanî yeꞌnen amîrîꞌnîkon anpîikaꞌtîpai, anna wanî manniꞌ warantî. Paapaya ikupîꞌpî.
17 Mîîkîrî Titoya îꞌ taatoꞌ annaya tîpîꞌ inna taꞌpî. Mîrîrî pîꞌ neken pra, tîîse amîrîꞌnîkon yarakkîrî esepopai awanîꞌpî mararî pra.
18 Mîîkîrî yarakkîrî tiwin uyonpakon yarima annaya sîrîrî. Mîîkîrî wanî kureꞌne tînamasen pe eesenyakaꞌmatoꞌ wenai. Maasa pra mîîkîrî esenyakaꞌma Cristo yekare ekaremekî pîꞌ.
19 Mîrîrî tîîse mîîkîrî uyonpakon wanî imenkasaꞌ pe attîtoꞌpe anna pokonpe, anna pîikaꞌtînen pe. Maasa pra antîrîꞌpîkon yarî annaya îꞌ ton pînon pia tîîtoꞌpe annaya. Mîrîrî wenai epuꞌtî toꞌya, kureꞌne inkamoro anpîikaꞌtîpai anna wanî, sîrîrî esenyakaꞌmatoꞌ pîꞌ, Paapa yapurî pe.
20 Anna yarakkîrî mîîkîrî wîtî tiaronkon eseurîma namai, anna winîkîi, seeniꞌ îꞌ ton pînon pîikaꞌtîtoꞌpe anna narî wenai.
21 Anna esenyakaꞌma yeseru wanî yairî epuꞌtî Paapaya, tîîse mîîkîrîya neken pra, tîîse pemonkonyamîꞌya nîrî epuꞌtî yuꞌse anna wanî.
22 Mîrîrî yeꞌnen inkamoro pokonpe tiaron uyonpakon yarima annaya sîrîrî. Tuꞌke iteꞌka mîîkîrî nîkupî ton tîrîꞌpî annaya mîîkîrîya ikupîꞌpî aweꞌtoꞌ yawîrî. Mîrîrî yeꞌnen epuꞌtîꞌpî annaya pemonkonyamîꞌ anpîikaꞌtîpai awanî. Moropai mîîkîrî wanî sîrîrîpe kureꞌne amîrîꞌnîkon anpîikaꞌtîpai tîwanî pîꞌ eesenumenka.
23 Tarîpai Tito pîꞌ ayeurîmauyaꞌnîkon sîrîrî. Mîîkîrî wanî esenyakaꞌma wanîyakon pe, amîrîꞌnîkon pîikaꞌtînen pe. Moropai manniꞌkan, toꞌ wîtî mannan yarakkîrî, inkamoro wanî soosi tawonkon nîmenkaꞌsan pe. Moropai inkamoro wanî Cristo yapurînenan pe.
24 Mîrîrî yeꞌnen inkamoro uyonpakon erepamî yai akoreꞌtaꞌnîkon, toꞌ yapiꞌtî morî pe, aweꞌsaꞌnamatoꞌkon ke. Mîrîrî kupîyaꞌnîkon yai, tiaron pata po soosi tawonkonya aweꞌsaꞌnamatoꞌkon epuꞌtoꞌpe, anna eseurîmaꞌpî yawîrî ikupîꞌpîyaꞌnîkon esepuꞌtoꞌpe.
