Sîrîrî Kaareta Itakon Iteꞌka Pe Paulo Nîmenukaꞌpî Coríntio Ponkon Pia 9:1-15
9 Tîntîrîkon ke Judéia ponkon Paapa pemonkonoyamîꞌ pîikaꞌtî toꞌya pîꞌ imenukauya eꞌpai pra man.
2 Maasa pra epuꞌtî pîꞌ wai, îꞌ kaiꞌma toꞌ anpîikaꞌtîpai awanîkon. Mîrîrî yeꞌnen amîrîꞌnîkon yapurîꞌpîuya kureꞌne. Macedônia pata ponkon innape ikuꞌnenan pîꞌ taꞌpîuya wai apîꞌnîkon, Grécia ponkon pîꞌ, îꞌ ton pînon anpîikaꞌtîpai awanîꞌpîkon, eesuwaꞌkaꞌpî manniꞌ konoꞌ pata pai. Mîrîrî yeꞌnen mîrîrî pîꞌ taatausinpai puꞌkuru toꞌ wanîꞌpî. Moropai kureꞌne toꞌ anpîikaꞌtîpai nîrî toꞌ enaꞌpî.
3 Tarîpai insamoro uyonpakon yarimauya sîrîrî aapiaꞌnîkon toꞌ wîtîtoꞌpe Tito pokonpe. Mîrîrî yeꞌnen îꞌ taꞌpîuya yawîrî inkamoroya antîrîkon muurukuntîsaꞌyaꞌnîkon epotoꞌpe, ikuꞌtî. Apîꞌnîkon eseurîmaꞌpî ayapurîꞌpîuyaꞌnîkon eꞌtoꞌpe yairî. Ikuꞌtî îꞌ pe pra rî eseurîmasaꞌ pe wanî namai.
4 Tîîse îꞌ pensa uutî ya, insamoro tiaronkon Macedônia ponkon pokonpe. Mîrîrî yai aawanmîraꞌnîkon ayeporîkon annaya namai ikonekatî. Îꞌ konekasaꞌyaꞌnîkon pra tîîse, anna erepansaꞌ ya anna eppepî eꞌpainon. Teuren apîꞌnîkon morî pe eseurîmasaꞌ tanne, yawîrî pra aweꞌsaꞌkon ya, eppepî eꞌpainon. Mîrîrî warantî nîrî aweppepîkon eꞌpainon.
5 Mîrîrî yeꞌnen insamoro uyonpakon pîꞌ esatîuya toꞌ wîtîtoꞌpe eꞌmaiꞌ pe urawîrî, mîrîrî antîrîkon pe ankonekakon mîrîrî konekai toꞌ wîtîtoꞌpe. Îꞌ pensa miarî yaꞌ erepansaꞌ ya, epotoꞌpeuya tamîꞌnawîrî ankonekaꞌpîkon taꞌpîyaꞌnîkon yawîrî. Moropai tamîꞌnawîronkonya epuꞌtoꞌpe mîrîrî antîrîkon tîrîyaꞌnîkon, ituꞌse awanîkon yeꞌnen, anîꞌya esatî pîꞌ pra.
6 Maasa enpenatatî sîrîrî pîꞌ. Manniꞌ mararî ipînenya mararî tînpîmîꞌpî yeperu moꞌka. Tîîse manniꞌ mararî pra ipînenya mararî pra tînpîmîꞌpî yeperu moꞌka. Mîrîrî warantî anneꞌ pe, mararî tîntîrî tîînenya, mararî nîrî yapisîiya tiaronkon winîpai. Tîîse morî pe, anneꞌ pe pra tîntîrî tîînenya, mararî pra morî yapisî tiaronkon winîpai.
7 Mîrîrî yeꞌnen tiwin pîꞌ siꞌma antîîpai aweꞌtoꞌkon pîkîrî teesenumenkai ayewankon yaꞌ itîîtî. Teesewankonoꞌmai pra moropai esatî pîꞌ neken pra, tîîse awakîrikon pe itîîtî. Maasa pra tîwakîri pe itîînen saꞌnama Paapaya mararî pra.
8 Moropai mararî pra itîînen pe Paapa wanî ituꞌse eꞌnîtoꞌ tamîꞌnawîrî itesaꞌ pe awanîpa. Moropai ituꞌse eꞌnîtoꞌ yentai itîrîiya. Tiaronkon ituꞌsankon pia itîrîkonpa itîrîiya.
9 Mîrîrî warantî Paapa maimu eꞌmenukasaꞌya taasaꞌ:Mararî pra ipînenya tînmîri yaꞌ tînpîmî pînsaꞌ warantî,manniꞌ Paapa yapurînenya itîrî mararî pramanniꞌkan îꞌ ton pînon saꞌne pia.Mîrîrî inkupîꞌpî wenai, ipatîkarî Paapaya irepa morî ke,iwanmîra awanî pepîn
taꞌpîiya.
10 Moropai Paapaya tîpînsen enaꞌpî tîrî anpîmî ton moropai yekkari awanî tîrîiya. Mîrîrî warantî nîrî aapiaꞌnîkon morî tîrîiya tiaronkon pia antîrîkon ton. Moropai inkamoro pîikaꞌtîsaꞌyaꞌnîkon wenai, inîꞌ panpîꞌ morî yapisîyaꞌnîkon Paapa winîpai.
11 Mîrîrî yeꞌnen mîîkîrî Paapaya amîrîꞌnîkon kupî ipîkku pe awanîkonpa, mîrîrî yeꞌka pe awanîkonpa. Moropai anna wenai mîrîrî anarimaꞌpîkon yapiꞌsaꞌ Paapa pemonkonoyamîꞌya yai, Paapa yapurî toꞌya, mîrîrî antîrîkon yarimasaꞌyaꞌnîkon wenai. —Morî pe man —taapîtî toꞌya awenaiꞌnîkon.
12 Mîrîrî anarimakon wanî pepîn Paapa pemonkonoyamîꞌ neken pîikaꞌtîtoꞌpe. Tîîse mîrîrî wanî inîꞌ panpîꞌ kureꞌne Paapa pîꞌ —Morî pe man —taa toꞌpe toꞌya awanî.
13 Inkamoroya Paapa yapurî. Maasa pra mîrîrî toꞌ pîikaꞌtîtoꞌyaꞌnîkonya ekaremekîꞌpî, innape ikupîyaꞌnîkon neken pra, tîîse îꞌ kaiꞌma Cristo maimu yawîrî awanîkon ekaremekîiya. Moropai nîrî Paapa yapurî toꞌya kureꞌne antîrîkon tîpîikaꞌtîtoꞌkon wenai moropai tamîꞌnawîronkon tiaronkon pîikaꞌtîyaꞌnîkon wenai.
14 Moropai inkamoro epîrema ya, aponaꞌnîkon, kureꞌne toꞌ atausinpa apîꞌnîkon. Moropai aapiaꞌnîkon îꞌ kaiꞌma Paapaya morî pe tîweꞌtoꞌ tîîsaꞌ wenai, amîrîꞌnîkon saꞌnama toꞌya.
15 —Morî pe man —taapaiꞌnîkon Paapa pîꞌ, maasa pra morî intîrîꞌpî, manniꞌ ikaisaron ton pîn wenai.
