Sîrîrî Kaareta Itakon Iteꞌka Pe João Nîmenukaꞌpî 1:1-13
1 Uurî João, aꞌyekeꞌton, apanamanenkon. Sîrîrî kaareta menukauya sîrîrî aapia, moropai anmukuyamîꞌ pia nîrî. Amîrî Paapa nîmenkaꞌpî tîpemonkono pe aweꞌtoꞌpe, maꞌnon. Innape ikuꞌnenan pe eꞌnî yeꞌnen, asaꞌnamauyaꞌnîkon. Moropai tiwinsarî asaꞌnamanenkon pepîn tîîse tamîꞌnawîronkon Paapa maimu epuꞌnenanya asaꞌnamakon nîrî.
2 Mîrîrî warantî awanî maasa pra Paapa maimu koꞌmanpîtî uyewankon yaꞌ. Ipatîkarî aakoꞌmamî uyewankon yaꞌ.
3 Morî tîrî pîꞌ Paapa man uponaꞌnîkon tîîwarîrî antîîpai tîwanî yeꞌnen. Tîꞌnokoꞌpî pe uyeraꞌmakon pîꞌ awanî. Morî pe uyewankon ereutanîpî pîꞌ man. Mîrîrî yeꞌka koꞌmannîtoꞌ ton eporî pîꞌ man uyunkon Paapa winîpai moropai inmu Jesus Cristo winîpai. Moropai innarî epuꞌtoꞌpe emapuꞌtîiyaꞌnîkon. Moropai uyonpakon saꞌnamatoꞌpe emapuꞌtîiyaꞌnîkon.
Yairon maimu yawîronkon
4 Tiaronkon anmukuyamîꞌ koꞌmamî yairon maimu yawîrî eporî pîꞌ wai. Mîrîrî pîꞌ atausinpaꞌpî. Mîrîrî warantî koꞌmannî eꞌpai taa pîꞌ Paapa man.
5 Tarîpai amenan Paapa nekaremekîꞌpî menukauya pepîn aapia tîîse penaron. Mîrîrî etaꞌpî annaya innape Jesus kupîꞌpî annaya yai. —Eseꞌ yuꞌse eꞌnîpaiꞌnîkon —mîrîrî taatoꞌ etaꞌpî annaya. Mîrîrî warantî koꞌmanpaiꞌnîkon, maꞌnon.
6 Paapa maimu yawîrî koꞌmannî ya, uyonpakon saꞌnama innape. Paapaya taꞌpî: —Ayonpakon saꞌnamatî —taꞌpîiya. Mîrîrî etaꞌpîyaꞌnîkon innape Jesus kupîꞌpîyaꞌnîkon yai. Mîrîrî yawîrî aakoꞌmamîkon yuꞌse Paapa man.
7 Sîrîrî non poro arinîke yenkuꞌtî tonkon epaꞌkasaꞌ. Innape Jesus Cristo esenpoꞌpî pemonkon pe kupî toꞌya pepîn. Mîrîrî warantî taa pemonkonya ya, mîîkîrî wanî pemonkonyamîꞌ yenkuꞌtînen pe, Cristo yeyaton pe.
8 Tîwarî akoꞌmantî, ayenupaꞌpîkon annaya kupîyaꞌnîkon namai tîwî, eesenkuꞌtîkon namai. Tîîse ituꞌse Paapa eꞌtoꞌ kupî pîꞌ akoꞌmantî aapiaꞌnîkon Paapa nîtîrî ton ayepeꞌpîkon pe yapisîkonpa tamîꞌnawîrî, Jesus pia eerepamîkon yai.
9 Cristoya ayenupaꞌpîkon yawîrî anîꞌ koꞌmamî pra awanî ya, tîîse Cristo maimu yuwaꞌkaiya ya, mîîkîrî pia Paapa wanî pepîn. Tîîse Cristoya uyenupaꞌpîkon yawîrî tîîkoꞌmansen pia Uyunkon Paapa wanî moropai inmu wanî. Saꞌnîrî toꞌ wanî iipia.
10 Moropai ayenupakonpa kaiꞌma akoreꞌtaꞌnîkon tiaron erepamî yai, tîwarî eꞌtî. Cristoya ayenupaꞌpîkon yawîrî pra eeseurîma ya, akoreꞌtaꞌnîkon aakoꞌmantoꞌpe kîꞌtîîtî ayewîꞌkon ta. —Uwakîri pe aaiꞌsaꞌ nai. Morî pe akoꞌmankî —tîkai pra eꞌtî ipîꞌ.
11 Maasa pra Cristoya ayenupaꞌpîkon yairî pra ayenupaiyaꞌnîkon tanne, —Morî pe akoꞌmankî —taa pîꞌ aakoꞌmamîkon ya, ipîikaꞌtîyaꞌnîkon mîrîrî. Mîîkîrî pokonpe imakuiꞌpî kupîyaꞌnîkon mîrîrî.
12 Tuꞌke itekare man apîꞌnîkon unekaremekî ton, tîîse kaareta ke anekaremeꞌpai pra wai. Maasa pra aapiaꞌnîkon itîîpai wanî sîrîrî. Mîrîrî yai ekaremekîuya apîꞌnîkon, seꞌ kaisarî atausinpantoꞌpe mararî pra.
13 Tîmîrî pe Paapa nîmenkaꞌpî apasi, mîîkîrî munkîyamîꞌ maimu man aapiaꞌnîkon.
