Sîrîrî Kaareta Itakon Iteꞌka Pe Paulo Nîmenukaꞌpî Timóteo Pia 1:1-18
1 Uurî Paulo, Jesus Cristo naipontîꞌpî ituꞌse Paapa wanî yeꞌnen. Maasa pra Paapaya taꞌpî: —Innape Jesus kuꞌnenan pia ipatîkarî enen koꞌmannîtoꞌ tîrîuya —taꞌpîiya. Jesus Cristo nîkupîꞌpî wenai, mîrîrî itekare ekaremeꞌse uyarimaꞌpîiya.
2 Timóteo, sîrîrî kaareta menukauya aapia, maasa pra unmu pe amîrî wanî uwakîri pe, innape Jesus Cristo kuꞌsaꞌya yeꞌnen.
Paapa pîꞌ esatîuya, moropai Jesus Cristo Uyepotorîkon pîꞌ: —Tamîꞌnawîrî morî pe aweꞌtoꞌkon tîîtî. Moropai aꞌnokoꞌpîkon pe eraꞌmatî, tîwanmîn tîîtî —tauya, apona itîîtoꞌpe toꞌya.
Pauloya Timóteo Panama Yairî Aakoꞌmantoꞌpe.
3 Apîꞌ enpenata ya, taapîtîuya Paapa pîꞌ, manniꞌ unapurî utamokonya yapurîꞌpî warantî. Yairî yapurîuya imakuiꞌpî tîkuꞌse pra. Paapa pîꞌ tauya: —Uwakîri pe man, Paapa, Timóteoya innape akupîꞌpî.
4 Wei ewaron kaisarî epîrema apona ya, aneraꞌmapai wanî. Maasa pra akaruwaꞌpî pîꞌ enpenatapîꞌnî pîꞌ wai. Mîrîrî yeꞌnen amîrî aneraꞌmapai wanî, Timóteo, atausinpatoꞌpe.
5 Maasa pra innape Jesus kuꞌnen pe awanî pîꞌ enpenataꞌpî. Eꞌmaiꞌ pe anoꞌ Lóide iteseꞌya ikupîꞌpî innape. Mîrîrî tîpo asan Eunice iteseꞌya ikupîꞌpî innape. Tarîpai amîrîya nîrî innape ikupîꞌpî, epuꞌtî pîꞌ wai.
6 Mîrîrî yeꞌnen mîrîrî Paapa nîtîrîꞌpî pîꞌ awenpenata yuꞌse wai. Ikonekakî, amîrî nîkupî ton pe Paapa nîtîrîꞌpî. Mîrîrî tîrîꞌpîiya manniꞌ yai Paapa esenyakaꞌmatoꞌ kupîpa apuꞌpai pona uyenya tîrîuya neꞌtîkini yai.
7 Mîrîrî kuꞌkî, maasa pra Morî Yekaton Wannî, Paapa nîtîrîꞌpî uupiaꞌnîkonya ukupîkon pepîn eranneꞌ pe. Tîîse meruntî ke eꞌnî emapuꞌtîiya, moropai tiaronkon saꞌnama emapuꞌtîiya, moropai uuwarîrîꞌnîkon tîweꞌpanamai eꞌnî emapuꞌtîiya, imakuiꞌpî kupî namai.
8 Mîrîrî yeꞌnen teweppeꞌse pra eꞌkî Uyepotorîkon yekare pîꞌ. Moropai uurî pîꞌ nîrî teweppeꞌse pra eꞌkî uurî atarakkansaꞌ yeꞌnen, Uyepotorîkon yekare ekaremekîuya wenai. Tîîse meruntî ke yapîtanîꞌkî, aweꞌtarumaꞌtî ya itekare ekaremekîya wenai. Aweꞌtarumaꞌtîtoꞌ pîꞌ eranneꞌ pe pra eꞌkî. Tîîse uurî eꞌtarumaꞌtî warantî aweꞌtarumaꞌtî, Paapaya ameruntîri ton tîîsaꞌ yeꞌnen.
9 Paapaya uurîꞌnîkon pîikaꞌtîsaꞌ, moropai uyannosaiꞌyaꞌnîkon morî pe koꞌmannîtoꞌpe. Mîrîrî ikupîꞌpîiya morî unkupîꞌpîkon wenai pra, tîîse tîîwarîrî morî antîîpai tîwanî yeꞌnen. Pena pata ekonekasaꞌ pra tîîse, mîrîrî morî tîrî tîuya pîꞌ eesenumenkaꞌpî Jesus Cristo yai.
10 Moropai sîrîrî tîrîꞌpîiya Uyepotorîkon Cristo Jesus iipî wenai. Mîîkîrî Uyepotorîkon enaꞌpî saꞌmantantoꞌ yentai. Mîrîrî wenai iipia enen koꞌmannî ipatîkarî. Innape itekare kupî wenai saꞌmantan pepîn. Mîrîrî yeꞌnen upiꞌpîkon kata pepîn ipatîkarî.
11 Mîrîrî yekare ekaremeꞌse umenkasaꞌ Paapaya. Uurî Paapa narimaꞌpî, pemonkonyamîꞌ yenupatoꞌpeuya itekare pîꞌ.
12 Mîrîrî yeꞌnen teweppeꞌse pra wai, eꞌtarumaꞌtî yeꞌka pe. Eꞌtarumaꞌtîtoꞌ pîꞌ eppepî pepîn, maasa pra Cristo Jesus unapurîkon kuꞌnen uurî innape. Mîîkîrî epuꞌnen uurî. Meruntî mîîkîrî. Mîrîrî yeꞌnen manniꞌ untîrîꞌpî iipia koꞌmannîpîiya tuipî pîkîrî. Mîrîrî epuꞌtî pîꞌ wai.
13 Yairî itekare ekaremeꞌkî manniꞌ anetaꞌpî uwinîpai. Ekaremeꞌkî innape Cristo tîkuꞌse, tiaronkon saꞌnamakî Cristo Jesus nîtîrîꞌpî ke.
14 Manniꞌ itekare Paapa nîtîrîꞌpî koꞌmannîꞌkî tiaronya inyakanma namai tiaron pe. Ikoꞌmannîꞌkî Morî Yekaton Wannî meruntîri ke. Maasa pra aakoꞌmamî uupiaꞌnîkon.
15 Tamîꞌnawîronkon innape Jesus Cristo kuꞌnenan Ásiaponkonya unîmîꞌpî epuꞌtî pîꞌ nai. Figelo moropai Hermógenesya nîrî unîmîꞌpî.
16 Tîîse Onesíforo kaane, tîꞌnokoꞌpî pe eraꞌma Paapaya yuꞌse wai Onesíforo, moropai itonpayamîꞌ nîrî. Maasa pra tuꞌke iteꞌka uyausinpapîtîꞌpîiya yairî maꞌre ena namai. Mîîkîrî eppeꞌsaꞌ pra man uurî atarakkansaꞌ pîꞌ.
17 Mîîkîrîya teerepansaꞌ yai tarî Roma pona, uurî yuwaꞌpî mararî pra uyeporî tîuya pîkîrî.
18 Mîrîrî yeꞌnen Uyepotorîkonya mîîkîrî saꞌnama yuꞌse wai, tamîꞌnawîron aretîꞌka tîuya weiyu yai. Mîîkîrî yeseru epuꞌtî pîꞌ nai morî pe, uurî pîikaꞌtîꞌpîiya Éfeso po tîwanî yai.
