Sîrîrî Kaareta Itakon Iteꞌka Pe Paulo Nîmenukaꞌpî Timóteo Pia 2:1-26
2 Moropai amîrî unmu, meruntî ke eꞌkî umeruntîrikon Jesus Cristo nîtîrîꞌpî ke.
2 Sîrîrî itekare ayenupaꞌpîuya tuꞌkankon pemonkonyamîꞌya eraꞌma tanne, mîrîrî anetaꞌpî uwinîpainon mîrîrî ke tiaronkon yenupakî. Manniꞌkan warayoꞌkon innape ikupîtonkon tîrumakai pra yenupakî, tiaronkon yenupatoꞌpe toꞌya mîrîrî ke nîrî.
3 Aweꞌtarumaꞌtîtoꞌ yapîtanîꞌkî uurî yarakkîrî siꞌma, Jesus Cristo poitîrî pe awanî wenai. Suraraya tîweꞌtarumaꞌtîtoꞌ yapîtanîpî manniꞌ warantî yapîtanîꞌkî.
4 Manniꞌ suraraya, taipontînen maimu yawîrî ikupî, tîîwarîron tînkoneka pîꞌ teesenumenkai pra. Taipontînen wakîri pe tîwanîpa ikupîiya.
5 Manniꞌ pemonkon teekaꞌtunsen ekaꞌtumî eꞌpainon teekaꞌtuntoꞌpe taꞌpî yawîrî îꞌ rî yapisîpa kaiꞌma. Tîîse yawîrî pra eekaꞌtunsaꞌ ya, mîîkîrîya tînapisî yapisî pepîn eꞌpainon. Mîrîrî warantî nîrî amîrîya ikuꞌkî taꞌpî yawîrî ikupî eꞌpai awanî, Jesus Cristo winîpainon yapisîpa.
6 Moropai warayoꞌ umî yaꞌ teesenyakaꞌmasen esenyakaꞌma mararî pra tîmoron tepuꞌse. Moropai mîîkîrîya teesenyakaꞌmaꞌpî epetasaꞌ moꞌka tekkari ton eꞌmaiꞌ pe, mîrîrî ton pe teesenyakaꞌmasaꞌ yeꞌnen. Mîrîrî warantî amîrî esenyakaꞌmasaꞌ ya, amoron tepuꞌse, Jesus Cristo winîpainon nîrî yapisîya.
7 Mîrîrî apîꞌ tauya manniꞌ pîꞌ esenumenkakî. Maasa pra mîrîrî pîꞌ eesenumenka ya, Uyepotorîkonya tamîꞌnawîron epuꞌtîya emapuꞌtî.
8 Enpenatakî Jesus Cristo pîꞌ, manniꞌ aweꞌmîꞌsaꞌkaꞌpî pîꞌ, manniꞌ Davi paarîꞌpî pîꞌ. Mîrîrî ekaremeꞌnen itekare ekaremekîuya sîrîrî.
9 Sîrîrî ekaremekîuya wenai eꞌtarumaꞌtî sîrîrî. Tarî wanî sîrîrî ewaꞌtîsaꞌ pe saꞌman ferro ke, manniꞌ pemonkon wîîtîpon yewaꞌtî toꞌya warantî. Tîîse Paapa maimu man yewaꞌtîsaꞌ pe pra ekaremeꞌtoꞌpe ekaremeꞌnenanya.
10 Mîrîrî yeꞌnen tamîꞌnawîrî yapîtanîpîuya tîpemonkono pe Paapa nîmenkaꞌsan ton pe. Mîrîrî yapîtanîpîuya maasa pra Jesus Cristoya toꞌ pîikaꞌtîtoꞌpe moropai toꞌ koꞌmantoꞌpe ipatîkarî tîîpia morî pe.
11 Sîrîrî esenupantoꞌ wanî yairon pe puꞌkuru:Jesus Cristo saꞌmantasaꞌ wenai,uurîꞌnîkon saꞌmantasaꞌ yarakkîrî.Mîrîrî yeꞌnen koꞌmannî pe man yarakkîrî.
12 Moropai mîrîrî wenai eꞌtarumaꞌtîntoꞌ yapîtanîpî ya,tamîꞌnawîronkon esaꞌ pe enan pe manCristo yarakkîrî nîrî.Tîîse “Unepuꞌtî pepîn mîîkîrî”, taꞌnîkon ya,mîîkîrîya taa nîrî: “Unepuꞌtîkon pepîn mîîkîrî”,taiya kupî sîrîrî upîꞌnîkon.
13 Moropai yairî eꞌnîꞌnîkon pra awanî ya,mîîwîni tîîse Cristo koꞌmamî yairî.Maasa pra seruꞌyeꞌ pe tîweꞌsen pepîn mîîkîrî.Îꞌ taasaꞌ tîuya ya, ikupîiya.
Teesenyakaꞌmasen Wanî Paapa Wakîri Pe
14 Tiaronkon yenupanenan pe ankupîꞌsan pîꞌ kaꞌkî sîrîrî unekaremekîꞌpî. Moropai toꞌ panamakî Paapa rawîrî siꞌma, teesiyuꞌpîꞌse toꞌ wanî namai tîmaimukon ke. Maasa pra mîrîrî warantî toꞌ wanî ya, morî pe awanî pepîn tiaronkon esenumenkatoꞌ tarumaꞌtî toꞌya.
15 Mîrîrî kupîya yuwakî, tamîꞌnawîrî Paapa wakîri pe awanîpa. Manniꞌ warayoꞌ teesenyakaꞌmatoꞌ pîꞌ mîîkîrî eppepî pepîn maasa pra teesenyakaꞌma epuꞌtî tîuya yeꞌnen. Mîrîrî warantî epuꞌkî morî pe, tamîꞌnawîronkon panamatoꞌpe yairon Paapa maimu ke, teweppeꞌse Paapa winîkîi awanî namai.
16 Tîîse îꞌ pe pra rî ituꞌse Paapa eꞌtoꞌ pepîn pîꞌ teeseurîmasanon maimu kîsetai. Maasa pra mîrîrî yeꞌka wanî pemonkonoyamîꞌ tarumaꞌtînen pe. Toꞌ atakaꞌma emapuꞌtîiya.
17 Maasa pra inkamoro yeꞌkakonya yenupantoꞌ wanî erekîꞌ pe tîweꞌsen warantî, neꞌneꞌ pe awanî. Mîrîrî ereꞌya itesaꞌ yanî warantî awanî. Asakîꞌne toꞌ man, warayoꞌkon mîrîrî yeꞌka pîꞌ yenupatonkon, Himeneu moropai Fileto toꞌ eseꞌ.
18 Inkamoroya yairî tîweꞌtoꞌkon rumakasaꞌ man. Yairon pepîn pîꞌ tiaronkon yenupasaꞌ man. Aasîrî Paapaya isaꞌmantaꞌsan pîmîꞌsaꞌkaꞌpî kaiꞌma toꞌ yenupasaꞌ toꞌya. Mîrîrî yeꞌnen toꞌ yakaꞌmasaꞌ toꞌya man, innape yairon kupî toꞌya pra awanî temapuꞌtîi.
19 Tîîse Paapa maimu wanî yairon pe puꞌkuru tîîkoꞌmansen pe. Wîttî yanrakiꞌ nîrî yuꞌnaꞌtîsaꞌ ituꞌna meruntî ke aakoꞌmantoꞌpe. Mîrîrî warantî Paapa maimu wanî meruntî ke aakoꞌmamî. See warantî aweꞌmenukasaꞌ mîrîrî:—Uyepotorîkonya tîmîrî ton pe tîweꞌsanon epuꞌtî.
Moropai aweꞌmenukasaꞌ nîrî: —Manniꞌkan Jesus pîꞌ Uyepotorî kon taawonanya yairî pra tîweꞌtoꞌkon rumaka eꞌpai awanî, inîꞌrî ikupî tîuyaꞌnîkon namai. Mîrîrî warantî koꞌmannî yairî, moꞌtan pepîn.
20 Ipîkku pe tîweꞌsen yewîꞌ kureꞌnan ta awanî pisakon Teken pra ouro pe moropai prata pe awanî pepîn, tîîse awanî yei konekasaꞌ moropai non kaꞌsaꞌ nîrî. Tîîse mîrîrî koreꞌta wanî tiaron pensa tînapurî pe imenkaꞌpî. Ipîkku pe tîweꞌsen erepansaꞌ yai mîrîrî ourokon, pratokon yapurîiya. Tîîse yei konekasaꞌ moropai non kaꞌsaꞌ yapurîiya wei kaisarî.
21 Mîrîrî yeꞌnen Paapa ton pe anîꞌ esenyakaꞌmatoꞌpe, nura pe tîweꞌtoꞌ rumaka eꞌpai awanî, morî kupî pîꞌ aakoꞌmamîpa. Mîrîrî pisakon, ouro kaꞌsaꞌ yapurî toꞌya warantî, Paapaya mîîkîrî yapurî ipîkku pe.
22 Mîrîrî yeꞌnen ituꞌse maasaronkon eꞌtoꞌ imakuiꞌpî tîpîinamai pra akoꞌmankî. Tîîse yairon kupî pîꞌ akoꞌmankî, innape ikupî pîꞌ akoꞌmankî. Tiaronkon saꞌnama pîꞌ akoꞌmankî, moropai Paapa yapurî pîꞌ akoꞌmankî. Moropai tîîwanmîra akoꞌmankî morî pe tîîkoꞌmansenon pokonpe. Uyepotorîkon winîpai tîweꞌpîikaꞌtîtoꞌkon ton esaꞌnenan pokonpe akoꞌmankî.
23 Pakkokon seꞌ tapairî teeseurîmasanon yarakkîrî kîseurîmai. Eseurîma ya, esiyuꞌpîꞌnîtoꞌ eseporî. Maasa pra îꞌ taa tîuyaꞌnîkon epuꞌtî toꞌya pepîn. Mîrîrî yeꞌnen kîseurîmai toꞌ yarakkîrî.
24 Maasa pra Uyepotorîkon poitîrî pe tîweꞌsen esiyuꞌpîtî eꞌpai pra man. Tîîse mîîkîrî eꞌpai awanî morî pe teekoreꞌmasen pe pra. Morî pe pemonkonyamîꞌ yenupanen pe eꞌpai awanî. Taatasiꞌsirunpasen pe pra eꞌpai awanî îꞌ etasaꞌ tîuya pîꞌ.
25 Tîîse mîîkîrîya itekare anetapaiꞌnîkon pepîn yeurîma eꞌpai awanî tînîn pîꞌ. Maasa pra mîrîrî wenai Paapaya toꞌ enpenatatoꞌ ton tîrî yai pra. Mîrîrî tîpo innape ikupî toꞌya.
26 Moropai esenkuꞌtîꞌsan pe pra toꞌ ena. Maasa pra Makuiya toꞌ yenkuꞌtîꞌpî. Uurîꞌnîkonya kamo yeꞌmarî ta iwîtoꞌ ton tîrî yai, aronne itîrî pepîn tîîse tenonse tîtîsen, kamoya eraꞌma namai. Mîrîrî warantî Makuiya teseru kuꞌtoꞌpe uyenkuꞌtîkon. Mîrîrî yeꞌnen inkamoro moꞌkatoꞌpe itenya yapai itekare ekaremekî eꞌpai awanî toꞌ pîꞌ.
