Sîrîrî Kaareta Itakon Iteꞌka Pe Paulo Nîmenukaꞌpî Timóteo Pia 3:1-17
3 Timóteo, sîrîrî tauya pîꞌ epuꞌkî. Maasa panpîꞌ Jesus iiꞌtoꞌ winîkîi saꞌme puꞌkuru awanî pe man mîrîrî yai.
2 Saꞌme awanî maasa pra teetîꞌnînmakon pîꞌ pemonkonyamîꞌ wanî kupî sîrîrî tîîwarîrîꞌnîkon. Saꞌme awanî maasa pra pemonkonyamîꞌ esekaꞌnunka kupî sîrîrî kureꞌne tîniru yuꞌse tîwanîkon pîꞌ. Mîrîrî yuꞌse toꞌ esekaꞌnunka mararî pra, maasa pra mîî pe tîwanîkonpa kaiꞌma toꞌ esekaꞌnunka. Mîî pe tîwanîkon yeꞌnen, toꞌ eseurîma mararî pra tîpîꞌnîkon epuꞌnen pe tîwanîkon pîꞌ. Saꞌme awanî maasa pra toꞌ eseurîma imakuiꞌpî pe tiaronkon pemonkonyamîꞌ winîkîi. Saꞌme awanî maasa pra —Morî pe man —taa toꞌya pepîn tonpakon pîꞌ, moropai Paapa pîꞌ nîrî taa toꞌya pepîn. Tîîse tîîwarîrîꞌnîkon tîîkoꞌmamîkon pîꞌ toꞌ koꞌmamî. Saꞌme awanî maasa pra toꞌ munkîyamîꞌ wanî pepîn tîyunkon maimu yawîrî. Saꞌme awanî maasa pra Paapa nama toꞌya pepîn kupî sîrîrî.
3 Saꞌme awanî maasa pra tonpakon saꞌnamatoꞌ ton pra toꞌ wanî. Îꞌ taꞌpî tîuyaꞌnîkon tonpakon pîꞌ manaꞌpoka toꞌya pepîn saꞌme toꞌ wanî. Imakuiꞌpî pe tiaronkon esenumenka emapuꞌtî toꞌya tonpakon winîkîi. Inkamoro etîꞌnînma pra awanî teserukon pîꞌ. Inkamoro wanî sokoroꞌ pe tîweꞌsanon pe. Mîrîrî yeꞌnen inkamoroya morî yewanmîrî, ituꞌse pra toꞌ wanî. Tonpakon yenkuꞌtînenan pe toꞌ wanî.
4 Saꞌme awanî maasa pra îꞌ kupî toꞌya teesenumenkai pra, yairon toꞌ esenumenkatoꞌ ton pra awanî. Tiaronkon yentai epuꞌnen pe tîwanîkon pîꞌ toꞌ esenumenka. Kureꞌne tarî taatausinpatoꞌkon pîꞌ toꞌ atausinpa Paapa pîꞌ taatausinpakon yentai.
5 Tîîse taa toꞌya: “Paapa yapurînenan anna” taa toꞌya tîntakon ke neken, tewankon yaꞌ yapurî yeꞌka pe pra.
Mîrîrî yeꞌnen inkamoro yeꞌka koreꞌta kasi.
6 Inkamoro ewomî pe man tiaronkon koreꞌta. Mîrîrî yai wîriꞌsanyamîꞌ, aꞌtuꞌmîra toꞌ yewan tîweꞌsanon yenkuꞌtî toꞌya kupî sîrîrî. Maasa pra toꞌ esewankonoꞌmaꞌpî imakuiꞌpî kupî tîuyaꞌnîkon pîꞌ. Mîrîrî yeꞌnen, toꞌ yenkuꞌtî toꞌya teserukon ke. Toꞌ panama toꞌya moropai innape toꞌ maimu kupî toꞌya teesenkuꞌtîi.
7 Inkamoro wîriꞌsanyamîꞌ koꞌmamî yairon itekare eta pîꞌ, ipîꞌ toꞌ esenupa teuren tîîse innape ikupî toꞌya eserîke pra awanî imakuiꞌpî ankuꞌpai tîwanîkon yeꞌnen.
8 Inkamoro warayoꞌkonya yairon pîꞌ yenupantoꞌ yewanmîrî manniꞌkan Janes moropai Jambres nurîꞌtî Moisésya tenupatoꞌkon yewanmîrîꞌpî warantî. Maasa pra toꞌ esenumenkatoꞌ ton pra awanî. Moropai innape yairon maimu kupî toꞌya pepîn. Mîrîrî yeꞌnen tîweꞌpîikaꞌtîtoꞌkon eporî toꞌya pepîn.
9 Tîîse inkamoro koꞌmamî kupî pepîn sîrîrî mîrîrî kupî pîꞌ. Maasa pra tamîꞌnawîronkonya toꞌ nîkupîꞌpî epuꞌtî kupî sîrîrî yairon pe pra awanî. Mîrîrî warantî Moisés nurîꞌtîya tîpanamatoꞌkon yewanmîrîtîponkon esepuꞌtîꞌpî.
Tiwin Konoꞌpî Pe Pauloya Timóteo Panama.
10 Tîîse amîrî, pemonkonyamîꞌ panamatouꞌya epuꞌnen, uyeseru epuꞌnen amîrî. Uukoꞌmamîꞌpî yeseru, îꞌ yuꞌse wanî, moropai îꞌ kaiꞌma innape ikupîꞌpîuya moropai teekoreꞌmasen pe pra wanî epuꞌnen amîrî. Pemonkonyamîꞌ saꞌnamanen pe wanî epuꞌnen amîrî. Moropai upona teerepansen yapîtanîpîꞌpîuya epuꞌnen amîrî.
11 Tiaronkonya utarumaꞌtîꞌpî epuꞌnen amîrî. Moropai eꞌtarumaꞌtîꞌpî epuꞌnen amîrî. Tamîꞌnawîrî îꞌ eꞌkupîꞌpî Antioquia cidaderî po wanî yai, Icônio po wanî yai, Listra po wanî yai, kureꞌne utarumaꞌtîtoꞌ yapîtanîpîꞌpîuya epuꞌnen amîrî. Tîîse tamîꞌnawîron winîpai Uyepotorîya umoꞌkaꞌpî epuꞌnen amîrî.
12 Tamîꞌnawîronkon Jesus Cristo maimu yawîrî ikoꞌmanpaiꞌnîkon koꞌmamî kupî sîrîrî tîweꞌtarumaꞌtîi, Jesus pemonkono pe tîwanîkon yeꞌnen.
13 Tîîse manniꞌkan imakuiꞌsan warayoꞌkonya, moropai yairon pepîn pîꞌ yenupanenanya pemonkonyamîꞌ yenkuꞌtî koꞌmannîpî inîꞌ panpîꞌ teesenkuꞌtîi.
14 Tîîse amîrî, Timóteo, yairon kupî pîꞌ akoꞌmankî, manniꞌ eesenupaꞌpî pîꞌ. Innape ikupîꞌpîya maasa pra mîrîrî pîꞌ ayenupatîponkon epuꞌtî pîꞌ nai innape toꞌ wanî yairî.
15 Moropai more pe awanîꞌpî pata pai sîrîrî Paapa maimu eꞌmenukasaꞌ pîꞌ eesenupaꞌpî. Mîrîrî epuꞌtîya wenai epuꞌnen pe akupîiya. Mîrîrî wenai innape Cristo Jesus kupîꞌpîya. Mîrîrî yeꞌnen aweꞌpîikaꞌtîsaꞌ epuꞌtîya.
16 Maasa pra tîmaimu menuka warayoꞌkonya emapuꞌtîꞌpî Paapaya tamîꞌnawîrî. Mîrîrî yeꞌnen morî pe awanî uurîꞌnîkon yenupanen pe yairon pîꞌ. Morî pe awanî uyakoꞌmenkanen pe nîrî. Morî pe awanî yairon kupî pîꞌ koꞌmannî emapuꞌtînen pe.
17 Mîrîrî warantî sîrîrî Paapa maimu man tîpemonkono yenupanen pe. Mîrîrî wenai tamîꞌnawîrî morî kupî pîꞌ aakoꞌmamî, tiaronkon pîikaꞌtî pîꞌ, maasa pra ipîꞌ teesenupasaꞌ yeꞌnen.
