Sîrîrî Kaareta Itakon Iteꞌka Pe Paulo Nîmenukaꞌpî Timóteo Pia 4:1-22
4 Paapaya eraꞌma tanne, moropai Jesus Cristoya eraꞌma tanne, ankupî ton ekaremekîuya sîrîrî. Maasa pra Cristo ennaꞌpo kupî sîrîrî tamîꞌnawîronkon esaꞌ pe tîwanîpa. Mîrîrî yai taiya kupî sîrîrî anîꞌ wanî morî pe, anîꞌ wanî imakuiꞌpî pe taiya kupî sîrîrî toꞌ pîꞌ, pemonkonyamîꞌ enenankon pîꞌ moropai isaꞌmantaꞌsan pîꞌ.
2 Mîrîrî yeꞌnen yairon esenupantoꞌ ekaremekî pîꞌ akoꞌmankî tîîtîꞌnapanse pra, pemonkonyamîꞌ anetapainokon pîꞌ moropai anetapainokon pepîn pîꞌ nîrî. Eseurîmakî inkamoro imakuiꞌpî kupî pîꞌ tîweꞌsanon pîꞌ toꞌ tîꞌnapantoꞌpe. Tîîse toꞌ yausinpakî moropai inkamoro yenupakî morî pe toꞌ koꞌmantoꞌpe, teesetaꞌkai pra.
3 Sîrîrî kupî pîꞌ akoꞌmankî, maasa pra maasa panpîꞌ yairon esenupantoꞌ anetapai pra pemonkonyamîꞌ ena kupî sîrîrî. Inkamoroya tuꞌke tenupanenkon ton yuwa kupî sîrîrî îꞌ anetapai toꞌ wanî etakonpa, moropai ituꞌse tîweꞌtoꞌkon yawîrî ikupîkonpa.
4 Mîrîrî yeꞌnen inkamoroya yairon esenupantoꞌ rumaka kupî sîrîrî inkamoroya tenupatoꞌkon etakonpa kaiꞌma. Tîîse mîrîrî toꞌ yenupatoꞌ toꞌya wanî îꞌ pe pra rî, panton pe neken awanî.
5 Tîîse amîrî, tîwarî eꞌkî tamîꞌnawîrî tuiꞌsen pîꞌ teesenumenkai. Saꞌman yapîtanîꞌkî. Tiaronkon pîꞌ itekare ekaremeꞌkî. Tamîꞌnawîron ankupî ton kuꞌkî tîwî tîkuꞌse pra.
6 Tarîpai tarî uukoꞌmantoꞌ ataretîꞌka sîrîrî. Umînî ikamouya pe wai. Mîrîrî ke Paapa repauya manniꞌkanya tîwukukon ke Paapa repaꞌpî warantî.
7 Tamîꞌnawîronkon pokonpe unkupî ton pe taꞌpî Paapaya kuꞌsauꞌya wai. Mîrîrî yeꞌnen yaretîꞌkasauꞌya sîrîrî, manniꞌ teekaꞌtunsenya teekaꞌtuntoꞌ yaretîꞌka warantî. Moropai innape puꞌkuru Paapa kupî pîꞌ uukoꞌmansaꞌ wai sîrîrî tîpose.
8 Tarîpai uurî ton pe ikonekasaꞌ yapisîuya kupî sîrîrî. Manniꞌ warayoꞌ teekaꞌtumî yaretîꞌkatîponya tîîpia toꞌ nîtîrî yapisî warantî uupia Uyepotorîkon nîtîrî yapisîuya maasa pra yairî imaimu yawîrî uukoꞌmansaꞌ yeꞌnen. Mîîkîrî pemonkonyamîꞌ yenunnen, yaironya itîrî tuiꞌsaꞌ weiyu yai. Moropai uupia neken itîrîiya pepîn, tîîse tamîꞌnawîronkon tînîmîkî pîꞌ tîweꞌsanon tîwakîrikon pe, taatausinpai, inkamoro pia nîrî itîrîiya.
Tîîpia Timóteo Iiꞌtoꞌpe Pauloya Esatî
9 Kaꞌneꞌ panpîꞌ aaipî yuwakî, Timóteo, tarîwaya uupia.
10 Maasa pra Demasya unîmîꞌpî. Mîîkîrî atausinpaꞌpî kureꞌne sîrîrî pata yeseru pîꞌ. Mîrîrî yeꞌnen attîꞌpî man Tessalônica cidaderî pona. Moropai Crescente nîrî wîtîꞌpî man Galácia pata pona. Moropai Tito wîtîꞌpî man nîrî Dalmácia pata pona.
11 Tîîse Lucas neken man uyarakkîrî. Mîrîrî yeꞌnen tauya apîꞌ. Aaipî yai, Marcos yuwakî ayarakkîrî enepîpa. Maasa pra mîîkîrîya upîikaꞌtî tarî esenyakaꞌmatoꞌ pîꞌ.
12 Tîîse Tíquico yarimaꞌpîuya wai miarî yaꞌ, Éfeso cidaderî pona.
13 Aaipî yai Trôade cidaderî po, Carpo yewîꞌ ta unîmîꞌpî uyaꞌsan menepîi. Moropai ukaaretarîkon menepîi. Ipîkku pe manniꞌ paaka piꞌpî ikonekasaꞌ yuꞌse wai.
14 4:14,15 Timóteo, tîwarî mîsiꞌ Alexandre pîꞌ, manniꞌ ferro pîꞌ teesenyakaꞌmasen. Mîîkîrî man kureꞌne îri pe itekare unekaremekîkon winîkîi. Uwinîkîi imakuiꞌpî kupîꞌpîiya mararî pra. Tîîse mîîkîrî tarumaꞌtî Uyepotorîkonya pe man imakuiꞌpî inkupîꞌpî wenai.
15 Eraꞌmakî 4:14
16 Eꞌmaiꞌ pe pemonkonyamîꞌ esanon rawîrî wanî yai uyeseru pîꞌ eseurîmaꞌpî. Mîrîrî yai tiwinsarî wanîꞌpî, anîꞌ tiaron upîikaꞌtînen ton pra. Tamîꞌnawîronkonya upîikaꞌtî pîn, tîwî ukupîꞌpî toꞌya. Tîîse mîrîrî wenai Paapaya toꞌ tarumaꞌtî yuꞌse pra wai tîîse tîîwanmîra toꞌ nîkupîꞌpî kupîiya yuꞌse wai.
17 Tîîse tiwinsarî wanî pîn. Maasa pra Uyepotorî wanîꞌpî uyarakkîrî. Mîîkîrîya umeruntîri ton tîrîꞌpî. Meruntî ke itekare pîꞌ eseurîmatoꞌpe inîꞌ panpîꞌ tamîꞌnawîronkon Judeuyamîꞌ pepîn neta ton pe. Moropai mîîkîrîya umoꞌkaꞌpî nariꞌ yapai kaikusi mata pia tîweꞌsen moꞌka warantî umoꞌkaꞌpîiya.
18 Mîîkîrî rî Uyepotorîya upîikaꞌtî koꞌmannîpî tamîꞌnawîron imakuiꞌpî winîpai. Moropai mîîkîrîya uyarî tîpata yaꞌ, kaꞌ pona. Mîîkîrî yapurî pîꞌ koꞌmannîpaiꞌnîkon man ipatîkarî. Sîrîrî warantî yapurî eꞌpai man.
Paulo Esekaremekî
19 Timóteo, umaimu man Áquila pia moropai inoꞌpî Priscila pia nîrî. Moropai umaimu man nîrî uyonpakon Onesíforo pia moropai tamîꞌnawîrî ipemonkonoyamîꞌ pia.
20 Uyonpakon Erasto nîmîꞌpîuya Coríntio cidaderî po. Moropai Trófimo nîmîꞌpîuya Mileto po, maasa pra priꞌya pra eenasaꞌ wanîꞌpî.
21 Timóteo, aaipî yuwakî uupia kaꞌneꞌ pe panpîꞌ, konoꞌpîtî eꞌsaraꞌtî rawîrî. Uyonpakon man tarî uupia. Êubulo, moropai Prudente moropai Lino moropai Cláudia, inkamoroya tîmaimukon yarima aapia moropai tamîꞌnawîronkon tiaronkonya nîrî tîmaimukon yarima aapia.
22 Timóteo, tauya Paapa pîꞌ: —Iipia akoꞌmankî, Paapa, tauya. —Moropai tamîꞌnawîrî morî pe aweꞌtoꞌ tîîkî toꞌ pia, tauya ipîꞌ. Mîrîrî neken.
