Sîrîrî Kaareta Itakon Iteꞌka Pe Pedro Nîmenukaꞌpî 1:1-21
1 Sîrîrî kaareta menukauya aapiaꞌnîkon. Uurî wanî Simão Pedro pe, Jesus Cristo poitîrî pe moropai inaipontîꞌpî pe. Imenukauya aapiaꞌnîkon, innape puꞌkuru ikupî pîꞌ tîîkoꞌmansenon pia innape ikupî pîꞌ anna koꞌmamî warantî. Paapaya moropai Upîikaꞌtînenkon Jesus Cristoya upîikaꞌtîꞌpîkon anîꞌ tîmenkai pra, yairî tîwanîkon yeꞌnen.
2 Aponaꞌnîkon epîrema, aapiaꞌnîkon morî pe tîweꞌtoꞌ moropai tîîwanmîn tîîtoꞌpe Paapaya epeꞌmîra, inîꞌ panpîꞌ, kureꞌne Paapa moropai Uyepotorîkon Jesus Cristo epuꞌtîyaꞌnîkon yeꞌka pe.
Paapaya Yannotoꞌ Moropai Imenkantoiꞌya
3 Uyonpayamîꞌ, Paapa pe tîwanî yeꞌnen, tamîꞌnawîrî ituꞌse eꞌnîtoꞌ tîîsaiꞌya man tîmeruntîri yai. Itîrîꞌpîiya ipatîkarî enen koꞌmannîtoꞌpe, moropai morî pe ituꞌse Paapa eꞌtoꞌ yawîrî koꞌmannîtoꞌpe. Inîꞌ panpîꞌ mîîkîrî epuꞌtîꞌnîkon wenai itîrîꞌpîiya. Uurîꞌnîkon yannoꞌpîiya morî pe tîwarantî eꞌnîtoꞌpe maasa pra morî pe puꞌkuru tîwanî yeꞌnen.
4 Mîrîrî warantî mîîkîrîya itîrîuya taꞌpî tîuya yawîrî itîrîꞌpî. Mîrîrî kureꞌnan puꞌkuru inkupîꞌpî wenai, imakuiꞌpî ankuꞌpai eꞌnîtoꞌ kupî namai itîrîꞌpîiya, sîrîrî non po tîweꞌsanon nîkupî koꞌmannîpî kupî namai. Moropai itîrîꞌpîiya morî pe tîwarantî uurîꞌnîkon eꞌtoꞌpe.
5 Mîrîrî yeꞌnen morî pe awanîkon yuwatî, innape ikuꞌtoꞌyaꞌnîkon yeꞌka pe morî pe awanîkonpa. Moropai morî pe awanîkon yeꞌka pe epuꞌnen pe awanîkon yuwatî.
6 Moropai epuꞌnen pe awanîkon yeꞌka pe aawarîrîꞌnîkon eetîꞌnînmakon yuwatî. Aawarîrîꞌnîkon eetîꞌnînmakon yeꞌka pe innape ikupî pîꞌ akoꞌmantî tîrumakai pra. Moropai innape tîrumakai pra aakoꞌmamîkon yeꞌka pe, ituꞌse Paapa wanî warantî aakoꞌmamîkon yuwatî.
7 Moropai ituꞌse Paapa wanî warantî aakoꞌmamîkon yeꞌka pe ayonpakon yarakkîrî ese yuꞌse aakoꞌmamîkon yuwatî. Moropai ese yuꞌse ayonpakon yarakkîrî awanîkon yeꞌka pe, toꞌ saꞌnamayaꞌnîkon yuwatî.
8 Sîrîrî kupîyaꞌnîkon eꞌpai awanî mîrîrî. Tamîꞌnawîrî sîrîrî kupîyaꞌnîkon ya, inîꞌ panpîꞌ morî kupîyaꞌnîkon esepuꞌtî Uyepotorîkon Jesus Cristo wenai. Morî kupîyaꞌnîkon wenai îꞌ pe pra rî awanîkon pepîn. Tîîse inîꞌ panpîꞌ Uyepotorîkon Jesus Cristo epuꞌtîyaꞌnîkon yairî.
9 Tîîse manniꞌ sîrîrîkon ton pîn wanî ya, mîîkîrî wanî mîrîrî enkaruꞌnan warantî. Mîîwîni pra awanî ya, manniꞌ pemonkon mararî eraꞌmanen warantî awanî. Maasa pra mîîkîrî wanmîra imakuiꞌpî inkupîꞌpî pena mîrîrî ronaꞌpî Jesusya epuꞌtîiya pra eenasaꞌ mîrîrî.
10 Mîrîrî yeꞌnen uyonpayamîꞌ, yairî awanîkon yuwatî inîꞌ panpîꞌ. Mîrîrîtoꞌpe Paapaya amîrîꞌnîkon yannoꞌpî moropai amenkaꞌpîiyaꞌnîkon. Mîrîrî kupîyaꞌnîkon ya, yairî, aatareꞌmokon pepîn ipatîkarî, innape ikuꞌtoꞌyaꞌnîkon rumakayaꞌnîkon pepîn.
11 Mîrîrî warantî aakoꞌmamîkon ya, îꞌ rî amanenpanenkon ton pra awanî kaꞌ pona eewontoꞌ pîꞌ. Uyepotorîkon pîikaꞌtîton Jesus Cristoya ayapisîkon yarakkîrî aakoꞌmamîkonpa ipatîkarî.
12 Mîrîrî yeꞌnen amîrîꞌnîkon anenpenatanîꞌpai wai sîrîrîkon pîꞌ, teuren tamîꞌnawîrî epuꞌtîyaꞌnîkon tanne, moropai meruntî ke aakoꞌmamîkon tanne, maasa pra innape yairon itekare kuꞌsaꞌyaꞌnîkon yeꞌnen.
13 Esenumenka, yairî awanî amîrîꞌnîkon yenpenatanîꞌtoꞌpeuya enen uukoꞌmamî pîkîrî.
14 Maasa pra uusaꞌmanta kupî epuꞌtî pîꞌ wai. Jesus Uyepotorîkonya taꞌpî upîꞌ: —Aasaꞌmanta kupî pe nai.
15 Mîrîrî yeꞌnen uusaꞌmanta rawîrî tamîꞌnawîron pîꞌ amîrîꞌnîkon enpenatatoꞌpe sîrîrî menukasauꞌya moropai sîrîrîkon pîꞌ awenpenatakon tîwîrî yuꞌse wai, uusaꞌmantasaꞌ tîpo.
Inkeꞌ Pe Jesus Etinyakaꞌmaꞌpî Pîꞌ Pedro Eseurîma
16 Uyonpayamîꞌ, anna neraꞌmaꞌpî ekaremekî annaya sîrîrî. Îꞌ kaiꞌma meruntî ke Uyepotorîkon Jesus Cristo wanî, moropai îꞌ kaiꞌma aaipî kupî ekaremekî annaya. Îꞌ kaiꞌma anna nepoppîtîꞌpî ekaremekî annaya pepîn apîꞌnîkon. Maasa pra anna yenu ke eraꞌmaꞌpî annaya, ipîkku pe aweꞌtoꞌ eraꞌmaꞌpî annaya.
17 Wîꞌ po anna wanî tanne, Paapaya Jesus yapurî eraꞌmaꞌpî annaya. Manniꞌ ipîkku, tamîꞌnawîronkon yentainon Paapa maimu etaꞌpî annaya, kaꞌ winîpai eeseurîmaꞌpî. Taꞌpîiya:—Mîserî unmu, uwakîri puꞌkuru.Kureꞌne ipîꞌ atausinpatoꞌ
—taꞌpî Paapaya.
18 Mîrîrî mai kaꞌ poinon etaꞌpî annaya Uyepotorîkon Jesus Cristo pokonpe anna wanî tanne wîꞌ po, oꞌnon pata aꞌka pe eetinyakaꞌmaꞌpî morî pe Paapa warantî.
19 Mîrîrî yeꞌnen epuꞌtîꞌnîkon sîrîrî itekare wanî yairî puꞌkuru. Manniꞌkan Paapa maimu ekaremeꞌnenan penaronkon profetayamîꞌ nurîꞌtî nekaremekîꞌpî pe awanî mîrîrî. Mîrîrî inkamoro nekaremekîꞌpî pîinamayaꞌnîkon ya, morî pe yairon pe awanîkon. Maasa pra mîrîrî itekare wanî ewaron ta eꞌnî ya uweiyukon warantî, ewaron weiyuꞌmanen pe. Maasa pra îꞌ eꞌkupî epuꞌtîꞌnîkon emapuꞌtînen pe awanî. Ewaron ta asarî ya uweiyukon ton yuwa uyeꞌmarîkon eraꞌmatoꞌpe, pata erenmapî pîkîrî. Mîrîrî warantî uweiyukon pe itekare wanî, îꞌ kaiꞌma koꞌmannîtoꞌ ekaremekîiya Uyepotorîkon Jesus Cristo iipî pîkîrî. Mîrîrî yai tamîꞌnawîron epuꞌtî aronne, manniꞌ kaiwanoꞌ pata erenmapîyakanya pata erenmapî ekaremekî warantî.
20 Anîꞌya tiwin kin sîrîrî itekare Paapa maimu eꞌmenukasaꞌ profetayamîꞌ nekaremekîꞌpî ekaremekî eserîke pra man tîîwarîrî. Mîrîrî epuꞌtîyaꞌnîkon yuꞌse wai, îꞌ epuꞌtî yuꞌse awanîkon yentai.
21 Maasa pra sîrîrî itekare profetayamîꞌ eseurîmaꞌpî wanî epuꞌnen pe tîwanîkon wenai pra, tîîse inkamoro yeurîmaꞌpî Morî Yekaton Wannîya, sîrîrî itekare Paapa winîpainon pîꞌ toꞌ eseurîmatoꞌpe.
