Sîrîrî Kaareta Itakon Iteꞌka Pe Pedro Nîmenukaꞌpî 2:1-22
2 Pena seruꞌyeꞌ pe teeseurîmasanon profetayamîꞌ esenpoꞌpî penaronkon pemonkonyamîꞌ koreꞌta. Moropai sîrîrîpe nîrî mîrîrî yeꞌkakon seruꞌyeꞌ pe yenupatonkon esenpo kupî sîrîrî akoreꞌtaꞌnîkon. Inkamoroya ayenupakon kupî sîrîrî seruꞌyeꞌ pe tîweꞌtoꞌkon ke ayakaꞌmakon toꞌya. Inkamoroya taa: —Imakuiꞌpî yapai uurîꞌnîkon moꞌkapa Uyepotorîkon saꞌmanta pra awanîꞌpî —taa toꞌya. Mîrîrî wenai Paapa piapai aatarimakon kupî. Mîrîrî yeꞌnen inkamoroya mîrîrî kupî wenai, kaꞌneꞌ pe toꞌ pona toꞌ tarumaꞌtîtoꞌ Paapaya erepamî kupî sîrîrî.
2 Inkamoro yeꞌkakonya tenupatoꞌkon yawîrî tuꞌke pemonkonyamîꞌ koꞌmamî akoreꞌtaꞌnîkon. Toꞌ yeseru nura kupî pîꞌ toꞌ koꞌmamî. Seꞌ tapairî wîriꞌsanyamîꞌ yarakkîrî toꞌ koꞌmamî. Inkamoro nîkupîꞌpî wenai, tiaronkon eseurîma piaꞌtî kupî sîrîrî imakuiꞌpî pe innape Paapa maimu yairon winîkîi.
3 Kureꞌne tîniru yuꞌse tîwanîkon wenai inkamoro seruꞌyeꞌ pe yenupatonkonya amîrîꞌnîkon yenyakaꞌma, moropai seruꞌyeꞌ pe tînepoppîtîkon pîꞌ ayenkuꞌtîkon pîꞌ toꞌ koꞌmamî. Tîîse pena pata pai Paapa wanî toꞌ yenumî yuꞌse. Imakuiꞌpî toꞌ nîkupî koꞌmannîpî epuꞌtîiya mîrîrî. Maasa pra eraꞌma pîꞌ aakoꞌmamî sîrîrî tîpose, aweꞌnasaꞌ pra man. Toꞌ tarumaꞌtîtoꞌ tîuya weiyu erepamî nîmîkî pîꞌ aakoꞌmamî.
4 Maasa pra pena mîrîrî warantî nîrî ikupîꞌpî Paapaya inserîyamîꞌ yarakkîrî. Manniꞌkan inserîyamîꞌ imakuiꞌpî kupîtîponkon yenumîꞌpîiya ewaron pe tîweꞌsen tuꞌnakan yaꞌ, tîwî toꞌ kupîiya pra. Inkamoro yewaꞌtîpîtîꞌpîiya saꞌman ferro ke, inkamoro koꞌmantoꞌpe îꞌ pensa tamîꞌnawîronkon yenumî tîuya weiyu erepamî pîkîrî.
5 Mîrîrî warantî nîrî Paapaya penaronkon kupî pra awanîꞌpî tîwî. Tîîse toꞌ tarumaꞌtîtoꞌ ton tîrîꞌpîiya kureꞌnan tuna ke, tîmaimu yawîrî pra toꞌ wanî wenai. Tîîse Paapaya Noé nurîꞌtî neken pîikaꞌtîꞌpî. Mîîkîrî Noéya ekaremeꞌpîtîꞌpî. —Yairî akoꞌmantî —taapîtîꞌpîiya toꞌ pîꞌ. Mîîkîrî Noé pîikaꞌtîꞌpîiya. Moropai ipokonpe asakîꞌne miaꞌ pona tîîmoꞌtai kaisarî neken, toꞌ pîikaꞌtîꞌpîiya.
6 Moropai pena mîrîrî warantî nîrî Paapaya Sodoma moropai Gomorra cidaderî tarumaꞌtîꞌpî apoꞌ ke, kureꞌne imakuiꞌpî pe mîrîrî pata ponkon wanî wenai. Inkamoro aramîꞌpî tamîꞌnawîrî. Mîrîrî kupîꞌpîiya îꞌ kaiꞌma sîrîrî pankon pemonkonyamîꞌ ituꞌse tîweꞌtoꞌ yawîronkon pepîn yarakkîrî ikupî tîuya ekaremekîpa kaiꞌma.
7 Inkamoro koreꞌtapai tiwin warayoꞌ Ló nurîꞌtî, yairî tîweꞌsen pîikaꞌtîꞌpî Paapaya. Mîîkîrî eꞌpîtîꞌpî mararî pra teesewankonoꞌmai mîrîrî pata po tîîkoꞌmansenon yeseru wanî yeꞌnen imakuiꞌpî pe.
8 Maasa pra toꞌ koreꞌta aakoꞌmanpîtîꞌpî. Moropai wei kaisarî mîîkîrî esewankonoꞌmapîtîꞌpî tewan yaꞌ toꞌ nîkupî eraꞌma tîuya yai, moropai toꞌ eseurîma eta tîuya yai imakuiꞌpî pe.
9 Mîrîrî warantî Paapaya manniꞌkan warayoꞌkon morî kupîtîponkon pîikaꞌtîꞌpî. Noé nurîꞌtî pîikaꞌtîꞌpîiya moropai Ló nurîꞌtî pîikaꞌtîꞌpîiya. Mîrîrî warantî morî pe tîweꞌsanon, tîmaimu yawîronkon sîrîrîpankon pîikaꞌtîiya toꞌ esewankonoꞌmatoꞌ winîpai. Moropai îꞌ kaiꞌma manniꞌkan imakuiꞌpî kupîtîponkon koneka Paapaya toꞌ pataꞌseꞌ ton yaꞌ, îꞌ pensa tamîꞌnawîronkon yenumî tîuya weiyu erepamî pîkîrî, toꞌ koꞌmantoꞌpe.
10 Paapaya inkamoro tarumaꞌtî yentai manniꞌkan teserukon ituꞌse tîweꞌtoꞌkon yawîrî nura ankuꞌpai tîweꞌsanon tarumaꞌtîiya. Moropai ipîkku pe Paapa eꞌtoꞌ namanenan pepîn, imaimu yawîronkon pepîn tarumaꞌtîiya kureꞌne.
Insamoro eppepî pepîn tînkupîkon pîꞌ, moropai mîî pe toꞌ wanî. Moropai inkamoro eseurîma imakuiꞌpî pe inserîyamîꞌ winîkîi. Toꞌ nama toꞌya pepîn.
11 Tîîse insamoro inserîyamîꞌ wanî meruntî ke puꞌkuru inkamoro yentai. Mîîwîni tîîse insamoro yenupatonkon seruꞌyeꞌ pe winîkîi toꞌ eseurîma pepîn imakuiꞌpî pe Paapa rawîrî siꞌma.
12 Tîîse insamoro warayoꞌkon wanî teserukon yawîrî ankuꞌpai, teesenumenkai pra, manniꞌ oꞌmaꞌ nariꞌ yuꞌ yawon warantî. Mîîkîrî wanî woꞌnannî yai teposen pe moropai tîwîsen pe, nariꞌ pe awanî yeꞌnen. Mîrîrî warantî inkamoro yeseru wanî, maasa pra teesenumenkai pra toꞌ eseurîma koꞌmannîpî tînepuꞌtîkon pepîn winîkîi. Mîrîrî wenai inkamoro wîîtoꞌ erepamî kupî sîrîrî manniꞌ oꞌmaꞌ yuꞌ yawon wîî warantî.
13 Moropai inkamoroya tiaronkon tarumaꞌtîꞌpî tîuyaꞌnîkon yeꞌma kupî sîrîrî tîweꞌtarumaꞌtîkon ke. Maasa pra Paapa yapurî tîuyaꞌnîkon kaiꞌma, inkamoroya ituꞌse tîweꞌtoꞌkon kupî ituꞌse tîwanîkon pîkîrî. Aꞌka yaꞌ, aronne, tîweppeꞌse pra tîîse tîwakîri pe ikupî toꞌya. Mîrîrî yeꞌnen akoreꞌtaꞌnîkon tekkarikon yonpa toꞌya yai, kureꞌne yeppeꞌnîꞌtonkon pe toꞌ wanî.
14 Inkamoro yeꞌkakon wanî seꞌ tapairî wîriꞌ yarakkîrî eꞌpai tîwanîkon pîꞌ toꞌ esenumenka tîwîrî. Imakuiꞌpî kupî tîuyaꞌnîkon pîꞌ toꞌ esetaꞌka pepîn. Moropai inkamoroya pemonkonyamîꞌ, aꞌtuꞌmîra tîweꞌsanon yenkuꞌtî. Imakuiꞌpî kupî toꞌya emapuꞌtî toꞌya. Îꞌ yuꞌse tîweꞌtoꞌkon pîꞌ toꞌ esekaꞌnunka koꞌmannîpî, maasa pra mîrîrî pîꞌ toꞌ esenupasaꞌ yeꞌnen. Inkamoro yeꞌka mîrîrî kuꞌnenan tîꞌka tîuya taasaꞌ Paapaya man.
15 Maasa pra inkamoro asarî koꞌmannîpî taatakaꞌmai yairon koꞌmannîtoꞌ winîpai taatarimai. Inkamoro esenumenka penaron manniꞌ Beor munmu Balaão nurîꞌtî esenumenkaꞌpî warantî. Mîîkîrî esenumenkaꞌpî imakuiꞌpî kupî tîuya pîꞌ kureꞌne tîniru yapisî tîuya pîꞌ.
16 Tîîse mîîkîrî yuwatîꞌpî Paapaya, ituꞌse Paapa eꞌtoꞌ ankuꞌpai pra awanî wenai. Attî yaponseꞌ itekîn eseurîmatoꞌpe ikupîꞌpîiya. Mîrîrî warantî mîîkîrî nîkupî maꞌnîpaꞌpî Paapaya.
17 Inkamoro seruꞌyeꞌkon yenupatonkon wanî tuna yakasaꞌ tuna ton pîn warantî. Moropai katupuru yarî aꞌsitunya warantî toꞌ wanî. Maasa pra inkamoro yenupantoꞌya tiaronkon yenkuꞌtî. Inkamoro yeꞌka pataꞌseꞌ ton konekasaꞌ Paapaya ituꞌnakan yaꞌ, ewaron pe puꞌkuru tîweꞌsen yaꞌ toꞌ koꞌmantoꞌpe.
18 Maasa pra inkamoro eseurîma mîî pe siꞌma, moropai toꞌ eseurîmatoꞌ wanî îꞌ pe pra rî. —Îꞌ waniꞌ awanî pepîn nura yuꞌse awanîkon ya —taa toꞌya. Mîrîrî wenai amen imakuiꞌpî rumakatîponkon esenumenka teserurîꞌpî pîꞌ emapuꞌtî toꞌya.
19 Inkamoro eseurîma morî pe. —Anîꞌ maimu yawîrî pra uuwarîrîꞌnîkon koꞌmannîtoꞌ wanî morî pe —taa toꞌya. Tîîse toꞌ esenkuꞌtîsaꞌ wanî, maasa pra mîrîrî nura tînkupîkon kupî pîꞌ toꞌ koꞌmamî yeꞌnen. Maasa pra tiwin pîꞌ toꞌ tîîse toꞌ yentai toꞌ yeseru nura enasaꞌ yeꞌnen. Anîꞌya taa ya, itesaꞌ pîn uurî, tîîse iteseru moro awanî, inkupî koꞌmannîpî. Mîrîrî maimu pe awanî, maasa pra itentai puꞌkuru awanî yeꞌnen.
20 Tîîse imakuiꞌpî, nura teserukon winîpai anîꞌ eꞌpîikaꞌtî ya, innape Uyepotorîkon, Upîikaꞌtînenkon, Jesus Cristo kuꞌsaꞌ tîuyaꞌnîkon wenai, moropai mîîkîrî ennaꞌpo ya, teꞌmaꞌpî pîꞌ, imakuiꞌpî kupî pîꞌ, itentai puꞌkuru imakuiꞌpî ena. Mîîkîrî yeseru ena pena eꞌmaiꞌ pe teseru wanîꞌpî yentai, imakuiꞌpî yaꞌ awennaꞌposaꞌ yeꞌnen.
21 Morî pe panpîꞌ awanî eꞌpainon yairon yekare etasaiꞌya pra aweꞌsaꞌya. Maasa pra itekare etaꞌpîiya moropai irumakaꞌpîiya. Awennaꞌpoꞌpî teꞌmaꞌpî pîꞌ. Mîrîrî warantî aatarimaꞌpî morî Paapa maimu tînetaꞌpî winîpai.
22 Mîrîrî yeꞌkakon pemonkonyamîꞌ pîꞌ teeseurîmasen sîrîrî yairon itekare:—Arinmaraka ennaꞌpokoi tînarakkaꞌpî enaꞌse.
Moropai porco ronasaꞌ ya morî pe, tîîse awennaꞌpo inîꞌrî kuisaꞌ ta esenunse eꞌkîꞌpai —taatoꞌ sîrîrî itekare.
