Sîrîrî Kaareta Itakon Iteꞌka Pe Pedro Nîmenukaꞌpî 3:1-18
3 Uyonpayamîꞌ, uwakîrikon puꞌkuru, sîrîrî kaareta menukauya itakon teꞌka pe aapiaꞌnîkon. Sîrîrî kaareta unmenukaꞌpî manniꞌ eꞌmaiꞌnon moropai sîrîrî itakon iteꞌkaron, mîrîrî ke amîrîꞌnîkon yenpenatanîpîuya yairî eesenumenkakonpa mîrîrî yeꞌkakon pîꞌ.
2 Awenpenatakon yuꞌse wai penaronkon Paapa maimu ekaremeꞌnenan nekaremekîꞌpî pîꞌ moropai Uyepotorîkon Upîikaꞌtîton nîtîrîꞌpî pîꞌ. Mîrîrî inaipontîꞌsanya ekaremekîꞌpî apîꞌnîkon, ankupîkon tonpe.
3 Eꞌmaiꞌ pe epuꞌtîyaꞌnîkon yuꞌse wai. Aminke pra Jesus iiꞌtoꞌ weiyu tîîse, pemonkonyamîꞌ esenpo kupî sîrîrî akoreꞌtaꞌnîkon. Inkamoro wanî imakuiꞌpî ituꞌse tîweꞌtoꞌkon kuꞌnenan pe, mararî pra itentaiꞌnîkon eenasaꞌ yeꞌnen. Inkamoro oꞌmaꞌta kupî sîrîrî apîꞌnîkon, innape ikuꞌsaꞌyaꞌnîkon pîꞌ.
4 Taa toꞌya apîꞌnîkon: —Mîîkîrîya tuipî taꞌpî pena innape nai? Tîîse oꞌnon pata mîîkîrî nai? Mîrîrî yekare etaꞌpî penaronkon utamokonya, tîîse toꞌ saꞌmantaꞌpî man, inîꞌrî toꞌ eꞌmîꞌsaꞌka pra awanîꞌpî. Îꞌ taꞌpîiya yawîrî îꞌ eꞌkuꞌsaꞌ pra man, mîrîrî warantî koꞌmannî pîꞌ man. Îꞌ pensa pata ekonekaꞌpî pata pai sîrîrî tîpose koꞌmannî pîꞌ man. Mîîkîrî iipî pe pra man —taa toꞌya.
5 Inkamoro yeꞌkakon amîrîꞌnîkon pîꞌ tîwoꞌmaꞌtasanon enpenata pepîn tîkuꞌse îꞌ eꞌkupîꞌpî pîꞌ. Toꞌ enpenata pepîn pena Paapa nekaremekîꞌpî pîꞌ moropai îꞌ kaiꞌma Paapaya tîmaimu ke kaꞌ moropai non konekaꞌpî pîꞌ. Toꞌ enpenata pepîn îꞌ kaiꞌma non konekaꞌpî Paapaya tuna winîpai moropai tuna arakkita.
6 Moropai toꞌ enpenata pepîn nîrî mîrîrî tuna ke Paapaya penaronkon tîꞌkaꞌpî pîꞌ.
7 Tîîse kaꞌ moropai non sîrîrîpe awanî manniꞌ konekasaꞌ Paapaya man tîmaimu ke, manniꞌ imaimu kaꞌ moropai non konekaꞌpî tîuya ke. Îꞌ pensa itarumaꞌtîtoꞌ tîuya apoꞌ ke weiyu yainon ton pe ikoꞌmannîpîiya, tamîꞌnawîronkon pemonkonyamîꞌ imakuiꞌsan yenumî tîuya yaino ton pe.
8 Uyonpayamîꞌ, uwakîrikon puꞌkuru, sîrîrîkon tîkuꞌse pra eꞌtî aawanmîraꞌnîkon. Maasa eraꞌmatî. Paapa pia tiwinan wei wanî mîrîrî 1.000 konoꞌ warantî. Moropai mîrîrî 1.000 konoꞌ kaisaron wanî mîrîrî tiwinan wei warantî. Uurîꞌnîkon esenumenkatoꞌ warantî Paapa esenumenkatoꞌ wanî pepîn.
9 Îꞌ koneka tîuya taꞌpî tîuya konekapa Paapa koꞌmamî pepîn sîrîrîpe tiaronkon esenumenka warantî. Tîîse mîîkîrîya anîmîkîkon koꞌmannîpî maasa pra anîꞌ eꞌtarumaꞌtî yuꞌse pra tîwanî yeꞌnen. Tîîse imakuiꞌpî teserukon pîꞌ tamîꞌnawîronkon enpenata yuꞌse awanî, moropai irumaka toꞌya yuꞌse awanî.
10 Tîîse Uyepotorîkon iiꞌtoꞌ weiyu wanî amaꞌyeꞌ iiꞌtoꞌ warantî, anîꞌya epuꞌtî pra tîîse. Mîrîrî weiyu yai kaꞌ eseraꞌma kupî pepîn sîrîrî. Kureꞌnan teesetasen yiꞌnîꞌ ton wanî kupî sîrîrî. Moropai tamîꞌnawîron kawîne tîweꞌsen moropai non po tîweꞌsen aramî kupî sîrîrî apoꞌ ke. Non moropai tamîꞌnawîron non po tîweꞌsen esonomî kupî sîrîrî.
11 Mîrîrî yeꞌnen tamîꞌnawîron ataretîꞌka epuꞌtîyaꞌnîkon yeꞌka pe, oꞌnon yeꞌka pe ayeserukon eꞌpai awanî? Ayeserukon eꞌpai man morî pe, imakuiꞌpî ton pra, ituꞌse Paapa eꞌtoꞌ yawîrî. Mîrîrî yeꞌnen mîîkîrî tînamai, iipia eeturumakakon eꞌpai awanî mîrîrî.
12 Moropai Paapa iiꞌtoꞌ weiyu nîmîkî pîꞌ akoꞌmantî. Moropai tamîꞌnawîron ituꞌse Paapa eꞌtoꞌ kupî pîꞌ akoꞌmantî, teesemiꞌtapai kaꞌneꞌ panpîꞌ aaiꞌtoꞌpe. Maasa pra mîrîrî weiyu erepamî yai, kaꞌ ataretîꞌka pe man apoꞌ ke. Moropai tamîꞌnawîron pata po tîweꞌsen awaiꞌna kupî sîrîrî apoꞌ ke.
13 Tîîse Paapaya amenan koꞌmannîtoꞌ kaꞌ moropai pata koneka tîuya taꞌpî. Oꞌnon pata yaironkon koꞌmamî pataꞌseꞌ ton taꞌpîiya. Mîrîrî nîmîkî pîꞌ koꞌmannî sîrîrî.
14 Mîrîrî yeꞌnen uyonpayamîꞌ, uwakîrikon puꞌkuru, mîrîrî weiyu yaino nîmîkî pîꞌ aakoꞌmamîkon pe tamîꞌnawîron konekatî morî pe, yairî Paapa pia awanîkonpa. Morî kuꞌtî, —Imakuiꞌpî mîîkîrî —taa toꞌya namai apîꞌnîkon. Moropai tîwanmîra yarakkîrî aakoꞌmamîkonpa, morî pe akoꞌmantî.
15 Epuꞌtî, maasa tuipî pra tîîse, pemonkonyamîꞌ eꞌpîikaꞌtî nîmîkî pîꞌ Paapa koꞌmamî. Sîrîrî itekare pîꞌ uwakîrikon puꞌkuru uyonpakon Paulo eseurîmaꞌpî. Epuꞌnen pe aweꞌtoꞌ ton tîrîꞌpî Paapaya. Mîrîrî menukaꞌpîiya aapiaꞌnîkon, sîrîrî yekare pîꞌ teeseurîmasen.
16 Moropai sîrîrî yekare pîꞌ teeseurîmatoꞌ menukaꞌpîiya tamîꞌnawîron tîkaaretarî po. Mîrîrî inmenukaꞌpî ikaaretarî pon tiaron pensa saꞌme awanî, anîꞌya epuꞌtî yentai. Mîrîrî ekaremekî manniꞌkan epuꞌnenan pepînya yairî pra. Inkamoro wanî itekare kuꞌnenan pe teuren, tîîse aꞌtuꞌmîra toꞌ wanî, kaꞌneꞌ pe irumaka toꞌya. Inkamoroya Paulo nîmenukaꞌpî ekaremekî tiaron pe, ituꞌse tîweꞌtoꞌkon pîkîrî. Mîrîrî warantî Paapa maimu, tiaronkon nîmenukaꞌpî, ekaremekî toꞌya nîrî yairî pra. Mîrîrî wenai tîîwarîrîꞌnîkon rî tîweꞌtarumaꞌtîtoꞌkon eporî toꞌya.
17 Tîîse uyonpayamîꞌ, aasîrî mîrîrî epuꞌtîyaꞌnîkon puꞌkuru. Mîrîrî yeꞌnen tauya, aka tîwarî eꞌtî, inkamoro imakuiꞌsanya ekaremekîꞌpî yawîrî tîweꞌse pra innape ikuꞌtoꞌyaꞌnîkon yapai amîrîꞌnîkon moꞌka toꞌya namai.
18 Tîîse inîꞌ panpîꞌ epeꞌmîra Paapa nîtîrîꞌpî pîꞌ epuꞌtî pîꞌ akoꞌmantî. Moropai inîꞌ panpîꞌ Uyepotorîkon Jesus Cristo epuꞌtî pîꞌ akoꞌmantî, [imaimu yawîrî awanîkon wenai]. Mîîkîrî yapurîpaiꞌnîkon morî pe aweꞌtoꞌ pîꞌ sîrîrîpe moropai ipatîkarî. Mîrîrî warantî yapurî eꞌpai man.
