Sîrîrî Kaareta Itakon Iteꞌka Pe Paulo Nîmenukaꞌpî Tessalônica Ponkon Pia 1:1-12
1 Uurî Pauloya sîrîrî kaareta menuka, Silas moropai Timóteo pokon pe tîîse uupia. Uyonpayamîꞌ, aapiaꞌnîkon Tessalônica cidaderî ponkon pia imenukauya. Amîrîꞌnîkon wanî Paapa, uyunkon pemonkono pe moropai Uyepotorîkon Jesus Cristo pemonkono pe.
2 Amîrîꞌnîkon repa toꞌya yuꞌse anna man morî pe tîweꞌtoꞌkon ke moropai tîwanmîra tîweꞌtoꞌkon ke.
Aweꞌtarumaꞌtîtoꞌkon Wenai
Morî Pe Aakoꞌmamîkon Kupî Sîrîrî
3 Uyonpayamîꞌ, awenaiꞌnîkon Paapa yapurî annaya sîrîrî tîwîrî. Sîrîrî kupî pîꞌ anna man maasa pra ayeserukon eraꞌma annaya wenai, inîꞌ panpîꞌ innape ikupî pîꞌ aakoꞌmamîkon yeꞌnen, moropai aawarîrîꞌnîkon tiaronkon saꞌnamayaꞌnîkon yeꞌnen. Mîrîrî yeꞌnen —Morî pe man —taa annaya Paapa pîꞌ.
4 Mîrîrî yeꞌnen apîꞌnîkon anna eseurîma sîrîrî anna wakîri pe puꞌkuru Paapa yapurînenan pîꞌ soosikon kaisarî. Anna eseurîma amîrîꞌnîkon pîꞌ maasa pra tamîꞌnawîrî aponaꞌnîkon tuiꞌsen yapîtanîpîyaꞌnîkon yeꞌnen. Amoronkon epuꞌtoꞌyaꞌnîkon moropai kureꞌne aweꞌtarumaꞌtîtoꞌkon koreꞌta innape ikupîyaꞌnîkon yeꞌnen. Mîrîrî pîꞌ anna wakîri pe anna eseurîma.
5 See warantî esepuꞌtî yairî Paapa wanî. Apîꞌnîkon Paapa, uyesaꞌkonya taa: —Îꞌ pe pra rî awanîkon pepîn. Ewontî tarîwaya upata yaꞌ —taiya. Mîrîrî ton pe aweꞌtarumaꞌtîkon sîrîrî.
6 Yairî Paapa wanî maasa pra manniꞌkan amîrîꞌnîkon tarumaꞌtîtîponkon tarumaꞌtîiya kupî sîrîrî.
7 1:7,8 Tîîse amîrîꞌnîkon erîꞌkaꞌtoꞌ ton tîrîiya kupî sîrîrî. Moropai anna erîꞌkaꞌtoꞌ ton nîrî tîrîiya anna eꞌtarumaꞌtîtoꞌ winîpai. Mîrîrî kupîiya kupî sîrîrî îꞌ pensa kaꞌ poi Uyepotorîkon Jesus Cristo iipî yai tîpemonkonoyamîꞌ inserîyamîꞌ meruntîkon pokonpe. Mîrîrî yai apoꞌ kureꞌnan enepîiya kupî sîrîrî tarakkîrî manniꞌkan innape Paapa kuꞌnenan pepîn tarumaꞌtîi. Moropai Uyepotorîkon Jesus maimu yawîrî pra tîîkoꞌmansenon tarumaꞌtîi aaipî.
8 Eraꞌmakî 1:7
9 Inkamoro eꞌtarumaꞌtî kupî sîrîrî mararî pra tînkupîꞌpîkon imakuiꞌpî yepeꞌpî pe. Moropai inkamoro wanî aminke Uyepotorîkon pîꞌ, morî, meruntî piapai aminke toꞌ koꞌmamî ipatîkarî tîweꞌtarumaꞌtîkon pîꞌ.
10 Mîrîrî kupî Paapaya pe man manniꞌ tînekaremekîꞌpî weiyu yai, tîpemonkonoyamîꞌ, innape tîkuꞌnenanya tapurîtoꞌpe Jesus iipî yai. Mîrîrî yai kureꞌne toꞌ esenumenka ipîꞌ taatausinpai. Amîrîꞌnîkonya nîrî yapurî mîrîrî inkamoro pokonpe, maasa pra innape itekare anna nekaremekîꞌpî kuꞌsaꞌyaꞌnîkon wenai.
11 Mîrîrî yeꞌnen anna epîrema sîrîrî amîrîꞌnîkon pona. Esatî annaya Paapa pîꞌ, manniꞌ Paapa amîrîꞌnîkon yannotîpon tîîpia aakoꞌmamîkonpa. Morî pe amîrîꞌnîkon kupîiya aapiaꞌnîkon tîntîrî yapisîkonpa kaiꞌma esatî annaya. Innape Jesus kupîyaꞌnîkon yeꞌnen, tamîꞌnawîron morî ankuꞌpai awanîkon. Mîrîrî yeꞌnen ameruntîrikon ton tîîtoꞌpe Paapaya esatî annaya mîrîrî kupîkonpa.
12 Mîrîrî warantî tamîꞌnawîronkonya Uyepotorîkon Jesus yapurî morî ankupîkon wenai. Moropai ayapurîkon toꞌya nîrî ipîkku pe akupîꞌpîkon mîîkîrîya wenai. Maasa pra Paapaya moropai Uyepotorîkon Jesus Cristoya amîrîꞌnîkon repaꞌpî morî ke.
