Sîrîrî Kaareta Itakon Iteꞌka Pe Paulo Nîmenukaꞌpî Tessalônica Ponkon Pia 2:1-17
2 Mîrîrî yeꞌnen, uyonpayamîꞌ, îꞌ kaiꞌma Uyepotorîkon Jesus Cristo iiꞌtoꞌ weiyu ekaremeꞌnen menukauya sîrîrî. Moropai îꞌ kaiꞌma iipia epereꞌnî kupî ekaremekîuya sîrîrî apîꞌnîkon.
2 Maasa pra teesenkuꞌtîi awanîkon yuꞌse pra anna man, moropai teesiꞌnîꞌse awanîkon yuꞌse pra anna man. Tiaronkonya taa apîꞌnîkon: —Aasîrî Uyepotorîkon weiyu erepansaꞌ man. Mîrîrî ekaremekîꞌpî itekare ekaremeꞌnenya —taa toꞌya. Moropai tiaronya ekaremekîꞌpî, Pauloya ekaremekîꞌpî, taa toꞌya yeꞌnen. Innape kîꞌkuꞌtî mîrîrî itekare.
3 Tîîse inkamoro yeꞌkakonya ayenkuꞌtîtoꞌkon pîꞌ teesenkuꞌtîi awanîkon eꞌpai pra man. Maasa pra Uyepotorîkon iiꞌtoꞌ weiyu eseporî rawîrî, tuꞌkankon pemonkonyamîꞌ wanî pe man Paapa yewanmîrînenan pe. Maasa pra imaimu yawîrî tîweꞌsanon pe pra toꞌ wanî. Moropai tiwin pemonkon iipî pe man, Paapa yeyaton pe tîweꞌsen. Tîîse maasa mîîkîrî tîꞌka Paapaya pe man.
4 Mîîkîrîya tamîꞌnawîronkon napurî yewanmîrî. Moropai inkamoro yentai tîwanî kaiꞌma eesenumenka. Mîîkîrî wanî kupî sîrîrî Paapa pe eꞌpai tamîꞌnawîron yentai. Paapa pe tîwanîpa kaiꞌma eereuta kupî sîrîrî Paapa soosirî ta ipataꞌseꞌ yaꞌ, tamîꞌnawîronkon esaꞌ pe tîwanîpa kaiꞌma. Mîîkîrîya taa kupî sîrîrî: —Uurî Paapa —taiya kupî sîrîrî.
5 Mîrîrî pîꞌ awenpenatakon pra naatî? Sîrîrî ekaremekîꞌpîuya pena akoreꞌtaꞌnîkon wanî yai apîꞌnîkon.
6 Mîîkîrî pemonkon erepamî akoreꞌtaꞌnîkon maꞌnîpanen moro man. Mîrîrî yeꞌnen eeseporî pra aakoꞌmamî. Moropai anîꞌ pe awanî epuꞌtî pîꞌ naatîi. Tîîse mîîkîrî esenpo pe man teesenpotoꞌ pataꞌpî weiyu yai, eesenpo pe man.
7 Tîîse aasîrî Makui esenyakaꞌma koꞌmannîpî sîrîrî. Pemonkonyamîꞌya Paapa maimu yewanmîrî emapuꞌtî pîꞌ aakoꞌmamî amaꞌ pe, anîꞌya epuꞌtî pra. Tîîse mîîkîrî imaꞌnapa pîꞌ tîîkoꞌmansenya imaꞌnapa koꞌmannîpî sîrîrî, Paapaya tîmoꞌka pîkîrî.
8 Mîrîrî tîpo Paapaya imoꞌkasaꞌ pataꞌpî ya, mîîkîrî pemonkon, Paapa yeyaton esenpo pe man. Moropai mîîkîrî pemonkon esenposaꞌ tîpo, Uyepotorîkon Jesus iipî. Mîrîrî yai iwîiya pe man tîmaimu ke. Tamîꞌnawîrî morî pe tîweꞌtoꞌ ke tiwinarî imaꞌtanîpîiya pe man.
9 Mîîkîrî pemonkon Paapa yeyaton iipî pe man Makui meruntîri yarakkîrî. Moropai mîîkîrîya tuꞌkan teraꞌmasen pepîn kupî kupî sîrîrî. Ikupî eserîkan pepîn kupîiya kupî sîrîrî moropai esenumenkantoꞌ kupîiya kupî sîrîrî, pemonkonyamîꞌ yenkuꞌtî yeꞌka pe.
10 Mîrîrî kupîiya kupî sîrîrî pemonkonyamîꞌ ataꞌkaꞌmaꞌsan yenkuꞌtîpa kaiꞌma imakuiꞌpî pe. Inkamoro esenkuꞌtî maasa pra yairon maimu anetapai pra tîweꞌsaꞌkon wenai. Mîrîrî yeꞌnen inkamoro pîikaꞌtî Paapaya pepîn.
11 Moropai mîrîrî wenai Paapaya ikupî kupî sîrîrî inkamoro seruꞌyeꞌkon maimu pîꞌ inna taatoꞌpe toꞌya.
12 Mîrîrî kupîiya inkamoro tarumaꞌtîpa, maasa pra yairon pîꞌ inna taasaꞌ toꞌya pra awanî yeꞌnen, moropai imakuiꞌpî yapurî pîꞌ toꞌ koꞌmansaꞌ yeꞌnen.
Yairon Yekare Yawîrî Akoꞌmantî.
13 Uyonpayamîꞌ, Paapa nîsaꞌnamaꞌsan, —Morî pe man —taa annaya Paapa pîꞌ tîwîrî awenaiꞌnîkon. Maasa pra amîrîꞌnîkon menkaꞌpî Paapaya eꞌmaiꞌ pe aweꞌpîikaꞌtîkonpa. Morî Yekaton Wannîya Paapa ton pe amoꞌkaꞌpîkon wenai moropai innape yairon kuꞌsaꞌyaꞌnîkon wenai, apîikaꞌtîiyaꞌnîkon.
14 Paapaya amîrîꞌnîkon yannoꞌpî anna nekaremekîꞌpî itekare wenai, Uyepotorîkon Jesus Cristo yarakkîrî ipîkku pe awanîkonpa.
15 Mîrîrî yeꞌnen uyonpayamîꞌ, mîrîrî anetaꞌpîkon yairon yawîrî akoꞌmantî. Mîrîrî etaꞌpîyaꞌnîkon anna nekaremekîꞌpî wenai moropai anna nîmenukaꞌpî wenai. Mîrîrî yawîrî akoꞌmantî.
16 Esatî annaya sîrîrî Uyepotorîkon Jesus Cristo pîꞌ, moropai Uyunkon Paapa pîꞌ. Manniꞌ uurîꞌnîkon saꞌnamatîpon, morî pe aweꞌtoꞌ wenai. Moropai tîwinîpainon tuiꞌsen nîmîkî pîꞌ koꞌmannî emapuꞌtînen, manniꞌ pîꞌ esatî annaya.
17 Aatausinpatoꞌkon ton, ameruntîrikon ton tîîtoꞌpe toꞌya morî kupî pîꞌ aakoꞌmamîkonpa. Moropai morî pîꞌ eeseurîmakonpa esatî annaya sîrîrî.
