Sîrîrî Kaareta Itakon Iteꞌka Pe Paulo Nîmenukaꞌpî Tessalônica Ponkon Pia 3:1-18
3 Mîrîrî yeꞌnen uyonpayamîꞌ, anna pona epîrematî itekare anna nekaremekîꞌpî etatoꞌpe pemonkonyamîꞌya, moropai yapiꞌtoꞌpe toꞌya îꞌ kaiꞌma amîrîꞌnîkonya yapisîꞌpî warantî.
2 Moropai epîrematî imakuiꞌsan pemonkonyamîꞌ winîpai Paapaya anna pîikaꞌtîtoꞌpe. Maasa pra tamîꞌnawîronkonya innape itekare ikupî pepîn.
3 Tîîse Uyepotorîkon koꞌmamî yairî. Mîîkîrîya îꞌ taꞌpî tîuya yawîrî ikupî. Amîrîꞌnîkon kupîiya meruntî ke awanîkonpa. Moropai amîrîꞌnîkon koꞌmannîpîiya morî pe Makui piapai.
4 Anna nekaremekîꞌpî yawîrî aakoꞌmamîkon mîrîrî. Moropai mîrîrî warantî ikupî pîꞌ aakoꞌmamîkon maasa pra Uyepotorîkonya ikupî epuꞌtî pîꞌ anna man.
5 Moropai Uyepotorîkonya apîikaꞌtîkon yuꞌse anna wanî yapurîkonpa, moropai tamîꞌnawîron tuiꞌsen yapîtanîpîkonpa Cristoya yapîtanîpîꞌpî warantî. Mîrîrî kupî Uyepotorîkonya yuꞌse anna man.
Enyaꞌne Pe Tîweꞌsen Pîꞌ Eeseurîma.
6 Uyonpayamîꞌ, Uyepotorî Jesus Cristo maimu pe taa annaya sîrîrî apîꞌnîkon. Uyonpakon enyaꞌneꞌkon piapai atarimatî. Maasa pra inkamoro enyaꞌneꞌkon wanî îꞌ kaiꞌma ayenupaꞌpîkon annaya yawîrî pra, ikoꞌmanpai toꞌ wanî.
7 Maasa pra amîrîꞌnîkonya epuꞌtî morî pe îꞌ kaiꞌma akoreꞌtaꞌnîkon anna koꞌmamîꞌpî yeseru. Mîrîrî kupîyaꞌnîkon eꞌpai awanî. Maasa pra anna koꞌmansaꞌ pra man akoreꞌtaꞌnîkon enyaꞌneꞌkon warantî. Moo teesenyakaꞌmai pra, anna koꞌmamî pra awanîꞌpî. Mîrîrî epuꞌtî pîꞌ naatîi.
8 Îꞌ esatî pîꞌ anna koꞌmansaꞌ pra man anîꞌkan pîꞌ epeꞌmîra. Tîîse anna esenyakaꞌmaꞌpî moropai anna ekeꞌnepamîꞌpî anna esenyakaꞌma ke. Anna emîꞌpamî pra wei moropai ewaron kaisarî anna esenyakaꞌmaꞌpî anîꞌ pîꞌ anna yekkari ton esatî annaya namai.
9 Inna seruꞌ pepîn. Anna yekkari ton esatî annaya eꞌpainon apîꞌnîkon tîîse esatî annaya pîn. Maasa pra sîrîrî anna yeseru warantî ikupîyaꞌnîkon yuꞌse anna wanî.
10 Akoreꞌtaꞌnîkon anna wanî yai, ankupîkon ton kupîꞌpî annaya ikupîkonpa. Anîꞌ wanî ya, teesenyakaꞌmai pra ikoꞌmanpai, mîîkîrîya tekkari yonpa pepîn eꞌpai awanî.
11 Sîrîrî pîꞌ anna eseurîma sîrîrî maasa pra akoreꞌtaꞌnîkon inkamoro yeꞌkakon enyaꞌneꞌkon warantî tîweꞌsanon wanî yekare etasaꞌ annaya yeꞌnen. Îꞌ tîkonekai pra ikoꞌmanpai toꞌ wanî tîîse tiaronkon koꞌmantoꞌ pîꞌ toꞌ eseurîmapîtî koꞌmannîpî.
12 Inkamoro pîꞌ taa annaya sîrîrî, mîrîrî kupî toꞌya namai. Uyepotorîkon Jesus Cristo maimu pe taa annaya sîrîrî. Tîîse morî pe toꞌ koꞌmantoꞌpe tiaronkon pokonpe teesenyakaꞌmakon pîꞌ, toꞌ koꞌmantoꞌpe teesenyakaꞌmai neken tekkarikon eporî toꞌya.
13 Tîîse amîrîꞌnîkon uyonpayamîꞌ, Paapa maimu yawîrî morî kupî pîꞌ akoꞌmantî teesetaꞌkai pra.
14 Yai pra moro awanî akoreꞌtaꞌnîkon tîweꞌsen mîîkîrî wanî taꞌpî annaya yawîrî pra ikoꞌmanpai. Mîîkîrî eraꞌmatî morî pe îꞌ kaiꞌma iteseru wanî. Moropai yairî pra awanî ya, iipiapai atarimatî, mîrîrî teseru wenai aweppeꞌtoꞌpe.
15 Tîîse mîîkîrî kîꞌkuꞌtî ayeyatonkon pe, tîîse ipanamatî. Ayonpakon panamayaꞌnîkon warantî ipanamatî.
Paulo Esekaremekî
16 Mîîkîrî Paapa, tîîwanmîn esaꞌya tîwanmîn tîrî yuꞌse wai aapiaꞌnîkon. Aponaꞌnîkon tuiꞌsen tamîꞌnawîron erepamî tanne, tîwîrî rî tîrîiya yuꞌse wai. Moropai aapiaꞌnîkon Uyepotorîkon koꞌmamî yuꞌse wai.
17 Sîrîrî warantî uyenya ke imenukauya sîrîrî. Tauya apîꞌnîkon, umaimu man aapiaꞌnîkon. Sîrîrî warantî imenukanen uurî tamîꞌnawîron ukaaretarî pîꞌ. Sîrîrî umaimu menukauya, uurîya innape imenukasaꞌ epuꞌtîkonpa.
18 Morî pe Uyepotorîkon Jesus Cristo eꞌtoꞌ wanî aapiaꞌnîkon yuꞌse wai. Mîrîrî neken.
