Sîrîrî Kaareta Teeseurînon João Nîmenukaꞌpî 1:1-14
1 Uurî João, aꞌyekeꞌton, apanamanenkon. Aapia sîrîrî kaareta menukauya sîrîrî, Gaio. Innape asaꞌnamauya.
2 Uyonpa, apona epîremakoi uurî. —Inkupî ton pona morî tîîkî —tauya Paapa pîꞌ. —Morî pe ikoꞌmannîꞌkî moropai priꞌya ikoꞌmannîꞌkî eeseparantî namai —tauya Paapa pîꞌ. Tarakkîrî aakoꞌmantoꞌ koꞌmannîpî Paapaya morî pe epuꞌtî pîꞌ wai.
3 Tiaronkon uyonpakon Jesus epuꞌnenan erepamîꞌpî aapiapai rî iipîꞌsan. —Yairon puꞌkuru mîîkîrî Gaio, yairon maimu yawîrî tîîkoꞌmansen —taapîtîꞌpî toꞌya. Mîrîrî pîꞌ atausinpaꞌpî mararî pra.
4 Yairon maimu kupî pîꞌ uyonpayamîꞌ koꞌmamî etauya uwakîri pe. Mîrîrî kaisaron tiaron atausinpatoꞌ ton pra wai.
Gaio Yeseru
5 Uyonpa, tîwîrî Jesus pemonkonoyamîꞌ pîikaꞌtîyaꞌnîkon pîꞌ aakoꞌmamî, inkamoro epuꞌtîya pra tîîse.
6 —Morî pe anna saꞌnamaꞌpîiya anna pokonpe eꞌpîtî yai —kaiꞌma, ankonekaꞌpî yekare ekaremekîꞌpî aapiapai iipîꞌsanya tarî soosi ta eperepîꞌsan pîꞌ.
7 Toꞌ eseꞌmaꞌtîꞌpî Jesus yekare ekaremeꞌse. Paapa pemonkono pe pra tîweꞌsanon pîꞌ îꞌ rî esatî toꞌya pra man.
8 Mîrîrî warantî inkamoro Jesus yekare ekaremekî pîꞌ teesenyakaꞌmasanon pîikaꞌtîpaiꞌnîkon. Ituꞌse toꞌ eꞌtoꞌ ton tîîpaiꞌnîkon toꞌ pia. Mîrîrî warantî toꞌ pîikaꞌtî ya, toꞌ pokonpe esenyakaꞌman yairon maimu ekaremekî pîꞌ.
Diótrefes Moropai Demétrio
9 Mororonkon Jesus pemonkonoyamîꞌ pia kaareta menukaꞌpîuya tîîse apanamanenkon pe uyapurîiya pra Diótrefes wanî. Tonpayamîꞌ yentai eꞌpai awanî. Moropai umaimu pîinamaiya pra awanî.
10 Mîrîrî yeꞌnen inkonekaꞌpî pîꞌ eeseurîma kupî sîrîrî aapia erepamî yai. Seruꞌyeꞌ aweꞌseruꞌtî upona. Moropai mîrîrîya yepiꞌtî pepîn. Tîîse Jesus pemonkonoyamîꞌ aminkankon erepamî ya, tonpa pe toꞌ yapisîiya pepîn. Moropai morî pe toꞌ anapiꞌpai tiaron wanî ya, —Kaane, tîwî toꞌ nîsi. Toꞌ yapiꞌse pra eꞌkî —taiya. Moropai imaimu tîpîinamai pra tiaronya toꞌ anapiꞌpai awanî ya, —Inîꞌrî soosi ta kewomîi —taiya mîîkîrî toꞌ yapisîtîpon pîꞌ.
11 Uyonpa, imakuiꞌpî kuꞌnenan warantî pra eꞌpai man. Morî kuꞌnenan warantî eꞌnîpaiꞌnîkon. Morî kupî pîꞌ koꞌmannî ya, Paapa pemonkono pe eꞌnî. Tîîse imakuiꞌpî kupî pîꞌ koꞌmannî ya, Paapa pemonkono pe eꞌnî pepîn. Paapa epuꞌsaꞌ pepîn mîrîrî.
12 Tarî tamîꞌnawîronkon eseurîma morî pe Demétrio pîꞌ. Yairon maimu yawîron mîîkîrî. Mîrîrî yeꞌnen morî pe awanî epuꞌtî. Anna eseurîma nîrî ipîꞌ. Morî pe iteseru wanî, useruku pepîn, mîrîrî epuꞌtî pîꞌ naatîi.
Aapiaꞌnîkon umaimu man
13 Tuꞌke itekare man apîꞌ unekaremekî ton, tîîse kaareta ke anekaremeꞌpai pra wai.
14 Tîîse aapia itîîpai wai. Mîrîrî yai eseraꞌman moropai eseurîman.
Paapaya tîwanmîn tîrî yuꞌse wai aapia. Tarîronkon Paapa pemonkonoyamîꞌ maimu man aapia. Umaimu nîrî aapiawonkon Paapa pemonkonoyamîꞌ pia. Mekaremeꞌkîi toꞌ pîꞌ tiwin pîꞌ toꞌ tîîse.
