Sîrîrî Kaareta Paulo Nîmenukaꞌpî Éfeso Ponkon Pia 1:1-23
1 Uurî Paulo, Jesus Cristo naipontîꞌpî ituꞌse Paapa wanî yeꞌnen. Sîrîrî kaareta menukauya amîrîꞌnîkon pia, Paapa nîmoꞌkaꞌsan tîmîrî ton pe, Éfeso cidaderî ponkon pia. Amîrîꞌnîkon wanî innape Jesus Cristo kupî pîꞌ tîîkoꞌmansenon pe.
2 Manniꞌ epeꞌmîra Paapa nîtîrî moropai tîwanmîra eꞌnîtoꞌ tîrî Uyunkon Paapaya moropai Uyepotorîkon Jesus Cristo yunya yuꞌse wai aapiaꞌnîkon.
Upîikaꞌtî Tîuyaꞌnîkon Pîꞌ Paapa Esenumenkaꞌpî Cristo Wenai
3 Paapa, Uyepotorîkon Jesus Cristo yun yapurîpaiꞌnîkon. Maasa pra kaꞌ winîpainon, Morî Yekaton Wannî tîrî tîuya wenai uurîꞌnîkon konekaꞌpîiya morî pe. Ikupîꞌpîiya Cristo nîkupîꞌpî wenai.
4 Maasa pra pena, sîrîrî pata koneka tîuya rawîrî, Paapaya uurîꞌnîkon menkaꞌpî, Jesus Cristo nîkupî ton wenai. Morî pe puꞌkuru eꞌnîtoꞌpe moropai îꞌ rî imakuiꞌpî unkupîꞌpîkon ton pra eꞌnîtoꞌpe tîrawîrî umenkaꞌpîiyaꞌnîkon. Paapaya uurîꞌnîkon saꞌnamaꞌpî kureꞌne.
5 Mîrîrî yeꞌnen eesenumenkaꞌpî pena tînmukuyamîꞌ pe uurîꞌnîkon kupî tîuya pîꞌ, Jesus Cristo wenai. Mîîkîrî esenumenkaꞌpî ituꞌse tîwanî yeꞌnen.
6 Mîrîrî yeꞌnen uurîꞌnîkonya yapurî eꞌpai awanî kureꞌne. Maasa pra morî tîrîꞌpîiya epeꞌmîra, tînmu kureꞌne tînsaꞌnama wenai.
7 Maasa pra uurîꞌnîkon wanî Jesus Cristo neꞌmaꞌsan pe, tîmînî iꞌkamo tîuya yai pakîꞌnan pona. Mîrîrî wenai unkupîꞌpîkon imakuiꞌpî kupîꞌpî Paapaya tîîwanmîra. Mîrîrî kupîꞌpîiya maasa pra upîꞌnîkon morî pe puꞌkuru tîwanî yeꞌnen.
8 Mararî pra tîwakîri pe puꞌkuru uurîꞌnîkon pia itîrîꞌpî Paapaya, epuꞌnen pe puꞌkuru tîwanî yeꞌnen.
9 Moropai anîꞌ nepuꞌtî pepîn epuꞌtoꞌpe uurîꞌnîkonya ikupîꞌpîiya. Îꞌ kaiꞌma ikupî tîuya pîꞌ Jesus Cristo nîkupîꞌpî wenai, manniꞌ pîꞌ eesenumenkaꞌpî pena. Mîrîrî yenpoꞌpîiya uupiaꞌnîkon.
10 Moropai tamîꞌnawîrî ekonekasaꞌ yai, ikupîiya taꞌpî tîuya yawîrî. Tamîꞌnawîronkon rumakaiya Cristo yenyaꞌ. Tamîꞌnawîrî kaꞌ po tîîkoꞌmansenon moropai non po tîîkoꞌmansenon rumakaiya itenyaꞌ, tamîꞌnawîronkon esaꞌ pe aweꞌtoꞌpe.
11 Tamîꞌnawîrî sîrîrî kupîꞌpî Paapaya, pena îꞌ kaiꞌma teesenumenkaꞌpî yawîrî. Mîrîrî yeꞌnen mîîkîrîya uurîꞌnîkon menkaꞌpî tîpemonkono pe eꞌnîtoꞌpe Cristo wenai. Mîrîrî kupîꞌpîiya ituꞌse tîwanî yeꞌnen.
12 Mîrîrî kupîꞌpîiya tapurîtoꞌpe uurîꞌnîkon Judeuyamîꞌya, morî pe, ipîkku pe Paapa eꞌtoꞌ yapurîtoꞌpe. Maasa pra eꞌmaiꞌ pe innape Cristo kuꞌsaꞌnîkon, moropai inîmîkî pîꞌ koꞌmannî, iipia koꞌmannîtoꞌpe.
13 Amîrîꞌnîkon yarakkîrî nîrî aweꞌkupîꞌpî mîrîrî warantî. Îꞌ pensa yairon Cristo yekare eꞌpîikaꞌtîntoꞌ etaꞌpîyaꞌnîkon yai, ikupîꞌpîyaꞌnîkon innape. Moropai mîrîrî yai, Paapaya Morî Yekaton Wannî tîrîuya taasaꞌ tîuya yawîrî itîrîꞌpî aapiaꞌnîkon. Tîmîrî pe awanîkon ekaremeꞌnen pe itîrîꞌpîiya.
14 Morî Yekaton Wannî tîrîꞌpîiya imakuiꞌpî yapai tîpemonkonoyamîꞌ yeꞌmaꞌpî tîuya ekaremeꞌnen pe. Moropai tîîpia inkamoro yarî tîuya ekaremeꞌnen pe itîrîꞌpîiya. Mîrîrî wenai uurîꞌnîkonya epuꞌtî îꞌ taasaꞌ tîuya yawîrî Paapaya ikupî. Mîrîrî yeꞌnen morî pe Paapa eꞌtoꞌ pîꞌ yapurî eꞌpai awanî kureꞌne.
Paulo Epîrematoꞌ
15 1:15,16 Mîrîrî yeꞌnen uurî epîrema sîrîrî. Innape Uyepotorîkon Jesus Cristo kupî pîꞌ awanîkon moropai tamîꞌnawîrî manniꞌkan innape ikuꞌnenan saꞌnamayaꞌnîkon yekare etasauꞌya pata pai, epîrema pîꞌ uukoꞌmamî tîîtîꞌnapanse pra. —Morî pe man —tauya Paapa pîꞌ amîrîꞌnîkon wenai. Sîrîrî warantî uurî enpenata tîwîrî rî amîrîꞌnîkon pîꞌ.
16 Eraꞌmakî 1:15
17 Moropai Paapa Uyepotorîkon Jesus Cristo yun manniꞌ morî puꞌkuru pîꞌ esatîuya. Amîrîꞌnîkon pia epuꞌnen pe aweꞌtoꞌkon ton tîîtoꞌpeiya. Îꞌ kaiꞌma tîwanî ekaremeꞌnen ton Morî Yekaton Wannî tîîtoꞌpeiya. Mîrîrî warantî neken îꞌ kaiꞌma Paapa wanî epuꞌtîyaꞌnîkon inîꞌ panpîꞌ.
18 Epîrema sîrîrî. Esatîuya Paapa pîꞌ mîîkîrîya anepuꞌtîkon pepîn epuꞌtîyaꞌnîkon emapuꞌtoꞌpe. Maasa pra amîrîꞌnîkon yannoꞌpîiya ipatîkarî aakoꞌmamîkonpa Cristo pia, moropai tamîꞌnawîrî intîrî yapisîkonpa. Tamîꞌnawîrî mîrîrî epuꞌtîyaꞌnîkon emapuꞌtoꞌpeiya esatîuya sîrîrî.
19 Moropai epîrema sîrîrî îꞌ kaiꞌma kureꞌne Paapa meruntîri wanî epuꞌtîkonpa. Mîrîrî tîmeruntîri tîrîꞌpîiya uurîꞌnîkon pia, innape tîkuꞌnenan pia, (morî pe uyewankon konekatoꞌpe tîuya).
20 Mîrîrî tîmeruntîri yenpoꞌpî Paapaya pena kureꞌnan, îꞌ pensa Cristo pîmîꞌsaꞌka tîuya yai. Moropai mîrîrî tîmeruntîri ke mîîkîrî tîrîꞌpîiya tîmeruntîri winî eereutatoꞌpe kaꞌ po.
21 Miarî siꞌma tamîꞌnawîronkon yentai ikupîꞌpîiya. Manniꞌkan epuꞌnenan, moropai ipîkkukon, moropai tiaronkon esaꞌ pe tîweꞌsanon, tamîꞌnawîronkon inkamoro sîrîrî pata po tîîkoꞌmansenon yentai ikupîꞌpîiya. Moropai inkamoro yentai neken pra, tîîse maasa amenan pata koneka Paapaya yai, ipîkku pe tîweꞌsanon wanî kupî sîrîrî. Inkamoro yentai nîrî ikupîꞌpîiya.
22 Paapaya tamîꞌnawîron kupîꞌpî Cristo maꞌre aweꞌtoꞌpe, moropai Cristo maimu yawîrî toꞌ koꞌmantoꞌpe. Maasa pra Cristo neken tîrîꞌpîiya tînmenkaꞌsan ton pe, inkamoro tîpemonkonoyamîꞌ tamîꞌnawîronkon yepotorî pe aweꞌtoꞌpe.
23 Maasa pra imenkaꞌsan wanî Cristo waikatoi pe, itesaꞌ warantî. Moropai inkamoro puꞌpai pe Cristo koꞌmamî tîmîrî pe toꞌ wanî yeꞌnen. Mîrîrî warantî tamîꞌnawîrî aweꞌtoꞌ yawîrî toꞌ wanî, tîîse Cristo ton pîn awanî ya, aweꞌtoꞌ yawîrî awanî pepîn. Maasa pra mîîkîrî koꞌmamî tamîꞌnawîrî tînkonekaꞌpî yepoi, tamîꞌnawîronkon koꞌmannîꞌnen pe.
