Sîrîrî Kaareta Paulo Nîmenukaꞌpî Éfeso Ponkon Pia 2:1-22
2 Pena amîrîꞌnîkon wanîꞌpî isaꞌmantaꞌsan pe, maasa pra Paapa maimu yawîrî aakoꞌmansaꞌkon pra awanîkon yeꞌnen, imakuiꞌpî kupî pîꞌ aakoꞌmamîkon yeꞌnen.
2 Mîrîrî yai, sîrîrî pata po tîîkoꞌmansenon koꞌmamîꞌpî warantî aakoꞌmamîꞌpîkon. Inkamoro yaipontînen, Makui maimu yawîrî aakoꞌmamîꞌpîkon. Mîîkîrî Makui wanî sîrîrî pata po oꞌmaꞌkon, tîpoitîrîtonon yaipontînen pe, moropai Paapa maimu yawîrî pra tîîkoꞌmansenon yaipontînen pe.
3 Tamîꞌnawîrî uurîꞌnîkon nîrî koꞌmamîꞌpî pena, imakuiꞌpî kupî pîꞌ inkamoro koꞌmamîꞌpî warantî. Ituꞌse eꞌnîtoꞌ yawîrî ankuꞌpai uurîꞌnîkon esenumenkaꞌpî. Îꞌ kaiꞌma esenumenkan yawîrî koꞌmannîꞌpî. Tiaronkon pîꞌ teekoreꞌmaꞌpî warantî uurîꞌnîkon pîꞌ nîrî Paapa ekoreꞌmaꞌpî, mîrîrî imakuiꞌpî pe eꞌnîtoꞌ wenai. Mîrîrî wenai uurîꞌnîkon antarumaꞌtîpai Paapa wanîꞌpî.
4 2:4,5 Tîîse mîîkîrîya uurîꞌnîkon eraꞌmaꞌpî tîꞌnokoꞌpî pe, kureꞌne usaꞌnama tîuyaꞌnîkon yeꞌnen. Ipatîkarî enen koꞌmannîtoꞌ ton tîrîꞌpîiya. Teuren pena imakuiꞌpî unkupîꞌpîkon wenai, isaꞌmantaꞌsan warantî eꞌnî tanne, uurîꞌnîkon koꞌmantoꞌ ton tîrîꞌpîiya Jesus Cristo yarakkîrî. Mîrîrî epeꞌmîra Paapa nîtîrîꞌpî wenai, aweꞌpîikaꞌtîsaꞌkon.
5 Eraꞌmakî 2:4
6 Paapaya Jesus Cristo pîmîꞌsaꞌka yai, uurîꞌnîkon nîrî pîmîꞌsaꞌkaꞌpîiya yarakkîrî. Moropai upataꞌseꞌkon ton tîrîꞌpîiya, kaꞌ po siꞌma tamîꞌnawîronkon koꞌmannîꞌnen pe eꞌnîtoꞌpe Cristo pokonpe.
7 Paapaya mîrîrî kupîꞌpî maasa pra tîwîrî tamîꞌnawîronkonya epuꞌtoꞌpe, mararî pra morî tîrî tîuya uupiaꞌnîkon epeꞌmîra. Kureꞌne usaꞌnamaꞌpîiyaꞌnîkon moropai upîꞌnîkon mîrîrî yenpoꞌpîiya Jesus Cristo nîkupîꞌpî wenai.
8 Maasa pra epeꞌmîra Paapa nîtîrîꞌpî wenai amîrîꞌnîkon eꞌpîikaꞌtîsaꞌ, innape ikupîyaꞌnîkon yeꞌnen. Ituꞌse amîrîꞌnîkon eꞌtoꞌ wenai pra, îꞌ ankupîꞌpîkon wenai pra, tîîse amîrîꞌnîkon repaꞌpîiya epeꞌmîra.
9 Aweꞌpîikaꞌtîsaꞌkon pepîn, morî ankupîꞌpîkon wenai. Mîrîrî yeꞌnen anîꞌ wanî pepîn mîî pe mîrîrî pîꞌ.
10 Maasa pra morî pe uurîꞌnîkon wanî Paapa nîkonekaꞌsan pe, Jesus Cristo piawonkon pe eꞌnî yeꞌnen. Moropai mîîkîrî yarakkîrî koꞌmannî wenai, morî kupî pîꞌ koꞌmannîtoꞌpe ukonekaꞌpîiyaꞌnîkon. Mîrîrî morî pîꞌ Paapa esenumenkaꞌpî pena ikupî pîꞌ koꞌmannîtoꞌpe.
Cristo Pemonkono Pe Judeuyamîꞌ Pepîn Ena
11 Enpenatatî îꞌ kaiꞌma pena awanîꞌpîkon pîꞌ. Amîrîꞌnîkon esenposaꞌ pra man Judeuyamîꞌ pe. Mîrîrî yeꞌnen Judeuyamîꞌ mîî pe tîweꞌsanonya taa apîꞌnîkon: —Paapa pemonkono pe pra awanîkon maasa pra amerekon piꞌpî yaꞌtî toꞌya pra awanîꞌpî —taa toꞌya. Tesaꞌkon pîꞌ neken toꞌ atapurî, tewankon yawon pîꞌ pra.
12 Enpenatatî, pena aakoꞌmamîꞌpîkon aminke Cristo pîꞌ. Paapa pemonkonoyamîꞌ imenkaꞌsan yonpa pe pra awanîꞌpîkon. Mîrîrî yeꞌnen îꞌ taꞌpî Paapaya toꞌ pîꞌ yawîrî ikupîꞌpîiya tîpemonkonoyamîꞌ ton pe, tîîse amîrîꞌnîkon ton pe pra. Iwinîpainon morî nîmîkîyaꞌnîkon pra awanîꞌpîkon. Aakoꞌmamîꞌpîkon sîrîrî pata po Paapa tepuꞌse pra. Mîrîrî warantî awanîꞌpîkon pena.
13 Pena amîrîꞌnîkon koꞌmansaꞌ aminke Paapa pîꞌ tîîse Cristo saꞌmantaꞌpî, imînî etiꞌkamoꞌpî pakîꞌnan pona. Mîrîrî inkupîꞌpî wenai tîîpia amîrîꞌnîkon enepîꞌpîiya.
14 Maasa pra mîîkîrî rî Cristoya tîwanmîra aweꞌtoꞌkon ton tîrîꞌpî. Akupîꞌpîiyaꞌnîkon Judeuyamîꞌ moropai Judeuyamîꞌ pepîn yarakkîrî tiwinan warantî. Tiwin pemonkon warantî aakoꞌmamîkonpa teesiyuꞌpîꞌse pra. Mîîkîrîya eseyaton pîꞌ aweꞌtoꞌkon yaretîꞌkaꞌpî.
15 Maasa pra Moisés nurîꞌtîya yenupantoꞌ, Judeuyamîꞌ yeseru yaretîꞌkaꞌpîiya. Tarîpai Jesus Cristo wenai tiwin akupîꞌpîiyaꞌnîkon. Mîrîrî yeꞌnen amenan pe amîrîꞌnîkon kupîꞌpîiya tîpemonkono pe. Mîrîrî warantî tîwanmîn tîrîꞌpîiya.
16 Pakîꞌnan pona tîîsaꞌmanta yai, Cristoya eseyaton pîꞌ eꞌnîtoꞌ yaretîꞌkaꞌpî. Maasa pra morî pe uurîꞌnîkon, Judeuyamîꞌ, Judeuyamîꞌ pepîn ena emapuꞌtîꞌpîiya Paapa yarakkîrî, tînkupîꞌpî wenai. Moropai ukupîꞌpîiyaꞌnîkon tiwinan pemonkon warantî.
17 Mîrîrî ekaremeꞌse Cristo iipîꞌpî. Moropai mîrîrî ekaremeꞌpîtîꞌpîiya tamîꞌnawîronkon pîꞌ tîwanmîra aakoꞌmamîkonpa. Ekaremekîꞌpîiya amîrîꞌnîkon Judeuyamîꞌ pepîn pîꞌ, aminke Paapa pîꞌ tîweꞌsanon. Moropai Judeuyamîꞌ pîꞌ nîrî ekaremekîꞌpîiya, aminke pra ipîꞌ tîweꞌsanon pîꞌ.
18 Cristo nîkupîꞌpî wenai uurîꞌnîkon tamîꞌnawîronkon Judeuyamîꞌ moropai Judeuyamîꞌ pepîn wîtî tarîpai Paapa pia. Maasa pra Morî Yekaton Wannîya uurîꞌnîkon yarî, mîîkîrî rîya. Inîꞌrî umaꞌnîpanenkon ton pra.
19 Mîrîrî yeꞌnen amîrîꞌnîkon Judeuyamîꞌ pepîn wanî pepîn kaꞌran pe tîweꞌsen warantî. Tîîse amîrîꞌnîkon wanî tarîpai Paapa pemonkonoyamîꞌ pe. Inmukuyamîꞌ pe awanîkon!
20 Amîrîꞌnîkon wanî Paapa yewîꞌ konekasaꞌ warantî. Moropai anna, Jesus naipontîꞌsan moropai profetayamîꞌ wanî tîꞌ warantî yapîtanîꞌtoꞌpe itîîsaꞌ. Maasa pra anna winîpai itekare etasaꞌyaꞌnîkon yeꞌnen. Tîîse Jesus Cristo wanî kureꞌnan tîꞌ warantî tamîꞌnawîrî uurîꞌnîkon yapîtanîꞌnen pe.
21 Mîîkîrîya uurîꞌnîkon koꞌmannîpî tamîꞌnawîrî morî pe eꞌnîtoꞌpe. Moropai mîîkîrîya inîꞌ panpîꞌ tepuꞌtoꞌpe uurîꞌnîkonya ikupî tîmîrî tonpe tîîpia eturumakantoꞌpe.
22 Mîrîrî warantî nîrî amîrîꞌnîkon wanî itewîꞌ pe, Jesus Cristo yarakkîrî awanîkon yeꞌnen. Tiaronkon innape ikuꞌnenan pokonpe tiwin itewîꞌ pe ukonekaiyaꞌnîkon, ita Paapa koꞌmantoꞌ ton, Morî Yekaton Wannî wenai. Mîrîrî warantî uurîꞌnîkon wanî.
