Sîrîrî Kaareta Paulo Nîmenukaꞌpî Éfeso Ponkon Pia 3:1-21
3 Mîrîrî yeꞌnen uurî Paulo, Jesus Cristo poitîrî wanî sîrîrî tarî atarakkannîtoꞌ ta itekare ekaremekîuya yeꞌnen amîrîꞌnîkon, Judeuyamîꞌ pepîn pîꞌ.
2 Upîꞌ morî pe tîwanî yeꞌnen, ikuꞌtoꞌpeuya Paapaya itîrîꞌpî uupia, epuꞌtî pîꞌ naatîi. Amîrîꞌnîkon Judeuyamîꞌ pepîn koreꞌta esenyakaꞌmatoꞌpe itîrîꞌpîiya.
3 Paapaya îꞌ kaiꞌma ikupî tîuya ekaremekîꞌpî upîꞌ Judeuyamîꞌ pepîn yarakkîrî. Sîrîrî itekare, sîrîrî tîpose anîꞌ nepuꞌtî pepîn menukaꞌpîuya aapiaꞌnîkon mararî, kureꞌne pra.
4 Mîrîrî erenkasaꞌyaꞌnîkon ya, epuꞌtîꞌpîyaꞌnîkon sîrîrî. Îꞌ kaiꞌma manniꞌ anîꞌ nepuꞌtî pepîn, Cristo wenai Paapa nîkupî ton pîꞌ esenumenka epuꞌtîꞌpîyaꞌnîkon.
5 Pena patapai anîꞌ nepuꞌtîꞌpî pepîn sîrîrî. Tîîse sîrîrî patapai, Morî Yekaton Wannî wenai Paapaya yenpoꞌpî, sîrîrî epuꞌtoꞌpe tînaipontîꞌsanya moropai Paapa maimu ekaremeꞌnenanya.
6 Anîꞌ nepuꞌtî pepîn wanî see warantî: Cristo nîkupîꞌpî yekare eta tîuyaꞌnîkon wenai Judeuyamîꞌ pepînya tîweꞌpîikaꞌtîtoꞌkon ton yapisî eꞌpainon Judeuyamîꞌ pokonpe Paapa winîpai. Inkamoro wanî nîrî Paapa munkîyamîꞌ pe, tiwin pemonkon warantî toꞌ eꞌtoꞌpe Judeuyamîꞌ yarakkîrî. Moropai Jesus Cristo nîkupîꞌpî wenai, inkamoro nîrî pîikaꞌtî Paapaya.
7 Epeꞌmîra tîntîrî tîrîꞌpî Paapaya uupia, moropai kureꞌne meruntî ke urepaꞌpîiya, tîmaimu ekaremeꞌtoꞌpeuya. Mîrîrî wenai, Paapaya uurî yaipontîꞌpî sîrîrî itekare ekaremeꞌtoꞌpeuya.
8 Teuren uurî wanî tanne tamîꞌnawîronkon Paapa pemonkonoyamîꞌ maꞌre, tîîse Paapaya itîrîꞌpî uupia tîmaimu ekaremeꞌtoꞌpeuya Judeuyamîꞌ pepîn pîꞌ. Kureꞌne anîꞌya epuꞌtî yentai Cristo nîtîrî ton mîrîrî ekaremekîuya Judeuyamîꞌ pepîn pîꞌ.
9 Moropai îꞌ kaiꞌma Judeuyamîꞌ pepîn pîikaꞌtî Paapaya ekaremekîuya tamîꞌnawîronkonya epuꞌtoꞌpe, manniꞌ anîꞌ nepuꞌtî pepîn pena patapainon. Paapaya neken epuꞌtîꞌpî pena, tamîꞌnawîron konekatîponya.
10 Tîîse sîrîrî innape ikuꞌnenan Judeuyamîꞌ moropai Judeuyamîꞌ pepîn tîmoꞌkaꞌsan wenai, tîwîrî epuꞌnen pe tîwanî epuꞌtî ipîkkukonya. Manniꞌkan kaꞌ po tîîkoꞌmansenonya, inserîyamîꞌya taa: —Kureꞌne epuꞌnen pe Paapa wanî. Mîrîrî taa toꞌya, innape Paapa kuꞌnenan eraꞌma tîuyaꞌnîkon wenai.
11 Mîrîrî epuꞌnen pe awanî esepuꞌtî. Uyepotorîkon Jesus Cristo yarimaꞌpîiya wenai, tîwîrî teesenumenkatoꞌ yawîrî.
12 Mîrîrî yeꞌnen Cristo yarakkîrî eꞌnî wenai, innape ikupî yeꞌnen, Paapa pia uurîꞌnîkon erepamî eꞌpainon eranneꞌ pe pra.
13 Mîrîrî yeꞌnen tauya sîrîrî apîꞌnîkon. Teesewankonoꞌmai pra eꞌtî, tarî uurî eꞌtarumaꞌtîtoꞌ pîꞌ, maasa pra amîrîꞌnîkon ton pe eꞌtarumaꞌtî sîrîrî. Tîîse tamîꞌnawîrî uyarakkîrî aweꞌkupî manniꞌ pîꞌ taatausinpai eꞌtî, amîrîꞌnîkon ton pe eꞌtarumaꞌtî yeꞌnen.
Kureꞌne Cristoya Uurîꞌnîkon Saꞌnama
14 Tamîꞌnawîrî mîrîrî wenai Paapa yapurîuya, epîrema irawîrî siꞌma uyeseꞌmu pona teenai.
15 Manniꞌ Paapa, tamîꞌnawîrî tîpemonkonoyamîꞌ kaꞌ ponkon pia itîînen moropai non ponkon. Tînmukuyamîꞌ kaiꞌma toꞌ esatîꞌpîiya.
16 Mararî pra antîrî ton moro awanî aapia, anîꞌya ikuꞌneꞌtî yentai. Mîrîrî yawîrî toꞌ meruntîri ton tîîkî tauya Paapa pîꞌ. Morî Yekaton Wannî wenai itîîkî toꞌ yewan yaꞌ tauya.
17 3:17,18 Esatîuya nîrî innape ikupîyaꞌnîkon wenai Cristo koꞌmantoꞌpe ayewankon yaꞌ. Moropai epîrema sîrîrî amîrîꞌnîkonya Cristo eꞌsaꞌnamatoꞌ epuꞌtoꞌpe inîꞌ panpîꞌ. Maasa pra mîîkîrî Cristoya asaꞌnamaꞌpîkon epuꞌtî pîꞌ naatîi, kureꞌne. Mîrîrî yeꞌnen amîrîꞌnîkon rumakaiya pepîn, ayapîtanîpîkon pîꞌ aakoꞌmamî. Mîrîrî epuꞌtîyaꞌnîkon yuꞌse wanî sîrîrî morî pe, tamîꞌnawîronkon Paapa pemonkonoyamîꞌ pokonpe siꞌma, îꞌ kaiꞌma Cristo eꞌsaꞌnamatoꞌ wanî kureꞌne. Aweneꞌ tuna wanî warantî, moropai tuꞌna awanî warantî, moropai kusan ikîꞌpî ton pra awanî warantî, moropai kawîne wîꞌ wanî warantî, Cristoya usaꞌnamatoꞌkon wanî ikîꞌpî ton pra.
18 Eraꞌmakî 3:17
19 Inna, epîrema sîrîrî amîrîꞌnîkon pona, maasa pra sîrîrî Cristo eꞌsaꞌnamatoꞌ epuꞌtîyaꞌnîkon yuꞌse wanî yeꞌnen, teuren tamîꞌnawîrî epuꞌtîyaꞌnîkon eserîke pra tîîse. Tîîse inîꞌ panpîꞌ epuꞌtîyaꞌnîkon yuꞌse wanî, Paapa pia eeturumaka yeꞌka pe eꞌtoꞌ yawîrî, tîwarantî aakoꞌmamîkonpa, tiaronkon saꞌnama pîꞌ. Sîrîrî warantî esatîuya Paapa pîꞌ.
20 Moropai kureꞌne taatausinpai Paapa yapurîuya. Imeruntîri uurîꞌnîkon, inmoꞌkaꞌsan pia intîrîꞌpî wenai, moropai Jesus Cristo nîkupîꞌpî wenai yapurîpaiꞌnîkon man. Mîîkîrîya unesatîꞌpîkon yentai itîrîiya epuꞌtîuya. Moropai îꞌ kaiꞌma esatî pîꞌ esenumenkaꞌnîꞌpî yentai itîrîiya.
21 Mîrîrî yeꞌnen kureꞌne Paapa yapurî pîꞌ koꞌmannî yuꞌse wai. Tamîꞌnawîronkon Cristo piawonkonya yapurî eꞌpai man tîwîrîrî, tîrumakai pra, sîrîrî pankonya moropai maasa teesenposanonya. Mîrîrî warantî aweꞌkupî yuꞌse wai.
