Sîrîrî Kaareta Paulo Nîmenukaꞌpî Éfeso Ponkon Pia 4:1-32
4 Mîrîrî yeꞌnen esatîuya sîrîrî apîꞌnîkon. Atarakkannîtoꞌ yewîꞌ ta Jesus Cristo wenai awanî manniꞌya esatî morî pe aakoꞌmamîkonpa, îꞌ kaiꞌma ituꞌse Paapa eꞌtoꞌ yawîrî. Mîrîrî yuꞌse awanîꞌpî amîrîꞌnîkon yanno tîuya yai.
2 Mîrîrî yeꞌnen tîwîrî akoꞌmantî mîî pe pra, eranmîra moropai teekoreꞌmasen pe pra. Morî pe tiaronkon saꞌnamatî, moropai îꞌ taatoꞌ toꞌya yapîtanîpî pîꞌ akoꞌmantî teekoreꞌmai pra.
3 Tiwin eesenumenkatoꞌkon kuꞌtî. Maasa pra mîrîrî warantî awanîkonpa Morî Yekaton Wannîya itîrîꞌpî aapiaꞌnîkon. Teesiyuꞌpîꞌse aakoꞌmamîkon namai tîwanmîra akoꞌmantî.
4 Tiwin uurîꞌnîkon wanî Paapa pemonkonoyamîꞌ pe, teuren arinîke eꞌnî tanne.Moropai tiwin uurîꞌnîkon pinunpanen wanî Morî Yekaton Wannî.Moropai tiwin kaꞌ pona wîtîntoꞌ nîmîkî pîꞌ koꞌmannî. Miarî morî pe eꞌnî kupî sîrîrî. Mîrîrî ton pe uurîꞌnîkon yannoꞌpî Paapaya.
5 Moropai Uyepotorîkon wanî tiwin.Moropai innape Cristo kuꞌsaꞌnîkon, tiaron pepîn.Moropai tiwin uurîꞌnîkon esenpatakonatoꞌ wanî, Cristo pemonkono pe eꞌnî ekaremeꞌnen pe.
6 Moropai Paapa, mîîkîrî yapurî, tiaron yapurî pepîn. Mîîkîrî rî wanî tamîꞌnawîronkon uurîꞌnîkon yun pe moropai uyesaꞌkon pe awanî, moropai ituꞌse tîweꞌtoꞌ kupî emapuꞌtîiya. Moropai uupiaꞌnîkon aakoꞌmamî.
7 Tiwin pîꞌ siꞌma, uurîꞌnîkonya ukaisarîꞌnîkon Cristo nîtîrî yapisîꞌpî, itîrîiya pîkîrî.
8 Paapa maimu eꞌmenukasaꞌya taasaꞌ yawîrî itîrîꞌpîiya. Taasaiꞌya man:Teenuku yai kaꞌ pona,mîîkîrî Cristo enaꞌpî teyatonon yentai,tamîꞌnawîronkon pemonkonyamîꞌ rawîrî.Moropai pemonkonyamîꞌ pia tîntîrî tîrîꞌpîiya
taasaiꞌya man.
9 Îꞌ kaiꞌma esenumenkan pîꞌ naatî Cristo enukuꞌpî pîꞌ kaꞌ pona? Eꞌmaiꞌ pe awautîꞌpî non yoꞌkoi.
10 Mîrîrî tîpo mîîkîrî rî enukuꞌpî kaꞌ pona tamîꞌnawîron yepoi, ipîkku pe tîwanîpa kaiꞌma. Moropai tamîꞌnawîrî pata kaisarî non po, kaꞌ po aakoꞌmamî sîrîrî, tamîꞌnawîronkon yentai tîwanîpa.
11 Moropai tîntîrî tîrîꞌpîiya tîpemonkonoyamîꞌ pia, pata ponkon kaisarî, toꞌ esenyakaꞌmatoꞌpe tînaipontîkon pe, moropai tiaronkon eꞌtoꞌpe Paapa maimu ekaremeꞌnenan pe, moropai tiaronkon kupîꞌpîiya tîpemonkono pe pemonkonyamîꞌ moꞌkanenan ton pe. Moropai tiaronkon kupîꞌpîiya tîpemonkonoyamîꞌ koꞌmannîꞌnenan ton pe, moropai toꞌ yenupanen ton pe.
12 Insamoro kupîꞌpîiya tîpemonkonoyamîꞌ pîikaꞌtînenan ton pe teesenyakaꞌmatoꞌ kuꞌtoꞌpe toꞌya. Moropai morî pe Cristo wanî warantî toꞌ eꞌtoꞌpe iwaikkatoi pe toꞌ wanî yeꞌnen, itesaꞌ warantî.
13 Mîrîrî yeꞌnen uyenupakon toꞌya yai tamîꞌnawîrî uurîꞌnîkon ena tiwin esenumenkantoꞌ yarakkîrî innape ikupî yeꞌnen. Moropai uyenupakon toꞌya yai, mîîkîrî Paapa munmu epuꞌtî uurîꞌnîkonya kupî sîrîrî inîꞌ panpîꞌ. Moropai uurîꞌnîkon akîpî kupî sîrîrî Cristo warantî eꞌnîtoꞌpe. Morî pe Cristo yeseru wanî manniꞌ warantî uyeserukon ena.
14 Mîrîrî warantî uurîꞌnîkon yenupasaꞌ toꞌya wenai, moreyamîꞌ warantî uurîꞌnîkon wanî pepîn, îꞌ epuꞌnenan pepîn warantî. Maasa pra seruꞌyeꞌkon warayoꞌkonya yenupantoꞌ pîꞌ inna taa, uurîꞌnîkon yenkuꞌtî toꞌya mîrîrî yenupantoꞌ toꞌya wenai. Mîrîrî wanî inna warantî tîîse inna taatîponkon yarî toꞌya atakaꞌmantoꞌ yaꞌ. Tîîse inîꞌrî inna taa pepîn yenupantoꞌ toꞌya pîꞌ, innape Paapa kupî yeꞌnen.
15 Tîîse eseurîman yairon pîꞌ neken, yairî uyonpakon saꞌnamaiꞌma. Mîrîrî warantî ikupîꞌnîkon ya, tamîꞌnawîrî morî pe eꞌnî Cristo ton pe. Manniꞌ uurîꞌnîkon yaipontînen, upuꞌpaikon pe tîwanî yeꞌnen.
16 Moropai uurîꞌnîkon wanî itesaꞌ warantî. Tamîꞌnawîrî eꞌtoꞌ yawîrî, maꞌtîkîꞌ pe pra. Tîîse tamîꞌnawîrî eꞌwaikkatoimîrî uyesaꞌkon wanî ya, morî pe aakoꞌmamî. Esenyakaꞌmantoꞌ kupî morî pe maasa pra tamîꞌnawîrî morî pe eꞌtoꞌ yawîrî awanî yeꞌnen. Mîrîrî warantî Cristo waikatoi pe eꞌnî yeꞌnen. Imaimu yawîrî koꞌmannî ya morî pe esenyakaꞌman, maasa pra tiaronkon saꞌnama pîꞌ koꞌmannî yeꞌnen.
Cristo Nîtîrî Amenan Koꞌmannîtoꞌ
17 Mîrîrî yeꞌnen amîrîꞌnîkon pîꞌ tauya sîrîrî Uyepotorîkon maimu pe. Taa pîꞌ uukoꞌmamî meruntî ke see warantî: Inîꞌrî manniꞌkan Paapa epuꞌnenan pepîn koꞌmamî manniꞌ warantî aakoꞌmamîkon namai. Maasa pra inkamoro esenumenkatoꞌ wanî îꞌ pe pra rî.
18 Moropai inkamoro esenumenka imakuiꞌpî kupî pîꞌ. Ipatîkaron Paapa nîtîrîꞌpî inkamoro koꞌmantoꞌ ton pra awanî. Maasa pra pakko pe Paapa epuꞌtî toꞌya pra toꞌ wanî yeꞌnen. Moropai ituꞌse pra toꞌ wanî maasa pra saꞌman pe toꞌ yewan wanî yeꞌnen.
19 Inkamoro enasaꞌ man aweppeꞌtoꞌ ton pra tamîꞌnawîron imakuiꞌpî tînkupîkon pîꞌ. Nura teserukon kupî pîꞌ toꞌ koꞌmamî. Moropai inîꞌ panpîꞌ ikupîkonpa toꞌ eturumakasaꞌ wanî. Mîrîrî warantî ituꞌse tîweꞌtoꞌkon pîꞌ toꞌ koꞌmamî, toneꞌ imakuiꞌpî ankuꞌpai toꞌ wanî. Mîrîrî warantî Paapa epuꞌnenan pepîn yeseru wanî.
20 Mîrîrî kupî pîꞌ aakoꞌmamîkonpa Cristoya ayenupasaꞌkon pra man.
21 Tîîse amîrîꞌnîkonya etaꞌpî Cristo yekare. Moropai innape ikupîꞌpîyaꞌnîkon imaimu yairon pîꞌ eesenupaꞌpîkon, iteseru pîꞌ.
22 Moropai pena amîrîꞌnîkon esenupaꞌpî îꞌ kaiꞌma penaroꞌ ayeserukon kupî pîꞌ aakoꞌmamîkon rumakakonpa. Mîrîrî ayeserukonya atarumaꞌtîꞌpîkon iwinîkîi pra inîꞌ panpîꞌ.
23 Mîrîrî winîpai ayewankon moropai eesenumenkatoꞌkon miakanmaꞌnîkon eꞌpai awanî amenan pe.
24 Mîrîrî yeꞌnen amenan aponkon yekaꞌmayaꞌnîkon warantî amenan ayeserukon ton yekaꞌmatî ayewankon yaꞌ manniꞌ Paapa yeseru warantî. Mîrîrî yeꞌnen yairî aakoꞌmamîkon, yairî Paapa koꞌmamî warantî.
25 Mîrîrî yeꞌnen seruꞌyeꞌ pe teeseurîmai pra eꞌtî inîꞌrî. Eeseurîmakon ya, yairî eeseurîmakon yuwatî ayonpakon yarakkîrî. Maasa pra tamîꞌnawîrî uurîꞌnîkon wanî Cristo waikatoi pe, ipemonkonoyamîꞌ yonpa pe.
26 Îꞌ pensa eekoreꞌmakon ya, ayentai eekoreꞌmatoꞌkon kîꞌtîrîi imakuiꞌpî kupîyaꞌnîkon namai.
Eekoreꞌmakon ya, wei ewomî pîkîrî kakoꞌmantî. Tîîse eekonekakon yuwatî.
27 Mîrîrî warantî imakuiꞌpî pataꞌseꞌ ton kîꞌtîîtî ayewan yaꞌ, Makui esenyakaꞌma koꞌmannîpî namai.
28 Anîꞌ eꞌsaꞌ ya amaꞌyeꞌ pe, inîꞌrî mîîkîrîya yamaꞌrunpa eꞌpai pra man. Tîîse eesenyakaꞌma neken eꞌpai awanî, morî pe tîîkoꞌmamîpa. Moropai mîrîrî warantî mîîkîrîya îꞌ ton pînon pîikaꞌtî eꞌpainon.
29 Eeseurîmakon ya seꞌ tapairî nura mai pîꞌ eeseurîmakon eꞌpai pra man. Tîîse morî mai yapurîyaꞌnîkon yuwatî. Mîrîrî ke tiaronkon pîikaꞌtîkonpa, moropai inîꞌ panpîꞌ epuꞌnen pe toꞌ eꞌtoꞌpe.
30 Moropai yairî maꞌre Paapa winîpainon Morî Yekaton Wannî tîkuꞌse pra eꞌtî. Maasa pra mîîkîrî Morî Yekaton Wannî wanî Paapa pemonkono pe uurîꞌnîkon wanî ekaremeꞌnen pe. Moropai mîîkîrî wanî yeꞌnen, Paapaya uurîꞌnîkon moꞌka imakuiꞌpî yapai epuꞌtîꞌnîkon, umoꞌkaiyaꞌnîkon weiyu yai.
31 Mîrîrî yeꞌnen tamîꞌnawîrî eekoreꞌmatoꞌkon rumakatî. Moropai aweꞌmuꞌtunpatoꞌkon rumakatî. Moropai aatasiꞌsirunpatoꞌkon rumakatî. Mîrîrî yeꞌka wenai tîwentaimepîꞌse pra eꞌtî. Tiaronkon winîkîi eeseurîmatoꞌkon rumakatî. Moropai tamîꞌnawîrî mîrîrî imakuiꞌpîkon rumakatî.
32 Tîîse morî pe eꞌtî, tiaronkon yarakkîrî eranmîra. Moropai îꞌ rî toꞌ nîkupîꞌpî awinîkîiꞌnîkon mîrîrî kuꞌtî aawanmîraꞌnîkon. Îꞌ kaiꞌma tîîwanmîra Jesus Cristo wenai Paapaya ankupîꞌpîkon kupîꞌpî warantî ikuꞌtî.
