Sîrîrî Kaareta Paulo Nîmenukaꞌpî Éfeso Ponkon Pia 5:1-33
5 Amîrîꞌnîkon wanî Paapa munkîyamîꞌ pe iwakîri pe puꞌkuru. Mîrîrî yeꞌnen oꞌnon yeꞌka pe Paapa wanî manniꞌ warantî awanîkon yuwatî.
2 Mîrîrî warantî îꞌ rî kupîyaꞌnîkon kaisarî, morî pe tiaronkon saꞌnama pîꞌ aakoꞌmamîkon yuꞌse wai. Maasa pra Cristoya uurîꞌnîkon saꞌnamaꞌpî. Mîîkîrî eꞌtîrîꞌpî uurîꞌnîkon ton pe tîîwarîrî. Toꞌ nîtîrî aꞌpusin Paapa wakîri pe, moropai Paapa yapurî pe toꞌ nîpoꞌtî warantî aasaꞌmantaꞌpî, kureꞌne usaꞌnama tîuyaꞌnîkon yeꞌnen. Mîrîrî warantî tiaronkon saꞌnamayaꞌnîkon eꞌpai awanî.
3 Paapa pemonkono pe awanîkon yeꞌnen, imakuiꞌpî pe seꞌ tapairî wîriꞌsanyamîꞌ yarakkîrî keꞌtî, moropai wîriꞌsanyamîꞌ, seꞌ tapairî warayoꞌkon yarakkîrî keꞌtî. Moropai nura tîkuꞌse pra eꞌtî, moropai kureꞌne îꞌ yuꞌse kîsekaꞌnunkatî. Mîrîrî warantî Paapa pemonkonoyamîꞌ koꞌmamî eꞌpai pra man.
4 Moropai eeseurîmakon ya, nura pîꞌ kîseurîmatî, tîîse Paapa pîꞌ —Morî pe man, Paapa —kaꞌtî neken.
5 Mîrîrî warantî wîriꞌsanyamîꞌ yarakkîrî tîweꞌsanon tînoꞌpî pepîn yarakkîrî, moropai nura pîꞌ teesenumenkasanonya, moropai kureꞌne îꞌ yuꞌse teesekaꞌnunkasanonya Paapa winîpainon îꞌ yapisî pepîn, îꞌ pensa aaipî ya tamîꞌnawîronkon esaꞌ pe. Maasa pra inkamoro yeꞌkakon wanî miaꞌ ke ikonekasaꞌ yapurînenan pe. Paapa yapurî toꞌya pepîn.
6 Mîrîrî yeꞌnen morî pe koꞌmanpaiꞌnîkon, anîꞌya uyenkuꞌtîkon namai seꞌ tapairon mai ke. Maasa pra Paapaya tîmaimu yawîronkon pepîn tarumaꞌtî kupî sîrîrî.
7 Mîrîrî yeꞌnen inkamoro yeꞌkakon koreꞌta tîweꞌse pra eꞌtî.
8 Maasa pra pena amîrîꞌnîkon koꞌmamîꞌpî inkamoro koꞌmamî manniꞌ warantî ewaron yaꞌ. Tîîse îꞌ pensa Paapa pemonkono pe eenaꞌpîkon patapai morî pe ayeserukon enasaꞌ aꞌka ta. Mîrîrî yeꞌnen akoꞌmantî morî pe, Paapa pemonkono pe awanîkon yeꞌnen.
9 Mîrîrî warantî aakoꞌmamîkon ya, tiaronkon pîikaꞌtîyaꞌnîkon morî pe toꞌ eꞌtoꞌpe moropai ayeserukon wanî yairî moropai eeseurîmatoꞌkon wanî morî pe, seruꞌyeꞌ pe pra.
10 Îꞌ rî Paapa wakîri pe tîweꞌsen epuꞌtîyaꞌnîkon yuwatî.
11 Moropai imakuiꞌpî toꞌ yeseru, seꞌ tapairon kîꞌkuꞌtî. Tîîse aronne ekaremeꞌtî yairî pra awanî epuꞌtoꞌpe toꞌya.
12 Mîrîrî yeꞌka amaꞌ pe toꞌ nîkupî pîꞌ eseurîman eserîke pra awanî. Maasa pra yeppeꞌnîꞌton pe awanî yeꞌnen.
13 Uurîꞌnîkon wanî toꞌ yeseru yenponenan pe taꞌnîkon ya toꞌ pîꞌ: —Mîrîrî wanî morî pe pra. Manniꞌ aꞌka pe tîweꞌsenya tamîꞌnawîrî teraꞌmasen pepîn yenpo manniꞌ warantî.
14 Maasa pra aꞌka pe tîweꞌsenya tamîꞌnawîron eseraꞌma emapuꞌtî. Mîrîrî yeꞌnen pena aweꞌmenukaꞌpî see warantî:Amîrî awetun koꞌmannîpî manniꞌ apakakî.Amîrî tîîsaꞌmantai tîîkoꞌmansen eꞌmîꞌsaꞌkakî.Moropai Cristoya amîrî kupî aꞌka ta aakoꞌmamîpa
taasaiꞌya man.
15 Mîrîrî yeꞌnen maasa eraꞌmatî morî pe îꞌ kaiꞌma aakoꞌmantoꞌkon menkakonpa. Pakko pe kakoꞌmantî tîîse epuꞌnen pe akoꞌmantî.
16 Morî kupîyaꞌnîkon yuwatî, maasa tîkai pra. Maasa pra tuꞌke imakuiꞌpî kuꞌnenan man akoreꞌtaꞌnîkon. Inkamoroya aamaꞌtînîpîkon namai ikuꞌtî.
17 Pakko pe tîweꞌse pra eꞌtî. Tîîse îꞌ kupîyaꞌnîkon yuꞌse Uyepotorîkon eꞌtoꞌ mîrîrî epuꞌtî.
18 Kureꞌne maiꞌ pîꞌ teetînse pra eꞌtî. Maasa pra mîrîrîya aakoꞌmantoꞌkon tarumaꞌtî. Tîîse Morî Yekaton Wannî esenyakaꞌmatoꞌpe apîꞌnîkon eturumakatî iipia.
19 Tiaronkon innape Jesus kuꞌnenan yarakkîrî eseurîmatî eren ke. Eserenkatî Paapa maimu eꞌmenukasaꞌ erenkatoꞌ pîꞌ moropai Paapa yapurîtoꞌ pîꞌ. Moropai Jesus yeseru pîꞌ teeseurîmasen eren pîꞌ eserenkatî Paapa yapurî pe. —Morî pe puꞌkuru man, Paapa —kaiꞌma eserenkatî.
20 Mîrîrî warantî Paapa uyunkon yapurîtî tîwîrî, tamîꞌnawîron kuꞌsaiꞌya wenai moropai Uyepotorîkon Jesus Cristo wenai.
Warayoꞌkon Moropai Toꞌ Noꞌpîtonon
21 Ayonpakon nîrî maimukon yawîrî akoꞌmantî, Cristo namayaꞌnîkon wenai.
22 Amîrîꞌnîkon wîriꞌsanyamîꞌ pîꞌ tauya sîrîrî, tînyo kenankon pîꞌ, anyokon maimu yawîrî akoꞌmantî, Uyepotorîkon namayaꞌnîkon wenai.
23 Maasa pra inyo wanî tînoꞌpî puꞌpai pe, tîpemonkonoyamîꞌ puꞌpai pe Cristo wanî manniꞌ warantî.
24 Mîrîrî yeꞌnen ipemonkonoyamîꞌ, inmoꞌkaꞌsan koꞌmamî Cristo maimu yawîrî. Mîrîrî warantî nîrî tînyo kenankon wîriꞌsanyamîꞌ koꞌmamî eꞌpai awanî îꞌ taasaꞌ tînyoya yawîrî.
25 Tînoꞌpî kenankon warayoꞌkon pîꞌ tauya: anoꞌpîkon saꞌnama pîꞌ akoꞌmantî, tîpemonkono pe tînmoꞌkaꞌsan saꞌnamaꞌpî Cristoya warantî. Toꞌ saꞌnama tîuya yeꞌnen tîîwarîrî aweꞌtîrîꞌpî, inkamoro pîikaꞌtîpa. Aasaꞌmantaꞌpî morî pe toꞌ eꞌtoꞌpe.
26 Innape tîmaimu kupî toꞌya eraꞌma tîuya yeꞌnen, imakuiꞌpî toꞌ nîkupîꞌpî ronaꞌpîiya, morî pe toꞌ eꞌtoꞌpe.
27 Mîrîrî warantî ikupîꞌpîiya tîîpia toꞌ enepîpa morî pe teken, imakuiꞌpî ton pra. Tîmîrî pe toꞌ wanî yeꞌnen, imakuiꞌpî, nura tîkuꞌse pra toꞌ koꞌmamî yuꞌse awanîꞌpî, tîwarantî.
28 Mîrîrî warantî tînoꞌpîkon saꞌnama pîꞌ warayoꞌkon koꞌmamî eꞌpai awanî. Tîweꞌsaꞌnamakon manniꞌ warantî tînoꞌpîkon saꞌnama toꞌya eꞌpai awanî mîrîrî. Tînoꞌpî saꞌnamanen wanî ya, aweꞌsaꞌnama nîrî.
29 Anîꞌ esewanmîrî pepîn tîîwarîrî, tîîse aweꞌsaꞌnama. Mîrîrî warantî nîrî tîpemonkonoyamîꞌ saꞌnama Cristoya.
30 Ipemonkono pe eꞌnî yeꞌnen usaꞌnamaiyaꞌnîkon mîrîrî.
31 Pena Paapaya taꞌpî:—Warayoꞌ noꞌpîta yai, eemoꞌka tun moropai tîsan piapai moropai tînoꞌpî yarakkîrî eena.Asakîꞌne toꞌ tîîse tiwinan warantî toꞌ enasaꞌ mîrîrî
—taasaiꞌya man.
32 Esenumenkantoꞌ mîrîrî kureꞌnan, maasa pra Cristo pîꞌ eseurîma moropai inmoꞌkaꞌsan pîꞌ.
33 Moropai amîrîꞌnîkon warayoꞌkon pîꞌ tauya nîrî, anoꞌpîkon saꞌnamatî aweꞌsaꞌnamakon manniꞌ warantî. Moropai wîriꞌsanyamîꞌ pîꞌ tauya, anyokon namayaꞌnîkon eꞌpai awanî.
