Sîrîrî Kaareta Paulo Nîmenukaꞌpî Éfeso Ponkon Pia 6:1-24
6 Moreyamîꞌ pîꞌ tauya sîrîrî moropai maasaronkon pîꞌ: Ayunkon asankon maimu yawîrî akoꞌmantî, Cristo nîmoꞌkaꞌsan pe awanîkon yeꞌnen. Mîrîrî kupî pîꞌ aakoꞌmamîkon ya, yairî aakoꞌmamîkon.
2 6:2,3 Pena Paapaya tîmaimu ekaremekîꞌpî unkupîkon pe: —Ayunkon asankon namatî —taꞌpî Paapaya.—Mîrîrî warantî aakoꞌmamîkon ya, morî pe aakoꞌmamîkonpa akupîuyaꞌnîkon moropai kusan pe aakoꞌmantoꞌkon wanî sîrîrî non po
—taꞌpîiya. Mîrîrî wanî ipîkku pe unkupîkon pe, maasa pra Paapaya taꞌpî eꞌmaiꞌ pe mîrîrî yawîrî eꞌnî ya, morî tîrîiya, taasaꞌ tîuya yawîrî.
3 Eraꞌmakî 6:2
4 Moropai toꞌ yunkonyamîꞌ pîꞌ tauya: wei kaisarî anmukukon panamatî Uyepotorîkon yeseru ke irumaka pata pe pra. Tîîse toꞌ tekatonkai pra eꞌtî, tîîse morî pe toꞌ yenupatî.
Ipoitîrî Moropai Ikaraiwarî
5 Amîrîꞌnîkon toꞌ poitîrîtonon akaraiwarîkon maimu yawîrî ikuꞌtî toꞌ namayaꞌnîkon yeꞌnen. Moropai mîrîrî kupîyaꞌnîkon yai, aawoꞌmaꞌtakon pe pra, yairî ikuꞌtî Cristo yapurîyaꞌnîkon manniꞌ warantî ikuꞌtî.
6 Aapia awanîkon yai neken inamayaꞌnîkon kaiꞌma keꞌtî. Tîîse aapiaꞌnîkon pra tîîse inamatî. Manniꞌ ituꞌse Paapa eꞌtoꞌ yawîrî ikuꞌtî awakîrikon pe, maasa pra Cristo pemonkono pe awanîkon yeꞌnen.
7 Tîîse awakîrikon pe esenyakaꞌmatî, akaraiwarîkon ton pe, îꞌ kaiꞌma Uyepotorîkon ton pe eesenyakaꞌmakon manniꞌ warantî. Manniꞌkan warayoꞌkon ton pe pra neken eesenyakaꞌmakon.
8 Maasa pra amîrîꞌnîkonya tiwin pîꞌ siꞌma akaisarîꞌnîkon Uyepotorîkon winîpainon yapisî kupî sîrîrî, manniꞌkan tesaꞌ kenankonya moropai itesaꞌ pînonya. Yapisîyaꞌnîkon kupî sîrîrî, îꞌ kaiꞌma ankupîꞌpîkon yepeꞌpî pe.
9 Amîrîꞌnîkon, toꞌ karaiwarîyamîꞌ, apoitîrîkon tîwakîmai eꞌtî. Yairî pra iteseru eraꞌmaya wenai, ipîꞌ teekoreꞌmai pra see warantî ikupîya pra awanî ya, atarumaꞌtîuya, tekai pra. Mîrîrî tîꞌnapannîꞌtî. Maasa pra amîrîya epuꞌtî mîrîrî moro toꞌ esaꞌ moropai ayesaꞌ wanî kaꞌ po. Mîîkîrîya tamîꞌnawîronkon koꞌmannîpî seꞌ kaisarî, eꞌsentai pra.
Surara Warantî Ekoreꞌmantoꞌ
10 Tarîpai tauya sîrîrî apîꞌnîkon. Meruntî ke akoꞌmantî Uyepotorîkon meruntîri kureꞌnan yarakkîrî, ipemonkono pe awanîkon yeꞌnen.
11 Mîrîrî ayuwaꞌnen ton aponkon yekaꞌmatî, manniꞌ surara epontîsaꞌ manniꞌ warantî. Tamîꞌnawîrî mîrîrî Paapa nîtîrî yapiꞌtî, meruntî ke awanîkonpa, Makuiya ayenumîkon namai. Maasa pra mîîkîrîya uurîꞌnîkon yenkuꞌtî tîuya yuwa koꞌmannîpî tuꞌke iteꞌka.
12 Maasa pra uurîꞌnîkon epîtoꞌ wanî pemonkon yarakkîrî pra tîîse Makui meruntîri winîkîi moropai tîpoitîrî pe uurîꞌnîkon yaipontînenan winîkîi, moropai manniꞌkan imawariyamîꞌ moropai maariwaꞌyamîꞌ winîkîi. Manniꞌkan kaꞌ poro taasaꞌsenon meruntîkon, imakuiꞌsan winîkîi uurîꞌnîkon ekoreꞌma.
13 Mîrîrî yeꞌnen tamîꞌnawîrî Paapa nîtîrî yapiꞌtî. Yapiꞌsaꞌyaꞌnîkon ya, imakuiꞌpî erepamî yai aponaꞌnîkon meruntî ke awanîkon, ayenumîiyaꞌnîkon pepîn. Teuren amîrîꞌnîkon yarakkîrî eekoreꞌma tîîse ayenumîiyaꞌnîkon pepîn. Mîrîrî yeꞌnen meruntî ke eꞌtî.
14 Mîrîrî yeꞌnen teekonekai eꞌtî. Paapa winîpainon yairon pe tîweꞌsen aworîmî yewaꞌtîkî, seruꞌyeꞌ pe tîweꞌsen winîkîi eeseyaꞌnamapa. Moropai yairî ayeseru ton yekaꞌmakî, mîrîrî saꞌman aroppoꞌta yuwaꞌnen ton yekaꞌmaya warantî.
15 Moropai ekonekatî îꞌ kaiꞌma Paapaya upîikaꞌtîsaꞌkon ekaremekîkonpa tiaronkon pîꞌ, morî pe toꞌ enatoꞌpe Paapa yarakkîrî. Mîrîrî itekare ekaremekîya wanî aꞌsaꞌsaꞌ yekaꞌmaya warantî satippe aakoꞌmamîkonpa aatareꞌmokon namai.
16 Moropai innape ikupî pîꞌ akoꞌmantî. Mîrîrî wanî manniꞌ awapu pe yapiꞌsaꞌya manniꞌ warantî. Mîrîrî yeꞌnen tamîꞌnawîrî Makui rupeya apoꞌtîkon eserîke pra awanî. Tîîse aponaꞌnîkon eerepamî yai, eesiꞌnîpî.
17 Moropai mîrîrî aweꞌpîikaꞌtîtoꞌkon ton yapiꞌtî, manniꞌ aroꞌ apuꞌpaikon yuwaꞌnen ton yekaꞌmakonpa yapisîyaꞌnîkon warantî. Moropai Morî Yekaton Wannî nîtîrî yapiꞌtî akasuparaikon pe. Mîrîrî wanî Paapa maimu pe.
18 Tamîꞌnawîrî sîrîrî kuꞌtî eepîremakon ke. Paapa pîꞌ aweꞌpîikaꞌtîtoꞌkon ton esatî. Epîrematî tîwîrîrî Morî Yekaton Wannî meruntîri yai. Mîrîrî yeꞌnen ariꞌkeꞌ pe eꞌtî, yairî maꞌre teenai pra. Moropai epîrematî tîwîrîrî tamîꞌnawîronkon innape Paapa kuꞌnenan pona.
19 Moropai epîrematî nîrî upona, Paapaya tîmaimu ekaremekîuya umeruntîri ton tîîtoꞌpe eranneꞌ pe siꞌma ekaremekîuya namai. Mîrîrî unekaremekî eꞌtoꞌpe aronne epuꞌtoꞌpe toꞌya. Mîrîrî toꞌ nepuꞌtîꞌpî pepîn epuꞌtoꞌpe toꞌya, epîrematî.
20 Mîrîrî ekaremekîuya wenai tarî wanî sîrîrî atarakkannîtoꞌ yewîꞌ ta. Tîîse upona epîrematî tarî siꞌma itekare ekaremekî pîꞌ uukoꞌmantoꞌpe, meruntî ke, eranneꞌ pe pra eꞌtoꞌpe. Maasa pra mîrîrî itekare ekaremeꞌtoꞌpeuya uurî yaipontîꞌpî Jesusya.
21 Uyonpakon Tíquico manniꞌ yairon, Uyepotorîkon esenyakaꞌmatoꞌ pîꞌ teesenyakaꞌmasenya tamîꞌnawîrî uyekare ekaremekî apîꞌnîkon, îꞌ kaiꞌma tarî uukoꞌmamî yekare epuꞌtîkonpa.
22 Mîrîrî ekaremeꞌse akoreꞌtaꞌnîkon yarimauya sîrîrî. Îꞌ kaiꞌma tamîꞌnawîrî anna yekare ekaremekîiya yai, aatausinpakonpa.
Paulo Esekaremekî
23 Uyunkon Paapaya moropai Uyepotorîkon Jesus Cristoya amîrîꞌnîkon pia tîwanmîn tîrî yuꞌse wai, uyonpayamîꞌ. Moropai îꞌ kaiꞌma tiaronkon saꞌnama pîꞌ aakoꞌmantoꞌkon ton tîrî toꞌya yuꞌse wai. Moropai innape tîkupîkon pîꞌ aakoꞌmamîkonpa itîrî toꞌya yuꞌse wai.
24 Moropai epeꞌmîra Paapa nîtîrî koꞌmamî yuꞌse wai tamîꞌnawîrî manniꞌkan Uyepotorîkon Jesus Cristo yapurî pîꞌ tîîkoꞌmansenon pia.
