Sîrîrî Kaareta Paulo Nîmenukaꞌpî Filemom Pia 1:1-25
1 Uurî Paulo nîmenukaꞌpî sîrîrî. Uurî atarakkannîtoꞌ yewîꞌ tawon, Cristo Jesus yekare ekaremekîuya wenai. Uyonpakon Timóteo yarakkîrî siꞌma, kaareta menuka annaya sîrîrî. Mîrîrî kaareta yarima annaya aapia, Filemom. Amîrî wanî anna wakîri pe, moropai Paapa ton pe teesenyakaꞌmasen pe awanî anna warantî.
2 Moropai Áfia nîrî pia yarima annaya. Uyonpa pe mîîkîrî wanî, uwîrisi warantî. Moropai Arquipo pia nîrî kaareta yarima annaya. Mîîkîrî wanî anna warantî, mararî pra teesenyakaꞌmasen pe Cristo esenyakaꞌmatoꞌ pîꞌ. Moropai ayewîꞌ ta Paapa yapurîi teeperepîꞌsenon pia nîrî sîrîrî kaareta yarima annaya.
3 Moropai morî ke arepakon Paapaya yuꞌse wai. Moropai tîîwanmîra aweꞌtoꞌkon tîrîiya yuꞌse wai. Mîrîrî warantî Uyepotorîkon Jesus Cristoya nîrî itîrî yuꞌse wai.
4 1:4,5 Paapa yarakkîrî eseurîma koꞌmannîpî amîrî ton pe. Tauya see warantî: —Paapa, morî pe man. Uwakîri pe man maasa pra innape Jesus kuꞌnen Filemom taapîtî tiaronkonya. Moropai apemonkonoyamîꞌ saꞌnamanen mîîkîrî, taa toꞌya nîrî —tauya Paapa pîꞌ.
5 Eraꞌmakî 1:4
6 Mîrîrî yeꞌnen, innape ikupîya yeꞌnen, tiaronkon pîꞌ itekare ekaremekî pîꞌ aakoꞌmamî yuꞌse wai. Mîrîrî warantî ekaremekîya ya, morî Paapa nîtîrîkon epuꞌtîya. Uurîꞌnîkon ton pe itîîsaiꞌya, Cristo pia eꞌnî yeꞌnen.
7 Moropai, uyonpa, atausinpasaꞌ wanî tiaronkon saꞌnamaya yeꞌnen. Paapa pemonkonoyamîꞌ yausinpaya kureꞌne.
Pauloya Filemom Esatî Onésimo Ton Pe
8 Mîrîrî yeꞌnen tauya eꞌpainon see warantî. Mîrîrî kuꞌkî tauya ya apîꞌ, yairî awanî, maasa pra Cristo narimaꞌpî pe wanî yeꞌnen. Tîîse mîrîrî warantî tauya pepîn.
9 Mîrîrî mîkupîi tauya, maasa pra kureꞌne asaꞌnamauya. Mîrîrî warantî tauya aꞌyekeꞌton pe wanî yeꞌnen, atarakkannîtoꞌ yewîꞌ ta wanî yeꞌnen.
10 Mîrîrî warantî esatîuya sîrîrî. Onésimo pîꞌ eseurîma sîrîrî. Mîîkîrîya Jesus yapisî emapuꞌtîꞌpîuya atarakkannîtoꞌ yewîꞌ ta siꞌma. Mîrîrî wenai unmu pe awanî mîrîrî.
11 Pena morî pe pra mîîkîrî eꞌpîtîꞌpî apîꞌ. Tîîse tarîpai morî pe eenasaꞌ sîrîrî apîꞌ, moropai upîꞌ nîrî. Apîikaꞌtînen pe puꞌkuru eenasaꞌ man tarîpai.
12 Mîîkîrî saꞌnamauya kureꞌne. Tîîse yarimauya sîrîrî aapia.
13 Mîîkîrî pîꞌ taapai wanîꞌpî: —Tarî akoꞌmankî upîikaꞌtîpa atarakkannîtoꞌ yewîꞌ ta wanî tanne. Tarî wanî Jesus yekare ekaremekîuya wenai. Uyarakkîrî Filemom wanî ya, upîikaꞌtîiya eserîke awanî. Mîrîrî yeꞌnen akoꞌmankî upîikaꞌtîpa Filemom yenta.
14 Tîîse mîrîrî warantî tauya pra wai, mîrîrî makai taasaꞌya pra tîîse. Apoitîrî yuꞌse pra wai, ituꞌse pra awanî tanne. Tîîse îꞌ rî ituꞌse wanî ya, mîrîrî nîrî yuꞌse wai.
15 Aꞌkî, aapiapai apoitîrî Onésimo epeꞌpî tîîse mararî aakoꞌmamî. Tarîpai awennaꞌpo sîrîrî ikoꞌmanse ipatîkarî aapia.
16 Awennaꞌpo aapia apoitîrî pe aweꞌtoꞌpe, tîîse apoitîrî yentai aweꞌtoꞌpe nîrî. Ayonpa pe puꞌkuru aweꞌtoꞌpe tarîpai awennaꞌpo. Mîîkîrî saꞌnamauya yentai saꞌnamaya eꞌpainon, maasa pra apoitîrî pe neken pra awanî, tîîse ayonpa pe puꞌkuru awanî, Jesus yapiꞌsaiꞌya yeꞌnen. Yai pra mîrîrî wenai aapiapai attî tîrîꞌpî Paapaya. Mararî aakoꞌmamîꞌpî aapiapai, tîîse aapia aakoꞌmamî ipatîkarî tarîpai.
17 Mîrîrî yeꞌnen morî pe yapiꞌkî ayewîꞌ ta. Uutîsaꞌ ya, morî pe uyapisîya eꞌpainon, awanîyakon pe wanî yeꞌnen. Mîrîrî warantî rî Onésimo apoitîrî yapiꞌkî.
18 Moropai awinîkîi imakuiꞌpî kuꞌsaiꞌya ya, epeꞌmîra aapia awanî ya, mîkai upîꞌ moropai ayeꞌmauya. Uurîya ayeꞌma.
19 Inna pîꞌ tauya sîrîrî. Ayeꞌmauya. Uurî Pauloya imenuka, seeniꞌ kaareta yonpa, ayeꞌmauya pîꞌ teeseurîmasen. Tîîse enpenatakî kureꞌne epeꞌmîra wanîꞌpî uyeꞌmaya pra awanî yeꞌnen. Uyeꞌmaya ya, îꞌ pe pra awanî, amîrî ke uyeꞌmaya eꞌpai awanî maasa pra Jesus yapisîya emapuꞌtîsauꞌya yeꞌnen.
20 Tîîse uyonpa, mîrîrî warantî tauya sîrîrî apîꞌ. Mîrîrî mîkupîi kureꞌne atausinpatoꞌpe, Cristo pemonkono pe eꞌnî yeꞌnen.
21 Umaimu yawîrî amîrî wanî epuꞌtî pîꞌ wai. Mîrîrî yeꞌnen seeniꞌ kaareta menukauya sîrîrî eranneꞌ pe pra. Îꞌ taasauꞌya neken kupîya pepîn, tîîse inîꞌ panpîꞌ esaꞌsauꞌya yentai.
22 Moropai inîꞌrî esatîuya sîrîrî, upataꞌseꞌ ton konekakî. Yai pra uutî kupî sîrîrî aapia. Maasa pra eepîremasaꞌkon yeꞌnen, Paapaya upîikaꞌtî aapia uutîtoꞌpe.
23 Tarîpai Epafras uupiawon atarakkannîtoꞌ yewîꞌ tawonya tîmaimu yarima sîrîrî. Tarî mîîkîrî wanî Cristo Jesus yekare ekaremekî tîuya wenai.
24 Moropai uyarakkîronkon teesenyakaꞌmasanon Marcos, Aristarco, Demas, Lucas, inkamoroya tîmaimukon yarima sîrîrî nîrî aapia.
25 Ayewankon yaꞌ morî tîrî Uyepotorîkon Jesus Cristoya yuꞌse wai. Mîrîrî neken.
