Sîrîrî Kaareta Paulo Nîmenukaꞌpî Galácia Ponkon Pia 1:1-24
1 Uurî Pauloya sîrîrî kaareta menuka aapiaꞌnîkon. Uurî wanî imenkasaꞌ pe, yaipontîsaꞌ pe, anîꞌrî pemonkon nîmenkaꞌpî pe pra, tîîse Jesus Cristo nîmenkaꞌpî pe wanî. Moropai Paapa, itun nîmenkaꞌpî pe wanî, manniꞌ Paapa, isaꞌmantaꞌsan koreꞌtapai Jesus pîmîꞌsaꞌkaꞌtîpon.
2 Tauya tamîꞌnawîronkon uyonpakon, tarî uupia toꞌ wanî manniꞌkanya tîmaimukon yarima pîꞌ man amîrîꞌnîkon Galácia soosirîkon tawonkon pia.
3 Morî epeꞌmîra tîntîrî tîrî Paapaya yuꞌse wai aapiaꞌnîkon. Moropai tîwanmîra tîweꞌtoꞌ tîrî Uyunkonya moropai Uyepotorîkon Jesus Cristoya itîrî yuꞌse wai aapiaꞌnîkon.
4 Mîîkîrî Cristo eturumakaꞌpî tîîsaꞌmantapa kaiꞌma, uurîꞌnîkon pîikaꞌtîpa umakuyikon winîpai. Mannankan sîrîrî pata po tîîkoꞌmansenon pemonkonyamîꞌ imakuiꞌsan warantî eꞌnî namai, uurîꞌnîkon moꞌkapa kaiꞌma aasaꞌmantaꞌpî. Îꞌ kaiꞌma ituꞌse Paapa, uyunkon eꞌtoꞌ yawîrî ikupîꞌpîiya.
5 Jesus nîkupîꞌpî wenai, —Morî pe puꞌkuru man, Paapa —taapaiꞌnîkon man tîwîrî rî. Mîrîrî warantî taapaiꞌnîkon.
Tiwinan Itekare Yairon
6 Mararî pra esenumenkan pîꞌ wai teesewankonoꞌmai uyewan yaꞌ. Maasa pra manniꞌ amîrîꞌnîkon yannotîpon morî pe, epeꞌmîn ke, mîîkîrî rumakasaꞌyaꞌnîkon tiwinarî. Moropai mîîkîrî tîrumakai tiaronkon nekaremekî yapiꞌsaꞌyaꞌnîkon.
7 Tîîse tiaron Cristo yekare yeꞌka ton pra man. Mîrîrî pîꞌ eseurîma, maasa pra mîrîrî kaiꞌma amîrîꞌnîkon yakaꞌmanenan moro toꞌ man. Inkamoro eseurîma koꞌmannîpî akoreꞌtaꞌnîkon. Yairon Cristo yekare miakanma yuꞌse toꞌ koꞌmamî.
8 Tîîse anîꞌya mîrîrî yeꞌka miakanma ya, annaya, mîîwîni pra awanî ya, inserî kaꞌ poinonya ekaremekî ya tiaron pe, anna nekaremekîꞌpî warantî pra, mîîkîrî eꞌtarumaꞌtî apoꞌ yaꞌ yuꞌse wai.
9 Sîrîrî pîꞌ pena anna eseurîmaꞌpî. Inîꞌrî tauya sîrîrî. Anîꞌya tiaron pe itekare ekaremekî ya, îꞌ yapiꞌsaꞌyaꞌnîkon warantî pra, ipatîkarî mîîkîrî eꞌtarumaꞌtî apoꞌ yaꞌ yuꞌse wai.
10 Sîrîrî warantî eseurîma ya, pemonkonyamîꞌ yapurîuya sîrîrî? Kaane, tiwin kin mîrîrî pîꞌ pra! Tîîse Paapa yapurîuya pe eseurîmatoꞌ yuꞌse wanî sîrîrî. Pemonkonyamîꞌ yapurîuya pe eseurîma ya, morî pe upîꞌ toꞌ eseurîmatoꞌpe, moriya Cristo poitîrî pe wanî pepîn eꞌpainon.
Îꞌ Kaiꞌma Yaipontîsaꞌ Pe Tîwanî Pîꞌ Paulo Eseurîma
11 Uyonpayamîꞌ, tauya sîrîrî apîꞌnîkon. Sîrîrî Cristo yekare ekaremekîuya manniꞌ, mîrîrî wanî pepîn tiwin kin pemonkon esenumenkatoꞌ.
12 Tiwin kin anîꞌ winîpai moropai anîꞌya uyenupasaꞌ pra man. Tîîse Jesus Cristo winîpai neken etaꞌpîuya. Moropai mîîkîrîya yenpoꞌpî uupia, mîrîrî ekaremeꞌtoꞌpeuya kaiꞌma.
13 Pena îꞌ kaiꞌma uukoꞌmanpîtîꞌpî yekare epuꞌtîꞌpîyaꞌnîkon, anna Judeuyamîꞌ yeseru yaꞌ uukoꞌmanpîtî yai. Moropai îꞌ kaiꞌma Cristo yapurînenan tarumaꞌtîpîtîꞌpîuya mararî pra îri pe toꞌ winîkîi. Moropai tamîꞌnawîron ankuꞌpai eꞌtoꞌ kuꞌpîtîꞌpîuya toꞌ winîkîi, toꞌ tîꞌkatoꞌpeuya.
14 Uurî eꞌpîtîꞌpî tamîꞌnawîron Judeuyamîꞌ yeseru yawîron pe, tiaronkon uyonpayamîꞌ yentai. Moropai îꞌ kaiꞌma tamîꞌnawîrî yawîrî ikupîuya yuwapîtîꞌpîuya, îꞌ kaiꞌma utamorîꞌsan yeserurîꞌpî.
15 Tîîse morî pe tîweꞌtoꞌ wenai Paapaya umenkaꞌpî pena, maasa esenpo pra tîîse usan roꞌta yapai. Moropai uyannoꞌpîiya îꞌ kaiꞌma tîmîrî ton pe eꞌtoꞌpe.
16 Moropai îꞌ pensa sîrîrî anekaremeꞌpai Paapa wanî yai upîꞌ tînmu yenpoꞌpîiya. Taꞌpîiya tekare ekaremekîuya yuꞌse tîwanî mannankan Judeuyamîꞌ pepîn pîꞌ. Mîrîrî etasauꞌya pata pai, anîꞌ winîpai upanamanen ton yuwasauꞌya pra wai.
17 Moropai Jerusalém pona uutîsaꞌ pra wai mannankan taipontîsanon pe, inmenkasaꞌkon pia, manniꞌkan urawîrî tîweꞌsanon. Inkamoro pia uutîsaꞌ pra wai upanamatoꞌpe toꞌya. Tîîse uutîꞌpî Arábia pata yaꞌ keren pona. Miarî uukoꞌmamîꞌpî. Moropai mîrîrî tîpo, ennaꞌpoꞌpî Damasco cidaderî pona.
18 Miarî uukoꞌmamîꞌpî eseurîwîꞌne konoꞌ kaisarî. Mîrîrî tîpo, uutî tuꞌkaꞌpî Jerusalém pona, Pedro anepuꞌpai wanî yeꞌnen. Moropai miarî uukoꞌmamîꞌpî asakîꞌne domingo kaisarî.
19 Moropai mîrîrî yai, tiaronkon Jesus naipontîꞌsan eraꞌmasauꞌya pra wai, tîîse Tiago neken, manniꞌ Uyepotorî yakon eraꞌmaꞌpîuya.
20 Mîrîrî warantî awanîꞌpî, useruku pepîn. Sîrîrî menukauya sîrîrî, Paapaya epuꞌtî tanne, îꞌ kaiꞌma yairî eseurîma sîrîrî.
21 Moropai mîrîrî tîpo, uutîꞌpî Síria pata poro moropai Cilícia pata poro.
22 Mîrîrî yai, uurî asarî tanne, Judéia soosirî tawonkonya uyepuꞌtî pra awanîꞌpî.
23 Eta pe neken uyekare etaꞌpî toꞌya, tiaronkon eseurîma pîꞌ. Taapîtîꞌpî toꞌya: —Tarîpai manniꞌ uurîꞌnîkon tarumaꞌtîpîtîtîponya innape ikuꞌsaꞌ tîuya ekaremeꞌpîtîꞌpî man, manniꞌ uurîꞌnîkonya innape ikuꞌtoꞌ anaretîꞌkapai eꞌpîtîꞌpî ya —taapîtîꞌpî toꞌya.
24 Moropai uwenai inkamoroya taa pîꞌ man Paapa pîꞌ: —Morî pe nai, Paapa. Kureꞌnan amîrî, mîîkîrî anna tarumaꞌtîtîpon pîikaꞌtîsaꞌya nai —kaiꞌma Paapa yapurîꞌpî toꞌya.
