Sîrîrî Kaareta Paulo Nîmenukaꞌpî Galácia Ponkon Pia 2:1-21
2 Asakîrîrî puꞌ pona tîîmoꞌtai (14) konoꞌ uukoꞌmamî tîpo, ennaꞌpo tuꞌkaꞌpî Jerusalém pona Barnabé yarakkîrî. Moropai Tito nîrî yarîꞌpîuya uyarakkîrî.
2 Miarî ya uutîꞌpî, maasa pra Paapaya ekaremekîꞌpî upîꞌ miarî ya uutîtoꞌpe. Miarî erepansaꞌ yai, anna emurukuntîꞌpî manniꞌkan soosi esanon neken pokonpe. Anna emurukuntîꞌpî anna eseurîmatoꞌpe iponarî. Mîrîrî yai toꞌ pîꞌ Cristo yekare ekaremekîꞌpîuya tamîꞌnawîrî manniꞌ Judeuyamîꞌ pepîn pîꞌ. Îꞌ kaiꞌma unekaremekî koꞌmannîpî ekaremekîꞌpîuya. Maasa pra mîrîrî esenyakaꞌmantoꞌ wanî yuꞌse pra awanîꞌpî îꞌ pe pra rî. Tîîse inna, mîrîrî warantî ikupî pîꞌ akoꞌmankî, taa toꞌya yuꞌse awanîꞌpî.
3 Mîrîrî eta tîuyaꞌnîkon ya, etaꞌpî toꞌya morî pe, innape ikupîꞌpî toꞌya. Mîrîrî yeꞌnen uwanîyakon Tito, Judeu pepîn tîîse Grego, mîîkîrî ena eꞌpai man Judeu yeseru yaꞌ, taa toꞌya pra awanîꞌpî.
4 Tîîse tiaronkon wanîꞌpî moro, innape Jesus kuꞌnenan pe tîweꞌkuꞌsanon moropai inkamoro emurukuntîsaꞌ wanîꞌpî anna pokonpe. Tîîse inkamoroya taa koꞌmannîpî Tito ena eꞌpai man Judeuyamîꞌ yeseru yaꞌ. Inkamoro warayoꞌkon ewonsaꞌ wanîꞌpî amaꞌ pe anna yakoꞌmenkakonpa kaiꞌma. Îꞌ kaiꞌma ikupî annaya aneraꞌmapai tîwanîkon yeꞌnen, Jesus yarakkîrî anna eꞌtoꞌ wenai. Inkamoro wanîꞌpî îꞌ kaiꞌma Moisés nurîꞌtîya yenupantoꞌ yawîrî anna wanî yuꞌse. Tîîse Cristo pemonkono pe eꞌnî yeꞌnen, unkupîkon ton Moisés nurîꞌtî nekaremekîꞌpî kupî pepîn.
5 Mîrîrî yeꞌnen mîrîrî pîꞌ inna, mîrîrî yawîrî kuꞌpaiꞌnîkon man, taasaꞌ annaya pra man. Maasa pra yairon Cristo yekare, manniꞌ anetaꞌpîkon koꞌmantoꞌpe aapiaꞌnîkon, tiaron pe miakanma anîꞌya namai.
6 Tîîse manniꞌkan soosi esaꞌ pe tîweꞌsanon, uyentainokon pe ankupîꞌsanya upanamasaꞌ pra man, amenan esenumenkatoꞌ ke. (Tîîse uurî pia anîꞌ wanî pepîn tiaron yentai tîîse Paapaya ukupîꞌpîkon seꞌ kaisarî eꞌnîtoꞌpeꞌnîkon.)
7 Tîîse inkamoroya îꞌ kaiꞌma Paapaya esenyakaꞌmatoꞌ ton tîîsaꞌ eraꞌmaꞌpî, Jesus Cristo yekare ekaremekî pîꞌ manniꞌkan Judeuyamîꞌ pepîn pîꞌ. Îꞌ kaiꞌma Paapaya Pedro kupîꞌpî Judeuyamîꞌ pîꞌ itekare ekaremeꞌtoꞌpeiya warantî.
8 Maasa pra Paapa esenyakaꞌma manniꞌ warantî Pedro yarakkîrî Judeuyamîꞌ pîꞌ itekare ekaremekî pîꞌ. Mîrîrî warantî nîrî uurî wenai Paapa esenyakaꞌma Judeuyamîꞌ pepîn pîꞌ itekare ekaremeꞌtoꞌpeuya.
9 Mîrîrî yeꞌnen Tiagoya moropai Pedroya moropai Joãoya manniꞌkan soosi esaꞌ pe tîweꞌsanonya epuꞌtîꞌpî, îꞌ kaiꞌma Paapa nîkupîꞌpî pe awanî. Moropai inkamoroya tenyakon tîrîꞌpî uurî pia moropai Barnabé pia. Mîrîrî yeꞌnen inna taꞌpî annaya îꞌ kaiꞌma Judeu pepîn koreꞌta anna esenyakaꞌma pîꞌ, moropai inkamoro esenyakaꞌma tanne Judeuyamîꞌ koreꞌta.
10 Tîîse esatîꞌpî inkamoroya anna pîꞌ, anna wanmîra manniꞌkan îꞌ ton pînon saꞌne, toꞌ koreꞌtawonkon kupî annaya namai. Tîîse mîrîrî kupî yuwa pîꞌ uukoꞌmamî sîrîrî, uuwanmîra ikupîuya pra ituꞌse wanî yeꞌnen.
Paulo Eseurîma Pedro Pîꞌ Meruntî Ke
Antioquia Cidaderî Po
11 Antioquia cidaderî po uukoꞌmamî tanne, Pedro erepamîꞌpî miarî ya. Mîîkîrî pîꞌ eseurîmaꞌpî meruntî ke, tamîꞌnawîronkon rawîrî siꞌma. Maasa pra iteseru wanîꞌpî yairî pra.
12 Pena iteseru wanîꞌpî see warantî. Maasa inkamoro Tiago narimaꞌsan erepamî pra tîîse, Pedroya tekkari yonpapîtîꞌpî manniꞌkan innape Jesus kuꞌnenan pokonpe, Judeuyamîꞌ pepîn pokonpe, Judeuyamîꞌ yeseru yawîrî pra. Tîîse inkamoro warayoꞌkon erepamîꞌpî pata pai inîꞌrî tekkari anonpapai pra eenaꞌpî Judeuyamîꞌ pepîn pokonpe. Maasa pra eranneꞌ pe eenaꞌpî inkamoro warayoꞌkon Jerusalém poi iipîꞌsan pîꞌ, toꞌ yeseru ankuꞌpai tîwanî yeꞌnen. Judeuyamîꞌ yeseru yawîrî innape Jesus kuꞌnenan koꞌmamî eꞌpai awanî, taa toꞌya. Mîrîrî yeꞌnen inîꞌrî Judeuyamîꞌ pepîn pîinamaiya pra eenaꞌpî.
13 Moropai tiaronkon Judeuyamîꞌ innape Jesus kuꞌnenan eꞌmenkaꞌpî Pedro pokonpe tîwanîkonpa Judeuyamîꞌ pepîn pokonpe tekkarikon anonpapai pra. Moropai Barnabé enaꞌpî toꞌ warantî nîrî anîꞌ pîinamaiya pra. Eranneꞌ pe eenaꞌpî inîꞌrî yairon ankuꞌpai pra.
14 Mîrîrî eraꞌmauya yai, epuꞌtîꞌpîuya yairî pra awanî. Cristo yekare nekaremeꞌtoꞌ yawîrî pra awanî. Mîrîrî yeꞌnen taꞌpîuya Pedro pîꞌ tamîꞌnawîronkon rawîrî siꞌma. —Aꞌkî, Judeu pe puꞌkuru awanî, tîîse aakoꞌmamî pepîn Judeuyamîꞌ yeseru yawîrî. Ayekkari yonpapîtîꞌpîya Judeuyamîꞌ pepîn pokonpe toꞌ warantî. Tîîse “Taatarimai toꞌ piapai”, taaya, “Judeuyamîꞌ yeseru kupîyaꞌnîkon eꞌpai man”, taaya toꞌ pîꞌ, toꞌ piapai taatarimai. Tîîse mîrîrî wanî pepîn yairî —taꞌpîuya ipîꞌ.
Judeuyamîꞌ Moropai Judeuyamîꞌ Pepîn Eꞌpîikaꞌtî Innape Ikupî Toꞌya Wenai
15 Taꞌpîuya Pedro pîꞌ: —Uurîꞌnîkon wanî Judeuyamîꞌ pe esenpoꞌsan pe. Manniꞌkan imakuiꞌsan, Moisés nurîꞌtîya yenupantoꞌ yawîrî pra tîweꞌsanon, Judeuyamîꞌ pepîn pe esenpoꞌsan pe pra eꞌnî.
16 Tîîse epuꞌtî, uurîꞌnîkon innape Jesus kuꞌnenanya pemonkon yapisî Paapaya pepîn Moisés nurîꞌtîya yenupantoꞌrîꞌpî konekaiya wenai, tîîse innape Jesus Cristo kuꞌtoiꞌya wenai yapisîiya morî pe. Mîrîrî yeꞌnen Judeuyamîꞌ pepîn warantî uurîꞌnîkon nîrî yapisî Paapaya innape Jesus Cristo kuꞌsaꞌ wenai, mîrîrî Moisésya yenupantoꞌ rîꞌpî koneka wenai pra. Maasa pra anîꞌ kupî Paapaya pepîn morî pe Moisésya yenupantoꞌ rîꞌpî kupîiya wenai.
17 Judeuyamîꞌ esenumenka see warantî, îꞌ pensa morî pe ukupîkon Paapaya yuwa ya, innape Jesus Cristo kupî wenai, uurîꞌnîkon wanî imakuiꞌsan pe Judeuyamîꞌ pepîn warantî. Imakuiꞌpî pe eꞌnî, maasa pra Moisésya yenupantoꞌ rîꞌpî yawîrî pra koꞌmannî wenai. Toꞌ esenumenka mîrîrî warantî, tîîse toꞌ esenkuꞌtîsaꞌ man. Maasa pra Cristoya imakuiꞌpî pe eꞌkî, Paapa maimu yawîrî pra eꞌkî taasaꞌ pra man.
18 Manniꞌ pena esuwaꞌkaꞌpî kuꞌse ennaꞌpo eserîke pra man. Mîrîrî yeꞌnen taa eserîke pra man, Moisés nurîꞌtîya yenupantoꞌ rîꞌpî yawîrî eꞌnîpaiꞌnîkon. Maasa pra mîrîrî taꞌnîkon ya, imakuiꞌpî pe rî koꞌmannî, mîrîrî yawîrî koꞌmannî eserîke pra man.
19 Tarîpai uurî, mîrîrî Moisés nurîꞌtîya yenupantoꞌ winîkîi inîꞌ îꞌ ton pra wai. Manniꞌ isaꞌmantaꞌpî warantî wanî sîrîrî iwinîkîi. Tarîpai enen esepuꞌtî sîrîrî Paapa winîkîi neken. Uurî saꞌmantaꞌpî Cristo yarakkîrî pakîꞌnan po aasaꞌmanta yai. Maasa pra morî pe uurîꞌnîkon yapisî Paapaya pepîn, mîrîrî Moisés nurîꞌtîya yenupantoꞌ yawîrî koꞌmannî wenai.
20 Mîrîrî yeꞌnen uuwarîrî uukoꞌmamî pepîn enen, tîîse manniꞌ Cristo enenan koꞌmamî sîrîrî uyarakkîrî. Moropai sîrîrî uukoꞌmamî manniꞌ innape Paapa munmu kupîuya yeꞌka pe. Manniꞌ usaꞌnamatîpon moropai uurî ton pe tîîwarîrî eturumakaꞌpî tîîsaꞌmantapa.
21 Morî pe ukuꞌtoꞌ Paapaya kupî pîꞌ wai innape. Maasa pra Moisés nurîꞌtîya yenupantoꞌ kupî wenai morî pe Paapaya uurîꞌnîkon yapisî ya, moriya îꞌ pe pra rî Cristo saꞌmantaꞌpî kupî mîrîrî.
