Sîrîrî Kaareta Paulo Nîmenukaꞌpî Galácia Ponkon Pia 3:1-29
3 Tarîpai eseurîma etatî Galácia ponkon. Pakkokon amîrîꞌnîkon. Anîꞌya amîrîꞌnîkon maꞌtanîpîꞌpî mîîtoꞌpe mîrîrî warantî awanîkonpa. Maasa pra pena amîrîꞌnîkonya unekaremekîꞌpî epuꞌtîꞌpî aronne, îꞌ kaiꞌma pakîꞌnan po Jesus Cristo saꞌmantaꞌpî yekare epuꞌtîꞌpîyaꞌnîkon.
2 Tarîpai ayekaranmapouyaꞌnîkon sîrîrî, Paapa winîpainon Morî Yekaton Wannî yapisîꞌpîyaꞌnîkon Moisés yenupantoꞌ rîꞌpî kupîyaꞌnîkon wenai? Innape Jesus Cristo yekare kupîyaꞌnîkon wenai kaꞌrî? Tarîpai umaimu yuꞌtî.
3 Yapisîꞌpîyaꞌnîkon innape Jesus kupîyaꞌnîkon wenai. Tîîse îꞌ ton pe Moisésya ayenupaꞌpîkon yawîrî ankuꞌpai awanîkon mîrîrî? Aawarîrîꞌnîkon morî pe eꞌpai awanîkon?
4 Innape Jesus kupîꞌpîyaꞌnîkon patapai, tamîꞌnawîron îꞌ eꞌkupîꞌpî ayarakkîrîꞌnîkon, amoronkon, aatausinpatoꞌkon, mîrîrî kupî pîꞌ naatî îꞌ pe pra rî? Îꞌ pe pra aweꞌsaꞌ pra man.
5 Paapaya Morî Yekaton Wannî tîrî aapiaꞌnîkon, moropai anîꞌ nîkupî pepîn kupî ya akoreꞌtaꞌnîkon, mîrîrî Moisésya yenupantoꞌ rîꞌpî kupîyaꞌnîkon wenai? Mîrîrî wenai pra, tîîse Cristo yekare etayaꞌnîkon wenai, innape ikupîꞌpîyaꞌnîkon wenai.
6 Mîrîrî warantî Abraão nurîꞌtî wanîꞌpî. Paapa maimu eꞌmenukasaꞌya taasaꞌ man:—Mîîkîrîya innape Paapa maimu kupîꞌpî moropai innape tîkupîiya wenai,Paapaya yapisîꞌpî yairî puꞌkuru ikuꞌsaꞌ tîuya yeꞌnen
—taasaiꞌya man.
7 Mîrîrî yeꞌnen epuꞌtî man, yaironkon pe eꞌnî Abraão nurîꞌtî payannîꞌsan pe puꞌkuru, innape ikupî yeꞌnen.
8 Pena Paapa maimuya taꞌpî îꞌ kaiꞌma Judeuyamîꞌ pepîn kupî tîuya yairon pe. Mîrîrî ekaremekîꞌpîiya eꞌmaiꞌ pe Abraão pîꞌ. Taꞌpîiya see warantî:—Amîrî wenai tamîꞌnawîron pata ponkon pemonkonyamîꞌ ton pe morî kupîuya pe wai
—taꞌpîiya.
9 Mîrîrî yeꞌnen mîrîrî yawîrî awanî. Abraão nurîꞌtî, manniꞌ innape tîkuꞌsaꞌ Paapaya warantî tamîꞌnawîronkon innape tîkuꞌnenan kupîiya, morî pe Abraão kupîꞌpî tîuya warantî.
10 Manniꞌkan Moisésya yenupantoꞌ rîꞌpî yawîrî tîîkoꞌmansenon tarumaꞌtî Paapaya pe man. Maasa pra imaimu menukasaꞌya taasaꞌ man:—Tamîꞌnawîronkon yawîrî pra tîîkoꞌmansenon tîwîrî manniꞌ aweꞌmenukasaꞌ yaꞌ manniꞌ tîweꞌsanon,inkamoro yeꞌka tarumaꞌtîuya pe man
—taasaiꞌya man. Epuꞌtî man, tamîꞌnawîronkon wanî imaimu yawîrî pra.
11 Inna, seruꞌ pepîn, anîꞌ kupî Paapaya pepîn yairon pe, mîrîrî Moisésya yenupantoꞌ rîꞌpî kupîiya wenai. Maasa pra imaimu eꞌmenukasaꞌya taasaꞌ man:—Paapa pia morî pe tîweꞌsen koꞌmamî eꞌpai man innape ikupî tîuya wenai
—taasaiꞌya man.
12 Tîîse Moisésya yenupantoꞌ rîꞌpîya taa pepîn tiwin kin. —Innape Jesus kuꞌtî yairon pe awanîkonpa —taiya pepîn. Tîîse taiya:—Seeniꞌ konekakî, seeniꞌ kîꞌkupîi
—taiya.—Mîrîrî yawîrî tîweꞌsen koꞌmamî pe man morî pe
—taasaiꞌya man.
13 Mîrîrî warantî uurîꞌnîkon wanîꞌpî Paapa nîtarumaꞌtîkon pe teuren tîîse upataꞌseꞌ yaꞌ Cristoya imoꞌkaꞌpî tîpona uurîꞌnîkon pîikaꞌtîpa kaiꞌma, uyeꞌmaꞌpîiyaꞌnîkon pakîꞌnan pona tîsaꞌmanta yai. Îꞌ kaiꞌma Paapa eꞌmenukasaꞌya taasaꞌ man:—Tamîꞌnawîronkon manniꞌkan imakuiꞌsan yei pîꞌ eꞌweyokkaꞌsan wanî Paapa nîtarumaꞌtîkon pe
—taasaiꞌya man.
14 Mîrîrî eꞌkupîꞌpî îꞌ kaiꞌma morî kupî tîuya taꞌpî Paapaya Abraão pîꞌ eꞌkuꞌtoꞌpe mîîkîrî Jesus Cristo wenai manniꞌkan Judeuyamîꞌ pepîn ton pe. Moropai uurîꞌnîkon tamîꞌnawîronkonya innape ikupî wenai Paapaya itîrîuya taꞌpî Morî Yekaton Wannî yapiꞌtoꞌpe aweꞌkupîꞌpî.
Îꞌ Taꞌpî Tîuya Kupî Paapaya Abraão Yarakkîrî
15 Uyonpayamîꞌ anepuꞌtîkon ton ekaremekîuya sîrîrî îꞌ kaiꞌma koꞌmannî yekare. Aꞌkî, îꞌ pensa asakîꞌnankon pemonkonyamîꞌ yai toꞌ eseta. Teeseurîmaꞌpîkon kupî toꞌya îꞌ kaiꞌma taꞌpî tîuyaꞌnîkon yawîrî. Anîꞌya îꞌ kaiꞌma taꞌpî tîuya miakanma eserîke pra awanî tiaron pe îꞌ taꞌpî tîuya.
16 Mîrîrî warantî Paapaya tîmaimu tîrîꞌpî Abraão nurîꞌtî pia moropai ipa rîꞌpî pia. Paapa maimu eꞌmenukasaꞌya taasaꞌ tuꞌkankon pemonkonyamîꞌ iparîꞌsan pîꞌ pra taasaiꞌya man. Tîîse tiwinan pîꞌ neken, iparîꞌpî Cristo pîꞌ eeseurîmaꞌpî.
17 Îꞌ ankapai uurî eꞌtoꞌ pîꞌ tauya sîrîrî. Paapaya esetantoꞌ ton kupîꞌpî moropai mîrîrî yawîrî ikupî tîuya taꞌpîiya. Mîrîrî tîpo 430 konoꞌ esuwaꞌkasaꞌ tîpo, Paapaya unkupîkon ton tîrîꞌpî Moisés nurîꞌtî pia. Mîrîrî wenai inîꞌrî kupîuya pepîn îꞌ taꞌpîuya Abraão yarakkîrî taiya pra awanîꞌpî. Mîrîrî yeꞌnen tîwî ikupîꞌpîiya taa eserîke pra man.
18 Maasa pra uurîꞌnîkon yapisî Paapaya pepîn Moisésya yenupantoꞌ yawîrî koꞌmannî wenai. Mîrîrî yawîrî awanî ya moriya îꞌ taꞌpî tîuya Abraão nurîꞌtî pîꞌ tîmaimu kupîiya pepîn eꞌpainon. Tîîse epeꞌmîra Paapaya itîrîꞌpî Abraão pia, taꞌpî tîuya yeꞌnen.
19 Mîrîrî wenai uurîꞌnîkon yapisî yeꞌka pe pra, tîîse îꞌ ton pe mîrîrî Moisésya yenupantoꞌ ton tîrîꞌpî Paapaya? Mîrîrî tîrîꞌpîiya îꞌ kaiꞌma Paapa eꞌtoꞌ ituꞌse yawîrî pra eꞌnî epuꞌtîpa kaiꞌma itîrîꞌpîiya. Tîîse ipatîkarî aakoꞌmantoꞌpe pra, aakoꞌmantoꞌpe manniꞌ Abraão parîꞌpî, ipîꞌ Paapa eseurîmaꞌpî, manniꞌ erepamî pîkîrî. Mîrîrîya îꞌ pensa Moisés nurîꞌtî pia tîmaimu tîîsaiꞌya ya, Paapaya itîrîꞌpî tîmîrî ton pe teeseurîmasanon inserîyamîꞌ wenai.
20 Tîîse Abraão nurîꞌtî yarakkîrî Paapa eseta yai, tîmîrî pe eeseurîmaꞌpî yarakkîrî, anîꞌ tiaron wenai pra. Mîrîrî yeꞌnen ipîkku pe panpîꞌ Paapa esetatoꞌ wanî Abraão nurîꞌtî yarakkîrî, Moisés pia intîrîꞌpî yentai.
Moisésya Yenupantoꞌ Wanî
Imakuiꞌpî Pe Eꞌnîtoꞌ Epuꞌtoꞌpe
21 Mîrîrî yeꞌnen îꞌ kaiꞌma esenumenkan mîrîrî pîꞌ? Innape Moisés nurîꞌtî pia Paapa nîtîrîꞌpî wanî, innape Abraão nurîꞌtî yarakkîrî Paapa esetatoꞌ wanî warantî? Inna, saꞌnîrî toꞌ wanî innape. Maasa pra Moisés nurîꞌtîya yenupantoꞌ yawîrî tîîkoꞌmansenonya Paapa winîpai tîîkoꞌmantoꞌ ton yapisî eꞌpainon, teuren tîîse yapisî toꞌya pepîn, maasa pra Paapa maimu yawîrî toꞌ wanî pepîn tiwin kin.
22 Mîrîrî warantî Paapa maimu eꞌmenukasaꞌya taasaꞌ imakuiꞌpî kuꞌsaꞌ tîuyaꞌnîkon yeꞌnen, tamîꞌnawîronkon yentai imakuiꞌpî enasaꞌ mîrîrî wenai. Mîrîrî yeꞌnen manniꞌkanya neken innape Jesus Cristo kuꞌnenanya tîweꞌpîikaꞌtîtoꞌkon yapisî, ikupî tîuya taꞌpî Paapaya yawîrî.
23 Tîîse maasa Cristo erepamî pra tîîse, pena Moisésya yenupantoꞌ rîꞌpîya uurîꞌnîkon pîikaꞌtîꞌpî, îꞌ kaiꞌma koꞌmannîtoꞌpe ekaremekîꞌpîiya. Mîrîrî Moisésya yenupantoꞌ rîꞌpî wanîꞌpî uurîꞌnîkon yenupatoꞌpe awanîꞌpî, Cristo erepamî pîkîrî sîrîrî non pona.
24 Tîîse Cristo erepansaꞌ yeꞌnen, epuꞌtî man, innape ikupî wenai, yairon pe Paapaya uurîꞌnîkon yapisî, Moisés nurîꞌtîya yenupantoꞌ yawîrî koꞌmannî wenai pra.
25 Tarîpai eerepansaꞌ man. Mîrîrî yeꞌnen inîꞌrî Moisésya yenupantoꞌ rîꞌpî wanî pepîn uyenupanenkon pe, maasa pra innape Cristo kupî yeꞌnen.
26 Maasa pra innape ikupîyaꞌnîkon wenai tamîꞌnawîrî amîrîꞌnîkon wanî Paapa munkîyamîꞌ pe manniꞌ Jesus Cristo yarakkîrî tîîkoꞌmansenon pe awanîkon.
27 Îꞌ pensa amîrîꞌnîkon esenpatakona yai taꞌpîyaꞌnîkon: —Tarîpai uurî Paapa pemonkono, penaroꞌ uyeserurîꞌpî kupîuya pepîn tîîse amenan pe uyeseru ton yapisîuya sîrîrî. Amenan pon wanî yekaꞌma warantî uyeseru ton yapisîuya Cristo winîpai.
28 Mîrîrî wenai taa eserîke pra awanî uurî Judeu, Judeu pepîn yentainon taa pepîn. Taa pepîn nîrî uurî anîꞌ poitîrî pepîn, toꞌ poitîrî yentainon taa pepîn. Moropai taa pepîn uurî warayoꞌ, wîriꞌ yentainon taa eserîke pra awanî. Maasa pra Paapaya tamîꞌnawîronkon amîrîꞌnîkon eraꞌma, seꞌ kaisarî Jesus Cristo yarakkîrî aakoꞌmamîkon wenai.
29 Aasîrî amîrîꞌnîkon wanî Cristo pemonkono pe tîweꞌsanon pe. Mîrîrî yeꞌnen amîrîꞌnîkon wanî nîrî Abraão nurîꞌtî payanîꞌsan pe Cristo warantî. Mîrîrî yeꞌnen Abraão pîꞌ Paapa nekaremekîꞌpî yapisîyaꞌnîkon pe naatîi.
