Sîrîrî Kaareta Paulo Nîmenukaꞌpî Galácia Ponkon Pia 4:1-31
4 Îꞌ amîrîꞌnîkon pîꞌ ankapai eꞌtoꞌ pîꞌ tauya sîrîrî. Maasa eraꞌmatî. More pe tîîse itun saꞌmanta yai, tamîꞌnawîrî temanne pe awanî, tîîse itesaꞌ pe aakoꞌmamî eserîke pra awanî, more pe awanî yeꞌnen.
2 More pe awanî tanne, tiaron pemonkonya koꞌmannîpî eꞌpai awanî. Mîîkîrî wanî more esaꞌ pe. Moropai itemanne esaꞌ pe awanî. Imaimu yawîrî more koꞌmamî îꞌ pensa kureꞌne teenasaꞌ pîkîrî, ikuꞌtoꞌpeiya taꞌpî itun nurîꞌtîya pîkîrî.
3 Mîrîrî warantî nîrî anna Judeuyamîꞌ wanîꞌpî, more wanî kaisarî, maasa Cristo yekare eta pra tîîse. Mîrîrî yai koꞌmannîꞌpî îꞌ kaiꞌma pata yeseru yawîrî eꞌpîikaꞌtîntoꞌpe kaiꞌma.
4 Tîîse îꞌ pensa Paapa munmu erepantoꞌ weiyu eseporîꞌpî, eesenpoꞌpî more pe wîriꞌ yai. Moropai mîîkîrî koꞌmamîꞌpî Moisés nurîꞌtîya yenupantoꞌ yawîrî.
5 Mîrîrî yawîrî aakoꞌmamîꞌpî maasa pra uurîꞌnîkon moꞌkapa kaiꞌma mîrîrî Moisésya yenupantoꞌ rîꞌpî winîpai. Mîrîrî yawîrî pra eꞌnî yeꞌnen eꞌtarumaꞌtîn kupî tanne uurîꞌnîkon moꞌkaꞌpîiya. Moropai uyeꞌmaꞌpîiyaꞌnîkon tîîsaꞌmanta ke, Paapa munkî pe uurîꞌnîkon enatoꞌpe.
6 Uurîꞌnîkon wanî tarîpai Paapa munkîyamîꞌ pe. Mîrîrî yeꞌnen uyewankon yaꞌ Paapaya Morî Yekaton Wannî yarimaꞌpî. Mîîkîrî wanî inmu yekaton pe. Mîîkîrîya taa —Paapa, uyun —taiya. Mîrîrî wenai uyunkon pe Paapa wanî epuꞌtî.
7 Moriya amîrîꞌnîkon wanî pepîn ipoitîrî pe. Tîîse inmukuyamîꞌ pe puꞌkuru awanîkon. Moropai inmukuyamîꞌ pe awanîkon yeꞌnen, Paapaya tamîꞌnawîronkon tînmukuyamîꞌ pia temanne tîrî aapiaꞌnîkon.
Paulo Esewankonoꞌma
Galácia Po Tîîkoꞌmansenon Pîꞌ
8 Pena amîrîꞌnîkonya Paapa epuꞌtî pra awanî yai, miaꞌ ke ikonekasaꞌ yapurîꞌpîyaꞌnîkon. Ipoitîrî warantî aakoꞌmamîꞌpîkon tîîse Paapa pe pra tîîse.
9 Tîîse tarîpai amîrîꞌnîkonya Paapa epuꞌsaꞌ man. Taapaiꞌnîkon man Paapaya amîrîꞌnîkon epuꞌsaꞌ man. Tîîse îꞌ waniꞌ awanî yeꞌnen tiaron poitîrî pe aweꞌtoꞌpe ennaꞌpopai awanîkon? Moisés nurîꞌtîya yenupantoꞌ yawîrî awanîkon ya, aweꞌpîikaꞌtîkon kaiꞌma eesenumenkakon? Aweꞌpîikaꞌtîkon pepîn.
10 Îꞌ ton pe taayaꞌnîkon, ipîkku pe iweiyu ton tîmoꞌkapîꞌse? Judeuyamîꞌ yeseru yawîrî eꞌpai naatî? Kapoi eraꞌtî pe yapurî moropai konoꞌ moꞌta yai yapurî, amenan konoꞌ ewomî yai yapurî taayaꞌnîkon, îꞌ pe pra rî tîîse?
11 Mararî pra apîꞌnîkon esewankonoꞌman pîꞌ wai. Teuren kureꞌne akoreꞌtaꞌnîkon uukoꞌmamîꞌpî esenyakaꞌma pîꞌ itekare ekaremekî pîꞌ mîrîrî yawîrî pra awanîkon sîrîrî. Mîrîrî yeꞌnen aapiaꞌnîkon îꞌ pe pra rî mîrîrî unekaremekîꞌpî wanî sîrîrî.
12 Uyonpayamîꞌ, esatîuya sîrîrî apîꞌnîkon îꞌ kaiꞌma uurî wanî warantî, Moisés nurîꞌtîya yenupantoꞌ yawîrî pra awanîkon yuꞌse wai. Inna seruꞌ pepîn uurî enaꞌpî amîrîꞌnîkon warantî mîrîrî Moisésya yenupantoꞌ rîꞌpî yawîrî pra. Mîrîrî yai îꞌ kaiꞌma imakuiꞌpî pe uwinîkîi eeseurîmasaꞌkon pra naatîi.
13 Manniꞌ yai Jesus Cristo yekare ekaremeꞌse akoreꞌtaꞌnîkon erepamîꞌpî eꞌmaiꞌ pe, priꞌya pra wanî yeꞌnen.
14 Tîîse mîrîrî wenai uyewanmarîyaꞌnîkon pra awanîꞌpîkon. Uyuꞌse awanîkon pîn, priꞌya pra esepuꞌtî tanne. Tîîse uyapisîꞌpîyaꞌnîkon awakîrikon pe manniꞌ Paapa narimaꞌpî inserî yapisîyaꞌnîkon warantî moropai Jesus Cristo erepamî akoreꞌtaꞌnîkon yapisîyaꞌnîkon warantî puꞌkuru uyapisîyaꞌnîkon.
15 Amîrîꞌnîkon wanîꞌpî kureꞌne taatausinpai. Mîrîrî yai tîîse îꞌ kaiꞌma eenasaꞌkon mîrîrî? Tauya apîꞌnîkon kureꞌne aatausinpaꞌpîkon îꞌ antîîpai awanîꞌpîkon uupia mararî pra kureꞌne ayenukon rî tîmoꞌkai antîîpai awanîꞌpîkon uupia.
16 Mîrîrî warantî awanîkon tîpo, ayeyatonkon pe enasaꞌ sîrîrî moriya. Maasa pra yairî eseurîma yeꞌnen, uyuꞌse pra eenasaꞌkon mîrîrî?
17 Aꞌkî, insamoro warayoꞌkon wanî kureꞌne amîrîꞌnîkon winîkîi tîîse inkamoro esenumenkatoꞌ wanî morî pe pra. Toꞌ esenumenka amîrîꞌnîkon pantaka yuꞌse inîꞌrî upîinamayaꞌnîkon namai. Upîinamayaꞌnîkon yentai tîpîinamakonpa apantakon toꞌya.
18 Inna, seruꞌ pepîn kureꞌne amîrîꞌnîkon winîkîi toꞌ esenumenka ya, morî kupîkonpa, îꞌ waniꞌ pra man. Mîrîrî warantî uurî esenumenka, ayarakkîrîꞌnîkon neken uurî wanî yai pra, tîîse oꞌnon pata aminke wanî tanne.
19 Uyonpayamîꞌ, unsaꞌnamakon, kureꞌne apîꞌnîkon esenumenka, unmukuyamîꞌ warantî awanîkon yeꞌnen. Uurî wanî asankon warantî. Manniꞌ wîriꞌ, more yanya tîmoron epuꞌtî tînre yenpotoꞌ tîuya weiyu yai warantî umoron epuꞌtîuya awenaiꞌnîkon. Maasa pra kureꞌne ituꞌse wanî amîrîꞌnîkon ena Cristo warantî iteseru warantî aakoꞌmamîkonpa.
20 Kureꞌne esenumenkan pîꞌ wai akoreꞌtaꞌnîkon eꞌpai wanî pîꞌ ayarakkîrîꞌnîkon eseurîmatoꞌpe, uurî pe puꞌkuru, kureꞌne apîꞌnîkon teesewankonoꞌmai uukoꞌmamî wenai.
Agar Moropai Sara Yekare Pîꞌ Eeseurîmaꞌpî Uurîꞌnîkon Yenupatoꞌpe
21 Amîrîꞌnîkon manniꞌkan Moisésya yenupantoꞌ rîꞌpî yawîrî eꞌpaiꞌnîkon. Maasa kaꞌtî upîꞌ. Etasaꞌyaꞌnîkon pra naatî, îꞌ kaiꞌma Moisés nurîꞌtîya yenupantoꞌ yekare?
22 Mîrîrîya taꞌpî pena Abraão nurîꞌtî munkîyamîꞌ wanîꞌpî asakîꞌne warayoꞌkon. Tiwinan wanîꞌpî ipoitîrîpaꞌ Agar more pe. Moropai tiaron wanîꞌpî inoꞌpî puꞌkuru Sara more pe, ipoitîrîpaꞌ pepîn.
23 Mîîkîrî ipoitîrîpaꞌ more esenpoꞌpî îꞌ kaiꞌma pemonkon esenpo warantî, tiaron pe pra. Tîîse ipoitîrîpaꞌ pepîn inoꞌpî more esenpoꞌpî îꞌ kaiꞌma kupî tîuya taꞌpî Paapaya yawîrî.
24 Mîrîrî toꞌ yekarekon wanî yenupantoꞌpe. Inkamoro asakîꞌnan wîriꞌsanyamîꞌ yekare wanî îꞌ kaiꞌma Paapa esetatoꞌpe pemonkonyamîꞌ yarakkîrî. Tiwin wanî manniꞌ wîꞌ po Moisés nurîꞌtî pia tîmaimu rumakaiya ekaremeꞌnen pe, mîîkîrî Agar wanî. Mîrîrî Moisés nurîꞌtîya yenupantoꞌ yawîrî tîîkoꞌmansenon pe wanî toꞌ poitîrîtonon warantî.
25 Manniꞌ wîꞌ, Sinai iteseꞌ wanî Arábia pata po tîweꞌsen pe. Mîrîrî yekare ekaremeꞌnen pe Agar wanî. Moropai manniꞌkan Jerusalém po tîîkoꞌmansenon, Judeuyamîꞌ koꞌmamî mîrîrî yawîrî toꞌ poitîrîkon warantî.
26 Tîîse manniꞌkan Cristo pemonkonoyamîꞌ wanî Moisésya yenupantoꞌ rîꞌpî yawîrî tîweꞌsanon pe pra, toꞌ poitîrî pe pra. Inkamoro koꞌmantoꞌ wanî kaꞌ po, tarîron Jerusalém yentai tîweꞌsen. Mîrîrî amenan Jerusalém wanî usankon pe. Mîrîrî ekaremeꞌnen pe Sara, Abraão noꞌpî rîꞌpî wanî, maasa pra ipoitîrîpaꞌ pra tîwanî yeꞌnen.
27 Maasa pra Paapa maimu eꞌmenukasaꞌya taasaꞌ man:Amîrî wîriꞌ, manniꞌ îꞌ pensa more yenpotîpon pepîntaatausinpai eꞌkî.Amîrî îꞌ pensa more morontasaꞌ epuꞌtîtîpon pepîn.Mararî pra entaimepîꞌkî aatausinpasaꞌ wenai.Maasa pra manniꞌ wîriꞌ, inyo nîrumakaꞌpî,mîîkîrî payanîꞌsan wanî kupî sîrîrî mararî pra,manniꞌ tînyo yarakkîrî tîîkoꞌmansen payanîꞌsan yentai
taasaiꞌya man.
28 Tarîpai uyonpayamîꞌ, amîrîꞌnîkon wanî manniꞌ Abraão munmu, Isaque warantî. Maasa pra eesenpoꞌpî Paapa maimuya taasaꞌ yawîrî. Mîrîrî warantî nîrî amîrîꞌnîkon wanî Paapa munkîyamîꞌ pe, innape imaimu kupîyaꞌnîkon yeꞌnen.
29 Isaque esenpoꞌpî Morî Yekaton Wannî wenai tîîse Ismael esenpoꞌpî tîyun wenai. Mîrîrî pîkînsaꞌ takon tarumaꞌtî piaꞌtîꞌpî Ismaelya. Mîrîrî warantî Moisésya yenupantoꞌ rîꞌpî yawîrî tîweꞌsanonya Cristo pemonkono pe tîweꞌsanon tarumaꞌtî sîrîrî.
30 Tîîse îꞌ kaiꞌma Paapa maimu eꞌmenukasaꞌya nai? Taasaiꞌya man see warantî:—Tîwî anoꞌpî poitîrîpaꞌ yarimakî attîtoꞌpe tînre yarakkîrî.Maasa pra mîîkîrî poitîrîpaꞌ moreya tîyun winîpaiintîrî yapisî eserîke pra man manniꞌ ipoitîrîpaꞌ pepînanoꞌpî puꞌkuru moreya intîrî yapisî manniꞌ warantî
—taꞌpî Paapaya Abraão pîꞌ pena.
31 Mîrîrî yeꞌnen uyonpayamîꞌ, uurîꞌnîkon wanî pepîn tiwin kin manniꞌ ipoitîrîpaꞌ munkîyamîꞌ warantî tîweꞌsanon pe. Tîîse manniꞌ ipoitîrîpaꞌ pepîn, inoꞌpî puꞌkuru munkî warantî eꞌnî.
