Sîrîrî Kaareta Paulo Nîmenukaꞌpî Galácia Ponkon Pia 5:1-26
5 Cristoya uurîꞌnîkon moꞌkaꞌpî penaroꞌ uyeserukon winîpai inîꞌrî mîrîrî yawîrî esekaꞌnunkan yuwa namai. Maasa pra pena mîrîrî warantî eꞌnîꞌpî yairon pe eꞌnîtoꞌpe teuren. Tîîse Cristoya neken ukupîkon yairon pe. Mîrîrî yeꞌnen saꞌme eꞌtî, inîꞌrî penaroꞌ ayeserukon yawîrî awanîkonpa tîwennaꞌpoi pra eꞌtî.
2 Maasa etatî. Yairon pîꞌ uurî Paulo eseurîma sîrîrî see warantî. Amîrîꞌnîkon eturumaka ya, amerekon piꞌpî pottî yaꞌtî pîꞌ yairon pe eenakonpa Paapa pia, Judeuyamîꞌya ikupî warantî. Mîrîrî kupîyaꞌnîkon wenai, morî pe Cristoya akupîkon pepîn. Mîrîrî yawîrî aakoꞌmamîkon ya, Cristo nîkupîꞌpî wanî eꞌpainon îꞌ pe pra rî aapiaꞌnîkon.
3 Inîꞌrî ankapai wai mîrîrî rî apîꞌnîkon. Mîrîrî yeꞌka kuꞌnen pemonkon wanî ya, moriya mîîkîrîya tamîꞌnawîrî mîrîrî Moisés nurîꞌtîya yenupatoꞌ yawîrî ikupî koꞌmannîpî eꞌpai awanî tîwaꞌkai pra.
4 Inkamoro esenumenka mîrîrî kuꞌsaꞌ tîuyaꞌnîkon wenai Paapaya uyapisîkon kaiꞌma toꞌ esenumenka, maasa pra Moisés nurîꞌtîya yenupantoꞌ yawîrî tîwanîkon yeꞌnen, tîîse inkamoro atarimasaꞌ mîrîrî mîîkîrî Cristo morî pe kuꞌtoꞌ ton piapai, mîrîrî epeꞌmîra Paapa nîtîrî anapiꞌpai pra tîwanîkon wenai.
5 Tîîse uurîꞌnîkonya inîmîkî îꞌ kaiꞌma Paapaya uurîꞌnîkon yapisî, yairon pe ukuꞌsaiꞌyaꞌnîkon yeꞌnen. Uurîꞌnîkon yapisîiya, epuꞌtî emapuꞌtî Morî Yekaton Wannîya. Mîrîrî pîkînsaꞌ, moropai innape ikuꞌtoꞌ wenai, Moisésya yenupantoꞌ rîꞌpî kupî wenai pra, uurîꞌnîkon yapisîiya morî pe.
6 Mîrîrî warantî Cristo yarakkîrî uurîꞌnîkon wanî tiaronkon yentai eꞌkuꞌnî pîꞌ pra. Mîrîrî yeꞌnen mîrîrî amerekon piꞌpî pottî yaꞌtîtoꞌ wanî îꞌ pe pra, tîîse eꞌsaꞌnamantoꞌ, moropai innape Cristo kuꞌtoꞌ wenai uurîꞌnîkon eꞌpîikaꞌtîn.
7 Aꞌkî uyonpayamîꞌ, pena amîrîꞌnîkonya Cristo nîkupîꞌpî kupîꞌpî innape, moropai mîrîrî kupî pîꞌ aakoꞌmanpîtîꞌpî, aweꞌpîikaꞌtîꞌpîkon. Tîîse anîꞌya mîrîrî kupîyaꞌnîkon pra awanî emapuꞌtîꞌpî, yairon yawîrî aakoꞌmamîkon namai?
8 Oꞌnon yeꞌka pe amîrîꞌnîkon yekaꞌnunkaꞌpîiya tîwî ikupîkonpa? Mîrîrî kupîtîponoꞌpî wanî amîrîꞌnîkon yarakkîrî Paapa pe pra, manniꞌ amîrîꞌnîkon yannotîpon pe pra.
9 Taa toꞌya manniꞌ warantî: —Mararon kîsereꞌna yaiꞌmetoꞌ ke yaiꞌmesaꞌ ya, tamîꞌnawîrî mîrîrî kîsereꞌna yaiꞌmesaiꞌya wanî —taa toꞌya. Mîrîrî warantî tamîꞌnawîrî amîrîꞌnîkon esenkuꞌtî eserîke awanî seruꞌyeꞌkon pîꞌ.
10 Tîîse uyonpayamîꞌ, mîrîrî yeꞌka kupî pîꞌ aakoꞌmamîkon eserîke pra akupîkon pîꞌ wai. Tîîse îꞌ kaiꞌma yairî eesenumenkatoꞌkon ton erepamî kupî pîꞌ wai yairî. Maasa pra Cristo yarakkîrî eꞌnî yeꞌnen. Moropai manniꞌ pemonkon, mîrîrî yeꞌka kupîyaꞌnîkon emapuꞌtîtîpon, mîîkîrî yeꞌka tarumaꞌtî Paapaya eserîke awanî epuꞌtî pîꞌ wai. Mîrîrî kupîiya anîꞌ pe awanî tepuꞌse pra.
11 Uyonpayamîꞌ, tiaronkon esenumenka amerekon piꞌpî pottî yaꞌtî ekaremekî pîꞌ uukoꞌmamî kaiꞌma. Tîîse eꞌpîikaꞌtîntoꞌpe mîrîrî Judeuyamîꞌ yeseru ekaremekîuya ya, Judeuyamîꞌ ekoreꞌma pepîn eꞌpainon, eseurîmatoꞌ pîꞌ. Tîîse Cristo saꞌmantatoꞌ yekare ekaremekîuya yeꞌnen, Judeuyamîꞌ ekoreꞌma mîrîrî pîꞌ.
12 Moropai îꞌ kaiꞌma inkamoro yeꞌka pemonkonyamîꞌya Judeuyamîꞌ yeseru yaꞌ amerekon piꞌpî pottî yaꞌtî yuꞌse toꞌ wanî ya, uurî pia ipiꞌpî neken yaꞌtî toꞌya eꞌpai pra awanî, tîîse tamîꞌnawîrî tîmerekon yaꞌtî toꞌya toꞌ esemuka eꞌpai awanî tiwin iteꞌka.
13 Amîrîꞌnîkon yannoꞌpî Paapaya uyonpayamîꞌ, Moisés nurîꞌtîya yenupantoꞌ yawîrî eesekaꞌnunkakon namai. Tîîse mîrîrî yeꞌka winîpai eemoꞌkasaꞌkon pîꞌ keꞌwapuꞌtîtî penaron ayeserukon rîꞌpî maimu pe. Tîîse mîrîrî warantî pra eetîꞌnînmakon eꞌpai man. Mîrîrî wenai tiaronkon pîikaꞌtîtî.
14 Maasa pra tamîꞌnawîron Moisés nurîꞌtîya yenupantoꞌ wanî tiwin. Taꞌpîiya see warantî:—Awanîyakon saꞌnamakî aawarîrî aweꞌsaꞌnama manniꞌ warantî
—taꞌpîiya.
15 Tîîse eesiyuꞌpîtîkon pîꞌ aakoꞌmamîkon ya, morî pe Cristo yarakkîrî aakoꞌmamîkon pepîn. Mîrîrî yeꞌnen aka, tîwarî eꞌtî mîrîrî warantî aakoꞌmamîkon namai.
Morî Yekaton Wannî Nama Tarîron Kaꞌrî Uyeserukon Yawîrî Koꞌmannî
16 Îꞌ ankapai eꞌtoꞌ mîrîrî pîꞌ tauya sîrîrî. Tîwî Paapa winîpainon Morî Yekaton Wannîya amîrîꞌnîkon pinunpa oꞌnon poro ituꞌse tîwanî pîkîrî. Mîrîrî kupî mîîkîrîya tanne, tarî ituꞌse aweꞌtoꞌkon maimu yawîrî pra awanîkon.
17 Maasa pra tarî ituꞌse eꞌnîtoꞌ uyeserukon wanî Paapa winîpainon Morî Yekaton Wannî yewanma pe, moropai ituꞌse Morî Yekaton Wannî eꞌtoꞌ wanî uurîꞌnîkon yewanma pe. Mîrîrî yeꞌnen inkamoro wanî saꞌnîrî eseyaton pîꞌ. Mîrîrî pîkînsaꞌ amîrîꞌnîkonya ituꞌse aweꞌtoꞌkon kupî eserîke pra man.
18 Tîîse Morî Yekaton Wannî maimu yawîrî awanîkon ya, tiwin kin Moisésya yenupantoꞌ rîꞌpî yawîrî pra awanîkon.
19 Aꞌkî, maasa eraꞌmatî. Imakuiꞌpî teserukon yawîrî tîweꞌsanon yeseru wanî teeseraꞌmai. Toꞌ yeseru wanî seꞌ tapairî tîweꞌsanon pe wîriꞌsanyamîꞌ yarakkîrî. Seꞌ tapairî wîriꞌsanyamîꞌ wanî warayoꞌkon yarakkîrî. Nura kupî toꞌya, toꞌ eppepî pepîn.
20 Moropai miaꞌ ke ikonekasaꞌ yapurînenan pe toꞌ wanî. Moropai piaꞌsanyamîꞌ yapurînenan pe toꞌ wanî. Mîrîrî kupî tîuyaꞌnîkon wenai pemonkon yeyaton pe toꞌ wanî. Teepîsanon pe toꞌ wanî. Teekoreꞌmasanon pe toꞌ wanî. Moropai tîkinmuwasenon pe toꞌ wanî. Moropai tuꞌke îꞌ yuꞌse tîweꞌsanon pe toꞌ wanî. Inkamoro yeꞌkakon wanî tîweꞌpantakakon tîîwarîrîꞌnîkon tiaronkon yarakkîrî.
21 Inkamoro wanî îꞌ kaiꞌma tiaron yemanne yuꞌse tîweꞌsanon pe. Teetînsenon pe toꞌ wanî. Teesiyuꞌpîꞌsanon pe toꞌ wanî. Toꞌ koꞌmamî mararî pra mîrîrî yeꞌkakon imakuiꞌpî kupî pîꞌ. Mîrîrî yeꞌnen tauya inîꞌrî pena taꞌpîuya warantî. Mîrîrî yeꞌkakon kuꞌnenan esaꞌ pe Paapa wanî pepîn. Inkamoro wîtî eserîke pra awanî Paapa pia. Ipatîkarî yarakkîrî toꞌ koꞌmamî pepîn.
22 Tîîse Morî Yekaton Wannî maimu yawîrî eꞌnîꞌnîkon ya, eꞌnî see warantî: eꞌsaꞌnaman, atausinpan, tîwanmîra eꞌnî, teekoreꞌmasen pe pra eꞌnî, nariꞌ pe pra eꞌnî, morî pe eꞌnî yairî îꞌ taꞌpî yawîrî eꞌnî,
23 mîî pe tîweꞌsen pe pra eꞌnî, uuwarîrîꞌnîkon wanî teetîꞌnînmasen pe eꞌnî. Mîrîrî warantî morî pe eꞌnî ya, anîꞌkanya yenupantoꞌ puremekî pepîn.
24 Manniꞌkan Jesus Cristo yapisîtîponkonya penaroꞌ imakuiꞌpî teserukon rumakaꞌpî. Maasa pra pakîꞌnan pona Cristo saꞌmantaꞌpî wenai, morî pe uurîꞌnîkon kupîpa. Mîrîrî yeꞌnen inîꞌ imakuiꞌpî ankuꞌpai pra enanîꞌpî.
25 Morî Yekaton Wannîya upîikaꞌtîsaꞌkon yeꞌnen imaimu yawîrî koꞌmannî yuwapaiꞌnîkon. Tîwî mîîkîrî esenyakaꞌma koꞌmannîtoꞌ yaꞌ tîîpaiꞌnîkon.
26 Uurîꞌnîkon atapurî eserîke pra man tiaron uyonpakon yentai ipîkku pe eꞌnî pîꞌ. Anîꞌ ekoreꞌma eserîke pra man mîrîrî warantî. Tiaron warantî ipîkku pe eꞌpai eꞌnî pîꞌ oꞌmaꞌtan eserîke pra man. Mîrîrî warantî ikupî pîꞌ koꞌmannî eꞌpaiꞌnîkon pra man.
