Sîrîrî Kaareta Paulo Nîmenukaꞌpî Galácia Ponkon Pia 6:1-18
6 Uyonpayamîꞌ, anîꞌya amîrîꞌnîkon koreꞌta imakuiꞌpî kupî eposaꞌ ya, manniꞌ Morî Yekaton Wannî maimu yawîrî tîweꞌsenya mîîkîrî pîikaꞌtî eꞌpai awanî, inkupîꞌpî wenai. Imakuiꞌpî pe tînkupîꞌpî wanî epuꞌtoꞌpeiya moropai irumakatoꞌpeiya. Tîîse mîrîrî kupîiya eꞌpai awanî mîî pe tîweꞌse pra, tîîse morî pe. Moropai tîwarî siꞌma ikupîiya eꞌpai awanî, imakuiꞌpî yaꞌ nîrî teena namai.
2 Aweꞌpîikaꞌtîkon yuwatî ayonpakon pokonpe. Toꞌ meruntîtannîpî yuwatî toꞌ atausinpatoꞌpe. Moropai mîrîrî warantî ikupî pîꞌ aakoꞌmamîkon ya, Cristoya taꞌpî yawîrî ikupîyaꞌnîkon mîrîrî. Maasa pra taꞌpîiya: —Ayonpakon saꞌnamatî, tîwî tîkuꞌse pra.
3 Anîꞌ esenumenka ya, tîîwarîrî ipîkku pe tîwanî pîꞌ, ipîkku pe pra siꞌma, mîîkîrî esenkuꞌtîsaꞌ saꞌne mîrîrî tîîwarîrî.
4 Mîrîrî yeꞌnen tiwin pîꞌ siꞌma warîrî wanî eseraꞌman eꞌpai awanî. Îꞌ rî kuꞌsaꞌ, morî kuꞌsaꞌ imakuiꞌpî kuꞌsaꞌ eraꞌmapai man. Morî kuꞌsaꞌ epuꞌtî ya, moriya mîrîrî pîꞌ atapurîn. Morî pe tiaron yeseru wenai iwarantî atapurîn eserîke pra man.
5 Maasa pra tiwin pîꞌ siꞌma uyeserukon unkupîꞌpîkon eseraꞌma kupî sîrîrî. Mîrîrî yeꞌnen Cristo pia erepannîsaꞌ ya, uurîꞌnîkonya rî unkupîꞌpîkon kuꞌsaꞌ ekaremekî kupî sîrîrî ipîꞌ.
6 Amîrîꞌnîkon koreꞌta Cristo yekare pîꞌ ayenupanenkon wanî ya, mîîkîrî pîikaꞌtîyaꞌnîkon yuwatî, tamîꞌnawîrî ituꞌse aweꞌtoꞌ pîꞌ morî pe. Itekkari ton pîꞌ itoꞌ ton ke, ipataꞌseꞌ ton ke, mîrîrîkon ke ipîikaꞌtîyaꞌnîkon yuwatî.
7 Tauya sîrîrî see warantî. Paapa yenkuꞌtîyaꞌnîkon kaiꞌma kîsenkuꞌtîtî, tamîꞌnawîrî Paapaya epuꞌtî tanne. Maasa eraꞌmatî. Warayoꞌya tînmîri pîmî ya, mîrîrî inpîmîꞌpî aroꞌta moropai eepeta. Mîrîrî tînpîmîꞌpî moꞌkaiya. Tiaron pe eepetasaꞌ pra awanî.
8 Mîrîrî warantî nîrî anîꞌya morî kuꞌsaꞌ ya, Morî Yekaton Wannî atausinpatoꞌ yawîrî morî eporîiya Morî Yekaton Wannî winîpai, ipatîkarî tîîkoꞌmantoꞌ ton. Tîîse anîꞌya imakuiꞌpî kuꞌsaꞌ ya, ituꞌse teesenumenka yawîrî, mîîkîrîya imakuiꞌpî yepeꞌ pe eꞌtarumaꞌtîntoꞌ eporî, aasaꞌmanta ipatîkarî.
9 Mîrîrî yeꞌnen morî kupî pîꞌ koꞌmannî teesetaꞌkai pra. Tîwîrî ikupî pîꞌ eꞌnîpai man, maasa pra îꞌ pensa yapisî weiyu erepamî yai, yapiꞌtoꞌpeꞌnîkon.
10 Mîrîrî yeꞌnen tîwîrî ikupî eserîkan wanî ya, morî kuꞌpaiꞌnîkon man tamîꞌnawîronkon yarakkîrî. Tîîse ikupî ya, manniꞌkan uyonpakon innape Jesus Cristo kupîtîponkon pîikaꞌtî yuwapai man, maasa pra inkamoro wanî yeꞌnen uyonpakon pe. Moropai innape ikuꞌnenan pepîn nîrî pîikaꞌtîtî.
Paulo Esekaremekî
Moropai Tiwinkanoꞌpî Pe Panamaiya
11 Uurîya sîrîrî kaareta menuka sîrîrî uyenya ke puꞌkuru aapiaꞌnîkon. Maasa eraꞌmatî îꞌ kaiꞌma inonkon pe imenukasauꞌya.
12 Tarîpai tauya sîrîrî apîꞌnîkon insamoro ayenupanenkon pîꞌ. Inkamoro wanî ipîkku pe tîweꞌkuꞌsanon pe. —Amerekon piꞌpî pottî yaꞌtîtî, —taa pîꞌ toꞌ koꞌmamî teesekaꞌnunkai. Mîrîrî kupîyaꞌnîkon yuꞌse toꞌ wanî tîpîꞌnîkon Judeuyamîꞌ oꞌmaꞌta namai. Maasa pra Cristo saꞌmantatoꞌ yekare neken ekaremekî toꞌya ya, Judeuyamîꞌya toꞌ tarumaꞌtî eꞌpainon.
13 Tîîse mîrîrî warantî amîrîꞌnîkon ena yuꞌse tîweꞌsanonya tamîꞌnawîrî Moisés nurîꞌtîya yenupantoꞌ kupî pepîn. Tîîse tîmaimukon pe mîrîrî kuꞌsaꞌyaꞌnîkon wenai atapurîpai toꞌ wanî. Taa toꞌya: —Anna maimu pe ikuꞌsaꞌ toꞌya —taa toꞌya. Mîrîrî kupîyaꞌnîkon yuꞌse toꞌ wanî, poro po neken teeseraꞌmasen ton apiꞌpîkon pîꞌ.
14 Tîîse uurî wanî pepîn inkamoro warantî. Jesus Cristo saꞌmantatoꞌ neken kuꞌnen pe wanî innape. Maasa pra Jesus saꞌmantaꞌpî wenai uurî nîrî, uusaꞌmantaꞌpî iwarantî. Mîrîrî yeꞌnen Paapa yapurînenan pepîn warantî eꞌpai pra wai. Moropai mîrîrî wenai tîîpiaꞌnîkon uurî yuꞌse pra toꞌ wanî, Cristo warantî wanî yeꞌnen.
15 Îꞌ waniꞌ awanî pepîn Paapa pia, mîrîrî warantî eꞌnî ya, Judeuyamîꞌ yeseru yaꞌ eꞌnî tanne, toꞌ yeseru yaꞌ pra eꞌnî tanne. Tîîse Paapa wanî pemonkon yeseru miakanmapai amenan pe aweꞌtoꞌpe.
16 Moropai tamîꞌnawîronkon manniꞌkan sîrîrî yawîrî yapurînenan wanî ya, inkamoro pia tîwanmîn moropai tîꞌnokoꞌmantoꞌ wanî mîrîrî. Tamîꞌnawîronkon Paapa pemonkonyamîꞌ, innape yapurînenan pia Paapaya itîrî yuꞌse wanî.
17 Mîrîrî yeꞌnen anîꞌya taa: —Cristo naipontîꞌpî pepîn amîrî, yuꞌse pra wai. Maasa pra sîrîrî uyesaꞌya ekaremekî sîrîrî îꞌ kaiꞌma erekîꞌ pe wanî. Mîrîrîya Jesus Cristo wanîyakon pe wanî ekaremekî sîrîrî, uyeraꞌmanenanya uyeraꞌmatoꞌpe.
18 Uyonpayamîꞌ, morî epeꞌmîn tîrî Uyepotorîkon Jesus Cristoya yuꞌse wai tamîꞌnawîronkon amîrîꞌnîkon pia. Moropai ayarakkîrîꞌnîkon aakoꞌmamî yuꞌse wai. Mîrîrî warantî eꞌpai man. Mîrîrî neken.
