Jesus Cristo Yekare João Nîmenukaꞌpî 1:1-51
1 Eesippiaꞌtî yai moro Mai tesaꞌsen wanîꞌpî. Mîîkîrî Mai wanîꞌpî Paapa pia. Moropai mîîkîrî Mai wanîꞌpî Paapa pe.
2 Mîîkîrî rî wanîꞌpî Paapa pia tamîꞌnawîron esippiaꞌtî yai.
3 Mîîkîrî wenai tamîꞌnawîron konekaꞌpî Paapaya. Îꞌ rî ekoneka pra awanîꞌpî mîîkîrî ton pra tîîse.
4 Awanîꞌpî enen koꞌmannîtoꞌ esaꞌ pe. Enen koꞌmannîtoꞌ iipiapainon, mîrîrîya pemonkonyamîꞌ weiyuꞌmaꞌpî morî pe Paapa epuꞌtoꞌpe toꞌya.
5 Ewaron yaꞌ puꞌkuru awitta pîꞌ aakoꞌmamî tîîse ewaron ta tîîkoꞌmansenon, imakuiꞌsanya mîrîrî aꞌka yiꞌnîpî eserîke pra awanîꞌpî.
6 Paapaya warayoꞌ yarimaꞌpî, iteseꞌ João.
7 Mîîkîrî iipîꞌpî eseurîmai, manniꞌ aꞌka pe tîweꞌsen pîꞌ eseurîmai, tamîꞌnawîronkonya aꞌka pe tîweꞌsen kuꞌtoꞌpe innape tîmaimu wenai.
8 Aꞌka pe tîweꞌsen pepîn mîîkîrî João, tîîse Paapaya yaipontîꞌpî aꞌka pe tîweꞌsen yekare ekaremeꞌse.
9 Mîîkîrî aꞌka pe tîweꞌsen manniꞌ wanîꞌpî innape, yenkuꞌtîton pe pra. Mîîkîrî tamîꞌnawîronkon pemonkonyamîꞌ weiyuꞌmanen iipîꞌpî sîrîrî pata pona.
10 Mîîkîrî asarîꞌpî sîrîrî non poro, tînkonekaꞌpî puꞌkuru poro, tîîse mîîkîrî pe epuꞌtî toꞌya pra, sîrîrî non po tîîkoꞌmansenon wanîꞌpî.
11 Tarîwaya tîpata pe tînkonekaꞌpî pona aaipîꞌpî. Tîîse ipemonkonoyamîꞌya yapisî pra awanîꞌpî.
12 Tîîse tapisîtîponkon pia itîrîꞌpîiya Paapa munkî pe toꞌ enatoꞌpe, manniꞌkan innape tîkupîtîponkon pia.
13 Paapa munkî pe inkamoro esenpoꞌpî, pemonkon pe esenpon warantî pra. Ituꞌse tîweꞌtoꞌ yawîrî toꞌ esenpo pra awanîꞌpî. Moropai ituꞌse anîꞌrî eꞌtoꞌ yawîrî pra, tîîse ituꞌse tîwanî yeꞌnen, Paapaya ikupîꞌpî.
14 Mîîkîrî Mai esenpoꞌpî pemonkon pe. Uurîꞌnîkon koreꞌta aakoꞌmamîꞌpî. Morî puꞌkuru iteseru eraꞌmaꞌpî annaya. Mîrîrî wenai îꞌ kaiꞌma iyun Paapa yeseru wanî epuꞌtîꞌpî annaya. Innape puꞌkuru awanî, morî pe puꞌkuru mîîkîrî eꞌtoꞌ wanî, tiwinan Paapa munmu yeseru pe.
15 João nurîꞌtî eseurîmapîtîꞌpî ipîꞌ see warantî: —Mîîkîrî warayoꞌ pîꞌ uurî eseurîmapîtî neꞌtîkini —taꞌpîiya. —Uyeꞌmaꞌpî pîꞌ Mîîkîrî iipî, tîîse uyentai awanî, maasa pra uurî ton pra tîîse Mîîkîrî wanîꞌpî —taꞌpîiya.
16 Iwinîpai morî epeꞌmîn yapiꞌnenan uurîꞌnîkon tamîꞌnawîrî. Kureꞌne morî tîîsaiꞌya. Morî tîîsaiꞌya morî pe tîwanî yeꞌnen, morî antîîpai tîwanî yeꞌnen.
17 Moisés nurîꞌtî yai Paapaya tîmaimu tîrîꞌpî unkupîkon ton pe. See warantî akoꞌmantî aweꞌtarumaꞌtîkon namai, kaiꞌma. Tîîse Jesus Cristo yai, yairon Paapa epuꞌtî moropai îꞌ kaiꞌma morî epeꞌmîn tîrîiya epuꞌtî.
18 Anîꞌya Paapa eraꞌmasaꞌ pra man sîrîrî tîpose. Tîîse tiwinan Paapa munmu, Paapa pia puꞌkuru tîîkoꞌmansen, mîîkîrîya Paapa yeseru ekaremeꞌsaꞌ sîrîrî.
João Batista Yekare
19 Jerusalém poi teepîremasanon moropai tonpakon Levitayamîꞌ yarimaꞌpî Judeuyamîꞌ esanonya João pia ekaranmapoi: —Anîꞌ amîrî? —taꞌpî toꞌya.
20 See warantî toꞌ maimu yuukuꞌpîiya. Aronne eesekaremekîꞌpî. Taꞌpîiya: —Uurî Paapa nîmenkaꞌpî, pîikaꞌtîton pepîn. Cristo pepîn uurî.
21 Moropai taꞌpî toꞌya: —Anîꞌ kin amîrî moriya? Elias nurîꞌtî kaꞌrî amîrî? Joãoya taꞌpî: —Kaane. Inîꞌrî taꞌpî toꞌya: —Pena Paapa maimu ekaremeꞌnen, manniꞌ Moisés nurîꞌtî nekaremekîꞌpî aaipî ton manniꞌ kaꞌrî awanî? —taꞌpî toꞌya. —Kaane —taꞌpîiya.
22 —Anîꞌ pe kin awanî mîrîrî? —taꞌpî toꞌya. —Anna pîꞌ kaꞌkî ekaremeꞌtoꞌpe annaya anna yarimatîponkon pîꞌ. Îꞌ taa pîꞌ nan anna pîꞌ? —taꞌpî toꞌya.
23 Joãoya yuukuꞌpî: —Uurî keren po eseurîmakoi Isaías nurîꞌtî nekaremekîꞌpî.“Uyepotorîkon yeꞌmarî ton konekatî toꞌsarî puꞌkuru
tauya tamîꞌnawîronkon pîꞌ”. Pena Paapa maimu ekaremeꞌnen Isaías nurîꞌtî nekaremekîꞌpî pemonkonyamîꞌ ekonekatoꞌpe Uyepotorîkon iipî rawîrî —taꞌpîiya toꞌ pîꞌ.
24 Inkamoro João pia erepamîꞌsan wanîꞌpî fariseuyamîꞌ narimaꞌsan pe.
25 Inîꞌrî João ekaranmapoꞌpî toꞌya: —Cristo pe pra awanî, moropai Elias pe pra awanî, moropai manniꞌ Paapa maimu ekaremeꞌnen, Moisés nurîꞌtî nekaremekîꞌpî pe pra awanî. Mîrîrî yeꞌnen îꞌ ton pe pemonkonyamîꞌ yenpatakonaya? —taꞌpî toꞌya.
26 Toꞌ maimu yuukuꞌpî Joãoya: —Inna, pemonkonyamîꞌ yenpatakonauya tuna ke neken, tîîse tiaron man akoreꞌtaꞌnîkon, anepuꞌtîkon pepîn.
27 Mîîkîrî pîꞌ tauya manniꞌ uyeꞌmaꞌpî pîꞌ eerepamî, tîîse uyentai awanî. Uyentai puꞌkuru awanî yeꞌnen, iꞌsaꞌsaꞌ yewa yeukauya pepîn, itarumaiꞌpî pe puꞌkuru wanî yeꞌnen —taꞌpîiya.
28 Tamîꞌnawîrî sîrîrî esuwaꞌkaꞌpî Betânia pata po iren Jordão ratai po, pemonkonyamîꞌ yenpatakona pîꞌ João wanîꞌpî pata.
Carneiro, Paapa Nîtîrîꞌpî
29 Mîrîrî tîpo tiaron wei yai, tîîpia Jesus iipî eraꞌmaꞌpî Joãoya. Jesus eraꞌmaiꞌma taꞌpîiya tamîꞌnawîronkon pîꞌ: —Aꞌkî, manniꞌ Paapa nîmenkaꞌpî aasaꞌmantatoꞌpe Carneiro eraꞌmatî. Mîserîya tamîꞌnawîronkon nîkupîꞌpî imakuiꞌpî moꞌka —taꞌpî Joãoya.
30 —Mîserî pîꞌ tauya manniꞌ, uyeꞌmaꞌpî pîꞌ tiaron iipî tîîse uyentai awanî, uurî ton pra tîîse awanîꞌpî mîîtoꞌpe, tauya neꞌtîkini.
31 Mîîkîrî pe mîserî epuꞌtîuya pra awanîꞌpî. Tîîse uuipîꞌpî pemonkonyamîꞌ yenpatakonai Israelponkonya mîserî epuꞌtoꞌpe —taꞌpî Joãoya.
32 Moropai João eseurîmaꞌpî Jesus pîꞌ: —Kaꞌ poi Morî Yekaton Wannî autî eraꞌmaꞌpîuya ipona wakuꞌkaimî warantî. Moropai ipo aakoꞌmamîꞌpî.
33 Mîîkîrî pe awanî epuꞌtîuya pra awanîꞌpî. Tîîse tuna ke pemonkonyamîꞌ yenpatakonai uyarimatîponya taꞌpî upîꞌ: “Warayoꞌ pona Morî Yekaton Wannî autî moropai ipo aakoꞌmamî eraꞌmaya ya, mîîkîrî pe awanî epuꞌtîya. Mîîkîrîya pemonkonyamîꞌ yenpatakona Morî Yekaton Wannî eꞌtoꞌpe toꞌ esaꞌ pe”, taꞌpîiya upîꞌ.
34 Moropai eraꞌmaꞌpîuya moropai tamîꞌnawîronkon pîꞌ tauya sîrîrî: “Paapa munmu mîserî” —taꞌpî Joãoya.
Jesus Nenupaꞌsan Eꞌmaiꞌnokon
35 Inîꞌrî tiaron wei yai awanîꞌpî João moropai inenupaꞌsan asakîꞌnankon.
36 Mîrîrî poro Jesus wîtî eraꞌmaꞌpî Joãoya. Taꞌpîiya tînenupaꞌsan pîꞌ: —Aꞌkî, mîîkîrî carneiro Paapa nîtîrî ton aasaꞌmantatoꞌpe uurîꞌnîkon ton pe —taꞌpîiya.
37 Moropai mîrîrî eta tîuyaꞌnîkon yeꞌnen, João nenupaꞌsan asakîꞌnankon wîtîꞌpî Jesus pîkîrî.
38 Mîrîrî pe, Jesus eraꞌtîꞌpî. Teꞌmaꞌpî pîꞌ toꞌ iipî eraꞌmaꞌpîiya. Taꞌpîiya toꞌ pîꞌ: —Îꞌ yuwayaꞌnîkon? —taꞌpîiya. Yuukuꞌpî toꞌya: —Rabi, (anna yenupanen taatoꞌ mîrîrî) —Oꞌnon pata tîîkoꞌmansen amîrî? —taꞌpî toꞌya.
39 —Aaseꞌnîkon maasa eraꞌmai —taꞌpî Jesusya.
Mîrîrîya ipîkîrî toꞌ wîtîꞌpî. Aakoꞌmantoꞌ eraꞌmaꞌpî toꞌya moropai iipia toꞌ koꞌmamîꞌpî pata koꞌmamî tîpose. Toꞌ erepansaꞌ wanîꞌpî 4 horas yairî tîîse.
40 Tiwinan mîîkîrî João maimu etatîpon Jesus pîkîrî itîꞌpî wanîꞌpî Simão Pedro yakon iteseꞌ André.
41 Jesus piapai tuutî tîpo, tîrui yuwai attîꞌpî. Eporîꞌpîiya. Taꞌpîiya tîrui pîꞌ: —Messias pe Paapa nîmenkaꞌpî pîikaꞌtîton eporî pîꞌ anna man. (Messias taa Judeuyamîꞌya moropai Cristo taa grego maimu ta)
42 Moropai tîrui yarîꞌpîiya Jesus pia. Jesus esenumenkaꞌpî Pedro pîꞌ moropai taꞌpîiya: —Amîrî Simão, João munmu. Tarîpai ayeseꞌtîuya Pedro pe. (Tîꞌ taatoꞌ mîrîrî Pedro, grego maimu ta.)
Jesusya Filipe, Natanael Yanno
43 Mîrîrî tîpo tiaron wei yai Jesus eseꞌmaꞌtîꞌpî Galiléia pona. Tuutî pe Filipe eporîꞌpîiya. —Aase uwenairî —taꞌpîiya Filipe pîꞌ.
44 Betsaida po tîîkoꞌmansen mîîkîrî Filipe, André, Pedro cidaderî po.
45 Filipe wîtîꞌpî Natanael yuwai. Eporîꞌpîiya. Taꞌpîiya Natanael pîꞌ: —Aꞌkî warayoꞌ Moisés nurîꞌtî moropai penaroꞌkon Paapa maimu ekaremeꞌnenan profetayamîꞌ nurîꞌtî nekaremekîꞌpî tîkaaretarîkon po, manniꞌ mîîkîrî eporî pîꞌ anna man. Jesus mîîkîrî eporî pîꞌ anna man, Jesus mîîkîrî Nazaré poinon, José munmu —taꞌpîiya.
46 Natanaelya yuukuꞌpî: —Nazaré pata poi morî epaꞌka eserîke pra man —taꞌpîiya. Filipeya taꞌpî: —Maasa aase eraꞌmai —taꞌpîiya.
47 Tîîpia Natanael iipî eraꞌmaꞌpî Jesusya. Tîwoiꞌnîkon pîꞌ taꞌpîiya: —Aꞌkî, Israel pon puꞌkuru mîîkîrî warayoꞌ seruꞌyeꞌ pepîn —taꞌpîiya.
48 Mîrîrî etaꞌpî Natanaelya. —Oꞌnon yeꞌka pe uyepuꞌtî pîꞌ nan? —taꞌpîiya Jesus pîꞌ. Jesusya yuukuꞌpî: —Filipe, ayannouya pra tîîse, ayeraꞌma pîꞌ wai figo yeꞌ yoꞌkoi awanî tanne.
49 Mîrîrî pîꞌ Natanaelya taꞌpî: —Uyenupanen, amîrî Paapa munmu. Amîrî anna Israelyamîꞌ yepotorî.
50 Jesusya taꞌpî ipîꞌ: —Innape ukupî pîꞌ nai ayeraꞌma pîꞌ wai figo yeꞌ yoꞌkoi tauya manniꞌ wenai. Tîîse mîrîrî yentainon eraꞌmaya pe nai.
51 Ayenkuꞌtîuya pepîn. Kaꞌ esettapuruka eraꞌmaya pe nai, moropai inserîyamîꞌ enuku moropai toꞌ autî eraꞌmaya pe nai uurî, pemonkon pe kaꞌ poi iipîꞌpî pia —taꞌpî Jesusya.
