Jesus Cristo Yekare João Nîmenukaꞌpî 10:1-42
10 Moropai Jesusya sîrîrî panton ekaremekîꞌpî fariseuyamîꞌ pîꞌ: —Ayenkuꞌtîuyaꞌnîkon pepîn. Anîꞌ ewomî ya carneiroyamîꞌ koꞌmantoꞌ kurarari ta, manaꞌta yai pra, mîîkîrî wanî amaꞌyeꞌ pe. Carneiroyamîꞌ yamaꞌrunpai eewomî mîrîrî.
2 Tîîse carneiroyamîꞌ esaꞌ ewomî manaꞌta yai puꞌkuru.
3 Manaꞌta eraꞌmanenya manaꞌta yarakkanmoka carneiroyamîꞌ esaꞌ ewontoꞌpe. Moropai carneiroyamîꞌ esaꞌya tekînon yanno tiwin pîꞌ, toꞌ eseꞌ pîꞌ. Imaimu epuꞌtî toꞌya. Iipia toꞌ iipî. Moropai toꞌ yarîiya parîꞌ yuwai.
4 Tekînon yarîiya. Toꞌ rawîrî attî moropai iteꞌmaꞌpî pîꞌ toꞌ wîtî, imaimu pîꞌ tesaꞌkon pe epuꞌtî tîuyaꞌnîkon yeꞌnen.
5 Tînepuꞌtîkon pepîn pemonkon yeꞌmaꞌpî pîꞌ toꞌ wîtî pepîn. Imaimu pîꞌ tiaron pe epuꞌtî toꞌya moropai iipiapai toꞌ epe.
Mîrîrî warantî Jesusya fariseuyamîꞌ yeurîmaꞌpî.
6 Mîrîrî carneiroyamîꞌ pantoni ekaremekîꞌpî Jesusya toꞌ pîꞌ tîîse oꞌnon yeꞌka pe tenupaiyaꞌnîkon epuꞌtî toꞌya pra awanîꞌpî.
7 Inîꞌrî Jesusya taꞌpî: —Aꞌkî, uurî manaꞌta, carneiroyamîꞌ ewontoꞌ warainon.
8 Tiaronkon iipîꞌpî urawîrî Paapa maimu pe pra, tîîse amaꞌyeꞌkon iipî warantî. Carneiroyamîꞌ anamaꞌrunpapai amaꞌyeꞌkon wanî warantî, pemonkonyamîꞌ yakaꞌmapai toꞌ wanîꞌpî, inkamoro yenkuꞌtîi. Tîîse Paapa pemonkonoyamîꞌya puꞌkuru toꞌ maimu eta pra awanîꞌpî.
9 Uurî wanî manaꞌta warantî, pemonkonyamîꞌ man carneiroyamîꞌ warantî. Uwenairî anîꞌ ewomî ya, tîpîikaꞌtîtoꞌ ton eporîiya îꞌ ton pra awanî pepîn. Morî pe eewomî moropai eepaꞌka tîîwanmîra tekkari ton eporîiya.
10 Amaꞌyeꞌ wanî carneiroyamîꞌ anamaꞌrunpapai. Toꞌ yamaꞌrunpaiya moropai toꞌ tîꞌkaiya. Mîrîrî warantî pra uuiꞌsaꞌ. Uurî uuiꞌsaꞌ sîrîrî enen upemonkonoyamîꞌ koꞌmantoꞌ ton tîîse, morî pe toꞌ koꞌmantoꞌpe, sîrîrî tîpose tîîkoꞌmamîꞌpîkon yentai.
11 Uurî carneiroyamîꞌ eraꞌmanen warainon morî. Uurîya uukoꞌmantoꞌ tîrî carneiroyamîꞌ pîikaꞌtîtoꞌpeuya.
12 Tiaron pemonkon wanî ya, carneiroyamîꞌ esaꞌ pe pra, tîîse carneiroyamîꞌ esaꞌ poitîrî pe, teesekaꞌnunkai carneiroyamîꞌ pîikaꞌtîiya pepîn, imîrî pe pra toꞌ wanî yeꞌnen. Oꞌmaꞌ carneiro yapiꞌnen kaikusi iipî eraꞌma tîuya ya, eepe. Moropai oꞌmaꞌya carneiroyamîꞌ pîraiꞌpîka moropai tiaron yapisîiya.
13 Carneiroyamîꞌ eraꞌmanen epe maasa pra carneiroyamîꞌ esaꞌ pia teesenyakaꞌmasen pe tîwanî yeꞌnen. Itekînnan pe pra carneiroyamîꞌ wanî. Toꞌ pînînmaiya pepîn.
14 Uurî man mîrîrî warantî pra. Carneiroyamîꞌ esaꞌ warainon uurî, morî. Upemonkonoyamîꞌ epuꞌnen uurî tamîꞌnawîrî. Moropai upemonkonoyamîꞌya uyepuꞌtî tesaꞌkon pe wanî.
15 Mîrîrî warantî Paapaya uyepuꞌtî tamîꞌnawîrî. Moropai Paapa epuꞌnen uurî. Moropai uukoꞌmantoꞌ tîrîuya upemonkonoyamîꞌ ton pe, inkamoro pîikaꞌtîtoꞌpeuya.
16 Tiaronkon upemonkonoyamîꞌ man tarîronkon pepîn. Moropai inkamoro nîrî enepîuya eꞌpai awanî uupia, tarîronkon pokonpe. Moropai umaimu eta toꞌya kupî sîrîrî. Awanî kupî sîrîrî tiwinan upemonkono pe toꞌ ena moropai tiwinan uurî toꞌ esaꞌ.
17 Uuwarîrî enen eꞌtoꞌ tîrîuya kupî sîrîrî. Moropai uusaꞌmanta eꞌmîꞌsaꞌkatoꞌpe enen. Mîrîrî wenai uyunya uꞌnînma.
18 Anîꞌya uwî pepîn ituꞌse pra wanî tanne. Isaꞌmantapai wai. Uuwarîrî eꞌtîrî, uusaꞌmantatoꞌpe. Moropai uuwarîrî eꞌmîꞌsaꞌka kupî sîrîrî uusaꞌmanta tîpo. Mîrîrî warantî eꞌtoꞌpe kaiꞌma Uyunya uyarimaꞌpî —taꞌpî Jesusya.
19 Judeuyamîꞌ esiyuꞌpîtîꞌpî inîꞌrî Jesusya tenupatoꞌkon pîꞌ. Seꞌ kaisarî pra toꞌ esenumenkaꞌpî Jesus pîꞌ.
20 —Îꞌ waniꞌ awanî yeꞌnen imaimu eta pîꞌ aakoꞌmamîkon —taꞌpî tiaronkonya. —Aatakaꞌmasaꞌkon mîrîrî. Oꞌmaꞌ yenseꞌ pe man —taꞌpî toꞌya.
21 Tîîse tiaronkonya taꞌpî: —Kaane, imariwaꞌkaꞌpan yeseru yairî pra uyenupaiyaꞌnîkon mîrîrî. Moropai imariwaꞌya anîꞌ kupî pepîn meruntî ke enkaruꞌnan yenu konekatoꞌpeiya —taꞌpî toꞌya.
Judeuyamîꞌya Jesus Kupî Pepîn Innape
22 Mîrîrî tîpo teserukon yawîrî Judeuyamîꞌ eperepîꞌpî Jerusalém po epîremantoꞌ yewîꞌ ekaremeꞌse inîꞌrî Paapa yewîꞌ pe teepîrematoꞌkon wenai, konoꞌ yai awanîꞌpî.
23 Jesus asarîꞌpî Judeuyamîꞌ epîrematoꞌ iwaꞌtoꞌ ta iteseꞌ Salomão pataꞌseꞌ.
24 Iwoi Judeuyamîꞌ eperepîꞌpî. Ipîꞌ taꞌpî toꞌya: —Îꞌ waniꞌ awanî yeꞌnen anna yakaꞌma pîꞌ aakoꞌmamî? Paapa nîmenkaꞌpî pe awanî ya, aronne esekaremeꞌkî innape epuꞌtoꞌpe annaya —taꞌpî toꞌya.
25 Jesusya taꞌpî: —Aasîrî esekaremekîꞌpî apîꞌnîkon, tîîse innape ukupîyaꞌnîkon pra awanîꞌpîkon. Uyun eseꞌ yai unkonekaꞌpîya uyekaremekî mîrîrî, anîꞌ pe wanî.
26 Tîîse innape ukupîyaꞌnîkon pra awanî, maasa pra uyekînnon carneiroyamîꞌ koreꞌtawonkon pepîn amîrîꞌnîkon. Upemonkono pe pra awanîkon.
27 Uyekînnonya umaimu epuꞌtî tesaꞌkon maimu pe. Toꞌ epuꞌnen uurî uyekîn pe. Uwenairî toꞌ wîtî.
28 Ipatîkarî toꞌ koꞌmantoꞌ ton tîrîuya. Ipatîkarî toꞌ koꞌmamî, toꞌ saꞌmanta pepîn, Paapa piapai toꞌ koꞌmamî pepîn tiwin kin. Uyenyaꞌ toꞌ wanî moropai uyenya pai anîꞌya toꞌ moꞌka pepîn.
29 Uyunya toꞌ tîrîꞌpî uupia. Uyun yentainon ton pra man. Uyun yenyaꞌ toꞌ wanî moropai itenya pai anîꞌya toꞌ moꞌka pepîn.
30 Uurî moropai Uyun tiwinan.
31 Mîrîrî taiya pîꞌ Judeuyamîꞌ ekoreꞌmaꞌpî. Inkamoroya tîꞌkon yanumîꞌpî Jesus wîîkonpa.
32 Mîrîrî pîꞌ Jesusya taꞌpî: —Tuꞌke iteꞌka morî kuꞌsauꞌya ya Uyun meruntîri ke. Oꞌnon unkonekaꞌpî wenai uwî yuꞌse awanîkon?
33 Judeuyamîꞌya taꞌpî: —Morî konekasaꞌya wenai awî annaya pepîn, tîîse imakuiꞌpî pe eeseurîmasaꞌ yeꞌnen Paapa pîꞌ. Amîrî pemonkon. Tîîse pemonkon pe siꞌma Paapa pe awanî kaiꞌma eeseurîma. Imakuiꞌpî mîrîrî —taꞌpî toꞌya.
34 Jesusya taꞌpî: —Aweꞌmenukasaꞌ man Paapa kaaretarî pîꞌ see warantî. Pemonkonyamîꞌ pîꞌ taꞌpîiya:“Yepotorî Wannî warainokon amîrîꞌnîkon”.
35 Paapa maimu mîrîrî. Yairî pra man taa pepîn. Mîîkîrî Paapa maimu menukatîponya taꞌpî tiaronkon pemonkonoyamîꞌ pîꞌ Paapa warantî awanîkon.
36 Îꞌ waniꞌ awanî yeꞌnen imakuiꞌpî pe eseurîman pîꞌ nai, taayaꞌnîkon upîꞌ, uurî Paapa munmu tauya wenai? Paapa nîmoꞌkaꞌpî uurî tîmîrî pe, Paapa naipontîꞌpî uurî.
37 Uyun nîkupî pîꞌ esenyakaꞌma pra awanî ya, umaimu kîꞌkupîi innape.
38 Tîîse uyun nîkupî pîꞌ esenyakaꞌma eraꞌmayaꞌnîkon ya, innape unkupîꞌpî kuꞌtî. Umaimu ankuꞌpai pra awanîkon ya innape, mîîwîni tîîse unkonekaꞌpî kuꞌtî innape. Uurî pia Paapa koꞌmamî, moropai Paapa pia uukoꞌmamî kuꞌtî innape —taꞌpîiya toꞌ pîꞌ.
39 Mîrîrî pîꞌ toꞌ ekoreꞌmaꞌpî inîꞌrî. Yapisî yonpaꞌpî toꞌya. Tîîse toꞌ piapai attîꞌpî.
40 Jordão ratai pona attîꞌpî, eꞌmaiꞌ pe João Batistaya pemonkonyamîꞌ yenpatakonaꞌpî pataꞌpî yaꞌ. Moro aakoꞌmamîꞌpî.
41 Arinîkon pemonkonyamîꞌ wîtîꞌpî iipia. Taꞌpî toꞌya: —Anîꞌya ikupî eserîkan pepîn konekaiya pra João nurîꞌtî wanîꞌpî, tîîse inekaremekîꞌpî Jesus pîꞌ man innape, tamîꞌnawîrî.
42 Miarî arinîkonya ikupîꞌpî innape.
