Jesus Cristo Yekare João Nîmenukaꞌpî 11:1-57
11 Warayoꞌ wanîꞌpî priꞌya pra, iteseꞌ Lázaro. Mîîkîrî koꞌmamîꞌpî Betânia pata po, manniꞌ Maria, Marta koꞌmantoꞌ yaꞌ.
2 Manniꞌ Maria itenaru, mîîkîrî Jesus puu karapaimatîpon karaꞌ ke moropai iꞌpu yaꞌmananîpîꞌpîiya tîpuꞌpai siꞌpo ke. Mîîkîrî pii enasaꞌ wanîꞌpî priꞌya pra.
3 Lázaro yenaruꞌtononya tîmaimukon yarimaꞌpî Jesus pia. —Anna yepotorî, toneꞌ anna pii man priꞌya pra, aniꞌnînma manniꞌ —kaiꞌma tîmaimukon yarimaꞌpî toꞌya.
4 Jesus pia itekare yarîꞌpî toꞌya. Mîrîrî eta tîuya pe Jesusya taꞌpî tînenupaꞌsan pîꞌ: —Aasaꞌmantatoꞌpe eeseparantîsaꞌ pepîn mîrîrî. Eeseparantîsaꞌ meruntî ke Paapa wanî epuꞌtoꞌpe tamîꞌnawîronkonya, moropai morî pe puꞌkuru inmu wanî epuꞌtoꞌpe toꞌya nîrî.
5 Kureꞌne Lázaro pînînmaꞌpî Jesusya. Moropai itenaruꞌtonon pînînmaꞌpîiya nîrî, Marta moropai itakon.
6 Priꞌya pra Lázaro wanî yekare eta tîpo, Jesus koꞌmamîꞌpî asakîꞌne wei.
7 Mîrîrî tîpo tînenupaꞌsan pîꞌ taꞌpîiya: —Aaseꞌnîkon see Judéia pata pona inîꞌrî.
8 Mîrîrî pîꞌ inenupaꞌsanya taꞌpî: —Anna yenupanen, amen awî yuꞌse Judeuyamîꞌ esanon wanîꞌpî tîꞌ ke Judéia po. Inîꞌrî itîîpai awanî kaꞌrî toꞌ koreꞌta?
9 Panton pe toꞌ maimu yuukuꞌpî Jesusya. Taꞌpîiya: —Aꞌka pe awanî wei epaꞌka pata pai eewomî pîkîrî. Aꞌka pe awanî tanne asanî ya atareꞌmon pepîn.
10 Ewaron yaꞌ pata eraꞌma pepîn uweiyukon ton pra awanî ya —taꞌpîiya.
11 Mîrîrî taa tîpo inîꞌrî Jesusya taꞌpî toꞌ pîꞌ: —Uyonpakon Lázaro weꞌnannî pîꞌ man, tîîse iipia uutî ikurantanîꞌse.
12 Inenupaꞌsanya taꞌpî: —Uyepotorî, morî pe iweꞌnasaꞌ ya, eesepiꞌtî piaꞌtîsaꞌ mîrîrî.
13 Lázaro erîꞌkapî kaiꞌma toꞌ esenumenkasaꞌ mîrîrî, tîîse Lázaro saꞌmantasaꞌ pîꞌ Jesus eseurîma kinî tanne.
14 Mîrîrî yeꞌnen aronne Jesusya taꞌpî toꞌ pîꞌ: —Lázaro saꞌmantasaꞌ man.
15 Uwakîri pe iipia eꞌsaꞌ pra wai, mîrîrî wenai inîꞌ panpîꞌ innape ukupîyaꞌnîkon kupî sîrîrî. Iipia wîtînpaiꞌnîkon. Aaseꞌnîkon see —taꞌpîiya.
16 Moropai Tomé tiaron iteseꞌ monoiꞌya taꞌpî tonpayamîꞌ pîꞌ: —Aaseꞌnîkon see ipîkîrî saꞌmantai wîtîn ipokonpe —taꞌpîiya.
Eꞌmîꞌsaꞌkantoꞌpe Moropai Enen Koꞌmannîtoꞌpe Jesus Wanî
17 Toꞌ wîtîꞌpî. Moropai toꞌ erepamîꞌpî Betânia pona. Aasîrî Lázaro nurîꞌtî yuꞌnaꞌtîsaꞌ toꞌya wanîꞌpî asakîrîrî wei kaisarî.
18 Aminke pra Betânia wanîꞌpî Jerusalém cidaderî pîꞌ, 3 km. kaisarî.
19 Mîrîrî yeꞌnen arinîkon Judeuyamîꞌ wîtîꞌpî Marta, Maria pia toꞌ pîikaꞌtîi, toꞌ pirankon saꞌmantasaꞌ yeꞌnen.
20 Jesus erepansaꞌ yekare eta tîuya pe Marta epaꞌkaꞌpî iipia. Tîîse Maria eꞌnîmîꞌpî wîttî ta.
21 Taꞌpî Martaya Jesus pîꞌ: —Uyenupanen, tarî aweꞌsaꞌ ya, piipiꞌ saꞌmantaꞌpî pepîn eꞌpainon.
22 Mîrîrî epuꞌtî pîꞌ wai, sîrîrî puꞌkuru îꞌ rî esatîya ya Paapa pîꞌ itîrîiya —taꞌpîiya.
23 Jesusya taꞌpî ipîꞌ: —Api eꞌmîꞌsaꞌka pe man.
24 Martaya taꞌpî: —Epuꞌtî pîꞌ wai. Tiwinanoꞌpî wei yai, isaꞌmantaꞌsan koreꞌtapai apemonkonoyamîꞌ eꞌmîꞌsaꞌka yai, piipiꞌ nîrî eꞌmîꞌsaꞌka.
25 Jesusya taꞌpî: —Uurî eꞌmîꞌsaꞌkantoꞌ moropai enen koꞌmannîtoꞌ. Innape ukuꞌnen saꞌmantasaꞌ ya, mîîkîrî ennapamî.
26 Moropai enenankon innape ukuꞌnenan koꞌmamî enen ipatîkarî. Innape awanî epuꞌtî pîꞌ nan? —taꞌpî Jesusya ipîꞌ.
27 —Inna uyepotorî —taꞌpîiya. —Paapa nîmenkaꞌpî amîrî. Paapa munmu amîrî, manniꞌ kaꞌ poi aaipî ton tarîwaya. Innape akupî pîꞌ wai —taꞌpîiya.
Jesus Karau
28 Mîrîrî taa tîpo awennaꞌpoꞌpî wîttî ta takon Maria yannoi. Taꞌpîiya Maria pîꞌ: —Uyenupanenkon erepannî pîꞌ man. Ayanno pîꞌ man —taꞌpîiya ipîꞌ amaꞌ pe, tiaronkonya eta namaiꞌma.
29 Mîrîrî eta tîuya pe Maria epaꞌkaꞌpî kaꞌneꞌ pe Jesus pia.
30 Poro po Jesus wanîꞌpî aminke mararî toꞌ koꞌmantoꞌ pîꞌ, Marta yarakkîrî teeseporîꞌpî pataꞌ.
31 Kaꞌneꞌ pe Maria epaꞌka eraꞌma tîuyaꞌnîkon pe Judeuyamîꞌ iipia ereutaꞌsan ipîikaꞌtînenan pe wîtîꞌpî ipîkîrî. —Aꞌkî —taꞌpî toꞌya, —Uuruwai pona attî moro esewankonoꞌmai ikarunse.
32 Jesus pia teerepamî pe Maria esenumîꞌpî. Moropai taꞌpîiya: —Uyepotorî, tarî aweꞌsaꞌ ya, piipiꞌ saꞌmantaꞌpî pepîn eꞌpainon. Ikarawaꞌpî.
33 Maria moropai Judeuyamîꞌ Maria yarakkîronkon karau eraꞌma tîuya pe Jesus esewankonoꞌmaꞌpî tewan ya. Kureꞌne eesewankonoꞌmaꞌpî.
34 Taꞌpîiya toꞌ pîꞌ: —Oꞌnon pata yuꞌnaꞌtîꞌpîyaꞌnîkon? Aase eraꞌmapîꞌse, Uyepotorî —taꞌpî toꞌya ipîꞌ.
35 Jesus karawaꞌpî.
36 Mîrîrî pîꞌ Judeuyamîꞌya taꞌpî: —Aꞌkî, kureꞌne isaꞌmantaꞌpî pînînmaiya eraꞌmakî.
37 Tîîse tiaronkonya taꞌpî: —Enkaruꞌnan yenu konekatîpon mîserî warayoꞌ. Îꞌ waniꞌ awanî yeꞌnen isaꞌmantaꞌpî pîikaꞌtîiya pra awanîꞌpî mîrîrî?
Lázaro Eꞌmîꞌsaꞌka
38 Inîꞌrî Jesus esewankonoꞌmaꞌpî tewan yaꞌ. Eerepamîꞌpî uuruwai pia. Aꞌta pe awanîꞌpî tîꞌ yai moropai itettapuru wanîꞌpî tîꞌ pe.
39 Jesusya taꞌpî: —Itettapuru moꞌkatî. Isaꞌmantaꞌpî yenaru Martaya taꞌpî: —Uyepotorî, ikî pe aakatasaꞌ sîrîrî. Asakîrîrî wei kaisarî aakoꞌmansaꞌ —taꞌpîiya.
40 Jesusya taꞌpî ipîꞌ: —Aasîrî taa pîꞌ wai apîꞌ innape ukupîya ya, Paapa meruntîri eraꞌmaya, innape nai?
41 Mîrîrî uuruwai yettapurîkaꞌpî toꞌya. Moropai kaꞌ teraꞌma yeꞌka pe Jesus epîremaꞌpî. —Paapa —taꞌpîiya, —Uwakîri pe umaimu eta pîꞌ nai.
42 Tîwîrî rî umaimu etanen amîrî. Epuꞌtî pîꞌ wai. Tîîse uwoi toꞌ mannan wanî epuꞌtî toꞌya pra. Anarimaꞌpî pe wanî epuꞌtoꞌpe toꞌya, taa pîꞌ wai apîꞌ.
43 Mîrîrî taa tîpo, awentaimeꞌpî aronne: —Lázaro, epaꞌkakî.
44 Mîrîrîya isaꞌmantaꞌpî epaꞌkaꞌpî satippe. Yaironpîꞌsaꞌ pe awanîꞌpî, itenya moropai iꞌpu pîkîrî, isaꞌmantaꞌpî yairontoꞌ kamisa ke. Itenpata yettapusaꞌ wanîꞌpî nîrî kamisa ke. Jesusya taꞌpî: —Yeukatî. Moropai yeukaꞌpî toꞌya.
Jesus Wîî Yuꞌse Judeuyamîꞌ Wanî
45 Arinîkon Judeuyamîꞌ Maria pia iipîꞌsanya Jesus nîkonekaꞌpî eraꞌmaꞌpî. Mîrîrî wenai innape ikupîꞌpî toꞌya.
46 Tîîse tiaronkon epaꞌkaꞌpî. Fariseuyamîꞌ pia toꞌ wîtîꞌpî. Jesus nîkonekaꞌpî ekaremekîꞌpî toꞌya fariseuyamîꞌ pîꞌ.
47 Fariseuyamîꞌ moropai teepîremasanon esanon eperepîꞌpî Judeuyamîꞌ panamanenan yarakkîrî Jesus pîꞌ eseurîmai. Taꞌpî toꞌya: —Oꞌnon yeꞌka pe ikupî eserîkan pepîn kuꞌsaꞌ Jesusya.
48 Tîwî ikupî ya tamîꞌnawîronkonya innape ikupî tesaꞌkon pe. Moropai mîrîrî wenai Romanoyamîꞌ iipî. Umeruntîrikon moꞌka toꞌya. Epîremantoꞌ yewîꞌ soroka toꞌya. Moropai upemonkonokon moꞌka toꞌya. Îꞌ kupî eꞌpai awanî? —taꞌpî toꞌya.
49 Moropai Caifás eseurîmaꞌpî. Mîîkîrî wanîꞌpî teepîremasanon esanon yepotorî pe mîrîrî konoꞌ pîꞌ. Mîîkîrî eseurîmaꞌpî: —Epuꞌnenan pepîn amîrîꞌnîkon —taꞌpîiya.
50 —Eesenumenkasaꞌkon pra naatîi. Jesus saꞌmanta eꞌpai man. Tiwinan saꞌmanta eꞌpai awanî tamîꞌnawîronkon ton pe, Romanoyamîꞌya utîꞌkakon namai iwenai.
51 Tîîwarîrî teeseurîma kaiꞌma eesenumenkaꞌpî. Tîîse teepîremasanon esanon yepotorî pe awanî yeꞌnen, Paapaya tîmaimu tîrîꞌpî mîrîrî iipia. Tamîꞌnawîronkon Judeuyamîꞌ ton pe Jesus saꞌmanta kupî ekaremekîꞌpîiya mîrîrî.
52 Moropai teken Judeuyamîꞌ ton pe aasaꞌmanta pepîn mîrîrî, tîîse pata kaisaronkon ton pe. Paapa munkî pe tîweꞌsanon eꞌparaipîkaꞌsan muurukuntî Jesusya kupî sîrîrî, tîîpia tiwinan warantî toꞌ eꞌtoꞌpe.
53 Moropai mîrîrî warantî Caifás eseurîma tîpo, Judeuyamîꞌ esekaꞌnunkaꞌpî Jesus wîî yuꞌse.
54 Mîrîrî epuꞌtî tîuya yeꞌnen Jesus asarî pra eenaꞌpî aronne Judeuyamîꞌ koreꞌta. Attîꞌpî Jerusalém poi keren rîꞌpîkîron pata pona iteseꞌ Efraim. Moro aakoꞌmamîꞌpî tînenupaꞌsan pokonpe.
55 Judeuyamîꞌ epereꞌtoꞌ weiyu wanîꞌpî aminke pra, iteseꞌ Páscoa. Mîrîrî pîꞌ enpen tîwanîkon yeꞌnen arinîkon wîtîꞌpî Jerusalém pona irawîrî ikonekai, Moisés nurîꞌtîya yenupantoꞌ yawîrî. Imakuiꞌpî pe teenasaꞌkon yeꞌnen toꞌ wîtîꞌpî eꞌronai teserukon yawîrî.
56 Jesus yuwaꞌpî toꞌya moro, tîîse eporî toꞌya pra awanîꞌpî. Ipîꞌ toꞌ eseurîmaꞌpî. —Aaipî pepîn kaꞌrî —kaiꞌma toꞌ eseurîmaꞌpî.
57 Fariseuyamîꞌ moropai teepîremasanon esanonya tîmaimukon yenpaꞌkaꞌpî. Oꞌnon pata Jesus koꞌmamî epuꞌnen wanî ya, ekaremeꞌtoꞌpeiya, yapisîkonpa kaiꞌma.
