Jesus Cristo Yekare João Nîmenukaꞌpî 12:1-50
12 Tiwin miaꞌ pona tîîmoꞌtai wei kaisarî Páscoa weiyu rawîrî, Jesus wîtîꞌpî Betânia pona Lázaro koꞌmantoꞌ yaꞌ. Manniꞌ isaꞌmantaꞌpî pîmîꞌsaꞌkaꞌpî tîuya koꞌmantoꞌ yaꞌ attîꞌpî.
2 Entamoꞌkantoꞌ konekaꞌpî toꞌya moro Jesus ton pe. Marta esenyakaꞌmaꞌpî toꞌ yekkari ton pîꞌ moropai Lázaro ereutaꞌpî tiaronkon pokonpe Jesus pia.
3 Mariaya karaꞌ yapisîꞌpî, morî epeꞌke iteseꞌ nardo. Jesus puu karapaimaꞌpîiya mîrîrî ke. Mîrîrî tîpo iꞌpu yaꞌmananîpîꞌpîiya tîpuꞌpai siꞌpo ke. Ipîra karaꞌpî kin aꞌpusin pe awanîꞌpî wîttî ta pîꞌ.
4 Mîrîrî pîꞌ inenupaꞌpî iteseꞌ Judas Iscariotes eseurîmaꞌpî. Teyatonkon pîꞌ Jesus ekaremekîton mîîkîrî. Mîîkîrî eseurîmaꞌpî.
5 —Îꞌ waniꞌ awanî yeꞌnen mîrîrî karaꞌ ke aweꞌrepa pra awanî? —taꞌpîiya. —Kureꞌne tîniru, tiwin konoꞌ kaisarî esenyakaꞌman yepeꞌ kaisarî yeꞌmaꞌpî toꞌya eꞌpainon tîniru ke. Mîrîrî tîîpîtî eꞌpainon îꞌ ton pînon pia —taꞌpîiya.
6 Tîîse iseruku mîrîrî. Îꞌ ton pînon pîꞌ eesenumenka pepîn. Tîmîrî ton pe ituꞌse awanîꞌpî maasa pra amaꞌyeꞌ pe tîwanî yeꞌnen. Jesus nenupaꞌsan tînirurî yenseꞌ yaanen pe tîweꞌsen pe tîwanî yeꞌnen imoꞌkapîtîꞌpîiya.
7 —Tîwî Maria nîsi —taꞌpî Jesusya. —Uusaꞌmanta kupî sîrîrî. Mîrîrî ton pe ukarapaimasaiꞌya mîrîrî.
8 Îꞌ ton pînon man arinîke puꞌkuru. Sîrîrî non po toꞌ eꞌtîꞌka pepîn tamîꞌnawîrî. Tîîse uurî, uutî kupî sîrîrî aapiapaiꞌnîkon —taꞌpî Jesusya.
Lázaro Wîî Yuꞌse Judeuyamîꞌ Wanî
9 Betânia po Jesus wanî epuꞌtîꞌpî arinîkon Judeuyamîꞌya. Mîrîrî yeꞌnen toꞌ wîtîꞌpî Jesus eraꞌmapîꞌse moropai isaꞌmantaꞌpî eꞌmîꞌsaꞌkasaꞌ pîꞌ esenumenkai.
10 Mîrîrî yeꞌnen teepîremasanon esanon wanîꞌpî Lázaro wîî yuꞌse.
11 Maasa pra iwenai arinîkon Judeuyamîꞌya Jesus kupîꞌpî innape epuꞌtî tîuyaꞌnîkon yeꞌnen.
Jerusalém Ta Jesus Ewomî
12 Arinîkon pemonkonyamîꞌ epereꞌsaꞌ wanîꞌpî festa pîꞌ tîwanîkonpa kaiꞌma Jerusalém pona. Jesus iipî epuꞌtî tîuyaꞌnîkon pe iponaya toꞌ wîtîꞌpî.
13 Yuꞌ yare maripa yeꞌ warainon yarîꞌpî toꞌya. Aaipî eraꞌma tîuyaꞌnîkon pe toꞌ entaimepîtî piaꞌtîꞌpî.—Morî pe man —taa piaꞌtîꞌpî toꞌya.—Morî mîserî, yepuru wanî,Paapa uyepotorîkon naipontîꞌpî,Israel ponkon yepotorî pe,
—taapîtîꞌpî toꞌya.
14 Moropai Jesusya tekîn ton yeporîꞌpî jumenta more. Ipona eenukuꞌpî, Paapa maimu eꞌmenukasaꞌ yawîrî.
15 See warantî aweꞌmenukasaꞌ wanîꞌpî:Teesiꞌnîꞌse pra eꞌtî,Paapa pemonkonoyamîꞌ Sião ponkon,aꞌkî, ayesaꞌkon iipî pe manjumenta more popenaronkon ayesaꞌkon reiyamîꞌ warantî
kaiꞌma Paapa maimu eꞌmenukasaꞌ wanîꞌpî.
16 Tîîse mîrîrî yawîrî Jesus wanî epuꞌtî inenupaꞌsanya pra awanîꞌpî. Jesus saꞌmantaꞌpî moropai aweꞌmîꞌsaꞌkasaꞌ tîpo neken toꞌ enpenataꞌpî penaronkon nekaremekîꞌpî pîꞌ. Moropai mîrîrî yai neken innape mîrîrî yawîrî Jesus wanîꞌpî epuꞌtîꞌpî toꞌya.
17 Moropai arinîkon pemonkonyamîꞌ, manniꞌkan isaꞌmantaꞌpî Lázaro pîmîꞌsaꞌka Jesusya eraꞌmaꞌtîponkon eseurîma koꞌmannîpîꞌpî inkonekaꞌpî pîꞌ.
18 Mîrîrî wenai tiaronkon epaꞌkaꞌpî Jerusalém yapai Jesus epose isaꞌmantaꞌpî pemonkon pîmîꞌsaꞌkasaiꞌya etasaꞌ tîuyaꞌnîkon yeꞌnen. Arinîke toꞌ wanîꞌpî.
19 Moropai mîrîrî pîꞌ fariseuyamîꞌ esenumenkaꞌpî tonpayamîꞌ pokonpe. —Aꞌkî, îꞌ kuꞌsaꞌ pra man —taꞌpî toꞌya. —Tamîꞌnawîronkon wîtîn pîꞌ man iipia, uurîꞌnîkon ton pra. Moropai innape ikuꞌsaꞌ toꞌya mîrîrî —taꞌpî toꞌya.
Gregoyamîꞌ Wanî Jesus Aneraꞌmapai
20 Judeuyamîꞌ festarî pîꞌ tîwanîkonpa tiaronkon gregoyamîꞌ iiꞌsaꞌ wanîꞌpî Jerusalém pona nîrî Judeuyamîꞌ yarakkîrî.
21 Insanan wîtîꞌpî eseurîmai Filipe yarakkîrî. Mîîkîrî Filipe wanîꞌpî Galiléia pata yawon Betsaida cidaderî poinon. Mîîkîrî pia toꞌ wîtîꞌpî. —Jesus aneraꞌmapai anna wanî —taꞌpî toꞌya.
22 Toꞌ nesatîꞌpî ekaremekîꞌpî Filipeya André pîꞌ moropai saꞌnîrî toꞌ wîtîꞌpî ekaremeꞌse Jesus pîꞌ.
23 Moropai Jesusya taꞌpî toꞌ pîꞌ: —Inna, maasa pra uweiyu erepansaꞌ man. Uurî kaꞌ poi iipîꞌpî pemonkon pe yapurî Judeuyamîꞌ pepînya kupî sîrîrî. Maasa pra ipîkku pe Paapaya uyenpo kupî sîrîrî.
24 Ayenkuꞌtîuya pepîn. Trigo yenaꞌpî yuꞌnaꞌtîsaꞌ pra awanî ya, tiwinsarî aakoꞌmamî. Tîîse yuꞌnaꞌtîsaꞌ ya, moropai ipiꞌpî katasaꞌ ya, moropai aaroꞌtasaꞌ ya, kureꞌne itîrîiya eꞌpainon.
25 Mîrîrî warantî sîrîrî non po koꞌmannîtoꞌ pînînma ya tîwîrî eꞌtîꞌkan. Tîîse sîrîrî non po koꞌmannîtoꞌ tiꞌnînmai pra kaꞌ po ipatîkarî koꞌmannîtoꞌ eporî kupî sîrîrî.
26 Upoitîrî pe eꞌpai anîꞌ wanî ya, uwenairî aaipî eꞌpai awanî. Uukoꞌmantoꞌ yaꞌ upoitîrî koꞌmamî nîrî. Upoitîrî pe anîꞌ esenyakaꞌmasaꞌ ya, uyunya nîrî yapurî —taꞌpî Jesusya.
Tîîsaꞌmanta Ekaremekî Jesusya
27 Jesus eseurîma koꞌmannîpîꞌpî: —Uyekaton esewankonoꞌman pîꞌ man. Îꞌ tauya eꞌpainon? Paapa, umoꞌkakî eꞌtarumaꞌtîtoꞌ winîpai tauya pepîn maasa pra sîrîrî warantî eꞌtarumaꞌtîi iipîꞌpî uurî.
28 Paapa, ayeseꞌ yapurîtoꞌpe tamîꞌnawîronkonya ikuꞌkî —taꞌpî Jesusya. Moropai mai esetaꞌpî kaꞌ poi. —Aasîrî morî pe uyeseꞌ yapurî toꞌya awenai moropai inîꞌ panpîꞌ yapurîtoꞌpe toꞌya ikupîuya pe wai —taꞌpî maiya.
29 Moropai arinîkon Jesus piawonkonya etaꞌpî mai eseurîma. Mîrîrî yeꞌnen tiaronkonya taꞌpî: —Waraꞌnapi pe man. Moropai tiaronkonya taꞌpî: —Inserî eseurîman pîꞌ man yarakkîrî.
30 Jesusya taꞌpî toꞌ pîꞌ: —Uurî wenai Paapa eseurîmasaꞌ pra man, tîîse eeseurîmasaꞌ amîrîꞌnîkon ton pe innape ukupîkonpa.
31 Sîrîrî non po tîîkoꞌmansenon yeseru imakuiꞌpî pe tarumaꞌtîtoꞌ weiyu erepansaꞌ man. Moropai sîrîrî imakuiꞌpî yepotorî yenpaꞌka Paapaya pe man.
32 Pakîꞌnan pona uꞌmîꞌsaꞌka toꞌya pe man tîpokapîꞌse moropai mîrîrî wenai uupia tamîꞌnawîronkon enepîuya —taꞌpîiya.
33 Oꞌnon yeꞌka pe tîwî toꞌya ekaremekîiya mîrîrî.
34 Tiaronkonya taꞌpî ipîꞌ: —Paapa kaaretarî po eeseporî ipatîkarî Cristo koꞌmamî kaiꞌma. Tîîse amîrîya taa, “Uurî kaꞌ poi iipîꞌpî pemonkon pe saꞌmanta kupî sîrîrî pakîꞌnan po”. Anîꞌ see amîrî, moriya? —taꞌpî toꞌya ipîꞌ.
35 Jesusya taꞌpî toꞌ pîꞌ: —Aꞌkaya ayeꞌmarîkon weiyuꞌma koꞌmannîpî mararî. Innape ikuꞌkî sîrîrî ewaron yaꞌ, aatakaꞌmakon namai. Ewaron yaꞌ eenakon ya, oꞌnon pata attîkon epuꞌtîyaꞌnîkon pepîn.
36 Tarî wanî tanne aweiyuꞌmanenkon pe innape ukuꞌtî upemonkono pe awanîkonpa, aꞌka ta tîîkoꞌmansenon pe awanîkonpa, Paapa epuꞌnenan pe.
Mîrîrî taa yaretîꞌka tîuya pe, Jesus wîtîꞌpî toꞌ piapai moropai eesenomîꞌpî.
37 Tamîꞌnawîrî mîrîrî ekoneka eserîkan pepîn konekaꞌpîiya toꞌ neraꞌmakon tonpe. Mîîwîni tîîse innape ikupî toꞌya pra awanîꞌpî.
38 Mîrîrî warantî awanîꞌpî Isaías nurîꞌtî nîmenukaꞌpî yawîrî. Pena Isaías nurîꞌtîya taꞌpî:Uyepotorî, anîꞌya innape unekaremekîꞌpîkon kuꞌsaꞌ pra man.Tîmeruntîri yenposaꞌ Paapaya,tîîse ikupî toꞌya pra man innape
taꞌpîiya.
39 Innape ikupî toꞌya eserîke pra awanîꞌpî. Maasa pra Paapaya toꞌ yenu yenkaruꞌnannîpîꞌpî Isaías nurîꞌtîya taꞌpî yawîrî.
40 Paapaya toꞌ yenu yenkaruꞌnannîpîꞌpî.Moropai toꞌ yewan saꞌmannîꞌsaiꞌya.Mîrîrî kupîꞌpîiya eraꞌma toꞌya namai tenukon ke.Moropai epuꞌtî toꞌya namai tewankon yaꞌ.Moropai imakuiꞌpî poi toꞌ eraꞌtî namaimoropai toꞌ yepiꞌtîuya pepîn.
taꞌpîiya.
41 Mîrîrî warantî Isaías nurîꞌtî eseurîmaꞌpî maasa pra ipîkku pe Cristo eꞌtoꞌ yenpoꞌpî Paapaya ipîꞌ. Jesus Cristo pîꞌ eeseurîmaꞌpî pena.
42 Mîîwîni tîîse arinîkon Judeuyamîꞌ esanonya innape Jesus kupîꞌpî Paapa nîmenkaꞌpî pe awanî. Tîîse aronne toꞌ esekaremekî pra awanîꞌpî fariseuyamîꞌya tenpaꞌkakon namai, teepereꞌtoꞌkon yewîꞌ tapai.
43 Maasa pra tonpakonya tapurîkon yuꞌse toꞌ wanîꞌpî Paapaya tapurîkon yuꞌse tîwanîkon yentai.
44 Moropai Jesus entaimeꞌpî: —Innape ukuꞌnen wanî ya, uyarimatîpon kupîiya nîrî innape.
45 Uyeraꞌmaiya ya, uyarimatîpon eraꞌmaiya nîrî.
46 Pemonkonyamîꞌ weiyuꞌmanen pe uuiꞌsaꞌ sîrîrî non pona Paapa epuꞌtoꞌpe toꞌya. Moropai innape ukuꞌnen koꞌmamî namai ewaron ta, Paapa tepuꞌse pra uuiꞌsaꞌ sîrîrî.
47 Umaimu etanen wanî ya, yawîrî pra aakoꞌmamî tîîse, mîîkîrî yenumîuya pepîn. Maasa pra pemonkonyamîꞌ tarumaꞌtîi uuiꞌsaꞌ pra wai, tîîse toꞌ pîikaꞌtîi uuipîꞌpî.
48 Tîîse anîꞌya taasaꞌ ya, ayuꞌse pra wai, moropai umaimu kupîiya pra wanî ya innape, yapisîiya pra awanî ya, tarumaꞌtîton moro man. Mîrîrî wanî umaimu, eseurîmaꞌpî manniꞌya tarumaꞌtî pe man tiwinanoꞌpî wei yai.
49 Uuwarîrî eseurîmasaꞌ pra wai. Paapa, uyarimatîponya upanamaꞌpî. “See warantî neken meseurîmai” taꞌpîiya upîꞌ.
50 Moropai epuꞌtî pîꞌ wai imaimuya ipatîkarî pemonkon koꞌmantoꞌ ton ekaremekî. Mîrîrî yeꞌnen eseurîma ya, Paapa nekaremekîꞌpî neken upîꞌ ekaremekîuya.
