Jesus Cristo Yekare João Nîmenukaꞌpî 13:1-38
13 Moropai entamoꞌkantoꞌ rawîrî Páscoa iteseꞌ Jesusya tîweiyu erepansaꞌ epuꞌtîꞌpî. Sîrîrî non poi tuutî Paapa pia epuꞌtîꞌpîiya. Tîpemonkonoyamîꞌ sîrîrî non ponkon saꞌnamaꞌpîtîꞌpîiya moropai sîrîrî îꞌ kaiꞌma inkamoro saꞌnama tîuya yenpoꞌpîiya tîîsaꞌmanta pîkîrî.
2 Jesus wanîꞌpî tînenupaꞌsan pokonpe entamoꞌkantoꞌ pîꞌ. Makuiya teesenumenkatoꞌ tîîsaꞌ wanîꞌpî Judas pia, Simão Iscariotes munmu pia. Teyatonon pîꞌ Jesus ekaremekî pîꞌ eesenumenka emapuꞌtîꞌpî Makuiya.
3 Moropai Jesusya epuꞌtîꞌpî tunya tamîꞌnawîron rumakasaꞌ tenyaꞌ. Moropai tuipîꞌpî Paapa piapai epuꞌtîꞌpîiya. Paapa pia tîwennaꞌpo kupî epuꞌtîꞌpîiya.
4 Tamîꞌnawîrî mîrîrî epuꞌtî tîuya pe Jesus eꞌmîꞌsaꞌkaꞌpî, tîpon moꞌkaꞌpîiya, moropai taꞌsan yewaꞌtîꞌpîiya.
5 Mîrîrî tîpo tuna kamoꞌpîiya pisa yaꞌ moropai tînenupaꞌsan puu rona piaꞌtîꞌpîiya moropai yaꞌmananîpîꞌpîiya taꞌsan yewaꞌtîsaꞌ ke.
6 Moropai Simão Pedro pia eerepansaꞌ ya, Pedroya taꞌpî ipîꞌ: —Uyepotorî, uꞌpu ronaya mîrîrî?
7 Jesusya yuukuꞌpî: —Unkupî epuꞌtîya pra awanî sîrîrî tîîse maasa epuꞌtîya.
8 Pedroya taꞌpî: —Kane, kane, amîrîya uꞌpu ronaya eꞌpai pra man —taꞌpîiya. —Aꞌpu ronauya tîrîya pra awanî ya, upemonkono pe awanî pepîn tarîpai —taꞌpî Jesusya.
9 Mîrîrî pîꞌ Simão Pedroya taꞌpî: —Uyepotorî, moriya uꞌpu neken kîꞌronai tîîse uyenya, upuꞌpai nîrî ronakî.
10 Jesusya taꞌpî: —Tîweꞌpîsen wanî nura pe pra, inîꞌrî aweꞌpî pepîn tîꞌpu neken ronaiya. Amîrîꞌnîkon wanî eꞌpîsanon warantî morî pe, nura pe pra, tîîse tiwinan man imakuiꞌpî pe.
11 (Jesusya epuꞌtîꞌpî anîꞌya tekaremekî teyatonon pîꞌ. Mîrîrî yeꞌnen taꞌpîiya mîrîrî tiwinan man imakuiꞌpî pe.)
12 Jesusya toꞌ puu rona tîpo, tîpon yekaꞌmaꞌpîiya moropai eereutaꞌpî inîꞌrî tîpataꞌpî yaꞌ. Moropai toꞌ pîꞌ taꞌpîiya: —Îꞌ kuꞌsauꞌya apîꞌnîkon epuꞌtî pîꞌ naatî? —taꞌpîiya.
13 —Anna yenupanen, anna yepotorî taa pîꞌ naatîi upîꞌ. Yairî man maasa pra ayepotorîkon pe wanî.
14 Tîîse uurîya, ayepotorîkonya, ayenupanenkonya aꞌpukon rona pîꞌ man. Mîrîrî warantî ayonpakon puu ronayaꞌnîkon eꞌpai awanî.
15 Aneraꞌmatonkon tîrî pîꞌ wai aapiaꞌnîkon, ikuꞌsauꞌya warantî ikupîkonpa, ayonpakon yarakkîrî.
16 Ayenkuꞌtîuya pepîn, ipoitîrî wanî pepîn tîkaraiwarî yentai. Moropai inarimaꞌpî wanî pepîn tarimaꞌtîpon yentai.
17 Mîrîrî epuꞌtî pîꞌ naatîi tarîpai. Mîrîrî yawîrî ikupîyaꞌnîkon ya, taatausinpai aakoꞌmamîkon.
Jesusya Teeyatonon Yenyaꞌ Tîrumakatîpon Ekaremekî
18 Tamîꞌnawîronkon amîrîꞌnîkon pîꞌ eseurîma pra wai. Unmenkaꞌsan epuꞌtî pîꞌ wai. Tîîse Paapa kaaretarî eꞌmenukasaꞌ yairî eꞌpai awanî. See warantî aweꞌmenukasaꞌ:Warayoꞌ uyarakkîrî tekkari enapîtîpon enasaꞌ uyeyaton pe.
Mîrîrî warantî aweꞌmenukasaꞌ mîrîrî.
19 —Mîrîrî ekaremekîuya sîrîrî apîꞌnîkon aweꞌkupî pra tîîse. Aweꞌkuꞌsaꞌ ya, innape ukupîkonpa anîꞌ pe wanî taꞌpîuya manniꞌ.
20 Yairî tauya sîrîrî. Morî pe anîꞌ unarimaꞌpî yapisîtîpon wanî ya, uurî puꞌkuru yapisîiya moropai uyapisîtîponya uyarimaꞌtîpon yapisî nîrî.
21 Mîrîrî taa tîpo, kureꞌne Jesus esewankonoꞌmaꞌpî moropai aronne taꞌpîiya: —Innape taa pîꞌ wai. Tiwinan amîrîꞌnîkon koreꞌtawonya uyekaremekî kupî sîrîrî uyeyatontonon pîꞌ.
22 Mîrîrî pîꞌ inenupaꞌsan eseraꞌmaꞌpî, anîꞌ pîꞌ taiya epuꞌtî toꞌya pra awanîꞌpî. Mîrîrî pîꞌ toꞌ esenumenkaꞌpî kureꞌne.
23 Tiwin inenupaꞌpî Jesus nîsaꞌnama ereutasaꞌ wanîꞌpî Jesus pia.
24 Mîîkîrî pîꞌ Simão Pedro esenpinîkuꞌpî, anîꞌ pe awanî ekaremeꞌtoꞌpe Jesusya.
25 Mîrîrî yeꞌnen aminke pra aweꞌrennukuꞌpî Jesus pia moropai taꞌpîiya: —Uyepotorî, anîꞌ pe nai? —taꞌpîiya.
26 Jesusya yuukuꞌpî: —Manniꞌ uyu kipîuya moropai iipia tîrîuya, mîîkîrî —taꞌpîiya. Moropai tiyu yapisîꞌpîiya moropai ikipîꞌpîiya tuma ka, itîrîꞌpîiya Judas pia, Simão Iscariotes munmu pia.
27 Moropai Judasya yapisîꞌpî. Mîrîrî yapisîiya tanne Makui ewomîꞌpî yaꞌ. Jesusya taꞌpî Judas pîꞌ: —Ankoneka konekata teesemiꞌtapai.
28 Tiaronkon iipiawonkonya epuꞌtî pra awanîꞌpî, îꞌ taiya pe awanî epuꞌtî toꞌya pra.
29 Tiaronkon esenumenkaꞌpî. Jesus moropai ipemonkonoyamîꞌ tînirurî yenseꞌ yaanen pe Judas wanî epuꞌtîꞌpî toꞌya. Mîrîrî yeꞌnen Jesusya ekaremekîꞌpî attîtoꞌpe festa yemanne ton yennai ou îꞌ ton pînon pia tîniru tîîtoꞌpeiya kaiꞌma tiaronkon esenumenkaꞌpî.
30 Moropai tiyu yapisî tîpo, Judas epaꞌkaꞌpî kaꞌneꞌ pe toꞌ koreꞌtapai. Moropai ewaron pe awanîꞌpî.
Amenan Unkupîkon Ton Ekaremekî Jesusya
31 Judas epaꞌka pe, Jesusya taꞌpî: —Tarîpai kaꞌ poi iipîꞌpî pemonkon pe, uurî yapurî pîꞌ pemonkonyamîꞌ man. Moropai Paapa yapurî pîꞌ pemonkonyamîꞌ man uurî wenai.
32 Moropai Paapa yapurî toꞌya ya, uurî ekaremekî Paapaya tamîꞌnawîronkon pîꞌ, morî pe wanî ekaremekîiya kupî sîrîrî tîîwarîrî.
33 Unmukuyamîꞌ, aapiaꞌnîkon tîkoꞌman pe uukoꞌmamî pepîn. Uyuwayaꞌnîkon kupî sîrîrî, tîîse tauya apîꞌnîkon. Judeuyamîꞌ esanon pîꞌ unekaremekîꞌpî, mîrîrî ekaremekîuya sîrîrî apîꞌnîkon. Oꞌnon pata uutî ya, attîkon eserîke pra awanî.
34 Moropai amenan ankupîkon ton ekaremekîuya sîrîrî. Ayonpakon saꞌnamatî. Asaꞌnamaꞌpîuyaꞌnîkon warantî toꞌ saꞌnamatî.
35 Ayonpakon saꞌnamayaꞌnîkon ya, upemonkonoyamîꞌ pe awanîkon epuꞌtî tamîꞌnawîronkonya.
Pedro Nekaremekî Ton Ekaremekî Jesusya
36 Simão Pedroya taꞌpî ipîꞌ: —Uyepotorî, oꞌnon pata pona attî mîrîrî? —taꞌpîiya. Jesusya yuukuꞌpî: —Upîkîrî attî eserîke pra awanî oꞌnon pata uutî ya. Tîîse maasa uwenairî attî —taꞌpîiya.
37 —Uyepotorî, îꞌ waniꞌ awanî yeꞌnen awenairî uutî eserîke pra awanî? —taꞌpî Pedroya. —Amîrî ton pe uusaꞌmanta eserîke wanî sîrîrî —taꞌpîiya.
38 Jesusya yuukuꞌpî: —Innape nai? Uurî ton pe naka aasaꞌmanta? Ayenkuꞌtîuya pepîn. Kariwana yunkon etun rawîrî, “Unepuꞌtî pepîn mîîkîrî”, taaya kupî sîrîrî. Eseurîwîꞌne iteꞌka taaya kupî sîrîrî —taꞌpîiya.
