Jesus Cristo Yekare João Nîmenukaꞌpî 14:1-31
14 Moropai Jesusya taꞌpî tînenupaꞌsan pîꞌ: —Teesewankonoꞌmai pra eꞌtî. Aasîrî innape Paapa kupî pîꞌ naatîi. Uurî nîrî kuꞌtî innape.
2 Maasa pra tuꞌke koꞌmannîtoꞌ moro man Uyun yewîꞌ ta. Îꞌ ton pra awanî ya, tauya nîrî eꞌpainon. Tîîse uutî sîrîrî aakoꞌmantoꞌkon ton konekai.
3 Moropai amîrîꞌnîkon ton pe ikonekasauꞌya ya, uuipî inîꞌrî amîrîꞌnîkon eraꞌmai, uupia aakoꞌmamîkonpa. Oꞌnon pata uukoꞌmamî ya, miarî nîrî uupia aakoꞌmamîkonpa.
4 Oꞌnon pata uutîtoꞌ epuꞌtî pîꞌ naatîi.
5 Mîrîrîya Toméya taꞌpî Jesus pîꞌ: —Uyepotorî, oꞌnon pata pona attî epuꞌtî annaya pra man. Oꞌnon yeꞌka pe wîtîntoꞌ, eꞌma epuꞌtoꞌpe annaya?
6 Jesusya yuukuꞌpî. —Uurî eꞌma, innarî, moropai koꞌmannîtoꞌ. Anîꞌ wîtî pepîn Paapa pia tîwî uurî tîkuꞌse —taꞌpîiya.
7 —Innape uyepuꞌtîyaꞌnîkon ya, Uyun nîrî epuꞌtîyaꞌnîkon. Moropai sîrîrî pata pai innape Paapa epuꞌtîyaꞌnîkon. Maasa pra aasîrî Mîîkîrî eraꞌmasaꞌyaꞌnîkon.
8 Filipeya taꞌpî Jesus pîꞌ: —Uyepotorî, eraꞌmatoꞌpe annaya Paapa yenpokî. Mîrîrî neken yuꞌse anna man.
9 Jesusya taꞌpî: —Pena pata pai uurî wanî aapiaꞌnîkon. Mîîwîni tîîse Filipe, uyepuꞌtîya pra nan? Filipe, anîꞌya uyeraꞌmasaꞌ ya, Paapa nîrî eraꞌmasaiꞌya. Mîrîrî yeꞌnen îꞌ ton pe Paapa yenpokî taaya manniꞌ?
10 Paapa yaꞌ uurî wanî moropai uurî yaꞌ Paapa wanî kupîya pra nan innape? —taꞌpîiya Filipe pîꞌ.
Moropai tînenupaꞌsan pîꞌ taꞌpîiya: —Mîrîrî tauya manniꞌ uwinîpainon pepîn, tîîse Paapa, uupia tîîkoꞌmansenya ituꞌse tîweꞌtoꞌ kupî uurî wenai.
11 Paapa yaꞌ uurî wanî moropai uyaꞌ Paapa wanî tauya manniꞌ kuꞌtî innape. Tîîse saꞌme awanî yeꞌnen innape mîrîrî kupîyaꞌnîkon pra awanî ya, innape ukuꞌtî unkupî wenai.
12 Ayenkuꞌtîuya pepîn. Anîꞌya innape ukupî ya, unkupîꞌpî warantî ikupîiya. Moropai unkupîꞌpî yentai ikupîiya maasa pra Paapa pia uutî kupî sîrîrî.
13 Mîrîrî wenai umaimu pe îꞌ rî anesatîkon tîrîuya aapiaꞌnîkon. Mîrîrî yeꞌnen uurî wenai morî pe Paapa yapurî tuꞌke pemonkonyamîꞌya.
14 Moropai tauya inîꞌrî umaimu pe îꞌ rî anesatîkon, mîrîrî kupîuya.
Morî Yekaton Wannî Iipî Ekaremekî Jesusya
15 Uꞌnînmayaꞌnîkon ya ayaipontîtouꞌyaꞌnîkon yawîrî akoꞌmantî.
16 Moropai Paapa pîꞌ esatîuya sîrîrî, apanamanenkon ton tiaron, yairon pîꞌ teeseurîmasen yarimatoꞌpeiya aapiaꞌnîkon aakoꞌmantoꞌpe ipatîkarî.
17 Sîrîrî non po tîîkoꞌmansenonya mîîkîrî yapisî eserîke pra awanî maasa pra eraꞌma toꞌya eserîke pra awanî, epuꞌtî toꞌya pepîn. Tîîse amîrîꞌnîkonya epuꞌtî maasa pra aakoꞌmamî apokonpeꞌnîkon, ayewankon yaꞌ awanî.
18 Uutî ya, tiwinsarî aweꞌnîmîkon pepîn aakoꞌmannîꞌnenkon ton pra, tîîse inîꞌrî ennaꞌpo kupî sîrîrî aapiaꞌnîkon.
19 Maasa mararî sîrîrî pata po tîîkoꞌmansenonya uyeraꞌma pepîn inîꞌrî. Tîîse amîrîꞌnîkonya inîꞌrî uyeraꞌma kupî sîrîrî. Moropai inîꞌrî enen uukoꞌmamî yeꞌnen, amîrîꞌnîkon koꞌmamî nîrî enen ipatîkarî.
20 Mîrîrî wei yai, Paapa pia uukoꞌmamî epuꞌtîyaꞌnîkon kupî sîrîrî. Moropai uyaꞌ aakoꞌmamîkon, amîrîꞌnîkon yaꞌ uukoꞌmamî warantî. Tiwin eꞌnî sîrîrî.
21 Anîꞌ unekaremekîꞌpî yapisîtîpon, moropai mîrîrî unekaremekîꞌpî yawîron, mîîkîrî uꞌnînmanen. Mîîkîrî uꞌnînmanen saꞌnama uyunya. Uurîya nîrî isaꞌnama moropai iipia uuipî, esekaremekî uyepuꞌtoꞌpeiya, taꞌpî Jesusya toꞌ pîꞌ.
22 Mîrîrîya taꞌpî Judasya. (Mîîkîrî Judas Iscariotes pepînya, tiaron) Mîîkîrîya taꞌpî Jesus pîꞌ: —Uyepotorî, oꞌnon yeꞌka pe anna pia aaipî tîîse tamîꞌnawîronkon pemonkonyamîꞌ pia aaipî pepîn?
23 Jesusya yuukuꞌpî: —Anîꞌya uꞌnînma ya, mîîkîrî koꞌmamî unekaremekîꞌpî yawîrî. Uyunya isaꞌnama, moropai anna erepamî iipia moropai anna koꞌmamî iipia —taꞌpîiya.
24 —Tîîse uꞌnînmanen pepîn koꞌmamî pepîn unekaremekîꞌpî yawîrî. Mîrîrî unekaremekîꞌpî uwinîpainon pepîn tîîse Paapa winîpainon.
25 Mîrîrî ekaremekîꞌpîuya akoreꞌtaꞌnîkon wanî yai.
26 Tîîse panamaton, Morî Yekaton Wannî, Paapa narimaton uyenta, mîîkîrîya amîrîꞌnîkon yenupa kupî sîrîrî tamîꞌnawîron pîꞌ. Moropai tamîꞌnawîrî unekaremekîꞌpî pîꞌ ayenpenatanîpîiyaꞌnîkon kupî sîrîrî.
27 Tîwanmîra aweꞌtoꞌkon nîmîuya aapiaꞌnîkon. Mîrîrî ke arepauyaꞌnîkon. Mîrîrî untîrî sîrîrî non po tîîkoꞌmansenon nîtîrî warainon pepîn. Mîrîrî yeꞌnen teesewankonoꞌmai pra eꞌtî, eranneꞌ pe pra.
28 Uutî sîrîrî aapiapaiꞌnîkon moropai inîꞌrî ennaꞌpo aapiaꞌnîkon tauya eta pîꞌ naatîi. Uꞌnînmayaꞌnîkon ya, aatausinpakon eꞌpainon. Maasa pra emikku sîrîrî uyun pia. Mîîkîrî uyun uyentainon.
29 Mîrîrî ekaremekî pîꞌ wai apîꞌnîkon uutî rawîrî. Mîrîrî yai uutî ya, innape ikupîkonpa.
30 Inîꞌrî kureꞌne eseurîma eserîke pra wai amîrîꞌnîkon yarakkîrî. Maasa pra sîrîrî pata esaꞌ iipî kupî sîrîrî. Mîîkîrî Makui uyentainon pepîn.
31 Tîîse îꞌ rî taa Paapaya ya, mîrîrî kupîuya, Paapa yapurîuya epuꞌtoꞌpe tamîꞌnawîronkon sîrîrî pata po tîîkoꞌmansenonya.
Aaseꞌnîkon sîrîrî pata pai.
