Jesus Cristo Yekare João Nîmenukaꞌpî 16:1-33
16 Moropai Jesusya taꞌpî toꞌ pîꞌ: —Mîrîrî ekaremekîꞌpîuya apîꞌnîkon innape Paapa kuꞌtoꞌyaꞌnîkon kupîyaꞌnîkon namai tîwî.
2 Teepereꞌtoꞌkon yewîꞌkon tapai amîrîꞌnîkon yenpaꞌka toꞌya kupî sîrîrî. Moropai inîꞌ panpîꞌ ikupî toꞌya. Maasa awî tîuyaꞌnîkon yai, Paapa wakîri pe awanî kaiꞌma toꞌ esenumenka kupî sîrîrî.
3 Mîrîrî warantî atarumaꞌtîkon toꞌya kupî sîrîrî, maasa pra uurî moropai uyun epuꞌtî tîuyaꞌnîkon pra awanî yeꞌnen.
4 Aasîrî mîrîrî ekaremekîꞌpîuya apîꞌnîkon. Moropai mîrîrî koneka toꞌya yai, awenpenatakon kupî sîrîrî.
Eꞌmaiꞌ pe upemonkono pe amîrîꞌnîkon ena piaꞌtîsaꞌ pe mîrîrî ekaremekîuya pra wanîꞌpî. Maasa pra aapiaꞌnîkon uurî wanî yeꞌnen.
Morî Yekaton Wannî Esenyakaꞌmatoꞌ
5 Tîîse uutî kupî sîrîrî uyarimaꞌtîpon pia. Mîîwîni tîîse uyekaranmapoyaꞌnîkon pra naatîi. Anîꞌya “Oꞌnon pata pona attî?” taa pra awanî, tiwin kin.
6 Mîrîrî ekaremekîuya yeꞌnen, eesewankonoꞌmasaꞌkon kureꞌne.
7 Tîîse yairî tauya sîrîrî. Uutîsaꞌ ya, morî pe awanî kupî sîrîrî aapiaꞌnîkon. Uutîsaꞌ pra awanî ya, panamatonkon iipî pepîn aapiaꞌnîkon. Tîîse uutîsaꞌ ya, mîîkîrî yarimauya aapiaꞌnîkon.
8 Mîîkîrî iipî non po tîîkoꞌmansenon pia. Aaipî ya, toꞌ pîꞌ ekaremekîiya. Imakuiꞌpî pe toꞌ wanî ekaremekîiya kupî sîrîrî. Moropai îꞌ pe yairon wanî ekaremekîiya. Moropai Paapaya toꞌ yenumî kupî ekaremekîiya kupî sîrîrî.
9 Moropai ekaremekîiya yairî pra toꞌ wanî imakuiꞌpî tînkupîꞌpî pîꞌ maasa pra innape ukupî toꞌya pra awanî.
10 Moropai ekaremekîiya yairî pra toꞌ esenumenka yairon pîꞌ. Maasa pra kaꞌ pona uutî, tarî uyeraꞌmayaꞌnîkon pepîn inîꞌrî. Mîrîrî yai Paapaya uyapisî morî pe, iwakîri pe. Mîrîrî wenai yairon pe wanî epuꞌtî toꞌya.
11 Moropai Paapaya imakuiꞌpî tarumaꞌtî ekaremekîiya maasa pra aasîrî Paapaya imakuiꞌpî yepotorî, Makui, tarumaꞌtî pe man.
12 Inîꞌ panpîꞌ anekaremeꞌpai wai apîꞌnîkon tîîse sîrîrî yapîtanîpîyaꞌnîkon pepîn.
13 Tîîse Mîîkîrî, yairon pîꞌ teeseurîmasen erepansaꞌ ya, tamîꞌnawîrî yairon Paapa piapainon pîꞌ ayenupaiyaꞌnîkon. Tîîwarîrî eeseurîma pepîn tîîse tînetaꞌpî ekaremekîiya moropai aweꞌkupîton maasa ekaremekîiya nîrî.
14 Uyapurîiya, maasa pra uwinîpainon tînetaꞌpî pîꞌ eeseurîma.
15 Tamîꞌnawîrî Paapa wanî manniꞌ itesaꞌ pe, uurî nîrî itesaꞌ pe. Mîrîrî yeꞌnen tauya, uwinîpainon tînapisîꞌpî, aapiaꞌnîkon itîrî Morî Yekaton Wannîya, unekaremekî ekaremekîiya apîꞌnîkon.
Esewankonoꞌmantoꞌ Moropai Atausinpantoꞌ
16 Maasa mararî tîîkoꞌmanse uyeraꞌmayaꞌnîkon pepîn moropai inîꞌrî mararî tîîkoꞌmanse tîpo uyeraꞌmayaꞌnîkon.
17 Mîrîrîya inenupaꞌsan esekaranmapoꞌpî tîpîꞌnîkon: —Îꞌ taiya pe awanî mîrîrî? “Maasa mararî uyeraꞌmayaꞌnîkon pepîn moropai inîꞌ aakoꞌmamîkon tîpo, uyeraꞌmayaꞌnîkon inîꞌrî,” taꞌpîiya saꞌrî. Moropai taiya nîrî: “Uutî uyun pia yeꞌnen uyeraꞌmayaꞌnîkon pepîn.” Îꞌ taiya pe awanî? —taꞌpî toꞌya.
18 —Maasa mararî tîpo taꞌpîiya saꞌrî îꞌ taiya pe awanî epuꞌtî pra man mîrîrî. Mîrîrî warantî toꞌ eseurîmaꞌpî tîîwarîrîꞌnîkon.
19 Tîpîꞌ anekaranmapopai toꞌ wanî epuꞌtîꞌpî Jesusya. Mîrîrî yeꞌnen taꞌpîiya toꞌ pîꞌ: —Maasa mararî uyeraꞌmayaꞌnîkon pepîn taa pîꞌ wai moropai inîꞌrî maasa uyeraꞌmayaꞌnîkon inîꞌrî taa pîꞌ wai. Îꞌ taiya pe awanî? —taꞌpîiya toꞌ pîꞌ.
20 —Innape taa pîꞌ wai apîꞌnîkon. Akaraukon kupî sîrîrî tîîse non po tîîkoꞌmansenon atausinpa. Eesewankonoꞌmakon tîîse mîrîrî eesewankonoꞌmatoꞌkon eraꞌtî inîꞌrî aatausinpatoꞌkon pe moropai aatausinpakon.
21 Wîriꞌ mîîkîrî tînre esenpo kupî ya, eesewankonoꞌmakoi. Maasa pra tîweꞌtarumaꞌtî weiyu eseposaꞌ yeꞌnen. Tîîse tînre esenposaꞌ tîpo, inîꞌrî tîweꞌtarumaꞌtîtoꞌ pîꞌ awenpenata pepîn. Tîîse more esenposaꞌ pîꞌ aatausinpa.
22 Mîrîrî warantî awanîkon. Esewankonoꞌman pîꞌ naatîi tîîse inîꞌrî ayeraꞌmauyaꞌnîkon moropai aatausinpakon kupî sîrîrî. Mîrîrî aatausinpatoꞌkon moꞌka anîꞌya eserîke pra awanî.
23 Mîrîrî yai uyekaranmapoyaꞌnîkon pepîn. Ayenkuꞌtîuyaꞌnîkon pepîn. Îꞌ rî anesatîkon Paapa pîꞌ itîrîiya aapiaꞌnîkon upemonkono pe awanîkon yeꞌnen.
24 Sîrîrî tîpo see Paapa pîꞌ esatîyaꞌnîkon pra awanîkon. Upemonkono pe siꞌma esatî moropai yapisîyaꞌnîkon. Mîrîrîya kureꞌne aatausinpakon. Aatausinpatoꞌkon wanî tîwîrî, mîîpîkîrî pra.
Imakuiꞌpî Yentai Jesus Wanî
25 Mîrîrî ekaremekî pîꞌ wai panton pe, aronne pra. Tîîse maasa uweiyu eseporî kupî sîrîrî. Mîrîrî yai ekaremekîuya pepîn panton pe tîîse aronne ayekaremekîuyaꞌnîkon Paapa pîꞌ.
26 Mîrîrî weiyu yai, Paapa pîꞌ esatîyaꞌnîkon aawarîrîꞌnîkon uyeseꞌ yai upemonkono pe awanîkon yeꞌnen. Paapa pîꞌ esatîuya pepîn amîrîꞌnîkon ton pe.
27 Maasa pra Paapaya asaꞌnamakon. Asaꞌnamaiyaꞌnîkon maasa pra uyapurîyaꞌnîkon yeꞌnen moropai innape ukupîꞌpîyaꞌnîkon, Paapa winîpainon pe.
28 Paapa piapai iipîꞌpî uurî, sîrîrî non pona. Moropai inîꞌrî sîrîrî non nîmîuya kupî sîrîrî. Ennaꞌpo kupî sîrîrî Paapa pia.
29 Mîrîrî pîꞌ inenupaꞌsanya taꞌpî ipîꞌ: —Aronne eseurîman pîꞌ nai tarîpai, panton pe pra —taꞌpî toꞌya.
30 —Tamîꞌnawîron epuꞌtî pîꞌ nai epuꞌtî pîꞌ anna man tarîpai. Îꞌ tiaronkon esenumenka epuꞌtî pîꞌ nai ayekaranmapo toꞌya pra tîîse. Mîrîrî wenai Paapa winîpaino pe awanî kupî pîꞌ anna man innape.
31 Jesusya toꞌ maimu yuukuꞌpî: —Tarîpai innape naka ukupî pîꞌ naatî? —taꞌpîiya toꞌ pîꞌ.
32 —Maasa panpîꞌ amîrîꞌnîkon eꞌtîrîka kupî sîrîrî. Maasa puꞌkuru pra attîkon kupî sîrîrî ayewîꞌkon ta, unîmîyaꞌnîkon kupî sîrîrî tiwinsarî. Mîîwîni tîîse tiwinsarî uukoꞌmamî pepîn maasa pra uyun wanî uupia.
33 Mîrîrî ekaremekî pîꞌ wai tîîwanmîra awanîkonpa Paapa winîkîi, uponaron pe awanîkon yeꞌnen. Tarî sîrîrî non po imakuiꞌpîya atarumaꞌtîkon, tîîse meruntî ke eꞌtî. Maasa pra imakuiꞌpî yentai wanîꞌpî.
