Jesus Cristo Yekare João Nîmenukaꞌpî 18:1-40
18 Teepîrema tîpo, Jesus epaꞌkaꞌpî tînenupaꞌsan yarakkîrî moropai iwîtî rukkuꞌnîtîꞌpî toꞌya, Cedrom iteseꞌ. Moro iratai po Oliveira yeꞌka wanîꞌpî. Miarî tînenupaꞌsan pokonpe eewomîꞌpî.
2 Mîrîrî Oliveira yeꞌka epuꞌtîꞌpî Judasya iteyatonon pîꞌ Jesus ekaremeꞌnenya. Epuꞌtîꞌpîiya maasa pra miarî Jesusya tînenupaꞌsan muurukuntîpîtîꞌpî.
3 Mîrîrî yeꞌnen moro Oliveira yeꞌkanaꞌ Judas erepamîꞌpî. Epîremantoꞌ yewîꞌ eraꞌmanenan enepîꞌpîiya moropai tiaronkon enepîꞌpîiya. Teepîremasanon esanon moropai fariseuyamîꞌ narimaꞌsan, arinîke toꞌ wanîꞌpî. Tîkasuparaikon moropai tîtaikapukon moropai tîweiyukon, tîꞌkumaꞌtukon ke toꞌ erepamîꞌpî.
4 Jesus epaꞌkaꞌpî toꞌ ponaya moropai toꞌ ekaranmapoꞌpîiya, tamîꞌnawîrî îꞌ kupî toꞌya tîpîꞌ epuꞌtîiꞌma. Taꞌpîiya toꞌ pîꞌ: —Anîꞌ yuwayaꞌnîkon? —taꞌpîiya.
5 Inkamoroya yuukuꞌpî: —Jesus, Nazaré pon —taꞌpî toꞌya. —Uurî mîîkîrî —taꞌpîiya. (Judas, iteyatonon pîꞌ Jesus ekaremeꞌnen, mîîkîrî wanî mîrîrî inkamoro pokonpe.)
6 Uurî mîîkîrî, taasaꞌ Jesusya pe, inkamoro atarimaꞌpî moropai toꞌ esenumîꞌpî non pona.
7 Moropai inîꞌrî Jesusya toꞌ ekaranmapoꞌpî: —Anîꞌ yuwayaꞌnîkon? —taꞌpîiya toꞌ pîꞌ. —Jesus, Nazaré pon —taꞌpî toꞌya.
8 —Uurî mîîkîrî tauya saꞌrî. Uurî yuwayaꞌnîkon ya, moriya tîwî insanan unenupaꞌsan nîtîi —taꞌpî Jesusya toꞌ pîꞌ.
9 Mîrîrî taꞌpîiya tîmaimu yawîrî aweꞌkuꞌtoꞌpe manniꞌ Paapa nîtîrîꞌsan koꞌmannîpîꞌpîuya anîꞌ atakaꞌma pra man taꞌpîiya neꞌtîkini. Innape tîmaimu eꞌtoꞌpe taiya mîrîrî warantî.
10 Mîrîrîya Simão Pedroya tîkasuparai moꞌkaꞌpî moropai teepîremasanon esanon yepotorî poitîrî pana yaꞌtîꞌpîiya. Mîîkîrî ipoitîrî eseꞌ Malco.
11 Mîrîrî pîꞌ Jesusya taꞌpî Pedro pîꞌ: —Tîwî akasuparai nîsi, yekaꞌmakî iwon yaꞌ —taꞌpîiya. —Ituꞌse Paapa eꞌtoꞌ yawîrî eꞌtarumaꞌtî pepîn naka? Kaane, eꞌtarumaꞌtî sîrîrî Paapa naipontîꞌpî pe.
Anás Pia Jesus Yarî Toꞌya
12 Mîrîrî tîpo Jesus yapisîꞌpî toꞌya, surarayamîꞌya moropai toꞌ esaꞌya, moropai teepîremasanon esanon narimaꞌsanya yapisîꞌpî, itenya yewaꞌtîꞌpî toꞌya.
13 Moropai eꞌmaiꞌ pe yarîꞌpî toꞌya Anás pia. Anás mîîkîrî Caifás yawo. Mîrîrî konoꞌ yai teepîremasanon esanon yepotorî pe Caifás wanîꞌpî.
14 Mîîkîrî Caifásya Judeuyamîꞌ esanon panamasaꞌ wanîꞌpî tiwin warayoꞌ saꞌmanta yuꞌse wanî tamîꞌnawîronkon pemonkonyamîꞌ ton pe kaiꞌma toꞌ panamasaiꞌya wanîꞌpî.
Pedroya Taa, Jesus Unepuꞌtî Pepîn
15 Moropai Simão Pedro moropai tiaron inenupaꞌpîya Jesus wenaimaꞌpî. Mîîkîrî tiaron inenupaꞌpî teepîremasanon esanon yepotorî nepuꞌtî. Mîrîrî yeꞌnen attîꞌpî Jesus pîkîrî itewîꞌ poroyiꞌpîrî pîkîrî,
16 poro po Pedro koꞌmamî tanne wîttî woimaꞌtîtoꞌ manaꞌta pia. Mîrîrîya tiaron inenupaꞌpî, manniꞌ teepîremasanon esanon yepotorî nepuꞌtîꞌpî, mîîkîrî ennaꞌpoꞌpî manaꞌta piawon wîriꞌ yarakkîrî eseurîmai. Eeseurîmaꞌpî moropai Pedro ewomî tîrîꞌpîiya.
17 Moropai mîîkîrî manaꞌta piawon wîriꞌya taꞌpî Pedro pîꞌ: —Mîîkîrî warayoꞌ nenupaꞌpî amîrî? —taꞌpîiya. —Kaane, uurî pepîn —taꞌpî Pedroya.
18 Mîrîrîya Pedro wîtîꞌpî ipoitîrîtonon koreꞌta apoꞌ pia tîweꞌsanon pia. Moropai teepîrematoꞌkon yewîꞌ eraꞌmanenan pia. Toꞌ atapinaꞌpî tîntîrukaꞌpîkon pia, komiꞌ pe pata wanî yeꞌnen. Satippe Pedro atapinaꞌpî toꞌ pokonpe.
Teepîremasanon Esanon Yepotorîya
Jesus Ekaranmapo
19 Mîrîrî tanne teepîremasanon esanon yepotorîya Jesus ekaranmapoꞌpî inenupaꞌsan pîꞌ moropai inekaremekîꞌpî pîꞌ.
20 Jesusya yuukuꞌpî: —Tamîꞌnawîronkon pemonkonyamîꞌ yeurîmapîtîꞌpîuya aronne, amaꞌ pe pra. Epereꞌnîtoꞌ yewîꞌkon ta, epîremantoꞌ yewîꞌ ta, toꞌ yenupapîtîꞌpîuya tîmurukun pe awanîkon tanne. Îꞌ tauya pra wanîꞌpî amaꞌ pe.
21 Mîrîrî yeꞌnen îꞌ ton pe uyekaranmapoya? Inkamoro umaimu etatîponkon mekaranmapoi, îꞌ taasauꞌya toꞌ pîꞌ. Mîrîrî epuꞌtî pîꞌ toꞌ man morî pe.
22 Mîrîrî taasaꞌ Jesusya pe, tiwin epîremantoꞌ yewîꞌ eraꞌmanenya Jesus yenpatamoꞌpî. Moropai taꞌpîiya: —Îꞌ ton pe see mîrîrî yeꞌka pe eseurîman mîrîrî teepîremasanon esanon yepotorî pîꞌ? —taꞌpîiya Jesus pîꞌ.
23 Jesusya yuukuꞌpî: —Yairî pra eseurîmasaꞌ ya, makai tamîꞌnawîronkon pîꞌ îꞌ kaiꞌma eseurîmasaꞌ. Tîîse yairî eseurîman pîꞌ wai. Îꞌ waniꞌ awanî yeꞌnen upaꞌtîya mîrîrî? —taꞌpî Jesusya mîîkîrî pîꞌ.
24 Mîrîrîya Anásya Jesus yarimaꞌpî taironpîꞌse Caifás pia, teepîremasanon esanon yepotorî pia.
Inîꞌrî Pedroya Taa, Mîîkîrî Unepuꞌtî Pepîn
25 Mîrîrî tanne Simão Pedro atapina koꞌmannîpîꞌpî satippe siꞌma. Moropai tiaronkon iipiawonkonya taꞌpî ipîꞌ: —Mîîkîrî warayoꞌ nenupaꞌpî nîrî amîrî kaꞌrî? Tîîse Pedroya taꞌpî: —Kaane uurî pepîn —taꞌpîiya.
26 Mîrîrîya tiwin teepîremasanon esanon yepotorî poitîrîya taꞌpî. Mîîkîrî pana Pedro naꞌtîꞌpî yonpa pe awanîꞌpî. Mîîkîrîya taꞌpî Pedro pîꞌ: —Amîrî kaꞌrî ayeraꞌmauya neꞌtîkini mîîkîrî yarakkîrî Oliveira yeꞌkanaꞌ eꞌnî neꞌtîkini —taꞌpîiya.
27 Inîꞌrî Pedroya taꞌpî: —Kaane. Mîrîrî pe rî kariwana yunkon eꞌnaꞌpî.
Pilatosya Jesus Ekaranmapo
28 Moropai eerenmapî ya Jesus yarîꞌpî toꞌya Caifás yewîꞌ tapai Governador Pilatos yewîꞌ ta. Tîîse Judeuyamîꞌ esanon wanîꞌpî ewonpai pra, tîweꞌkîꞌpakon namai Judeuyamîꞌ pepîn koreꞌta. Maasa pra Páscoa entamoꞌkantoꞌ pîꞌ eꞌpai toꞌ wanîꞌpî. Mîrîrî yeꞌnen toꞌ ewomî pîn.
29 Mîrîrî yeꞌnen poro pona Pilatos epaꞌkaꞌpî toꞌ pia. Moropai taꞌpîiya toꞌ pîꞌ: —Îꞌ imakuiꞌpî inkupîꞌpî taayaꞌnîkon mîrîrî, mîserî nîkupîꞌpî? —taꞌpîiya.
30 Yuukuꞌpî toꞌya. —Aꞌkî, imakuiꞌpî kuꞌsaiꞌya pra awanî ya, aapia eneꞌsaꞌ annaya pepîn eꞌpainon. Tîîse imakuiꞌpî kupîtîpon mîserî —taꞌpî toꞌya.
31 Mîrîrî yeꞌnen taꞌpî Pilatosya toꞌ pîꞌ: —Amîrîꞌnîkon mîîkîrî yeseru yakoꞌmenkatî aawarîrîꞌnîkon moropai itarumaꞌtîtî ayeserukon yawîrî. Tîîse yuukuꞌpî toꞌya: —Amîrîꞌnîkon Romanoyamîꞌya anîꞌ wîî meꞌpo annaya tîrî pepîn —taꞌpî toꞌya.
32 Mîrîrî warantî toꞌ eseurîmaꞌpî mîrîrî, Jesus nekaremekîꞌpî pîꞌ innape aweꞌtoꞌpe. Maasa pra îꞌ kaiꞌma tîîsaꞌmanta ekaremeꞌsaꞌ Jesusya wanîꞌpî.
33 Pilatos ewomîꞌpî tewîꞌ ta moropai Jesus yanno meꞌpoꞌpîiya. Mîrîrîya Jesus ekaranmapoꞌpîiya: —Judeuyamîꞌ esaꞌ amîrî, rei amîrî? —taꞌpîiya Jesus pîꞌ.
34 Jesusya yuukuꞌpî: —Uyekaranmapoya awinîpai kaꞌrî ou tiaronkonya ekaremeꞌsaꞌ mîrîrî apîꞌ —taꞌpîiya.
35 Pilatosya taꞌpî: —Judeu pepîn uurî. Amîrî yonpayamîꞌ moropai teepîremasanon esanonya arumakasaꞌ mîrîrî uyenyaꞌ —taꞌpîiya. —Îꞌ kupî pîꞌ nan? —taꞌpîiya.
36 —Sîrîrî non po pemonkonyamîꞌ yaipontîuya pepîn toꞌ esaꞌ pe. Mîrîrî warantî ikupîuya ya, upoitîrîtonon eseyaꞌnama eꞌpainon Judeuyamîꞌ esanonya uyapisî namai. Tîîse mîrîrî yeꞌka pe pra kupîuya tarî sîrîrî non po. Maasa pra sîrîrî non winîpainon pepîn uurî —taꞌpîiya.
37 Mîrîrî yeꞌnen Pilatosya taꞌpî ipîꞌ: —Moriya rei pe awanî mîrîrî? Jesusya taꞌpî: —Amîrîya taa mîrîrî, yairon mai. Esenpoꞌpî moropai uuipîꞌpî sîrîrî non pona yairon ekaremeꞌse. Mîrîrî ton pe neken erepamîꞌpî. Moropai yairon anetapainonya umaimu pîinama.
38 Pilatosya taꞌpî: —Îꞌ mîrîrî yairon? —taꞌpîiya.
Mîrîrî tîpo Pilatos epaꞌkaꞌpî pemonkonyamîꞌ pia moropai taꞌpîiya toꞌ pîꞌ: —Imakuiꞌpî inkupîꞌpî eporîuya pra wai. Îꞌ wenai pra iwîmeꞌpouya eserîke pra wai —taꞌpîiya.
39 —Tîîse ayeserukon yawîrî konoꞌ kaisarî Páscoa yai, tiwin unarakkamoꞌpî rumakauya aapiaꞌnîkon. Mîserî amîrîꞌnîkon Judeuyamîꞌ rei rumakauya yuꞌse naatî?
40 Mîrîrî yuukuꞌpî toꞌya tîwentaimepîꞌse. —Kaane, mîîkîrî pepîn. Barrabás rumakaya yuꞌse anna man —taꞌpî toꞌya. (Barrabás mîîkîrî amaꞌyeꞌ.)
