Jesus Cristo Yekare João Nîmenukaꞌpî 19:1-42
19 Mîrîrî tîpo Pilatosya Jesus poꞌpîtî meꞌpoꞌpî.
2 Surarayamîꞌya itarako ton konekaꞌpî mîꞌnî ke. Moropai yekaꞌmaꞌpî toꞌya ipuꞌpai pona, moropai suuyu sonpan rei pon yeꞌka yekaꞌmaꞌpî toꞌya ipîꞌ tîîwoꞌmaꞌtakon pe.
3 Moropai iipia toꞌ erepanpîtîꞌpî. Taapîtîꞌpî toꞌya ipîꞌ: —Viva Jesus, Judeuyamîꞌ esaꞌ amîrî. Rei amîrî —kaiꞌma taa pîꞌ toꞌ koꞌmamîꞌpî. Moropai mîîkîrî yenpatamopîtîꞌpî toꞌya.
4 Moropai inîꞌrî Pilatos epaꞌkaꞌpî moropai taꞌpîiya Judeuyamîꞌ pîꞌ: —Aꞌkî, mîîkîrî yenpaꞌka meꞌpo pîꞌ wai eraꞌmakonpa. Imakuiꞌpî inkupîꞌpî eporîuya pra wai. Îꞌ wenai pra iwî meꞌpouya eserîke pra wai.
5 Mîrîrî yeꞌnen Jesus epaꞌkaꞌpî mîꞌnî yeꞌ tarakko pe tîîse moropai suuyu sonpan tîpon yaꞌ. Mîrîrîya Pilatosya taꞌpî toꞌ pîꞌ: —Aꞌkî, mîserî warayoꞌ man. Eraꞌmatî! —taꞌpîiya.
6 Mîîkîrî eraꞌma tîuyaꞌnîkon pe teepîremasanon esanon moropai toꞌ poitîrîtonon entaimepîtîꞌpî. —Iwî meꞌpokî, iwî meꞌpokî pakîꞌnan pona —taapîtîꞌpî toꞌya.
Moropai Pilatosya taꞌpî toꞌ pîꞌ: —Kaane, uurî pepîn. Amîrîꞌnîkon neken tarîpai. Ituꞌse awanîkon ya, ipokapîtîtantî pakîꞌnan pona, iwîtî —taꞌpîiya. —Tîîse uurî pia morî pe eraꞌma pîꞌ wai. Îꞌ wenai pra iwîtî tauya eserîke pra wai.
7 Tîîse Judeuyamîꞌya yuukuꞌpî: —Moisés nurîꞌtî nekaremekîꞌpî yawîrî aasaꞌmanta eꞌpai awanî. Maasa pra Paapa munmu pe aweꞌkupî —taꞌpî toꞌya.
8 Mîrîrî eta tîuya pe, Pilatos esiꞌnîpîꞌpî inîꞌ panpîꞌ.
9 Moropai eewomîꞌpî tewîꞌ ta inîꞌrî. Moropai Jesus ekaranmapoꞌpîiya. —Oꞌnon pata painon amîrî? —taꞌpîiya. Tîîse Jesusya yuuku pîn.
10 Pilatosya taꞌpî ipîꞌ: —Umaimu yuukuya pepîn? Enpenatakî, ayesaꞌ uurî. Arumakauya eꞌpainon, awî meꞌpouya eꞌpainon —taꞌpîiya Jesus pîꞌ.
11 Jesusya yuukuꞌpî: —Aawarîrî uyesaꞌ pe awanî pepîn. Uyesaꞌ pe awanî maasa pra Paapaya itîîsaꞌ mîrîrî aapia. Mîrîrî yeꞌnen mîîkîrîya, ayenyaꞌ urumakatîponya, imakuiꞌpî kuꞌsaꞌ mîrîrî, imakuiꞌpî kuꞌsaꞌya yentai.
12 Mîrîrî eta tîuya yeꞌnen, Jesus anrumakapai Pilatos wanîꞌpî. Tîîse Judeuyamîꞌ entaimepîtîꞌpî. —Irumakaya ya, César yeyaton pe awanî —taꞌpî toꞌya. —Anîꞌ eꞌkupî ya rei pe César yentai eꞌpai awanî. César pîinamaiya pepîn.
13 Mîrîrî eta tîuya pe Jesus yenpaꞌka meꞌpoꞌpî Pilatosya. Moropai eereutaꞌpî taponseꞌ pona miarî pata tîꞌ kaꞌsaꞌ pona. (Judeuyamîꞌ maimu ta Gabatá).
14 Awanîꞌpî sexta-feira Páscoa konekatoꞌ weiyu pe. Moropai wei enuꞌsaꞌ wanîꞌpî. Mîrîrî yai Pilatosya taꞌpî Judeuyamîꞌ esanon pîꞌ: —Aꞌkî, ayesaꞌkon mîîkîrî, rei mîîkîrî —taꞌpîiya.
15 Moropai toꞌ entaimepîtîꞌpî. —Iwî meꞌpokî, iwî meꞌpokî pakîꞌnan pona —taapîtîꞌpî toꞌya. —Ayesaꞌkon wîî meꞌpouya yuꞌse naatî? —taꞌpî Pilatosya. —Itesaꞌ pînon anna —taꞌpî toꞌya. —César neken anna esaꞌ —taꞌpî teepîremasanon esanonya.
16 Mîrîrî tîpo Pilatosya Jesus rumaka tuꞌkaꞌpî Judeuyamîꞌ yenyaꞌ iwîtoꞌpe toꞌya.
Jesus Pokapîtî Toꞌya Pakîꞌnan Po
17 Mîrîrî yeꞌnen surarayamîꞌya yarîꞌpî. Jesus epaꞌkaꞌpî cidade poi. Pakîꞌnan yarîꞌpîiya tîwîtoꞌ yaponseꞌ ton. Eerepamîꞌpî pata eseꞌ pemonkon puꞌpaiꞌpî warainon. (Judeuyamîꞌ maimu ta Gólgota.)
18 Moro ipokapîtîꞌpî toꞌya pakîꞌnan po. Moropai tiaronkon nîrî asakîꞌnankon warayoꞌkon pokapîtîꞌpî toꞌya iratai winî Jesus wanîꞌpî toꞌ arakkita.
19 Moropai Pilatosya tabua pona imenukaꞌpî moropai itîrî meꞌpoꞌpî pakîꞌnan pona.JESUS NAZARÉ PON, JUDEUYAMÎꞌ ESAꞌ
taatoꞌ eꞌmenukasaꞌ wanîꞌpî.
20 Mararonkon pepîn Judeuyamîꞌya mîrîrî erenkaꞌpî maasa pra Jesus wîꞌpî toꞌya aminke pra cidade pia. Moropai mîrîrî eꞌmenukasaꞌ wanîꞌpî eseurîwîꞌnankon maimukon ta. Judeuyamîꞌ maimu ta, romanoyamîꞌ maimu ta, moropai gregoyamîꞌ maimu ta aweꞌmenukasaꞌ wanîꞌpî.
21 Moropai teepîremasanon esaꞌya taꞌpî Pilatos pîꞌ: —Judeuyamîꞌ esaꞌ kaiꞌma kîꞌmenukai tîîse “Judeuyamîꞌ esaꞌ uurî”, taꞌpî mîserîya taatoꞌ menukakî —taꞌpî toꞌya.
22 Pilatosya yuukuꞌpî: —Îꞌ unmenukaꞌpî koꞌmamî mîrîrî warantî. Tiaron pe imoꞌtannîpîuya pepîn —taꞌpîiya.
23 Pakîꞌnan pona Jesus pokapîtî surarayamîꞌya tîpo, ipon yanumîꞌpî toꞌya moropai pantakaꞌpî toꞌya tîkaisarîꞌnîkon, saakîrîronkon. Sonpan nîrî yanumîꞌpî toꞌya. Mîrîrî sonpan morî tiwin ikaꞌsaꞌ, iisiꞌpîntoꞌ ton pîn.
24 Mîrîrî yeꞌnen taꞌpî toꞌya tîpîꞌnîkon: —Ipon karaka namai, tîꞌ yenunpaiꞌnîkon anîꞌ yemanne pe sonpan wanî epuꞌtoꞌpeꞌnîkon —taꞌpî toꞌya.
Mîrîrî kupîꞌpî toꞌya Paapa maimu eꞌmenukasaꞌ eꞌtoꞌpe innape. See warantî aweꞌmenukasaꞌ:Upon pantakaꞌpî toꞌya tîkoreꞌtaꞌnîkon moropai sonpan,anîꞌ pon pe aweꞌnîmî epuꞌtîkonpa tîꞌ yenumîꞌpî toꞌya.
Mîrîrî yeꞌnen mîrîrî kupîꞌpî surarayamîꞌya.
25 Mîrîrî tanne aminke pra Jesus pakîꞌnanon pia wîriꞌsanyamîꞌ wanîꞌpî satippe. Jesus yan moropai itakon moropai Clopas noꞌpî, iteseꞌ Maria, moropai Maria Magdala pon, inkamoro wanîꞌpî aminke pra.
26 Moropai tîsan eraꞌma tîuya pe, moropai tînenupaꞌpî, tîsaꞌnamanen, eraꞌma tîuya pe, Jesusya taꞌpî tîsan pîꞌ: —Eraꞌmakî, anre mîîkîrî tarîpai —taꞌpîiya.
27 Mîrîrî tîpo taꞌpîiya tînenupaꞌpî pîꞌ: —Eraꞌmakî, asan mîîkîrî tarîpai —taꞌpîiya. Moropai mîrîrî pata pai inenupaꞌpîya isan yarîꞌpî tewîꞌ ta aakoꞌmantoꞌpe.
Jesus Saꞌmanta
28 Tîîkoꞌmamî tîpo, Jesusya tamîꞌnawîrî aretîꞌkasaꞌ tîuya epuꞌtîꞌpî. Moropai taꞌpîiya: —Tuna aninnîpai wai. Mîrîrî taꞌpîiya innape Paapa maimu eꞌmenukasaꞌ eꞌtoꞌpe yairî.
29 Moro pisa wanîꞌpî intapîkîron uva yekku soꞌritasaꞌ yenseꞌ. Mîrîrî yeꞌnen tuꞌnasen esponja tîrîꞌpî toꞌya woꞌ ka. Moropai amansaꞌ tanne, esponja moꞌkaꞌpî toꞌya. Hissopo yeꞌ pona tîrîꞌpî toꞌya, moropai iꞌmîꞌsaꞌkaꞌpî toꞌya inta yaꞌ.
30 Mîrîrî yuꞌnaꞌpî Jesusya moropai taꞌpîiya: —Tamîꞌnawîron ataretîꞌkasaꞌ man. Mîrîrî taa tîuya yaretîꞌka pe aweꞌmuruikaꞌpî moropai aasaꞌmantaꞌpî.
Jesus Yaraꞌta Yasoꞌka Toꞌya
31 Mîrîrî Páscoa konekatoꞌ weiyu yai, moropai penane wanî sábado ipîkku, páscoa pîꞌ toꞌ eꞌtoꞌ. Mîrîrî yeꞌnen isaꞌmantaꞌsan esaꞌrîꞌpî koꞌmamî pakîꞌnan po yuꞌse pra Judeuyamîꞌ wanîꞌpî. Mîrîrî yeꞌnen toꞌ wîtîꞌpî Pilatos pia. Taꞌpî toꞌya ipîꞌ: —Inkamoro pîsi waikîpîtî meꞌpokî kaꞌneꞌ panpîꞌ toꞌ saꞌmantatoꞌpe moropai toꞌ esaꞌrîꞌpî moꞌkatoꞌpe annaya pakîꞌnan po toꞌ koꞌmamî namai sábado yai —taꞌpî toꞌya ipîꞌ.
32 Mîrîrî yeꞌnen surarayamîꞌ wîtîꞌpî. Eꞌmaiꞌnon pakîꞌnan pon pîsi waikîpîtîꞌpî toꞌya. Mîrîrî tîpo tiaron pîsi waikîpîtîꞌpî toꞌya Jesus yarakkîronkon.
33 Tîîse Jesus pia teerepamîkon yai, eraꞌmaꞌpî toꞌya aasîrî aasaꞌmantasaꞌ wanîꞌpî. Mîrîrî yeꞌnen iꞌsi waikîpîtî toꞌya pra awanîꞌpî.
34 Tîîse tiwin suraraya tîkasuparai ke yaꞌsoꞌkaꞌpî Jesus yaraꞌta yai. Mîrîrî pe rî imînî moropai tuna tiꞌkamoꞌpî mararî pra.
35 Mîrîrî eraꞌmatîpon uurî. Moropai ekaremekîuya sîrîrî innape ikupîkonpa. Mîrîrî unekaremekî wanî yairî. Moropai mîrîrî wanî innape epuꞌtîuya.
36 Mîrîrî eꞌkupîꞌpî Paapa maimu eꞌmenukasaꞌ eꞌtoꞌpe innape. See warantî aweꞌmenukasaꞌ:Tiwin iteꞌpî waikîpîtî toꞌya pepîn tiwin kin
taatoꞌ.
37 Moropai inîꞌrî Paapa maimu eꞌmenukasaꞌ see warantî:Pemonkonyamîꞌya tînaꞌsoꞌkaꞌpîkon eraꞌma pe man
taatoꞌ mîrîrî.
Jesus Yuꞌnaꞌtî Toꞌya
38 Mîrîrî tîpo José Arimatéia ponya Pilatos pîꞌ esatîꞌpî, Jesus esaꞌrîꞌpî yuꞌnaꞌtîpa kaiꞌma. Mîîkîrî José wanîꞌpî Jesus wenaimetîpon pe tîîse amaꞌ pe, maasa pra Judeuyamîꞌ esanon namaꞌpîiya.
39 Moropai Nicodemos, manniꞌ Jesus pia itîꞌpî ewaron yaꞌ. Mîîkîrî wîtîꞌpî José yarakkîrî. Aꞌpusin yarîꞌpîiya 35 quilos kaisarî yaiꞌmei mirra, aloé yarakkîrî.
40 Moropai Jesus esaꞌrîꞌpî wontîꞌpî toꞌya kamisa ke aꞌpusin tekaꞌmai, Judeuyamîꞌ yeseru yawîrî isaꞌmantaꞌpî esaꞌrîꞌpî konekatoꞌ tîuyaꞌnîkon yawîrî.
41 Moropai jardim wanîꞌpî Jesus wîꞌpî toꞌya pata pia aminke pra. Moro wanîꞌpî amenan uuruwai, tîꞌ yawon isaꞌmantaꞌpî ton pînon.
42 Moropai Judeuyamîꞌ festarî weiyu ekonekatoꞌ wanî yeꞌnen mîrîrî uuruwai yaꞌ Jesus esaꞌrîꞌpî yekaꞌmaꞌpî toꞌya aminke pra awanî yeꞌnen.
