Jesus Cristo Yekare João Nîmenukaꞌpî 2:1-25
2 Asakîꞌne wei tîpo, eꞌmarimantoꞌ wanîꞌpî Caná cidaderî po, Galiléia pata yaꞌ. Jesus yan wanîꞌpî moro.
2 Jesus moropai inenupaꞌsan yetaꞌpî toꞌya eꞌmarimantoꞌ pona toꞌ wîtîtoꞌpe.
3 Moropai miarî toꞌ wuku eꞌtîꞌkaꞌpî. Mîrîrî pîꞌ Jesus yanya taꞌpî ipîꞌ: —Toꞌ wuku eꞌtîꞌkan pîꞌ man —taꞌpîiya.
4 Jesusya yuukuꞌpî: —Maamaꞌ, amîrî mîrîrî uurî pepîn. Maasa uweiyu erepansaꞌ pra man —taꞌpîiya.
5 Taꞌpî isanya wîttî esaꞌ poitîrîtonon pîꞌ: —Îꞌ rî taiya ya apîꞌnîkon, mîrîrî kuꞌtî —taꞌpîiya.
6 Awanîꞌpî moro tîꞌ konekasaꞌ kamotikon pe tiwin miaꞌ pona tîîmoꞌtai kaisarî, tuna yenseꞌ pe teserukon yawîrî Judeuyamîꞌ eꞌronatoꞌpe. Awanîꞌpî kureꞌne tuna yapiꞌnenan 80, 100 litros kaisarî yapiꞌnenan.
7 Jesusya taꞌpî wîttî esaꞌ poitîrîtonon pîꞌ: —Tuna ke kamotikon yannîꞌtî —taꞌpîiya. Yannîpîꞌpî toꞌya intapîkîrî.
8 Taꞌpîiya toꞌ pîꞌ: —Tarîpai imoꞌkatî. Yaatî entamoꞌkantoꞌ yepuru pia. Mîrîrî kupîꞌpî toꞌya.
9 Mîrîrî enîrîꞌpî entamoꞌkantoꞌ yepuruya tuna konekasaꞌ uva yekku pe. Mîrîrî pe awanî epuꞌtîiya pra awanîꞌpî, tîîse wîttî esaꞌ poitîrîtononya epuꞌtîꞌpî. Warayoꞌ tîweꞌmarimasen yannoꞌpîiya.
10 Taꞌpîiya ipîꞌ: —Uyonpa, uyeserukon wanî tiaron pe. Entamoꞌkan yai, morî panpîꞌ woꞌ yenpo toꞌya. Moropai tamîꞌnawîronkonya enîrî mararî pra. Mîrîrî tîpo itîrî toꞌya morî maꞌran. Tîîse mîrîrî warantî pra ikupî pîꞌ nai. Eꞌmaiꞌ pe morî maꞌran yenpo pîꞌ nai. Morî panpîꞌ yenpaꞌka pîꞌ nai kînnîꞌpî —taꞌpîiya tîweꞌmarimasen pîꞌ.
11 Mîrîrî anîꞌ nîkupî eserîkan pepîn kupîꞌpî Jesusya eꞌmaiꞌ pe puꞌkuru toꞌ neraꞌma ton pe. Galiléia pata po tîweꞌsen Caná cidaderî po ikupîꞌpîiya. Moropai tîmeruntîri yenpoꞌpîiya. Moropai inenupaꞌsanya ikupîꞌpî innape.
12 Mîrîrî tîpo toꞌ autîꞌpî Caná poi Cafarnaum pona. Toꞌ wanîꞌpî Jesus, isan, itakontonon moropai inenupaꞌsan. Cafarnaum po toꞌ koꞌmamîꞌpî mararî.
Epîremantoꞌ Yewîꞌ Ta Jesus Wîtî
13 Aminke pra Judeuyamîꞌ festarî wanî yai, iteseꞌ páscoa Jesus wîtîꞌpî Jerusalém pona, mîrîrî pîꞌ tîwanîpa kaiꞌma.
14 Moro, epîremantoꞌ yewîꞌ ta pemonkonyamîꞌ eporîꞌpîiya paakayamîꞌ, carneiroyamîꞌ, wakuꞌkaimîyamîꞌ ke, tîweꞌrepasanon moropai tîniru miakanmanenan. Moro teesenyakaꞌmatoꞌkon pîꞌ toꞌ eporîꞌpîiya.
15 Mîrîrî yeꞌnen toꞌ poꞌpîꞌtoꞌ ton konekaꞌpîiya eꞌseusa ke. Mîrîrî ke toꞌ yenpaꞌkaꞌpîiya epîremantoꞌ yewîꞌ tapai tekînkon carneiroyamîꞌ paakayamîꞌ pokonpe. Tîniru miakanmanenan tînirurî sorokaꞌpîiya, moropai toꞌ yaponseꞌkon, toꞌ mesarikon raꞌtîꞌpîiya.
16 Wakuꞌkaimîyamîꞌ ke tîweꞌrepasanon pîꞌ taꞌpîiya: —Ayekînkon yaatî tarîpai. Uyun yewîꞌ kîꞌkuꞌtî aweꞌrepatoꞌkon yewîꞌ pe.
17 Mîrîrî kupîiya pîꞌ inenupaꞌsan esenumenkaꞌpî. Pena aweꞌmenukasaꞌ Paapa maimu pîꞌ toꞌ enpenataꞌpî. Paapa maimuya taa:—Yairî ayewîꞌ koꞌmamî yuꞌse wai kureꞌne. Mîrîrî yuꞌse eꞌtoꞌ enasaꞌ uyesaꞌ pe
—taiya. Mîrîrî pîꞌ Jesus nenupaꞌsan enpenataꞌpî.
18 Mîrîrî kupîiya wenai Judeuyamîꞌya taꞌpî ipîꞌ: —Anîꞌ maimu pe inkamoro yenpaꞌka pîꞌ nan? Yairî nai kupî annaya yuꞌse awanî ya, anna esenumenkatoꞌ ton kuꞌkî, anîꞌya ikupî eserîkan pepîn. Îꞌ konekaya innape akuꞌtoꞌpe annaya? —taꞌpî toꞌya.
19 Jesusya yuukuꞌpî: —Sîrîrî Paapa yewîꞌ, yarankatî moropai seurîwîꞌne wei kaisarî tîîse iꞌmîꞌsaꞌkauya inîꞌrî —taꞌpîiya toꞌ pîꞌ.
20 Judeuyamîꞌya yuukuꞌpî: —46 konoꞌ kaisarî sîrîrî wîttî koneka pîꞌ toꞌ wanîꞌpî. Mîrîrî yeꞌnen seurîwîꞌne wei kaisarî ikonekaya pepîn tiwin kin.
21 Tîîse toꞌ esenkuꞌtîsaꞌ wanîꞌpî, wîttî pîꞌ Jesus eseurîma kaiꞌma, tîîse tîpîꞌ eeseurîma tanne.
22 Moropai aasaꞌmantatoꞌ yapai aweꞌmîꞌsaꞌka tîpo, Jesus nenupaꞌsan enpenataꞌpî mîrîrî taꞌpîiya pîꞌ. Moropai innape Paapa maimu eꞌmenukasaꞌ kupîꞌpî toꞌya moropai Jesus maimu nîrî.
Tamîꞌnawîronkon Pemonkonyamîꞌ Yeseru
Epuꞌtî Jesusya
23 Moro Jerusalém po páscoa pîꞌ Jesus wanî tanne, arinîkonya ikupîꞌpî innape anîꞌya ikupî eserîkan pepîn kupîiya eraꞌma tîuyaꞌnîkon yeꞌnen.
24 Tîîse Jesus eturumaka pra awanîꞌpî toꞌ yenyaꞌ, maasa pra tamîꞌnawîronkon yewan epuꞌtî tîuya yeꞌnen.
25 Anîꞌya pemonkon yeseru pîꞌ teurîma yuꞌse pra awanîꞌpî, pemonkon yewan yaꞌ tîîkoꞌmansen epuꞌtîiya mîîtoꞌpe.
