Jesus Cristo Yekare João Nîmenukaꞌpî 20:1-31
20 Domingo erenmapî yai, ewaron ke tîîse Maria Madalena wîtîꞌpî uuruwai pona. Moropai eraꞌmaꞌpîiya, tîꞌ kureꞌnan wanîꞌpî eraꞌtîsaꞌ innaꞌta poi.
2 Mîrîrî eraꞌma tîuya pe Maria ekatumîꞌpî Simão Pedro pia moropai tiaron inenupaꞌpî Jesus nîsaꞌnamaꞌpî pia. Moropai taꞌpîiya toꞌ pîꞌ: —Uyepotorîkon yarîꞌpî toꞌya man uuruwai yapai moropai oꞌnon pata yaasaꞌ toꞌya epuꞌtî annaya pra man.
3 Mîrîrî yeꞌnen Pedro moropai tiaron inenupaꞌpî wîtîꞌpî uuruwai pona.
4 Saꞌnîrî toꞌ ekatumîꞌpî tîîse tiaron inenupaꞌpî kaꞌneꞌ panpîꞌ eekaꞌtumîꞌpî Pedro ekaꞌtumî yentai. Mîrîrî yeꞌnen eerepamîꞌpî uuruwai pona Pedro rawîrî.
5 Moropai aweꞌmuruikaꞌpî kamisa eraꞌmaꞌpîiya tîîse eewomî pra awanîꞌpî.
6 Iteꞌmaꞌpî pîꞌ Pedro erepamîꞌpî. Tiwinarî Pedro ewomîꞌpî uuruwai yaꞌ, tîꞌ yawon yaꞌ. Moro kamisa eraꞌmaꞌpîiya.
7 Moropai Jesus puꞌpai woinon kamisa eraꞌmaꞌpîiya tiaron kamisa piapai aminke maꞌre. Yanmakoꞌmasaꞌ pe awanîꞌpî.
8 Mîrîrî tîpo tiaron inenupaꞌpî ewomîꞌpî Pedro yeꞌmaꞌpî pîꞌ. Eraꞌmaꞌpîiya, innape Jesus eꞌmîꞌsaꞌkasaꞌ kupîꞌpîiya.
9 (Mîîwîni tîîse Paapa maimu eꞌmenukasaꞌ epuꞌtî toꞌya pra awanîꞌpî, aweꞌmîꞌsaꞌka eꞌpai awanî taatoꞌ.)
10 Mîrîrî tîpo toꞌ emikkuꞌpî.
Jesus Esenpo Maria Pia
11 Maria koꞌmamîꞌpî satippe tîkarawaꞌpî. Tîkarau yeꞌka pe aweꞌmuruikaꞌpî moropai uuruwai yaꞌ eraꞌmaꞌpîiya.
12 Moro inserîyamîꞌ asakîꞌnankon eraꞌmaꞌpîiya, aimutun toꞌ pon. Toꞌ ereutasaꞌ wanîꞌpî Jesus pataꞌpî yaꞌ, tiwin ipuꞌpai pataꞌpî yaꞌ, tiaron iꞌpu pataꞌpî yaꞌ.
13 Moropai taꞌpî toꞌya Maria pîꞌ: —Wîriꞌ, îꞌ pîꞌ akarau mîrîrî? Mariaya yuukuꞌpî: —Inna, uyepotorî yarîꞌpî toꞌya man moropai oꞌnon pata yarîꞌpî toꞌya epuꞌtîuya pra wai.
14 Mîrîrîya eeraꞌtîꞌpî moropai Jesus eraꞌmaꞌpîiya. Tîîse Jesus pe awanî epuꞌtîiya pra awanîꞌpî.
15 Jesusya taꞌpî ipîꞌ: —Wîriꞌ, îꞌ pîꞌ akarau mîrîrî? Anîꞌ yuwaya? —taꞌpîiya. Jardim koꞌmannîꞌnen kaiꞌma Maria esenumenkaꞌpî. Mîrîrî yeꞌnen taꞌpîiya: —Inna, uyonpa, amîrîya kaꞌrî yaasaꞌ nai kaꞌkî upîꞌ oꞌnon pata yarî pîꞌ nan uutîtoꞌpe eraꞌmai? —taꞌpîiya.
16 Jesusya taꞌpî ipîꞌ: —Maria —taꞌpîiya.
Mîrîrî pîꞌ eeraꞌtîꞌpî iponaya moropai taꞌpîiya Judeuyamîꞌ maimu ta: —Rabôni —taꞌpîiya. (Uyenupanen taatoꞌ mîrîrî.)
17 —Uurî kîsapisî —taꞌpî Jesusya ipîꞌ. —Maasa enuku pra wai uyun pia. Tîîse atîkî uyonpayamîꞌ pia. Makai toꞌ pîꞌ ennaꞌpo uyun pia, mîîkîrî wanî toꞌ yun pe nîrî, Paapa unapurîton moropai toꞌ napurîton nîrî pia uutî.
18 Mîrîrî yeꞌnen Maria wîtîꞌpî inenupaꞌsan pia moropai ekaremekîꞌpîiya. —Uyepotorîkon eraꞌma pîꞌ wai, see yeꞌka pe taa pîꞌ man —taꞌpîiya.
Tînenupaꞌsan Pia Jesus Esenpo
19 Pata koꞌmamîꞌpî mîrîrî domingo yai. Mîrîrî yai inenupaꞌsan epereꞌsaꞌ atarakkansaꞌ wanîꞌpî maasa pra Judeuyamîꞌ esanon pîꞌ eranneꞌ pe toꞌ wanîꞌpî. Mîrîrî tanne Jesus iipîꞌpî toꞌ koreꞌta satippe awanîꞌpî. Moropai taꞌpîiya toꞌ pîꞌ: —Tîîwanmîra eꞌtî.
20 Mîrîrî taa tîuya tîpo, tenya prego yettaꞌpî moropai taraꞌta yaino yenpoꞌpîiya. Mîrîrî pîꞌ inenupaꞌsan atausinpaꞌpî tepotorîkon eraꞌma tîuyaꞌnîkon pîꞌ.
21 Inîꞌrî Jesusya taꞌpî toꞌ pîꞌ: —Tîîwanmîra eꞌtî. Sîrîrî non pona uyunya uyarimasaꞌ warantî ayarimauyaꞌnîkon —taꞌpîiya.
22 Mîrîrî tîpo toꞌ pumaꞌpîiya. —Morî Yekaton Wannî yapiꞌtî —taꞌpîiya toꞌ pîꞌ.
23 —Anîꞌ nîkupîꞌpî imakuiꞌpî kupîyaꞌnîkon ya aawanmîraꞌnîkon, Paapaya nîrî ikupî tîîwanmîra. Tîîse anîꞌ nîkupîꞌpî imakuiꞌpî kupîyaꞌnîkon pra awanî ya, aawanmîraꞌnîkon, mîrîrî warantî aakoꞌmamî mîrîrî.
Jesus Esenpo Tomé Pia
24 Moropai Tomé, tiwin inenupaꞌpî tiaronkon inenupaꞌsan yarakkîrî pra awanîꞌpî Jesus iipîꞌpî yai. (Mîîkîrî Tomé wanîꞌpî asakîꞌne iteseꞌ, Tomé moropai monoiꞌ.)
25 Mîrîrî yeꞌnen tiaronkon inenupaꞌsanya ekaremekîꞌpî. —Uyepotorîkon eraꞌma pîꞌ anna man —taꞌpî toꞌya ipîꞌ. Tîîse Toméya taꞌpî toꞌ pîꞌ: —Innape akupîuyaꞌnîkon pepîn. Uyenya eperu ke itenya pokatoꞌ pataꞌpî yaꞌ yapîuya pra tîîse innape ikupîuya pepîn. Yaraꞌta yaꞌsoꞌkasaꞌ yaꞌ uyenya yekaꞌmauya pra tîîse innape ikupîuya pepîn —taꞌpî Toméya toꞌ pîꞌ.
26 Moropai eseurîwîꞌne miaꞌ pona tîîmoꞌtai (8) wei tîpo, inîꞌrî inenupaꞌsan epereꞌsaꞌ wanîꞌpî wîttî ta. Moropai Tomé wanîꞌpî toꞌ pokonpe. Manaꞌtakon atarakkansaꞌ wanîꞌpî. Mîîwîni tîîse Jesus esenpoꞌpî toꞌ koreꞌta, awanîꞌpî satippe. Moropai taꞌpîiya toꞌ pîꞌ: —Tîîwanmîra eꞌtî —taꞌpîiya.
27 Moropai taꞌpîiya Tomé pîꞌ: —Ayenya yekaꞌmakî uyenya yaꞌ, eraꞌmakî. Moropai uyaraꞌta yai ayenya yawonnîꞌkî innape ukupîpa. Innape pra uurî kîꞌkupîi —taꞌpîiya Tomé pîꞌ.
28 Mîrîrîya Toméya yuukuꞌpî: —Uyepotorî, Paapa unapurîton —taꞌpîiya.
29 Jesusya taꞌpî ipîꞌ: —Innape ukupî pîꞌ nan uyeraꞌmaya yeꞌnen? Tîîse tiaronkon uyeraꞌmaꞌtîponkon pepîn inkamoro, tîîse innape ukupî toꞌya. Mîrîrî wenai toꞌ atausinpa.
Îꞌ Ton Pe Sîrîrî Kaareta Menuka Tîuya
Ekaremekî Joãoya
30 Moropai mararî pra anîꞌ nîkupî eserîkan pepîn kupîꞌpî Jesusya tînenupaꞌsanya eraꞌma tanne. Tîîse sîrîrî kaareta pona imenukasauꞌya pra wai.
31 Tîîse unmenukaꞌsan menukaꞌpîuya innape Jesus wanî Cristo, Paapa nîmenkaꞌpî pe kupîkonpa. Innape Paapa munmu pe Jesus wanî kupîkonpa. Moropai innape ikupîyaꞌnîkon yeꞌnen, aakoꞌmamîkon enen ipatîkarî iipia.
