Jesus Cristo Yekare João Nîmenukaꞌpî 21:1-25
21 Mîrîrî tîpo, inîꞌrî Jesus esenpoꞌpî tînenupaꞌsan pia Tiberíades kuꞌpîrî ena po toꞌ tîîse. Sîrîrî warantî awanîꞌpî.
2 Tîmurukun pe toꞌ wanîꞌpî. Simão Pedro, Tomé, manniꞌ iteseꞌ monoiꞌ, Natanael, Galiléia pon Caná poinon, Zebedeu munkîyamîꞌ, moropai tiaronkon asakîꞌnankon Jesus nenupaꞌsan wanîꞌpî.
3 Moropai Simão Pedroya taꞌpî tiaronkon pîꞌ: —Tarrafa pîꞌ uutî sîrîrî —taꞌpîiya. —Inna iyarî, anna wîtî nîrî —taꞌpî toꞌya ipîꞌ. Mîrîrî yeꞌnen toꞌ asaraꞌtîꞌpî kanau yaꞌ. Tiwin ewaron erenmapî pîkîrî anîꞌ yapisî toꞌya pra awanîꞌpî.
4 Wei epaꞌka tanne, Jesus esenpoꞌpî tuna ena pona satippe. Tîîse Jesus pe awanî epuꞌtî inenupaꞌsanya pra awanîꞌpî.
5 Moropai Jesusya taꞌpî toꞌ pîꞌ: —Uyonpayamîꞌ, anîꞌ yapisîyaꞌnîkon pra naatî? —taꞌpîiya. —Inna, anîꞌ ton pra man —taꞌpî toꞌya.
6 Jesusya taꞌpî toꞌ pîꞌ: —Tarrafa yenuntî kanau meruntî winî, moroꞌyamîꞌ yapisîkonpa. Moropai yenumîꞌpî toꞌya moropai inîꞌrî mîrîrî yekuꞌna toꞌya eserîke pra awanîꞌpî maasa pra mararî pra moroꞌyamîꞌ atapiꞌsaꞌ wanîꞌpî.
7 Moropai inenupaꞌpî Jesus nîsaꞌnamaꞌpîya taꞌpî Pedro pîꞌ: —Uyepotorîkon mîîkîrî —taꞌpîiya. Mîrîrî eta tîuya pe Pedroya tîpon yekaꞌmaꞌpî maasa pra tîpon moꞌkasaiꞌya wanîꞌpî. Moropai aarapumîꞌpî tuna kaꞌ.
8 Tiaronkon inenupaꞌsan wîtîꞌpî Pedro pîkîrî tuna ena pona kanau yaꞌ, tarrafa yekuꞌnaꞌpî toꞌya. Maasa pra aminke pra tuna ena pona toꞌ wanîꞌpî. Yai pra 100 metros kaisarî toꞌ wanîꞌpî.
9 Tîwautîkon pe apoꞌ eraꞌmaꞌpî toꞌya, moroꞌyamîꞌ wanîꞌpî ipo moropai pão.
10 Moropai Jesusya taꞌpî toꞌ pîꞌ: —Anapisîꞌpîkon moroꞌyamîꞌ yonpa eneꞌtî —taꞌpîiya toꞌ pîꞌ.
11 Simão Pedro asaraꞌtîꞌpî moropai tarrafa kuꞌnaꞌpîiya. Mararonkon pepîn moroꞌyamîꞌ wanîꞌpî. 153 kaisarî wanîꞌpî. Mîîwîni tîîse tarrafa eꞌkarakasaꞌ pra awanîꞌpî.
12 Moropai Jesusya taꞌpî toꞌ pîꞌ: —Asiꞌtî entamoꞌkai —taꞌpîiya. Moropai “Anîꞌ amîrî?” kaiꞌma taa anîꞌya pra awanî epuꞌtîꞌpî toꞌya.
13 Mîrîrîya Jesus wîtîꞌpî, pão yanumîꞌpîiya, toꞌ pia itîrîꞌpîiya. Mîrîrî warantî moroꞌ yanumîꞌpîiya itîrîꞌpîiya nîrî toꞌ pia.
14 Mîrîrî wanî teeseurînon iteꞌka pe Jesus esenpoꞌpî tînenupaꞌsan pia tîweꞌmîꞌsaꞌka tîpo.
Jesus Eseurîma Pedro Yarakkîrî
15 Tîwentamoꞌkakon tîpo, Jesusya taꞌpî Simão Pedro pîꞌ: —Simão, João munmu amîrî. Uurî saꞌnamaya insananya usaꞌnama yentai?
Yuukuꞌpî Pedroya: —Inna, uyepotorî. Asaꞌnama pîꞌ wai, epuꞌtî pîꞌ nai —taꞌpîiya.
Jesusya taꞌpî: —Upemonkonoyamîꞌ koꞌmannîꞌkî, ayekînnan carneiroyamîꞌ koꞌmannîpîya warantî.
16 Moropai itakon teꞌka pe Jesusya taꞌpî Pedro pîꞌ: —Simão, João munmu amîrî. Innape puꞌkuru usaꞌnama pîꞌ nan? —taꞌpîiya.
—Inna, uyepotorî —taꞌpî Pedroya. —Asaꞌnama pîꞌ wai epuꞌtî pîꞌ nai.
Jesusya taꞌpî: —Moriya upemonkonoyamîꞌ koꞌmannîꞌkî ayekînnan koꞌmannîpîya warantî.
17 Teeseurînon teꞌka pe Jesusya taꞌpî: —Simão, João munmu amîrî. Uurî saꞌnama pîꞌ nan?
Mîrîrî pîꞌ Pedro esewankonoꞌmaꞌpî. Maasa pra Jesusya tekaranmapopîtîꞌpî eseurîwîꞌne iteꞌka kaisarî, —Uurî saꞌnama pîꞌ nan? —taiya yeꞌnen. Mîrîrî yeꞌnen taꞌpîiya ipîꞌ: —Uyepotorî, tamîꞌnawîron epuꞌnen amîrî. Asaꞌnama pîꞌ wai epuꞌnen amîrî nîrî.
Jesusya taꞌpî: —Moriya upemonkonoyamîꞌ koꞌmannîꞌkî ayekînnan koꞌmannîpîya warantî —taꞌpîiya.
18 Ayenkuꞌtîuya pepîn, pena maasa awanî ya apon ton yekaꞌmapîtîꞌpîya moropai ituꞌse aweꞌtoꞌ yaꞌ attîpîtîꞌpî. Tîîse aꞌyekeꞌton pe eena ya, ayenya yekainumîya tiaronya ayewaꞌtîtoꞌpe moropai ayarî toꞌya oꞌnon pata ituꞌse aweꞌtoꞌ pepîn yaꞌ.
19 Mîrîrî taa tîuya pe, Jesus eseurîmaꞌpî îꞌ kaiꞌma Pedro saꞌmantatoꞌ pîꞌ. Moropai aasaꞌmantatoꞌ wenai, tiaronkonya Paapa yapurî. Mîrîrî tîpo Jesusya taꞌpî ipîꞌ: —Upîkîrî aase.
20 Moropai Pedro eraꞌtîꞌpî, tiaron inenupaꞌpî eraꞌmaꞌpîiya, manniꞌ Jesus nîsaꞌnamaꞌpî, Jesus pia awanî manniꞌ entamoꞌkantoꞌ Páscoa iteseꞌ weiyu yai, Jesus pîꞌ ekaranmapotîpon —Uyepotorî, anîꞌya amîrî ekaremekî ayeyatonon pîꞌ? —taiya neꞌtîkini. Mîîkîrî eraꞌmaꞌpî Pedroya.
21 Mîrîrî eraꞌma tîuya yeꞌnen Pedroya taꞌpî Jesus pîꞌ: —Uyepotorî, îꞌ eꞌkupî mîserî yarakkîrî?
22 Jesusya yuukuꞌpî: —Mîîkîrî koꞌmamî yuꞌse wanî ya uuipî pîkîrî, mîîkîrî yarakkîrî îꞌ ton pra nai. Tîîse amîrî, upîkîrî aase —taꞌpîiya.
23 Mîrîrî yeꞌnen tiaronkon itonpayamîꞌya taa koꞌmannîpîꞌpî manniꞌ inenupaꞌpî, aasaꞌmanta pepîn kaiꞌma toꞌ eseurîmapîtîꞌpî. Tîîse mîrîrî yeꞌka pe pra Jesus eseurîmaꞌpî. —Aasaꞌmanta pepîn —taiya pra awanîꞌpî. Tîîse, —Uuipî pîkîrî aakoꞌmamî yuꞌse wanî ya, mîîkîrî yarakkîrî îꞌ ton pra nai —taꞌpîiya.
24 Manniꞌ inenupaꞌpî mîrîrî ekaremeꞌnen mîîkîrî, imenukatîpon nîrî, moropai inekaremekîꞌpî yairî epuꞌtî pîꞌ anna man.
25 Moropai mararon pepîn Jesus nîkupîꞌsan. Mîrîrî eꞌmenukasaꞌ wanî ya, tuꞌke kaareta yannîpîiya eꞌpainon, sîrîrî pata yentai.
